Yu Wok Long Bihainim Gutpela Pasin Tru?
“Oltaim yupela i mas tingting tasol long . . . olgeta pasin i nambawan tru na olgeta pasin yumi save amamas tru long lukim ol man i mekim.”—FILIPAI 4:8.
1. Wanem kain pasin i stap long nau? Olsem wanem na ol dispela pasin i no bagarapim lotu bilong Jehova?
OL KAIN KAIN pasin nogut olsem pasin pamuk na olkain pasin sem nogut tru na ol narapela kain pasin nogut i wok long go insait long olgeta samting bilong dispela graun yumi stap long en. (Efesus 2:1-3) Tasol God Jehova i no inap larim ol man i bagarapim klinpela lotu bilong em. Ol buk na nius Kristen, ol miting, ol kibung, ol i save givim ol tok lukaut long yumi olsem yumi no ken mekim ol pasin i no stret. Yumi save kisim ol gutpela tok long Baibel bilong helpim yumi long “pas tru long gutpela pasin.” (Rom 12:9) Olsem na lain Witnes Bilong Jehova i wok strong long i stap klin na bihainim gutpela pasin tru. Tasol olsem wanem long yumi olgeta wan wan? Yes, olsem wanem long yu? Yu wok long bihainim gutpela pasin?
2. Stori long gutpela pasin. Bilong wanem i hatwok long bihainim gutpela pasin?
2 Gutpela pasin i olsem pasin i nambawan olgeta, pasin i gutpela, pasin na tingting i stret. Gutpela pasin i no wanpela pasin i stap nating long yumi—em i save mekim wok. Tru, gutpela pasin i save kirapim yumi long abrusim rong, tasol em i mekim narapela wok tu. Em i save kirapim yumi long bihainim ol pasin i gutpela. (1 Timoti 6:11) Aposel Pita i tokim ol wanlain Kristen olsem: “Mekim [gutpela pasin] i stap strong olsem bilip bilong yupela.” Bai ol i mekim olsem wanem? Ol i mas “wok strong tru” long mekim. (2 Pita 1:5) Yumi gat sin, olsem na yumi mas wok strong tru bambai yumi ken bihainim gutpela pasin. Tasol ol manmeri bilong bipo i save pret long God, ol i bin bihainim gutpela pasin, maski ol bikpela hevi tru i painim ol na i laik pasim rot bilong ol long mekim olsem.
Em i Bihainim Gutpela Pasin
3. King Ahas i bin mekim wanem ol pasin nogut tru?
3 Baibel i stori long planti manmeri ol i bin bihainim gutpela pasin. Yumi ken tingim gutpela man Hesekia. Papa bilong em, King Ahas bilong Juda, ating em i bin lotuim god Molek. “Em i gat 20 krismas long taim em i kamap king na em i stap king long Jerusalem inap 16 yia. Tasol em i no mekim stretpela pasin long ai bilong God, Bikpela bilong en, olsem tumbuna bilong en Devit i bin mekim. Nogat. Em i mekim pasin nogut tasol, olsem ol king bilong Israel i bin mekim. Na tu em i mekim kranki pasin olgeta. Em i kilim pikinini man bilong en na i kukim em olsem ofa bilong paia i kukim olgeta. Em i bihainim dispela rabis pasin tru bilong ol lain manmeri i bin i stap long dispela graun bipo. Tasol Bikpela i bin rausim ol na givim dispela graun long ol Israel. Na Ahas i save go long ol ples bilong lotu long ol giaman god. . . . Na em i mekim ol ofa na kukim paura bilong kamapim smok i gat gutpela smel.” (2 King 16:2-4) Sampela i tok, dispela tok olsem “kukim em olsem ofa bilong paia i kukim olgeta,” em i makim wanpela kain pasin bilong kamap klin long ol samting bilong lotu, na i no makim olsem ol i kukim tru ol pikinini long paia olsem ofa. Tasol wanpela buk bilong John Day (Molech—A God of Human Sacrifice in the Old Testament) i tok: ‘Ol rait samting bilong bipo na sampela samting bilong ol lain Kates, na ol samting ol i bin painim taim ol i digim graun bilong painim ol samting bilong bipo, ol i makim olsem bipo ol i bin kilim ol pikinini olsem ofa . . . long hap bilong Kenan, olsem na yumi no ken ting ol stori bilong Olpela Testamen long [ol i bin kilim ol pikinini olsem ofa] i no gat as bilong en.’ Na 2 Stori 28:3 i tok klia olsem Ahas “i kilim ol pikinini man bilong en na i kukim olsem ofa bilong paia i kukim olgeta.” (Skelim wantaim Lo 12:31; Song 106:37, 38.) Em pasin nogut tru!
