Hetman Bilong Dispela Graun i Kamap Ples Klia

‘GOD bai i rausim hetman bilong dispela graun,’ em tok Jisas i bin mekim long sampela manmeri. Bihain em i tok moa olsem ‘hetman bilong dispela graun i no gat strong long bosim mi,’ na “God i skelim pinis hetman bilong dispela graun.” (Jon 12:31; 14:30; 16:11) Jisas i toktok long husat?

Taim yumi skelim tok Jisas i mekim long “hetman bilong dispela graun,” i klia tru olsem em i no toktok long Papa bilong em, God Jehova. Orait, husat tru em “hetman bilong dispela graun”? Olsem wanem God bai “rausim” em? Na olsem wanem God i bin “skelim” em pinis?

“Hetman Bilong Dispela Graun” i Kamapim Klia Em Yet

Olsem wanpela lida bilong lain raskol i save hambak long strong bilong em, olsem tasol Devil i bin hambak taim em i traim Jisas, em Pikinini Bilong God. Bihain long em i soim Jisas long “olgeta kingdom bilong graun,” Satan i tokim em: “Mi bai givim yu namba long bosim olgeta dispela kingdom, na tu, bai mi givim yu ol nambawan gutpela samting bilong ol. Mi inap mekim olsem, long wanem, olgeta dispela samting i bilong mi, na mi inap givim long man mi laik givim. Olsem na sapos nau yu lotu long mi, orait olgeta dispela samting bai kamap ol samting bilong yu.”​—⁠Luk 4:​5-7.

Sapos Devil em i pasin nogut tasol, olsem sampela man i tok, orait bai yumi no inap kliagut long dispela traim. Yu ting wanpela tingting nogut i traim Jisas bihain long em i kisim baptais? Sapos olsem, bilong wanem Baibel i tok “sin i no stap long em”? (1 Jon 3:⁠5) Jisas i no tok olsem Devil i no gat strong bilong bosim ol man, nogat, em i toktok long Devil olsem em i “hetman bilong dispela graun,” na i tok moa olsem em i “man bilong kilim man i dai” na “man bilong giaman.”​—⁠Jon 14:30; 8:⁠44.

Inap 60 yia bihain long Satan i traim Krais, aposel Jon i tokim ol Kristen olsem Satan i gat bikpela strong long pulim ol man, na em i tok “dispela graun olgeta i stap long han bilong Satan.” Na em i tok moa olsem Satan em “man i save giamanim olgeta manmeri bilong graun.” (1 Jon 5:19; Revelesen 12:⁠9) Tru tumas, Baibel i kamapim klia olsem wanpela spirit em i “hetman bilong dispela graun.” Tasol strong bilong em long bosim ol man i go inap long wanem mak?

Hetman Bilong Dispela Graun i Givim Strong Long Sampela Moa

Long ol tok aposel Pol i raitim long pait bilong ol Kristen long holimpas bilip, em i kamapim klia nambawan birua bilong ol. Em i tok: “Yumi no pait wantaim ol manmeri, nogat, yumi pait wantaim ol gavman, na ol wok bos, na ol hetman i bosim tudak bilong dispela graun, na ol spirit nogut i stap antap.” (Efesus 6:12) Olsem na dispela pait i no wanpela pait ol i mekim “wantaim ol manmeri,” nogat, em i wanpela pait ol i mekim wantaim “ol spirit nogut.”

Dispela tok “ol spirit nogut” i no makim ol pasin nogut, nogat, em i makim ol ensel nogut i gat bikpela strong. Olsem na Satan i bin kamapim strong bilong em long rot bilong ol narapela ensel i bikhet na i bin lusim “ples stret bilong ol” long heven.​—⁠Jut 6.

Buk Daniel long Baibel i kamapim planti tok profet long olsem wanem ‘ol hetman bilong dispela graun’ i bin bosim ol manmeri kirap long bipo yet na i kam inap long nau. Profet Daniel i tingting planti long ol wanlain Juda husat i lusim kalabus long Babilon na i kam bek long Jerusalem long 537 B.C.E., na inap 3-pela wik em i beten long Jehova i ken helpim ol. Wanpela ensel, em God i bin salim bilong strongim profet, em i tokim em long as na em i kam bihaintaim. Em i tok: “Ensel i save lukautim kantri Persia i bin pasim mi inap long 21 de.”​—⁠Daniel 10:​2, 13.

Husat dispela “ensel i save lukautim kantri Persia”? Dispela ensel i no makim King Sairus bilong Persia husat i bin amamas long Daniel na lain bilong em long dispela taim. Na tu, olsem wanem wanpela king bilong graun inap pasim wanpela ensel inap 3-pela wik, sapos wanpela ensel tasol i gat strong long kilim i dai 185,000 soldia long wanpela nait? (Aisaia 37:36) Dispela “ensel i save lukautim kantri Persia” em i wanpela wokman bilong Devil, olsem wanpela spirit nogut em Devil i givim strong long em bilong lukautim ol hap em Gavman Persia i bosim. Bihain long en, ensel bilong God i tok olsem em i mas i go bek na pait long “ensel i save lukautim kantri Persia” na narapela spirit nogut em “ensel i lukautim kantri Grik.”​—⁠Daniel 10:​20, 21.

