Sapta 16

Pinis Bilong Tupela King i Kam Klostu

1, 2. Olsem wanem King bilong not i senis bihain long Namba Tu Pait?

LONG 1835 saveman Alexis de Tocqueville bilong Frans i skelim pasin bilong wok politik long Amerika na Rasia na em i tok: “Wanpela i save bihainim pasin bilong larim ol man yet i makim samting ol bai mekim; narapela i save strong long bosim ol samting ol man bai mekim. Pasin bilong tupela . . . i narapela narapela kain; tasol i luk olsem God i makim tupela long holim strong bilong stiaim ol samting bai kamap long planti kantri long bihain.” Olsem wanem? Tok bilong dispela man i kamap tru taim Namba Tu Pait i pinis? Saveman J. M. Roberts i tok: “Tru tumas, long pinis bilong Namba Tu Pait i luk olsem tupela strongpela gavman em ol i narapela narapela kain​—em wanpela i kamap long Rasia na wanpela long Amerika​—ol bai makim ol samting bai painim ol man.”

² Long tupela bikpela pait Jemani i stap olsem king bilong not na em i stap nambawan birua bilong king bilong saut​—em Gavman Inglan-Amerika. Tasol bihain long Namba Tu Pait Jemani i bruk. Wes Jemani i kamap pren bilong king bilong saut, na Is Jemani i kamap pren bilong ol kantri Komiunis, em Soviet Yunion i het bilong ol. Dispela lain politik i sanap olsem king bilong not, na em i birua long Inglan-Amerika. Tupela king i resis na dispela pasin birua namel long ol i kirap long 1948 na i go inap long 1989. Bipo, king bilong not, em Jemani, i bin bagarapim dispela “kontrak holi.” (Daniel 11:​28, 30, NW ) Dispela gavman Komiunis bai mekim wanem long dispela kontrak?

OL KRISTEN TRU I PUNDAUN TASOL OL I WIN

3, 4. Husat ol i “mekim nogut long kontrak”? Ol i bin i stap olsem wanem long king bilong not?

³ Ensel bilong God i tok: “Na ol man i mekim nogut long kontrak, long rot bilong ol switpela tok em bai stiaim ol i go na ol bai tromoi bilip i tru. Tasol ol manmeri i save long God bilong ol, ol bai win na mekim tru wok bilong ol. Na ol manmeri bilong dispela lain em ol i gat gutpela save, ol bai givim gutpela tingting na save long planti manmeri. Na inap sampela de ol birua bai pundaunim ol long rot bilong bainat na paia, na long rot bilong kalabusim ol na stilim ol samting bilong ol.”​—Daniel 11:​32, 33, NW.

⁴ “Ol man i mekim nogut long kontrak” em ol hetman bilong Kristendom, ol i tok ol i Kristen tasol pasin bilong ol i bagarapim nem Kristen. Long buk bilong em (Religion in the Soviet Union), Walter Kolarz i tok: “[Long taim bilong Namba Tu Pait] Gavman Soviet i laik bai ol Misin i ken helpim pait long rot bilong givim mani samting na long tok orait long mekim pait.” Orait bihain long pait ol hetman bilong ol misin i laik i stap pren yet wantaim dispela gavman nau em i kamap king bilong not, maski em i bilip olsem i no gat God i stap. Olsem na Kristendom i insait moa yet long pasin bilong dispela graun, na long ai bilong Jehova ol i tromoi bilip i tru na ol i olsem samting i sting tru.​—Jon 17:16; Jems 4:4.

5, 6. “Ol manmeri i save long God bilong ol,” ol i husat? Wanem samting i painim ol taim ol i stap aninit long king bilong not?

⁵ Olsem wanem long ol Kristen tru​—“ol manmeri i save long God bilong ol” na ol manmeri “i gat gutpela save”? Ol i bin i “stap aninit long ol gavman,” tasol ol Kristen i stap aninit long king bilong not ol i no bilong dispela graun. (Rom 13:1; Jon 18:36) Ol i bin was gut na ‘samting bilong Sisar, ol i givim long Sisar,’ na tu, ‘samting bilong God ol i givim long God.’ (Matyu 22:21) Ol i mekim olsem na ol man i traim pasin bilong ol long i stap gut long God.—2 Timoti 3:12.