4. Hesekia i bin stap namel long ol man i mekim pasin nogut, tasol em i bihainim wanem kain pasin?
4 Orait, olsem wanem long Hesekia, em i bin i stap namel long ol man i mekim ol pasin nogut tru olsem? Song 119 inap givim sampela tingting long yumi, long wanem, sampela i ting Hesekia i bin raitim, na em i mekim long taim em i stap yet olsem pikinini bilong king. (Song 119:46, 99, 100) Olsem na ating wanpela tok bilong dispela Song i makim ol hevi i bin painim Hesekia, olsem: “Ol hetman i kibung na painim rot bilong kilim mi i dai. Tasol maski, mi wokman bilong yu, bai mi tingting oltaim long stretpela lo bilong yu. Bel bilong mi em i hevi tru. Yu strongim mi olsem yu bin promis.” (Song 119:23, 28) Hesekia i stap namel long ol man i mekim lotu giaman, olsem na ating ol lain i sindaun long haus king ol i bin mekim planti tok bilas long em, na dispela i mekim na em i no inap slip gut. Tasol em i bihainim gutpela pasin, na bihain em i kamap king na em i wok yet long “mekim gutpela pasin long ai bilong Bikpela . . . Hesekia i bilip strong long God, Bikpela bilong ol Israel.”—2 King 18:1-5.
Ol i Bihainim Gutpela Pasin
5. Wanem ol hevi i bin painim Daniel wantaim 3-pela poroman bilong em?
5 Na i gat sampela moa i bihainim gutpela pasin tru, olsem Daniel na 3-pela poroman bilong em, Hanania na Misael na Asaria. Ol Babilon i bin kisim ol long kantri bilong ol na ol i go kalabus long Babilon. Ol i givim nem bilong ol Babilon long dispela 4-pela yangpela, olsem Beltesasar, Satrak, Mesak, Abetnego. King i tok “ol i mas kisim wankain kaikai na dring olsem ol lain man long haus bilong king i save kisim,” na sampela bilong ol dispela kaikai em Lo bilong God i tambuim. Na tu, ol dispela yangpela i mas skul inap 3-pela yia long “rit na rait long tok ples bilong ol Babilon [“Kaldia,” NW].” Tasol i no olsem ol i mas lain long wanpela tok ples tasol, nogat; long wanem, ating dispela tok “ol Kaldia” long dispela ves i makim ol lain i bin skul gut na ol i gat bikpela save. Olsem na ol dispela yangpela Hibru i mas lain long ol bilip kranki bilong ol Babilon.—Daniel 1:1-7.
6. Olsem wanem yumi ken tok, Daniel i bihainim gutpela pasin?
6 Maski ol man i strong tru long subim Daniel wantaim 3-pela poroman bilong em long bihainim pasin bilong ol Babilon, ol i laik bihainim gutpela pasin na ol i no laik bihainim ol pasin nogut. Daniel 1:21 i tok: “Daniel i holim dispela wok bilong king longpela taim. Em i wok i stap yet long taim Sairus i kamap king bilong Babilon.” Em nau, Daniel “i wok i stap yet” olsem gutpela wokboi bilong Jehova inap 80 krismas samting—insait long dispela taim i gat sampela strongpela king i kamap na i pundaun pinis. Em i stap gut long God, maski sampela bikman nogut bilong gavman i mekim ol pasin bilong trik na painim rot bilong bagarapim em, na maski ol pasin nogut bilong pamuk samting i pulap insait long lotu bilong Babilon. Daniel i wok long bihainim gutpela pasin na em i no lusim.
