Tok Bilong Jehova i Gat Laip

Sampela Bikpela Tok Bilong Buk Daniel

WANPELA dikseneri (Holman Illustrated Bible Dictionary) i tok: “Buk Daniel em i wanpela buk bilong Baibel i kirapim tru tingting. Em i kamapim ol tok i tru i stret long ol man i stap long kain kain taim.” Stori bilong Buk Daniel i kirap long 618 B.C.E. taim King Nebukatnesar bilong Babilon i kam long Jerusalem na banisim taun na em i “kisim sampela yangpela man namel long ol Juda” na bringim ol i go kalabus long Babilon. (Daniel 1:​1-3) Wanpela bilong ol em yangpela mangi Daniel, ating long dispela taim em i gat 14 o 15 krismas samting. Daniel i stap yet long Babilon taim em i pinisim dispela buk. Long dispela taim Daniel i gat klostu 100 krismas na God i mekim dispela tok promis long em: “Bai yu dai, tasol bihain bai yu kirap bek na long las de bai yu kisim ol samting God i bin makim bilong yu.”​—Daniel 12:13.

Namba wan hap bilong Buk Daniel i stori long wanem samting i bin kamap pastaim na wanem samting i kamap bihain. Long namba tu hap, Daniel i raitim stori bilong ol samting em i lukim. Daniel yet i raitim dispela buk, na dispela buk i gat ol tok profet long ol bikpela gavman bilong graun ol i kamap na bihain ol i pundaun, taim bilong Mesaia bai i kam, na ol samting bai kamap long taim bilong yumi.a Dispela lapun profet i tingim bek ol samting i bin painim em na em i stori long en, em ol dispela samting inap strongim yumi long i stap gut long God. Tok bilong Buk Daniel i gat laip na em i wok strong i stap.​—Hibru 4:12.

SKUL YUMI KISIM LONG NAMBA WAN HAP BILONG BUK DANIEL

(Daniel 1:1–6:28)

Em yia 617 B.C.E. Daniel na 3-pela pren bilong em, em Satrak, Mesak na Abetnego ol i stap long haus bilong king long Babilon. Long 3-pela yia ol i kisim skul, ol dispela yangpela i no lusim ol stretpela lo bilong God. Inap olsem 8-pela yia bihain, King Nebukatnesar i kisim wanpela narakain driman. Daniel i tokaut long dispela driman bilong king na em i kamapim insait bilong en. King i luksave olsem Jehova i “winim olgeta arapela god. Em i Bikpela bilong olgeta king, na em i save kamapim as bilong ol samting i hait.” (Daniel 2:47) Tasol i no longtaim bihain na Nebukatnesar i lusim tingting long dispela samting. Taim 3-pela pren bilong Daniel i no laik lotu long wanpela traipela imis, king i tok na ol i tromoi 3-pela i go long bikpela paia. Trupela God i kisim bek dispela 3-pela yangpela, na Nebukatnesar i luksave olsem “i no gat wanpela god inap long helpim ol manmeri bilong en olsem dispela God.”​—Daniel 3:29.

Nebukatnesar i kisim narapela driman i gat bikpela mining bilong en. Em i lukim wanpela bikpela diwai, em ol i katim na pasim as bilong en na em i no ken kru na kamap gen. Daniel i autim as bilong dispela driman long king. Hap truim bilong dispela tok profet long driman i kamap tru taim Nebukatnesar i kamap longlong na bihain em i kamap orait gen. Planti yia bihain, King Belsasar i mekim wanpela bikpela kaikai na em i singautim ol bikman bilong en i kam long dispela kaikai, na em i mekim pasin hambak na mekim wok long ol kap na plet em ol i bin kisim long haus bilong Jehova. Long dispela nait stret, ol i kilim Belsasar na Darius bilong Midia i kamap king. (Daniel 5:​30, 31) Long taim bilong Darius, taim Daniel i winim 90 krismas, sampela bikman i bel nogut long Daniel na ol i painim rot bilong kilim em i dai. Tasol Jehova i kisim em bek na “ol laion i no bagarapim em.”​—Daniel 6:27.