⁶ Ol dispela samting i mekim na ol Kristen tru ol i bin ‘pundaun’ na “win” wantaim. Ol i pundaun, olsem ol man i mekim nogut tru long ol, na sampela ol i kilim ol i dai. Tasol ol i win, long wanem, klostu olgeta i bin stap gut long God. Ol i winim pinis strong bilong dispela graun, olsem Jisas i bin mekim. (Jon 16:33) Na tu ol i no lusim wok bilong autim tok, maski ol i stap long ol kalabus o ol banis kalabus nogut. Taim ol i mekim olsem, ol i “givim gutpela tingting na save long planti man.” Maski ol man i mekim nogut long ol long ol dispela kantri king bilong not i bosim, namba bilong ol Witnes Bilong Jehova i go antap. Ol dispela man “i gat gutpela save” ol i bin stap gut long God, na dispela i mekim na namba bilong dispela “bikpela lain” i go antap long ol dispela kantri.​—KTH 7:​9-14.

LAIN BILONG JEHOVA I KAMAP GUTPELA TRU

 7. Ol Kristen God i bin makim ol na ol i stap aninit long king bilong not, ol i kisim wanem “liklik helpim”?

⁷ Ensel i tok olsem: “Taim ol birua i pundaunim ol [ol manmeri bilong God], ol bai kisim liklik helpim.” (Daniel 11:34a, NW ) Taim king bilong saut i win long Namba Tu Pait, dispela i mekim na sindaun bilong ol Kristen i stap aninit long king bilong not i kamap gutpela liklik. (Skelim wantaim KTH 12:​15, 16.) Na i wankain tu long ol Kristen i stap aninit long senis bilong dispela king, sampela taim ol i kisim helpim. Taim dispela pasin birua namel long ol lain bilong Amerika na Rasia i laik pinis, planti hetman bilong ol gavman i luksave olsem ol Kristen i save stap gut long God ol i no birua long gavman, olsem na ol i orait long ol na larim ol i rejista long gavman. Na tu, ol dispela Kristen i kisim helpim long bikpela lain i go bikpela moa, em ol i bin kisim ol tok liklik lain Kristen i autim, na ol i helpim liklik lain long mekim dispela wok.​—Matyu 25:​34-40.

 8. Olsem wanem sampela i bin bung wantaim ol manmeri bilong God “long rot bilong ol switpela tok”?

⁸ Long taim bilong dispela pasin birua namel long Amerika na Rasia i gat sampela man i tokaut olsem ol i laik mekim wok bilong God, tasol ol i gat tingting nogut. Ensel i tok lukaut olsem: “Planti bai i go bung wantaim ol long rot bilong ol switpela tok.” (Daniel 11:34b, NW ) Planti ol i laikim tok i tru, tasol ol i no laik dediket long God. Na sampela i luk olsem ol i kisim gutnius, tasol ol i mekim wok bilong gavman olsem man bilong lukstil. Wanpela ripot i tok: “Sampela Komiunis i kam insait long oganaisesen bilong God na ol i giaman long givim bel na wok strong, na sampela i kamap wasman samting.”

 9. Bilong wanem Jehova i larim ol dispela man bilong giaman i “pundaunim” sampela gutpela Kristen?

⁹ Dispela ensel i tok moa olsem: “Ol birua bai pundaunim sampela bilong ol man i gat gutpela save, bambai God i ken stretim na klinim ol na mekim ol i kamap waitpela, i go inap long taim bilong pinis; long wanem, taim God i makim i no kamap yet.” (Daniel 11:​35, NW ) Ol dispela man bilong giaman ol i mekim na gavman i holim sampela brata. Jehova i larim dispela samting i kamap na bai em i ken stretim ol manmeri bilong em na ol bai kamap gutpela na kamap klin tru long ai bilong em. Jisas tu “em i karim pen, na dispela i skulim em tru long pasin bilong bihainim tok bilong God,” na i wankain tu long ol dispela Kristen i stap gut long God​—ol hevi i kamap bilong traim bilip bilong ol na dispela i skulim ol long sanap strong na karim hevi. (Hibru 5:8; Jems 1:​2, 3; skelim wantaim Malakai 3:3.) Olsem na ol i ‘kamap stretpela, na klinpela na waitpela.’

