Ol i Resis Bilong Bosim Graun​—⁠Husat Bai Win?

‘OL RASIA i tingting tasol long subim mipela long lusim ol samting mipela laik putim long ples antap bilong pasim ol roket samting bilong ol birua sapos ol i kirapim pait long kantri bilong mipela. Mi ting Mista Gorbachev i save, mipela i no ken lusim.’ Presiden Reagan bilong Amerika i tok olsem bihain long taim em i bung wantaim ol bikman bilong Rasia long Jeniva long Novemba 1985.

Ol i kibung long Jeniva na nau wanpela yia i go pinis na dispela tupela strongpela gavman i stap birua yet. Na i gat planti kantri ol i helpim dispela tupela lain, em lain bilong Is (ol komyunis) na lain bilong Wes (ol kapitalis). Olsem na ol manmeri long olgeta hap bilong graun ol i insait long dispela resis. Yu tu yu insait long en. Maski yu stap long wanpela kantri i no helpim lain bilong Is o lain bilong Wes, tasol long nau ol lain man i wok strong long hipim planti samting bilong pait na sapos pait i kirap em bai kamap bikpela pait tru na bagarap inap painim olgeta man meri pikinini−yu tu.

Olsem na yu mas tingim ol samting inap kamap long rot bilong pasin birua i stap namel long dispela tupela strongpela lain i resis long bosim graun. Yu ting ol inap mekim i dai dispela pasin birua na i stap sekan? Sapos nogat na pait i kirap, husat bai win? Sapos yu save long dispela samting, dispela inap helpim yu long i stap gutpela long bihain.

Pasin Birua i Kirap

I gat sampela buk i stori long ol samting i kamap long nau na planti ol i tok, dispela pasin birua namel long lain bilong Is na lain bilong Wes i bin kirap bihain long Namba Tu Pait Bilong Olgeta Hap. Tasol Baibel i tok, dispela pasin birua i kirap longtaim bipo, olsem 2,300 yia bipo.

Sapos yu save long stori bilong ol samting i bin kamap bipo long kantri Grik, bai yu save Aleksanda i winim planti pait na daunim planti lain na mekim gavman bilong Grik i kamap bikpela gavman i bosim planti hap. Danyel i tok profet long dispela samting long Baibel. Dispela “strongpela king” em i dai long yia 323 B.C.E., na bihain, olsem Baibel i tok profet pinis, kingdom bilong em i bruk na i kamap fopela kingdom. Fopela kepten long ami bilong em ol i kirap bosim dispela fopela kingdom. (Danyel 11:​2-4, NW ) Wanpela kepten em Selusas Namba 1 Nikato. Em i kirap bosim hap bilong Siria na Mesopotemia−em dispela tupela kantri i stap klostu long as ples bilong Danyel (Juda) long hap bilong not na is. Na narapela kepten, em Tolemi Lagus, em i kirap bosim hap bilong Isip na Palestain. Dispela tupela kantri i stap long hap bilong saut na wes. Olsem na dispela tupela man i kamap olsem “king bilong hap bilong not” na “king bilong hap bilong saut.”−Danyel 11:​5, 6, NW.

King bilong Siria i kamap olsem “king bilong not” na King bilong Isip i kamap olsem “king bilong saut.” Tasol dispela tok profet i makim ol samting i mas kamap insait long planti handet yia, olsem na bihain ol narapela narapela lain i kamap olsem “king bilong not” na “king bilong saut.” Tasol ol dispela lain i mekim stret ol samting olsem dispela tok profet i tok dispela tupela “king” bai mekim−oltaim tupela i stap birua birua na ol i bosim ol hap i stap olsem long not na long saut.

Nau yumi save kolim dispela tupela lain olsem “Is” na “Wes.” Dispela tu em i olsem tok piksa tasol, long wanem dispela tupela lain wantaim i bosim sampela hap bilong Is na sampela hap bilong Wes tu. Tasol tok profet bilong Baibel i kolim ol olsem “not” na “saut.”

God Bilong “King Bilong Not”

Danyel i tok profet long “taim bilong pinis” na em i tok, “king bilong not” bai “litimapim em yet i stap antap long olgeta god,” na bai “em i no tingim God bilong ol tumbuna bilong em.” Em bai litimapim nem bilong “god bilong lukautim ol taun i gat strongpela banis”; bai em i givim “gol na silva na ol ston i dia tumas na ol gutpela samting” bilong litimapim nem bilong dispela god. Na “bihain bai em i pinis.”−Danyel 11:​35-39, 45, NW.