7. Dispela pasin em Daniel wantaim 3-pela poroman bilong em i bihainim, em inap lainim yumi long wanem samting?
7 Yumi inap lainim planti samting long stori bilong Daniel wantaim ol poroman bilong em. Ol i wok long bihainim gutpela pasin na ol i no laik bihainim ol pasin na tingting bilong ol Babilon. Tru, ol i bin kisim ol nem bilong Babilon, tasol long olgeta taim ol man inap luksave olsem ol i wokboi bilong Jehova. Olsem na inap 70 yia samting bihain, taim king bilong Babilon i toktok wantaim Daniel, king i kolim nem Hibru bilong em! (Daniel 5:13) Inap long taim em i dai, long olgeta taim Daniel i nolaik tru long lusim lo bilong God liklik, na em i mekim olsem long ol liklik samting tu. Taim em i yangpela, em “i no laik kaikai na dring ol samting ol i givim em long haus bilong king. Daniel i ting, nogut em i kaikai na dring na em i kamap doti long ai bilong God.” (Daniel 1:8) Yumi save, dispela pasin bilong Daniel wantaim 3-pela poroman bilong em long sanap strong na i no surik liklik, dispela i bin strongim ol long winim ol bikpela hevi tru i painim ol bihain na ol i no bagarap.—Daniel, sapta 3 na 6.
Bihainim Gutpela Pasin Long Nau
8. Olsem wanem ol yangpela Kristen inap sakim pasin bilong dispela graun bilong Satan na ol i no ken go insait long en?
8 Lain bilong God long nau ol i mekim wankain pasin olsem Daniel na 3-pela poroman bilong em i bin mekim—ol i no laik bihainim ol pasin nogut bilong dispela graun em Satan i bosim. (1 Jon 5:19) Sapos yu wanpela yangpela Kristen, ating ol narapela yangpela i strong tru long subim yu long bihainim pasin bilong ol long bilas, na wokim gras, na laikim ol kain musik ol i save laikim. Tasol yu no ken bihainim olgeta nupela kain stail bilong klos samting ol i save kamapim. Yu mas sanap strong na no ken “wokabaut wankain olsem ol man bilong dispela graun.” (Rom 12:2) “Lusim pasin bilong givim baksait long God na . . . olgeta laik nogut bilong dispela graun, na . . . tingting gut na wokabaut stret.” (Taitus 2:11, 12) Yu no ken tingting long ol narapela yangpela i mas orait long yu—bikpela samting tru, em yu mas mekim ol samting na bai Jehova i ken orait long yu.—Sindaun 12:2.
9. Wanem sampela traim inap painim ol Kristen i mekim wok bisnis? Ol i mas bihainim wanem kain pasin?
9 Ol Kristen i bikpela pinis, ol traim i save painim ol tu na ol i mas bihainim gutpela pasin. Sampela traim inap painim ol bisnisman Kristen, olsem mekim sampela pasin i no stret tumas, o sakim sampela lo bilong gavman na ol lo bilong tromoi takis. Tasol maski ol narapela bisnisman o wanwok i mekim wanem kain pasin, ‘yumi laik wokabaut stret long olgeta taim.’ (Hibru 13:18) Baibel i tok yumi mas mekim stretpela pasin long ol bos, na ol wokman bilong yumi, na ol man i baim ol samting bilong yumi, na ol gavman bilong graun. (Lo 25:13-16; Matyu 5:37; Rom 13:1; 1 Timoti 5:18; Taitus 2:9, 10) Na yumi mas wok strong long mekim stret ol samting long wok bisnis bilong yumi. Yumi mas raitim stret ol samting long pepa na putim gut, na sapos yumi wokim kontrak wantaim narapela, orait yumi mas raitim ol tok bilong dispela kontrak long pepa. Sapos yumi mekim olsem, ating bai i no gat planti kros na hevi i kamap.
Was Gut!