10. Wanem insait bilong dispela tok “inap long taim bilong pinis”?

¹⁰ Ol manmeri bilong Jehova bai wok long pundaun na kamap klin i go i go “inap long taim bilong pinis.” Tru, ol i save ol man bai mekim nogut long ol i go inap long pasin nogut bilong nau i pinis. Tasol wok bilong mekim lain bilong God i kamap klin na waitpela long rot bilong ol samting nogut king bilong not i mekim long ol, em i mas kamap insait long dispela “taim God i makim.” Olsem na long Daniel 11:35 (NW ) dispela “taim bilong pinis” i mas makim pinis bilong dispela hap taim em God i wok long stretim lain bilong em na mekim ol i kamap klin tru taim ol i karim hevi em king bilong not i putim long ol. Ol dispela hevi i pinis long taim Jehova i makim.

DISPELA KING BAI LITIMAPIM EM YET

11. Ensel i tok king bilong not i gat wanem tingting long wok king bilong Jehova?

¹¹ Ensel i stori moa long king bilong not olsem: “Dispela king bai i mekim ol samting long laik bilong em yet. Em bai i hambak na litimapim nem bilong em yet na i tok, ‘Mi winim olgeta god.’ Na em bai i mekim olkain tok bilas bilong daunim nem bilong God Antap Tru [olsem em i no laik daun long Jehova, em Nambawan Bos]. Em bai i mekim dispela pasin i go inap long taim belhat bilong God i pinis, long wanem, God bai i mekim olgeta samting em i ting long mekim. Dispela king bai i no laikim ol giaman god bilong ol tumbuna bilong en, na dispela giaman god ol meri i save laikim. Na em bai i givim baksait long olgeta god, long wanem, em i ting em yet i stap namba wan na i winim ol.”​—Daniel 11:​36, 37.

12, 13. (a) Olsem wanem king bilong not i bin givim baksait long “god bilong ol tumbuna bilong en”? (b) Husat dispela “ol meri” king bilong not i no tingim? (c) King bilong not i givim biknem long wanem “god”?

¹² King bilong not i truim dispela tok profet na em i givim baksait long “god bilong ol tumbuna bilong en,” olsem God Triwan bilong Kristendom. Gavman Komiunis i laik kirapim ol man long bilip olsem i no gat God i stap. Olsem na king bilong not i makim em yet olsem wanpela god taim em i tok, ‘Mi winim olgeta god.’ Em i no tingim “ol meri,” em ol kantri i stap aninit long em olsem Not Vietnam, nogat, em i “mekim ol samting long laik bilong em yet.”

¹³ Ensel i skruim tok profet i go moa, na em i tok: “Bai em i givim biknem long wanpela giaman god tasol, em god bilong lukautim ol taun i gat strongpela banis. Ol tumbuna bilong dispela king i no bin lotu long dispela god bipo. Tasol king bai i givim silva na gol na ol naispela ston samting na ol arapela gutpela presen olsem ofa long dispela god.” (Daniel 11:38) King bilong not i bilip long dispela “god bilong lukautim ol taun i gat strongpela banis,” em ol nupela samting bilong pait ol man i wokim. Em i givim bikpela mani tru long dispela “god” olsem ofa bilong kisim bek em.

14. Olsem wanem king bilong not i mekim tru wok bilong em?

¹⁴ “Taim em i go pait bilong kisim ol taun i gat strongpela banis, em bai i askim dispela god bilong ol arapela lain long helpim em. Na em bai i givim biknem long ol man i laikim em i stap king bilong ol. Na em bai i mekim ol i kamap hetman na i givim ol hap graun long ol olsem presen, bilong bekim dispela helpim em i kisim long ol.” (Daniel 11:39) King bilong not i bilip strong long “dispela god bilong ol arapela lain,” olsem ol samting bilong pait, na long rot bilong ol dispela strongpela samting bilong pait em i bin wokim, em i kamapim wanpela strongpela gavman tru long “taim bilong las de.” (2 Timoti 3:1) Ol lain i save wanbel long tingting bilong em, ol i save kisim helpim long samting bilong politik, mani, na sampela taim long ol samting bilong pait.

