Grik−Namba Faiv Bikpela Gavman Long Graun

Olsem wanpela lepat i gat 4-pela pul bilong pisin na em i ran spid tru, olsem tasol Aleksanda i lusim hap bilong Grik na em i go daunim olgeta hap bilong Esia Maina (nau yumi kolim Teki), na Palestain, na Isip, na olgeta hap em bikpela gavman bilong Midia na Pesia i bosim, na em i go olgeta inap long boda bilong India. Olsem wanem? Yu laik kisim sampela save moa long dispela man bilong winim pait na long ol tok Baibel i mekim long em?

ALEKSANDA i gat 20 krismas tasol na em i kamap king bilong Masedon. Tupela yia bihain, em i bihainim tingting bilong papa bilong em, Filip, na em i go bekim pait long strongpela lain Pesia long hap bilong sankamap. Aleksanda i wok long winim pait i go i go na em i daunim olgeta lain i stap long taim bilong em.

Dispela yangpela man bilong ami em i gat save long pait, em i daunim ol lain long Esia Maina, na Siria, na Palestain, na Isip, na Babilonia, na em i daunim olgeta lain em bikpela gavman bilong Midia na Pesia i bosim i go inap long boda bilong kantri India long bipo! Sampela man i tok, em i nambawan bikpela jenaral bilong ami long bipo, na nau ol man i save kolim em Bikpela Man Aleksanda.

Kwiktaim tru Grik i kamap namba faiv bikpela gavman long graun em Baibel i stori long en. Na dispela gavman i kamap bikpela gavman tru, winim ol narapela bikpela gavman i bin kamap paslain long en. Dispela samting i bin kamap olsem wanem? Baibel i stori olsem wanem long dispela gavman? Bilong wanem yu mas save long dispela gavman?

Baibel i Tok Profet long En

Inap olsem 200 yia paslain long taim bilong Aleksanda, Babilon i stap nambawan bikpela gavman na ol Midia na Pesia i no kamap bikpela gavman yet. Long dispela taim Jehova i bin soim tupela piksa long profet bilong em Danyel, na Danyel i lukim ol samting i mas kamap long graun long bihain. Bihain bikpela gavman Babilon i pinis na Danyel i lukim namba 3 piksa i makim sampela samting i mas kamap bihain tru long taim bilong em. Danyel i raitim ol samting em i bin lukim. Ol dispela tok profet i wok long kamap tru 200 yia bihain long taim Danyel i raitim na i kolim stret ol samting i mas painim Aleksanda na bikpela gavman bilong em.

Danyel i lukim wanem samting? Ol dispela tok profet i stap long Baibel long hap bilong Danyel. Danyel i bin raitim long yia 536 Samting paslain long Krais. Em hia liklik stori bilong ol samting Danyel i bin lukim na i mas painim namba faiv bikpela gavman long graun, em gavman bilong Grik:

Long namba wan piksa, Danyel i lukim dispela gavman bilong Grik i olsem wanpela lepat em inap spid tru. “Em i gat 4-pela pul bilong pisin long baksait bilong en. . . . na em i kisim wok bilong bosim ol man.”−Danyel 7:​6, NW.

Long namba tu piksa, Danyel i lukim wanpela meme man i “lusim hap bilong san i go daun na em i kam.” Em i ran i kam spid tru na i olsem “lek bilong en i no holim graun.” Em i ran i kam long sipsip man i gat tupela kom, em ensel i tok dispela sipsip man i makim “king bilong Midia na Pesia.” Nau dispela meme man i “paitim dispela sipsip man na em i brukim tupela kom bilong en.” Ensel i tokim Danyel, “dispela meme man i gat planti gras em i makim king bilong Grik.”−Danyel 8:​5-8, 20, 21, NW.

Long namba tri piksa, ensel i tokim Danyel, wanpela king bilong “Pesia . . . bai em i kirap na birua tru long gavman bilong Grik. Na wanpela bikpela king bai kamap, na em bai bosim planti hap, na em bai mekim laik bilong em yet.”−Danyel 11:​2, 3, NW.

Ol dispela tok piksa i makim wanem samting i mas kamap? Olsem wanem? Olgeta samting i bin kamap tru olsem ensel i tokim Danyel long en? Orait, nau yumi ken stori.