10. Taim yumi makim ol musik yumi laik harim, bilong wanem yumi mas “was gut”?
10 Song 119:9 i kolim narapela samting bilong helpim yumi long bihainim gutpela pasin long ai bilong God. Man bilong raitim dispela Song i tok: “Olsem wanem na yangpela man i ken wokabaut long klinpela pasin? Em i mas [“was gut na,” NW] bihainim tok bilong yu na bai em i stap klin.” Wanpela strongpela samting bilong Satan long pulim ol man, em musik, long wanem, musik i gat strong long kirapim bel bilong yumi. Sori tru, sampela Kristen i no bin ‘was gut’ long ol musik, na isi isi ol i kirap laikim ol musik nogut, olsem musik rap na hevi-metal. Ating sampela bai tok, ol dispela kain musik i no save nogutim ol, o ol i no save putim yau long tok bilong ol dispela singsing. Na sampela i tok, ol i save laikim kain pairap bilong dispela musik, o ol i laikim strongpela krai bilong gita. Tasol taim ol Kristen i skelim musik, ol i no save tingim wanem kain musik ol i save amamas long harim, nogat. Bikpela tingting bilong ol, em “Bikpela i save laikim” o nogat. (Efesus 5:10) Planti musik hevi-metal na musik rap i save helpim ol pasin nogut olsem tok nogut, na pamuk, na ol pasin bilong Satan tua—em ol pasin i no ken i stap insait long lain bilong God. (Efesus 5:3) Maski yumi yangpela o yumi lapun, yumi olgeta wan wan i mas tingim dispela askim: Kain musik mi save laikim, em i makim olsem mi wok long bihainim gutpela pasin o pasin nogut?
11. Olsem wanem Kristen i ken was gut taim em i lukim televisen na ol video na piksa wokabaut?
11 Planti samting i save kamap long televisen, na video, na ol piksa wokabaut i save kamapim ol pasin nogut. Wanpela saveman olsem dokta bilong stretim sik bilong tingting em i tok, ‘dispela bilip olsem ol amamas i nambawan samting long i stap bilong man, na ol samting bilong maritpasin, na pait na bagarapim man, na mangal, na pasin bilong tingim yumi yet tasol,’ ol dispela samting i save kamap planti taim long planti piksa ol i save wokim long nau. Olsem na bilong was gut oltaim, yumi mas skelim gut ol piksa samting yumi laik lukim. Man bilong raitim Song i beten olsem: “Helpim mi long givim baksait long ol samting i no gutpela.” (Song 119:37) Wanpela yangpela Kristen nem bilong em Joseph, em i bihainim dispela lo. Em i go lukim wanpela piksa wokabaut, tasol taim i gat pasin pamuk na pait i kamap long dispela piksa, em i kirap na lusim haus piksa. Yu ting em i sem long mekim olsem? Em i tok, “Nogat. Mi tingim Jehova pastaim na mi laik mekim ol samting em i laikim.”
Stadi na Tingim Tingim Long Bel
12. Bilong bihainim gutpela pasin, bilong wanem yumi mas stadi na tingim tingim long bel ol dispela tok yumi lainim?
12 Tru, yumi mas abrusim ol samting nogut, tasol yumi mas mekim sampela samting moa. Bilong bihainim gutpela pasin, yumi mas stadi long ol gutpela samting i stap long Baibel na tingim tingim long bel bambai yumi ken bihainim ol lo bilong en long sindaun bilong yumi. Man bilong raitim Song i tok: “Mi laikim tru lo bilong yu. Mi save tingting long en long san na long nait.” (Song 119:97) Olsem wanem long yu? Yu save makim taim long olgeta wik bilong stadi long Baibel na ol buk Kristen? Tru, i hatwok long painim taim bilong stadi gut long Baibel na tingim tingim long bel. Tasol ating yu inap lusim sampela samting yu save mekim na yu ken makim dispela hap taim bilong mekim stadi bilong yu. (Efesus 5:15, 16) Sapos yu kirap long moningtaim tru, ating dispela bai i gutpela taim bilong beten na stadi na tingim tingim long bel.—Skelim wantaim Song 119:147.
13, 14. (a) Bilong wanem pasin bilong tingim tingim ol tok long bel em i bikpela samting tru bilong helpim yumi? (b) Bilong helpim yumi long nolaik tru long pasin pamuk, yumi ken tingim tingim long bel wanem ol skripsa?