NARAPELA BAI “SUBIM” NARAPELA

15. King bilong saut i wok long “subim” king bilong not olsem wanem?

¹⁵ Ensel i tokim Daniel: “Klostu long taim bilong las de, orait king bilong hap saut bai i kam pait [“subim,” NW ] long king bilong hap not.” (Daniel 11:40a) Olsem wanem? King bilong saut i bin “subim” king bilong not nau long “taim bilong pinis”? (Daniel 12:​4, 9, NW ) Tru tumas em i mekim olsem. Bihain long Namba Wan Pait, dispela kontrak bilong sekan ol i subim Jemani​—em king bilong not​—long sainim, em wanpela strafe bilong ol, na i olsem ol i “subim” ol o i laik kirapim ol long bekim pait gen. King bilong saut i winim Namba Tu Pait, na bihain em i redim ol samting nogut bilong pait, olsem ol bom nuklia samting, bilong sutim i go long king bilong not, na em i kamapim strongpela oganaisesen i gat sampela kantri i insait long en, ol i kolim NATO. Wanpela saveman bilong Inglan i stori long wok bilong NATO, na em i tok: “Namba wan wok bilong NATO em bilong pasim strong bilong Soviet Yunion, em namba wan birua bilong bel isi long Yurop. Em i mekim dispela wok inap 40 yia, na em i mekim gut tru.” Na insait long ol yia bilong pasin birua namel long Amerika na Rasia, king bilong saut i wok long “subim” yet king bilong not, olsem wokim rot bilong lukstil long ol samting bilong em, na mekim olkain tok gris, na kirapim sampela pait.

16. King bilong not i mekim wanem taim king bilong saut i wok long subim em?

¹⁶ Orait, king bilong not i mekim wanem? “Wantu king bilong hap not bai i kisim ol karis na ol hos na ol sip bilong pait na i go hariap bilong pait strong long king bilong hap saut. Em bai i daunim planti kantri olsem wara i tait bikpela.” (Daniel 11:40b) Nau long taim bilong las de king bilong not i bin kamap strong. Long Namba Tu Pait ol Natsi i bin daunim na kisim planti kantri olsem tait wara. Bihain long pait nupela king bilong not i bosim planti kantri. Long taim bilong pasin birua namel long Rasia na Amerika, em i pait wantaim king bilong saut​—em i mekim long rot bilong helpim ol narapela kantri long pait bilong ol, olsem long Afrika, na Esia, na Sentral na Saut Amerika. Em i mekim nogut long ol Kristen tru long taim em i laik pasim wok bilong ol, tasol em i no inap pasim olgeta. Na ami bilong em i daunim sampela kantri, olsem ensel i tok: “Dispela ami bai i kam kamap long dispela gutpela graun God i bin givim long ol manmeri bilong en [i stap bilong ol manmeri bilong Jehova long ol samting bilong spirit], na bai ol i kilim i dai bikpela lain manmeri.”​—Daniel 11:41a.

17. King bilong not i no inap kisim wanem ol kantri?

¹⁷ Tasol king bilong not i no inap kisim na bosim olgeta hap bilong graun. Ensel i tok profet olsem: “Tasol dispela ami bai i no inap kisim kantri Idom na Moap na bikpela hap bilong kantri Amon.” (Daniel 11:41b) Long bipo, Idom na Moap na Amon i stap olsem namel long Isip, em king bilong saut, na Siria, em king bilong not. Long nau ol i makim ol kantri na oganaisesen em king bilong not i laik kisim, tasol em i no inap.

EM I NO INAP LARIM ISIP I STAP GUT

18, 19. Olsem wanem king bilong saut i pilim tru strong bilong king bilong not long stiaim em?

¹⁸ Ensel bilong Jehova i tok moa: “Dispela king [bilong not] bai i daunim planti kantri na tu bai em i no larim Isip i stap gut. Nogat. Em bai i kisim ol planti silva na gol na ol arapela gutpela samting bilong ol Isip i gat bikpela pe long en. Na ol man bilong kantri Libia na Sudan bai i helpim em.” (Daniel 11:​42, 43) “Isip,” em king bilong saut, i kisim hevi taim king bilong not i wok strong long kisim ol narapela kantri. Olsem: King bilong saut i lus long pait long Vietnam. Na olsem wanem long Libia na Sudan? Ol i bin stap klostu long Isip bilong bipo, na yumi ken ting ol i makim ol kantri i stap klostu long “Isip” bilong nau (em king bilong saut), na sampela taim ol i bin “helpim” king bilong not.

¹⁹ Orait, king bilong not i bin kisim ol “gutpela samting bilong ol Isip” o nogat? Yumi ken tok em i bin stiaim strong king bilong saut long ol samting em i mekim long mani bilong en. Em i pret long king bilong not na dispela i kirapim em long lusim bikpela mani long wokim ol samting bilong pait na kisim bikpela lain ami, na nevi, na planti balus bilong pait. Long dispela rot king bilong not i bin “kisim” na bosim ol “gutpela samting,” olsem bikpela mani samting, bilong king bilong saut.