“King bilong not” long nau em i no bilip olsem God i stap. Em i tok i no gat God na em i wok long daunim ol lotu. Em i bilip long ol samting bilong pait na strongpela ami bilong helpim em. Olsem na em i givim bikpela mani bilong “litimapim nem” bilong “god bilong lukautim ol taun i gat strongpela banis.” “King bilong saut” long nau em tu i bilip long ol samting bilong pait na long strongpela ami, tasol em i bilip long ol narapela god tu, na planti manmeri long lain bilong em ol i givim bel long lotu.

Nau Ol i Resis Bilong Bosim Graun

Tok profet bilong Danyel i stori long taim bilong yumi na i tok: “Long taim bilong pinis bai king bilong saut i subim em [king bilong not], na bai king bilong not i ran i kam long em [king bilong saut] olsem strongpela win wantaim [ol samting bilong pait]; na bai [king bilong not] i go insait long ol ples olsem bikpela tait wara na i go moa.”−Danyel 11:​40, NW.

Ating yu save, bihain long Namba Tu Pait planti lain i kirap bihainim tingting bilong “king bilong not” na dispela “king” i kirap bosim planti lain maski ol man i mekim pait bilong pasim em. Em bai “go insait” long hamas kantri moa, em yumi no save; tasol “king bilong saut” i bin wok long pasim em long i go insait long ol kantri ol i save kolim “fri.” Dispela tupela “king” i stap birua birua na narapela i “subim” narapela. Dispela samting i mekim na nau ol i wok strong long hipim planti samting bilong pait na long putim ol samting long ples antap bilong pasim ol birua. Narapela i sutim tok long narapela na tok, em i laik bosim olgeta hap bilong graun.

Danyel i tok moa olsem: “Em [king bilong not] bai bosim ol gutpela samting i stap hait insait long graun, . . . na olgeta gutpela samting bilong Isip. Na ol Libia wantaim ol Itiopia bai wokabaut wantaim em.” (Danyel 11:​43, NW ) Dispela tok “ol gutpela samting i stap hait insait long graun,” ating dispela tok i makim wel samting i stap insait long graun; na tru, “king bilong not” long nau em i bosim planti kantri i gat wel samting long graun bilong ol. Em i gat strong tu long sampela kantri em i no bosim, em ol tu i gat planti gutpela samting i stap insait long graun bilong ol. Yumi olgeta yumi was i stap−yumi laik save, bai em i kisim bikpela strong moa long bosim ol dispela samting na dispela bai mekim wanem long ol wok bisnis samting.

Husat Bai Win?

Tasol wanem samting i pasim dispela tupela “king” na tupela i no kirap na pait tru? Wanpela bikpela samting em olsem: Dispela tupela lain wantaim i pret long bikpela bagarap ol bom nuklia samting bilong ol inap kamapim. Olsem na ol i wok yet long bung na toktok wantaim na sainim ol pepa, olsem kontrak, maski ol i no save mekim ol samting ol i pasim tok long mekim. I olsem Danyel i tok profet pinis: “Ol bai bung long wanpela tebol na autim tok giaman. Tasol i no gat wanpela samting bai kamap gutpela, long wanem, pinis bilong ol samting i no yet; em bai kamap long taim bilong en olsem ol i makim pinis.”−Danyel 11:​27, NW.

Olsem na ating yu laik save: Bihain bai wanem samting i kamap? Ol inap pinisim pasin birua i stap namel long ol na kamapim gutaim i no ken pinis? O bihain bai bikpela pait i kamap na bai wanpela lain i win? Tok profet bilong God long Baibel i bekim tok long dispela tupela askim, olsem: Nogat! Bilong wanem Baibel i tok olsem? Long wanem i gat narapela king i stap em bai daunim dispela tupela lain wantaim na em bai bosim olgeta hap bilong graun. Senis bai kamap−bai nupela king i bosim graun−liklik taim bihain!

[Piksa long pes 4]

STRONG BILONG AMI BILONG OL BIKPELA LAIN LONG GRAUN

Ol bom nuklia

50,000

Ol soldia samting

11,913,000

Ol sip bilong pait

1,350

Ol balus bilong pait

20,100

Ol strongpela ka ain

95,800