13 Pasin bilong tingim tingim long bel ol tok bilong stadi, dispela em i bikpela samting tru, long wanem, em i save helpim yumi long holimpas long tingting ol samting yumi save lainim. Na bikpela samting moa, em inap helpim yumi long kisim tingting olsem bilong God. Olsem: Yumi kisim save olsem God i tambuim pasin pamuk, tasol yumi mas mekim sampela samting moa—yumi mas ‘givim baksait tru long pasin nogut, na yumi mas pas tru long gutpela pasin.’ (Rom 12:9) Yumi inap pilim tru tingting bilong Jehova long pasin pamuk taim yumi tingim tingim long bel ol bikpela tok bilong Baibel, olsem Kolosi 3:5 i tok: “Yupela i mas kilim i dai olgeta pasin bilong dispela graun i stap long bel bilong yupela. Mi tok long olkain pasin olsem, pasin pamuk na pasin doti, na pasin bilong bel i kirap long mekim ol pasin nogut, na pasin bilong mangal long ol samting bilong narapela man . . . em i wankain olsem pasin bilong lotu long giaman god.” Askim skin bilong yu: “Wanem kain pasin bilong bel i kirap em mi mas kilim i dai? Mi mas abrusim wanem samting inap kirapim ol laik nogut long bel bilong mi? Mi man, mi mas senisim sampela pasin mi save mekim long ol meri o olsem wanem?”—Skelim wantaim 1 Timoti 5:1, 2.
14 Pol i tokim ol Kristen long ol i mas abrusim pasin pamuk na bosim gut ol laik bilong skin, bambai ol “i no ken mekim rong long ol Kristen brata na giamanim ol.” (1 Tesalonaika 4:3-7) Askim skin bilong yu: ‘Olsem wanem na pasin pamuk i save nogutim man? Sapos mi mekim kain rong olsem, dispela bai mekim wanem samting nogut long mi yet o long narapela? Dispela bai mekim wanem long mi long ol samting bilong spirit, na long bel, na long skin? Na olsem wanem long sampela insait long kongrigesen ol i bin brukim lo bilong God na ol i no tanim bel? Nau ol i stap olsem wanem?’ Sapos yumi tingim gut ol tok Baibel i mekim long ol kain pasin olsem, dispela inap mekim na bai yumi nolaik moa yet long ol samting i nogut long ai bilong God. (Kisim Bek 20:14; 1 Korin 5:11-13; 6:9, 10; Galesia 5:19-21; KTH 21:8) Pol i tok, man i mekim pasin pamuk “em i no sakim tok bilong ol man tasol. Nogat. Em i sakim tok bilong God.” (1 Tesalonaika 4:8) I no gat wanpela Kristen tru bai sakim tok bilong Papa bilong em long heven, a?
Gutpela Pasin na Ol Poroman
15. Bilong wanem ol poroman i bikpela samting taim yumi wok long bihainim gutpela pasin?
15 Taim yumi bung wantaim ol man i gat gutpela pasin, dispela tu i save helpim yumi long bihainim gutpela pasin. Man bilong raitim Song em i tok: “Mi save wokabaut wantaim ol man i save mekim wok bilong yu [Jehova] na i save bihainim lo bilong yu.” (Song 119:63) Yumi mas go long ol miting Kristen na bung wantaim ol manmeri i save bihainim gutpela pasin. (Hibru 10:24, 25) Sapos yumi stap wanpis, dispela inap mekim na bai yumi tingting long yumi yet tasol, na yumi inap pundaun na mekim pasin nogut. (Sindaun 18:1) Tasol taim yumi bung wantaim ol Kristen, dispela inap strongim yumi long bihainim yet gutpela pasin. Na yumi mas was gut, nogut yumi poroman wantaim ol man i mekim pasin nogut. Yumi ken mekim gut long ol man i sindaun klostu long yumi, na ol wanwok, na ol wanskul. Tasol sapos yumi wokabaut olsem man i gat gutpela tingting, bai yumi no pren tumas wantaim ol man i no bihainim gutpela pasin Kristen.—Skelim wantaim Kolosi 4:5.