Ol Dispela Tok Profet i Kamap Tru

Long kirap bilong yia 334 paslain long Krais, Aleksanda i brukim liklik pasis ol i kolim Dadanels na em i go insait long hap bilong Esia. Em i gat bikpela ami, inap olsem 30,000 soldia ol i wokabaut long lek na 5,000 ol i sindaun long hos. Aleksanda i ran i go spid tru, olsem lepat i gat 4-pela pul bilong pisin o meme man i ran spid tru na i olsem lek bilong en i no holim graun. Kwiktaim tru em i daunim olgeta hap em Pesia i bosim. Em bikpela hap, winim tru ol hap Aleksanda yet i bosim. Tasol olsem wanem? “Em bai bosim planti hap, na em bai mekim laik bilong em yet,” olsem Baibel i tok profet long em? Ol samting i bin kamap i soim yumi, tru tumas em i bin mekim olsem.

Long Wara Granikas, long hap bilong not-wes long Esia Maina (nau yumi kolim Teki), Aleksanda i winim pait na daunim ol Pesia long namba wan taim. Long taim bilong kol em i daunim olgeta hap bilong wes long Esia Maina. Na long mun Oktoba samting long yia bihain, long Isas long hap bilong saut-is long Esia Maina, em i daunim olgeta wanpela bikpela ami bilong ol Pesia, em inap olsem 500,000 soldia, na bikpela king Darias Namba 3 bilong Pesia em i ranawe i go. Em i lusim meri pikinini bilong em i stap na Aleksanda i holim ol.

Aleksanda i no bihainim ol dispela Pesia i ranawe i go. Em i kisim ami bilong em i go long hap bilong saut long nambis bilong Solwara Mediterenian, na em i daunim ol as ples bilong bikpela lain sip bilong ol Pesia. Em i kirapim pait long taun Taia long ailan, tasol inap 7-pela mun Taia i stap strong. Bihain Aleksanda i kisim ol bruk bruk ston na pipia bilong olpela taun Taia long bikples, em Nebukatnesa i bin bagarapim, na em i tromoi long solwara na wokim olsem rot i go long dispela taun long ailan na em i bagarapim dispela taun. Sampela hap hap ston samting bilong dispela rot i stap yet na sapos yu go long dispela hap yu inap lukim. Dispela samting i truim wanpela tok profet bilong Esikiel, em i bin tok ol bai tromoi das bilong Taia i go insait long solwara.−Esikiel 26:​4, 12.

Aleksanda i laik kirapim pait long Jerusalem, tasol ol i no laik pait na ol i givim dispela taun long em, olsem na em i no bagarapim. Na bihain em i go long hap bilong saut na daunim Gasa. Em i wok long “bosim planti hap” moa na em i “mekim laik bilong em yet” i go inap long Isip. Ol Isip i amamas long em na ol i tok, em i man bilong kisim bek ol long han bilong ol birua. Long Memfis em i mekim ofa long wanpela god bilong ol Isip, em bulmakau Apis, na ol pris bilong ol Isip i amamas. Na em i kamapim taun Aleksandria. Bihain i gat planti skul na ol saveman i pulap long dispela taun na taun i kamap olsem as ples bilong kisim save na i laik winim taun Atens long dispela samting. Dispela taun i holim yet nem bilong em.

Olgeta samting Filip, em papa bilong Aleksanda, i bin tingting long mekim, em Aleksanda i mekim pinis na em i winim i go moa, na i gat sampela wok moa em i laik mekim. Kwiktaim tru, olsem wanpela meme man i ran spid tru, em tanim i go long hap bilong not-is. Em i brukim hap bilong Palestain i go long Wara Taigris. Na long yia 331 paslain long Krais em i pait wantaim ol Pesia long Gaugamela, klostu long olpela taun Niniva, em biktaun bilong Asiria long bipo na i bagarap pinis. Ol Pesia i bin strongim gen ami bilong ol na ol i gat 1 milion samting soldia, tasol liklik lain ami bilong Aleksanda, ol inap olsem 47,000, ol i daunim dispela draipela ami na Darias Namba 3 i ranawe i go. Bihain lain bilong em yet i kilim em i dai.