LASPELA PAIT BILONG KING BILONG NOT

20. Ensel i tok wanem long laspela pait bilong king bilong not?

²⁰ Dispela resis namel long king bilong not na king bilong saut​—maski ol i resis long pait, o wok bisnis, o long narapela rot​—pinis bilong en i kam klostu pinis. Ensel bilong Jehova i stori long wanpela pait i no kamap yet, na em i tok: “Bihain ol man bai i tokim em [king bilong not] long ol samting i kamap long hap sankamap na long hap not na dispela tok bai i mekim em i pret. Na bai em i bel nogut tru na i go pait strong moa na pinisim tru planti lain manmeri. Na em bai i sanapim ol bikpela haus sel bilong em long hap graun i stap namel long nambis bilong biksolwara Mediterenian na dispela maunten i nambawan tru, em maunten bilong God. Tasol em bai i bagarap na i no gat wanpela bai i helpim em.”​—Daniel 11:​44, 45.

21. Wanem ol samting bilong king bilong not yumi no save yet long en?

²¹ King bilong not i lusim bikpela strong taim Soviet Yunion i bruk na pinis long Disemba 1991. Orait, husat bai stap king bilong not long taim bilong truim bilong Daniel 11:​44, 45? Wanpela kantri bipo em i hap bilong Soviet Yunion? O em bai senis i go long narapela gavman olsem bipo em i bin mekim planti taim? O ating sampela narapela kantri bai kamapim ol bom nuklia na ol bai resis gen long wokim ol samting bilong pait na dispela bai makim husat em i king bilong not? Yumi mas wet long kisim bekim bilong ol dispela askim. I no savepasin long toktok nating long ol dispela samting. Taim king bilong not i kirap mekim laspela pait bilong em, truim bilong tok profet bai stap ples klia long ol man i gat gutpela save long Baibel.​—Lukim “Ol King Long Daniel Sapta 11,” long pes 284.

22. Yumi gat wanem ol askim long dispela laspela pait bilong king bilong not?

²² Tasol yumi save long samting klostu nau king bilong not bai mekim. Em bai harim sampela tok “i kamap long hap sankamap na long hap not” na em bai “i go pait strong moa na pinisim tru planti lain manmeri.” Em bai pait long husat? Wanem ol tok bai kirapim em long i go pait?

EM I PRET LONG OL TOK EM I HARIM

23. (a) Wanem bikpela samting i mas kamap paslain long Armagedon? (b) Husat “ol king i kam long hap sankamap”?

²³ Yumi laik skelim tok em Buk Kamapim Tok Hait i mekim long bagarap bai painim Bikpela Babilon, em olgeta lotu giaman. Paslain long “bikpela de bilong God I Gat Olgeta Strong i kotim ol manmeri,” em Armagedon, ‘paia bai kukim’ dispela birua bilong lotu i tru na pinisim em olgeta. (KTH 16:​14, 16; 18:​2-8) Taim God i kapsaitim namba 6 dis bilong belhat bilong em i go daun long wara Yufretis, dispela i makim bagarap bai painim Bikpela Babilon, na nau dispela “wara em i drai olgeta, bilong redim rot bilong ol king i kam long hap sankamap.” (KTH 16:12) Husat ol dispela king? Em God Jehova na Jisas Krais tasol!​—Skelim wantaim Aisaia 41:2; 46:​10, 11.

24. Jehova bai mekim wanem na ating dispela i pretim king bilong not?

²⁴ Buk Kamapim Tok Hait i stori gut long taim bagarap i painim Bikpela Babilon, olsem: “Dispela 10-pela kom yu bin lukim [em ol gavman i bosim graun long taim bilong pinis], ol dispela kom wantaim dispela wel animal [Yunaitet Nesen] ol bai i birua long pamukmeri. Ol bai i bagarapim em tru na rausim olgeta klos samting bilong en. Na ol bai i kaikai mit bilong bodi bilong en, na kukim em olgeta long paia.” (KTH 17:16) Tasol bilong wanem ol gavman bai bagarapim Bikpela Babilon? Long wanem, “God yet i givim tingting long ol dispela king, bai ol i ken mekim ol dispela samting i kamap.” (KTH 17:17) King bilong not em wanpela bilong ol dispela gavman. Ating dispela tok bilong “hap sankamap” em i harim, em dispela samting Jehova i mekim bilong givim tingting long ol gavman long bagarapim dispela pamukmeri, em olgeta lotu giaman.