16. Taim yumi bihainim tok bilong 1 Korin 15:33, olsem wanem dispela i helpim yumi long bihainim gutpela pasin long nau?
16 Pol i tok: “Sapos yumi poroman wantaim ol man nogut, bai ol i bagarapim gutpela pasin bilong yumi.” Em i mekim dispela tok bilong givim tok lukaut long ol bilipman, olsem bilip bilong ol inap bagarap sapos ol i poroman wantaim ol man i tok ol i Kristen tasol ol i sakim tok bilong Baibel long ol man i dai pinis bai kirap bek. Tasol lo i stap insait long dispela tok lukaut bilong Pol em i makim tu ol man bilong ausait na insait long kongrigesen em yumi save bung wantaim ol. (1 Korin 15:12, 33) Tru, yumi no laik givim baksait long ol brata sista Kristen bilong yumi sapos ol i no wanbel wantaim yumi long sampela tingting yumi holim. (Matyu 7:4, 5; Rom 14:1-12) Tasol yumi mas was gut sapos sampela insait long kongrigesen i save mekim sampela pasin i olsem i no stret, o ol i man bilong bel nogut o toktok planti. (2 Timoti 2:20-22) Em i pasin bilong gutpela tingting sapos yumi bung wantaim ol manmeri em ol i ken strongim bel bilong yumi na yumi ken strongim bel bilong ol. (Rom 1:11, 12) Dispela bai helpim yumi long bihainim gutpela pasin na stap yet long “rot bilong kisim laip.”—Song 16:11.
Wok Yet Long Bihainim Gutpela Pasin
17. Olsem Namba sapta 25 i stori long en, wanem bagarap i painim ol Israel? Dispela inap lainim yumi long wanem samting?
17 Klostu long taim ol Israel i kisim Graun Bilong Promis, planti tausen bilong ol i kirap bihainim pasin nogut—na bagarap i painim ol. (Namba, sapta 25) Orait, long nau lain bilong Jehova i stap klostu tru long nupela taim i gat stretpela pasin long en. Ol manmeri i wok yet long givim baksait long ol pasin nogut bilong dispela graun, ol tasol inap go insait long en. Tru, yumi man bilong graun tasol na sampela taim tingting bilong yumi i laik pulim yumi long mekim rong, tasol God inap helpim yumi long bihainim stretpela rot em spirit holi bilong em i soim long yumi. (Galesia 5:16; 1 Tesalonaika 4:3, 4) Olsem na yumi mas bihainim tok em Josua i bin givim long ol Israel: “Yupela i mas pret long Jehova na mekim wok bilong em long pasin i stret olgeta na i tru.” (Josua 24:14, NW) Sapos yumi pret long mekim wanpela samting Jehova i no laikim, dispela bai helpim yumi long bihainim gutpela pasin.
18. Olgeta Kristen i mas tingting strong long mekim wanem long pasin nogut na gutpela pasin?
18 Sapos yu gat bikpela laik long mekim ol samting God i laikim, orait tingim gut tok bilong Pol, em i tok: “Oltaim yupela i mas tingting tasol long ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.” Sapos yu mekim olsem, orait wanem samting bai kamap? Pol i tok: “Dispela olgeta pasin yupela i mas mekim oltaim. Na God, em i as bilong pasin bilong bel isi, em bai i stap wantaim yupela.” (Filipai 4:8, 9) Tru tumas, Jehova bai helpim yu na yu inap givim baksait long pasin nogut na bihainim gutpela pasin.
[Futnot]
a Lukim Wastaua, Epril 15, 1993, pes 19-24, na ol stori “Ol Yangpela i Laik Save . . . ” long Kirap! bilong Oktoba 8, na Disemba 8, 1993, na Kirap! (tok Inglis) bilong Mas 22, 1993, na Novemba 22, 1996.
Sampela Tok Bilong Kamapim Gen
◻ Yumi mas mekim wanem bilong bihainim gutpela pasin?
◻ Wanem samting i painim Hesekia na Daniel na 3-pela Hibru, tasol ol i bihainim yet gutpela pasin?
◻ Olsem wanem yumi ken bihainim pasin bilong Daniel long sakim ol pasin trik bilong Satan?
◻ Bilong wanem ol Kristen i mas was gut long ol samting ol i laik mekim bilong kisim amamas?
◻ Stadi, na tingim tingim ol dispela tok long bel, na ol man yumi bung wantaim ol, olsem wanem ol i bikpela samting long man i wok long bihainim gutpela pasin?
[Piksa long pes 15]
Yangpela man Hesekia i bihainim gutpela pasin, maski em i stap namel long ol man i save lotuim god Molek
[Ol Piksa long pes 17]
Ol Kristen i mas was gut long taim ol i laik kisim sampela amamas