Aleksanda i amamas tru long em i winim ol pait na nau em i kisim ami bilong em i go long hap bilong saut na em i daunim biktaun bilong ol Pesia bilong taim bilong kol, em Babilon. Em i kisim tu ol narapela biktaun bilong ol, em Susa na Pesepolis, na em i kisim olgeta gol na silva samting bilong ol Pesia na kukim bikpela haus king bilong Seksis. Bihain em i daunim biktaun Ekbatana. Nau dispela man bilong winim kwik ol pait em i daunim ol narapela hap em Pesia i bosim i go inap long Wara Indas long hap nau yumi kolim Pakistan. Ol Grik i kamap namba faiv bikpela gavman long graun em Baibel i stori long en.

Aleksanda i daunim ol dispela hap, olsem na tok ples Grik na pasin bilong ol Grik i go kamap long olgeta dispela hap. Sampela Grik i go sindaun long ol dispela hap na tok ples Grik bilong ol (Koine Greek) i kamap olsem tok ples bilong olgeta man long dispela taim bipo. Na bihain ol i raitim ol tok bilong Nupela Testamen long dispela tok ples.

Wok Gavman Bilong Aleksanda i Bruk

Aleksanda i laik wokim gen Babilon bai i kamap nambawan biktaun long ol hap em i bosim. Tasol dispela samting i no kamap. Baibel i stori long dispela meme man na i tok, em i gat wanpela bikpela kom, na ensel i tokim Danyel:

“Na dispela meme man i hambak long strong bilong en; tasol taim em i kamap strong, nau bikpela kom bilong en i bruk na fopela i kamap olsem senis bilong en, long 4-pela win bilong heven. . . . Na dispela meme man i gat planti gras em i makim king bilong Grik; na bikpela kom i kamap namel long tupela ai bilong en i makim namba wan king. Na dispela kom bai bruk na bai 4-pela i kamap, olsem na bai 4-pela king i kamap long lain bilong em, tasol bai ol i no gat strong olsem bilong em.”−Danyel 8:​8, 21, 22, NW.

“Na taim em i sanap pinis, bai wok gavman bilong em i bruk long 4-pela win bilong heven, tasol i no bilong ol pikinini bilong em na ol i no ken bosim planti hap olsem em i bin mekim; long wanem ol bai kamautim gavman bilong em, na em bilong ol narapela man.”−Danyel 11:​4, NW.

Olsem Baibel i tok pinis, Aleksanda i no i stap bikpela bos bilong graun inap longtaim. Em i winim ol pait i go na taim em i gat 32 krismas tasol em i dai pinis. Sik malaria i kisim em, tasol em i save pati na dring planti na spak, na long yia 323 paslain long Krais, taim em i stap long Babilon, wantu em i dai pinis. Ol i kisim skin bilong em i go long Isip na planim long Aleksandria. Dispela “bikpela kom” i makim “namba wan king” em i bruk pinis. Wanem samting i kamap long wok gavman bilong em bihain long dispela?

Tok profet bilong Baibel i tok, wok gavman bilong em bai bruk, tasol ol i no ken givim long lain bilong em, “i no bilong ol pikinini bilong em.” Brata bilong Aleksanda, em Filip Arideas, em i kisim wok king inap liklik taim, tasol em i no inap mekim, na ol man i kilim em i dai. Ol i kilim i dai tupela pikinini man bilong Aleksanda tu, em Alou, em pikinini tru bilong Aleksanda, na Hekulis, em pikinini bastet. Olsem na lain bilong Aleksanda i pinis, em man bilong kapsaitim blut bilong planti man.

Olsem Baibel i tok, i gat “4-pela king i kamap long lain bilong em, tasol bai ol i no gat strong olsem bilong em.” Wok gavman bilong em i “bruk long 4-pela win bilong heven, tasol . . . ol i no ken bosim planti hap olsem em i bin mekim.” Dispela samting i bin kamap o nogat?