Bekim Bilong Ol Askim Bilong Baibel:

1:​11-​15​—Dispela 4-pela yangpela Hibru i bin kisim gaden kaikai tasol na ol i no kaikai abus. Yu ting dispela i as na bodi bilong ol i kamap gutpela? Nogat. Tenpela de i sotpela taim tumas long wanpela pasin bilong kaikai i ken kamapim sampela senis long bodi. Dispela senis i kamap long ol dispela yangpela Hibru, long wanem, ol i bilip long Jehova olsem na em i blesim ol.​—Sindaun 10:22.

2:1​—Wanem taim Nebukatnesar i kisim driman long bikpela imis? Buk Daniel i tok “long namba 2 yia bilong Nebukatnesar i stap king” em i kisim dispela driman. Nebukatnesar i kamap king long yia 624 B.C.E. Namba 2 yia bilong em i stap king bai kirap long yia 623 B.C.E.​—sampela yia paslain long em i bagarapim Juda. Long dispela taim, Daniel i no stap yet long Babilon na bai em inap kamapim insait bilong driman. Olsem na bilong save long dispela “namba 2 yia” i kirap long wanem taim, yumi mas kirap kaunim long 607 B.C.E. taim king bilong Babilon i bagarapim Jerusalem na em i kamap bosman bilong graun.

2:​32, 39​—Olsem wanem gavman em silva i makim em i no strong olsem gavman em gol i makim? Olsem wanem gavman em bras i makim em i no gutpela olsem gavman em silva i makim? Gavman em silva i makim, em Midia-Persia, em i no strong olsem gavman em gol i makim, em Babilon, long wanem, Midia-Persia i no bin daunim gavman Juda. Gavman i kamap bihain em bras i makim, em Grik, em i no gat strong olsem Midia-Persia, em silva i makim. Gavman Grik i bosim planti hap bilong graun tasol em bai i no kisim biknem long mekim wanpela gutpela wok olsem larim lain bilong Jehova i lusim kalabus.

4:​8, 9, NW​—Olsem wanem? Daniel i kamap wanpela glasman i save yusim marila posin samting? Nogat. Dispela tok “hetman bilong ol glasman i save yusim marila posin samting” i makim wok Daniel i holim olsem “bos bilong olgeta man i save givim gutpela tingting long king.”​—Daniel 2:48.

4:​10, 11, 20-​22​—Diwai long driman bilong Nebukatnesar i makim wanem samting? Pastaim dispela diwai i makim Nebukatnesar, em het bilong wanpela gavman i bosim graun. Tasol dispela bikpela diwai i makim wok bilong “bosim ol manmeri bilong olgeta hap bilong graun,” olsem na dispela i makim samting i bikpela moa. Daniel 4:17 i helpim yumi long save olsem dispela diwai i stori long wok bilong “God Antap Tru” long bosim ol man. Olsem na dispela diwai i makim tu wok bilong Jehova long bosim olgeta samting, na moa yet wok king em i mekim bilong bosim graun. Dispela driman i gat 2-pela truim bilong en​—em long wok king bilong Nebukatnesar na wok king bilong Jehova.

4:​16, 23, 25, 32, 33​—Dispela “7-pela yia” i longpela olsem wanem? Ol senis i kamap long bodi bilong King Nebukatnesar i kamap insait long “7-pela yia.” Ol dispela wan wan yia i gat 360 de olsem na ol dispela 7-pela yia em 2,560 de. Long bikpela truim bilong en, dispela 7-pela yia em 2,520 yia. (Esekiel 4:​6, 7) Dispela haptaim i kirap long taim Jerusalem i bagarap long yia 607 B.C.E. na i pinis long taim Jisas i kamap King long heven long 1914 C.E.​—Luk 21:24.

6:​6-​10​—Baibel i no tok yumi mas bihainim wanpela kain pasin olsem sanap o sindaun samting taim yumi beten long Jehova. Olsem na yu ting em i savepasin long Daniel i beten long pasin hait inap 30 de? Olgeta man i save long pasin bilong Daniel long beten 3-pela taim long olgeta de. Dispela i as na ol birua bilong em i kamapim dispela lo long pasim ol man long beten long ol arapela god. Sapos Daniel i senisim dispela pasin bilong em long beten, ol man bai ting olsem em i surik na pundaun long bilip na em i no lotuim Jehova wanpela tasol.