Dispela inap skulim yumi long wanem samting? Yumi ken save tru olsem i gat ‘ol hetman bilong dispela graun,’ em ol spirit nogut husat i helpim nambawan hetman bilong ol, em Satan, long bosim dispela graun. Tasol i kam inap long nau ol i gat laik long mekim wanem samting?

Hetman Bilong Dispela Graun i Kamapim Klia Em i Husat Tru

Long laspela buk bilong Baibel, em Revelesen, aposel Jon i stori long olsem wanem Jisas, em nambawan ensel Maikel, i daunim Satan na ol spirit nogut, na Jon i stori long ol samting nogut tru i kamap taim Jisas i rausim ol long heven. Baibel i tok: “Yu graun . . . lukaut, long wanem, Satan i kam daun pinis long [yu], na em i belhat nogut tru, em i save em i gat sotpela taim tasol bilong i stap.”​—⁠Revelesen 12:​9, 12.

Olsem wanem Satan i kamapim bikpela belhat bilong em? Wankain olsem ol lida bilong ol lain raskol i gat tingting olsem ‘bosim o bagarapim’ ol man, olsem tasol Satan na ol spirit nogut i gat strongpela tingting long bagarapim dispela graun na ol manmeri. Satan i save olsem taim bilong em i sot pinis, olsem na em i yusim wanpela bikpela samting​—⁠em ol bikpela bisnis​—⁠bilong kirapim ol man long baim planti samting, na dispela i pinisim ol risos bilong dispela graun na i bagarapim graun, win, na wara samting, na dispela i laik bagarapim i stap bilong yumi ol man.​—⁠Revelesen 11:18; 18:​11-​17.

Kirap long taim God i wokim Adam na Iv, Devil i kamapim tu laik bilong em long bosim ol man long rot bilong wok politik na lotu. Buk Revelesen i stori long ol gavman politik olsem wanpela wel animal em Devil i givim “bikpela namba” long en. Na tu, em i stori olsem em i pasin doti taim ol lotu i insait long wok politik, na Baibel i kolim dispela olsem pasin pamuk bilong spirit. (Revelesen 13:2; 17:​1, 2) Tingim ol pasin bilong daunim ol man, wok kalabus, na ol pait samting i kamap insait long sampela handret yia, ol dispela pasin i bin kilim i dai planti milion manmeri. Yu ting i gat wanpela em inap tok olsem ol dispela samting nogut tru i bin kamap em i wok bilong ol man tasol? O ol i kamap, long wanem, ol spirit nogut em yumi no inap lukim ol i stiaim ol man long mekim ol dispela pasin?

Baibel i kamapim ples klia tru dispela man husat i save stiaim ol hetman bilong dispela graun na ol gavman politik. Maski ol man i save long dispela samting o nogat, ol i save bihainim ol pasin bilong hetman bilong ol, na tu, ol i bihainim dispela pasin olsem ‘bosim o bagarapim’ ol man. Tasol ol man bai kisim pen na hevi long rot bilong wok bos bilong Devil i go inap wanem taim?

Devil Bai Pinis Olgeta

Wok em Krais i mekim taim em i stap long graun i kamapim olsem klostu nau Devil na ol spirit nogut bai pinis. Taim ol disaipel bilong Jisas i stori long olsem wanem ol i bin rausim ol spirit nogut, em i tokim ol: “Mi lukim Satan i pundaun pinis kain olsem laitning i kam daun long skai.” (Luk 10:18) Long dispela tok, Jisas i kamapim olsem em i amamas long em bai daunim hetman bilong dispela graun taim em i stap gen long heven olsem nambawan ensel Maikel. (Revelesen 12:​7-9) Sapos yu skelim gut ol tok profet bilong Baibel, bai yu kisim save olsem Maikel i winim dispela pait long heven long yia 1914.a

Kirap long dispela yia, Satan i save olsem em i gat sotpela taim tasol i stap paslain long em bai bagarap. Tru, ‘dispela graun olgeta i stap long han bilong em,’ tasol planti milion manmeri long nau i no larim Satan long giamanim ol na larim em i bosim ol. Baibel i helpim ol long save long ol pasin na wok bilong em. (2 Korin 2:11) Tok bilong Pol long ol wanbilip Kristen i helpim ol long wetim gutpela samting bai kamap bihain, em i tok: “Klostu nau God husat i save givim bel isi, em bai krungutim Satan aninit long lek bilong yupela.”b​—⁠Rom 16:⁠20.

Klostu nau Satan bai pinis olgeta! Aninit long gutpela wok bos bilong Krais, ol stretpela manmeri bai mekim graun i kamap gutpela ples paradais. Pasin bilong pait, bel nogut, na mangal bai pinis olgeta. Baibel i tok: “Ol man bai i no inap tingim moa ol samting i bin kamap bipo.” (Aisaia 65:17) Man! Gutpela samting tru bai painim ol man husat i lusim kalabus bilong dispela hetman i stap hait na wok bos bilong em!

[Ol Futnot]

[Rait long pes 9]

Aninit long gutpela wok bos bilong Krais, ol stretpela manmeri bai mekim graun i kamap gutpela ples paradais