Bihain ol i brukim ol hap Aleksanda i bin bosim na ol i givim long 4-pela jenaral bilong ami bilong em: (1) Jenaral Kasanda i kisim Masedonia na ples Grik. (2) Jenaral Laisimakas i kisim Esia Maina na Tres long hap bilong Yurop. (3) Jenaral Selusas Nikator i kisim Babilonia na Midia na Siria na Pesia na ol provins long hap bilong san i kamap i go inap long Wara Indas. (4) Jenaral Tolemi Lagus i kisim Isip na Libia na Palestain. Olsem Baibel i tok pinis, long dispela wanpela bikpela gavman bilong Aleksanda i gat 4-pela gavman Grik i bin kamap.a

Gavman bilong Tolemi long Isip i stap longtaim liklik, winim narapela 3-pela gavman. Ol Rom i daunim dispela gavman long yia 30 paslain long Krais, na long dispela taim Rom i senisim Grik na i kamap nambawan bikpela gavman long graun, em namba 6 bikpela gavman.

Ol Man i Ken Wetim Gutpela Samting i Kamap

Olsem wanem? Inap long taim bihain bihain bai i gat narapela narapela bikpela gavman i kamap long graun na mekim nogut long ol man? Nogat. Baibel i tok yumi stap long taim bilong pinis bilong laspela bikpela gavman olsem.−Revelesen 17:⁠10.

Danyel i lukim ol dispela gavman bilong graun ol i kain olsem ol wel abus. Em i lukim pinis dispela samting nogut na bihain em i lukim gutpela samting. Em i lukim piksa bilong heven yet na em i lukim God, em “Bikpela Man Bilong Bipo,” em i givim wok king long “wanpela man kain olsem wanpela pikinini bilong man.” God i no ken givim dispela wok king long wanpela hetman bilong graun bihain bai em i kamap na em i laik tumas long kisim bikpela namba olsem. Nogat. Em i givim dispela wok long Krais Jisas, em i kirap bek pinis na i stap long heven!−Danyel 7:​9, 10, 13, NW.

Em gutpela samting tru! Dispela Kingdom bilong heven na wok king bilong en i narapela kain tru long wok king bilong ol dispela king bilong bipo, em ol i save pait pait. Danyel i stori long dispela “pikinini bilong man” em i stap long heven na em i gat biknem tru na Danyel i tok: “[Bikpela Man Bilong Bipo] i givim wok king na biknem na kingdom long em, na ol man bilong olgeta hap graun, na olgeta lain man, na ol man i gat kain kain tok ples bai ol i mekim wok bilong em. Em bai i stap king inap long taim bihain bihain; wok king bilong em i no ken pinis. Na kingdom bilong em i no ken bagarap.” (Danyel 7:​14, NW ) Dispela Kingdom bai kamapim bel isi na stretpela pasin long graun.−Aisaia 9:​6, 7.

Ol dispela king bilong graun i bin mangalim planti samting na bagarapim planti man, tasol yumi ken amamas, long wanem yumi save, dispela Kingdom bilong heven i kamap pinis na klostu nau bai em i bosim olgeta hap bilong graun long stretpela pasin!−Revelesen 12:​10, 12.

“Ol samting yu bin lukim olsem piksa em bai kamap bihain; em bai kamap long taim ol i makim; em i ran strong i go inap long taim bilong pinis, na em bai no ken giaman. Sapos em i no kamap kwik, yu mas tingim na wetim i stap; long wanem, em bai kamap tru. Em i no ken i kam bihaintaim.”−Habakak 2:​3, NW.

[Futnot]

[Mep long pes 26]

(Bilong save ol dispela rait i stap we long pes, lukim buk o magasin)

Ol Hap Alexsanda i Bosim

Pela

Sadis

Isas

Damaskas

Taia

Jerusalem

Alexandria

Memfis

Tibs

Wara Yufretis

Wara Tigris

Gaugamela

Babilon

Ekbatana

Susa

Pesepolis

Aleksandria Esate

Taksila

Wara Indas

[Mep long pes 28]

(Bilong save ol dispela rait i stap we long pes, lukim buk o magasin)

Gavman Bilong Alexsanda i Bruk 4-pela Hap

Bikpela Solwara

KASANDA

Pela

LAISIMAKAS

Laisimakia

TOLEMI LAGUS

Aleksandria

SELUSAS NIKATOR

Antiok

Selusia

[Piksa long pes 27]

Nambis klostu long biktaun Aleksandria long nau

[Kredit Lain]

Pictorial Archive (Near Eastern History) Est.