Skul Yumi Kisim:

1:​3-8. Pasin bilong Daniel na 3-pela pren bilong em long stap gut long Jehova i kamapim klia olsem papamama bilong ol i bin skulim ol gut. Taim ol papamama i daun long God i putim wok bilong lotu i stap nambawan samting long laip bilong ol na ol i skulim ol pikinini bilong ol long mekim olsem, dispela bai helpim ol pikinini bilong ol long sakim ol traim na hevi inap kamap long skul na long narapela hap.

1:​10-​12. Daniel i kliagut long as na “namba wan ofisa” i pret long king, olsem na Daniel i no askim em moa long ol samting. Tasol bihain Daniel i go toktok wantaim “wasman bilong lukautim ol.” Ating em inap bihainim tingting bilong Daniel liklik, long wanem, em i no inap toktok stret long king. Taim sampela hevi i kamap, yumi tu i mas bihainim savepasin na gutpela tingting.

2:​29, 30. Wankain olsem Daniel i bin mekim, yumi mas litimapim nem bilong Jehova long ol samting yumi kisim, olsem ol gutpela pasin na save bilong mekim sampela kain wok em yumi kisim, long wanem, yumi kisim skul long Baibel.

3:​16-​18. Sapos long pastaim ol dispela tripela Hibru i no bin sakim kaikai i doti long ai bilong Jehova, orait yumi ken ting olsem ol i no inap sanap strong na bekim tok bilong king. Yumi tu i mas wok strong long ‘mekim stret olgeta wok yumi kisim.’​—1 Timoti 3:11.

4:​24-​27. Bilong autim tok bilong Kingdom i gat tokaut long strafe bai painim ol man, yumi mas i gat strongpela bel na bilip wankain olsem bilong Daniel taim em i tokaut long samting bai painim Nebukatnesar na wanem samting king i mas mekim na bai em i ‘ken i stap gut na olgeta samting em i mekim bai kamap gutpela tasol.’

5:​30, 31. Ol tok long “song i gat tok bilas long king bilong Babilon” i kamap tru. (Aisaia 14:​3, 4, 12-​15) Satan i gat wankain pasin antap olsem ol king bilong Babilon, olsem na em tu bai kisim bagarap.​—Daniel 4:30; 5:​2-4, 23.

DRIMAN BILONG DANIEL I SOIM KLIA WANEM SAMTING?

(Daniel 7:1–12:13)

Taim Daniel i kisim namba wan driman long 553 B.C.E., em i winim 70 krismas. Daniel i lukim 4-pela animal em ol i makim ol bikpela gavman bilong graun kirap long taim bilong em i kam inap long taim bilong yumi. Long driman, em i lukim long heven “wanpela man i wankain olsem yumi man bilong graun,” i kisim “strong na biknem . . . na wok king bilong en i no inap pinis.” (Daniel 7:​13, 14) Tupela yia bihain, Daniel i kisim narapela driman long Midia-Persia, Grik, na wanpela gavman bai kamap em i olsem “man nogut tru.”​—Daniel 8:23.

Em yia 539 B.C.E. na Babilon i bagarap pinis, na Darius bilong Midia em i kamap king long kingdom bilong ol Babilon. Daniel i beten long Jehova long ol Juda bai go bek long as ples bilong ol. Taim em i beten i stap, Jehova i salim ensel Gebriel i kam long Daniel bilong ‘kliaim tingting bilong em, na bai em i gat planti gutpela save.’ (Daniel 9:​20-​25) Em yia 536/535 B.C.E. na liklik lain Juda i go bek long Jerusalem. Tasol sampela lain i birua long wok bilong ol Juda long wokim gen tempel. Dispela i mekim na Daniel i wari tru. Em i beten long dispela samting, na Jehova i salim wanpela ensel i gat bikpela namba i kam long em. Dispela ensel i strongim Daniel na bihain em i kamapim tok profet i stori long pait bai i stap namel long king bilong not na king bilong saut. Dispela pait i kirap long taim gavman bilong Bikpela King Aleksander i bruk long 4-pela hap na 4-pela jeneral bilong em i kamap king bilong ol dispela wan wan hap na i go inap long taim Namba Wan Ensel Maikel “bai i kamap.”​—Daniel 12:1.

Bekim Bilong Ol Askim Bilong Baibel:

8:9​—Dispela “gutpela graun” i makim wanem samting? Dispela “gutpela graun” i makim sindaun bilong ol manmeri bilong God long taim bilong Gavman Inglan wantaim Amerika i bosim graun.

8:​25​—Husat dispela “bikpela King i winim olgeta king”? Tok Hibru sar, ol i tanim olsem “king,” insait bilong en i olsem “hetman” o “bikman.” Dispela biknem olsem “King i winim olgeta king” i makim God Jehova wanpela tasol​—em i Nambawan Hetman i winim ol arapela hetman, na “Maikel” tu i wanpela hetman i gat bikpela namba.​—Daniel 10:13.

9:​27​—Wanem kontrak i stap yet inap long pinis bilong 70 wik o 36 C.E.? Jehova i rausim kontrak bilong Lo long 33 C.E. taim Jisas i dai. Tasol em i larim kontrak em i mekim wantaim Abraham i helpim yet lain Israel bilong skin inap long 36 C.E., long dispela rot Jehova i mekim gut long ol Juda, long wanem, ol i tumbuna pikinini bilong Abraham. Kontrak Jehova i mekim wantaim Abraham em i larim i stap yet bilong helpim “lain Israel tru bilong God.”​—Galesia 3:​7-9, 14-​18, 29; 6:16.

Skul Yumi Kisim:

9:​1-​23; 10:11. Daniel i gat pasin daun, em i save stap gut long God, na em i man bilong stadi na beten long olgeta taim, olsem na ‘God i laikim em tumas.’ Ol dispela pasin bilong em i helpim em long i stap gut long God i go inap long taim em i dai. Yumi tu i mas wok strong long bihainim pasin bilong Daniel.

9:​17-​19. I stret yumi beten long nupela taim God bai kamapim, em “stretpela pasin tasol bai i stap long en,” tasol bikpela samting moa em yumi mas beten long nem bilong Jehova i mas i stap holi na kamapim klia olsem em tasol i nambawan bos, na yumi no tingting tasol long ol hevi bilong yumi bai pinis.​—2 Pita 3:13.

10:​9-​11, 18, 19. Bilong bihainim pasin bilong ensel husat i go long Daniel, yumi mas helpim na givim tok bilong mekim gut bel bilong narapela narapela.

12:3. Long taim bilong las de, “ol man i gat gutpela save na tingting,” em ol Kristen God i bin makim ol, ol i stap olsem “lait” na ol i “stiaim planti manmeri long bihainim stretpela pasin,” em ol dispela “planti manmeri” bilong “ol arapela sipsip.” (Filipai 2:15; KTH 7:9; Jon 10:16) Ol Kristen God i bin makim ol, ol bai ‘lait olsem ol sta’ long Taim Bilong Wan Tausen Yia Bilong Krais i Stap King. Long dispela taim Jisas na ol Kristen God i bin makim ol bai mekim wok long ofa bilong Krais bilong helpim ol man i save bihainim tok na bilip long dispela ofa. Lain “arapela sipsip” i mas wok gut wantaim ol Kristen God i bin makim ol na givim bel olgeta long helpim ol.

Jehova i Mekim Gut Long Ol Man i Save Pret Long Em

Buk Daniel i skulim yumi long wanem samting long God yumi lotuim? Tingim ol tok profet i stap insait long en​—em ol tok profet i bin kamap tru pinis na ol tok profet truim bilong en i no kamap yet. Ol dispela tok promis i kamapim klia olsem Jehova em i Man Bilong Truim ol tok bilong em!​—Aisaia 55:11.

Stori bilong Buk Daniel i kamapim klia God bilong yumi i wanem kain man? Dispela 4-pela yangpela Hibru em ol i no laik insait long ol samting bilong Babilon ol i kisim “bikpela save tru long olkain tok i stap long ol buk, na ol i gat gutpela save long planti arapela samting.” (Daniel 1:17) God tru i salim wanpela ensel i go na helpim Satrak, Mesak, na Abetnego na ol i no kisim bagarap long bikpela paia. God i lukautim Daniel na em i no kisim bagarap long hul bilong ol laion. Jehova i save ‘helpim na lukautim ol man i save bilip long em’ na em “i mekim gut long ol manmeri i save pret long em.”​—Song 115:​9, 13.

[Futnot]

[Piksa long pes 18]

Bilong wanem ‘God i laikim tumas’ Daniel?