25. (a) Wanem lain em king bilong not i gat laik tru long kamapim belhat bilong em long ol? (b) King bilong not i “sanapim ol bikpela haus sel bilong em” we?

²⁵ Tasol i gat wanpela lain em king bilong not i gat laik tru long kamapim belhat bilong em long ol. Ensel i tok: “Em bai i sanapim ol bikpela haus sel bilong em long hap graun i stap namel long nambis bilong biksolwara Mediterenian na dispela maunten i nambawan tru, em maunten bilong God.” Long taim bilong Daniel dispela “biksolwara” em solwara Mediterenian, na maunten hia em maunten Saion, na bipo tempel bilong God i bin stap long en. Olsem na long truim bilong dispela tok profet, king bilong not bai kam pait long lain bilong God. Dispela ‘hap graun i stap namel long biksolwara na maunten,’ i makim i stap bilong liklik lain wokman bilong God long ol samting bilong spirit. Ol i bin lusim “biksolwara,” em ol manmeri i no save lotu long God, na ol i gat tingting long mekim wok king wantaim Jisas Krais long maunten Saion long heven.​—Aisaia 57:20; Hibru 12:22; KTH 14:1.

26. Olsem tok profet bilong Esekiel i makim, ating husat i as bilong dispela tok i kam “long hap not”?

²⁶ Esekiel i bin i stap long taim bilong Daniel, na em tu i bin tok profet long dispela hevi bai painim lain bilong God “long taim bilong pinis.” Em i tok Gok bilong Magok, em Satan, bai kirapim pait long ol. (Esekiel 38:​14, 16) Orait Gok bai kirap long wanem hap na i kam? Long rot bilong Esekiel Jehova i tok: “Long hap not.” (Esekiel 38:15) Maski em i pait strong tru long ol manmeri bilong Jehova, em i no inap bagarapim ol. Jehova i stiaim ol samting i go bilong bagarapim lain bilong Gok, dispela i as na Gok i kam pait long lain bilong Jehova. Olsem na Jehova i tokim Satan: “Bai mi putim huk long wasket bilong yu na pulim yu . . . i kam.” “Bai mi mekim yu i lusim . . . hap not tru na bai mi bringim yu i kam long ples maunten bilong Israel.” (Esekiel 38:4; 39:2) Dispela tok i kam “long hap not” i mekim king bilong not i belhat tru, olsem na dispela tok i mas kam long Jehova. God tasol i save long wanem ol samting bai insait long ol tok “i kamap long hap sankamap na long hap not,” na bihain bai yumi save.

27. (a) Bilong wanem Gok bai kirapim king bilong not wantaim ol narapela king long i kam pait long lain bilong God? (b) Wanem samting bai kamap long dispela pait bilong Gok?

²⁷ Gok i kirap pait long “lain Israel tru bilong God” wantaim bikpela lain “arapela sipsip,” long wanem, ol i gat planti samting na ol i no insait moa long pasin bilong dispela graun em i bosim. (Galesia 6:16; KTH 7:9; Jon 10:16; 17:​15, 16; 1 Jon 5:19) Em i bel nogut long “ol dispela manmeri i bin lusim ol arapela kantri na i kam,” na ol i gat planti gutpela samting bilong spirit. (Esekiel 38:12) Gok i lukim i stap bilong ol Kristen long ol samting bilong spirit i olsem ‘ol taun i no gat banis i raunim ol,’ na i no hatwok long pinisim ol, olsem na em bai pait strong tru long bagarapim ol bambai i no gat wanpela samting i pasim em long bosim olgeta man. Tasol em bai lus tru. (Esekiel 38:​11, 18; 39:4) Taim ol king bilong graun wantaim king bilong not i kam pait long lain bilong Jehova, ol dispela king “bai i bagarap.”

‘DISPELA KING BAI I BAGARAP’

28. Wanem samting bai painim king bilong not na king bilong saut long bihain?

²⁸ Laspela pait king bilong not i mekim, em i no mekim long king bilong saut. Olsem na i no king bilong saut bai i bagarapim king bilong not. Na tu, i no king bilong not bai i bagarapim king bilong saut. “I no gat man bai i bagarapim” king bilong saut, nogat. Kingdom bilong God bai mekim.a (Daniel 8:25) Long pait bilong Armagedon, Kingdom bilong God bai bagarapim olgeta king bilong graun, na yumi ken ting dispela samting bai painim king bilong not tu. (Daniel 2:44) Daniel 11:​44, 45 i stori long ol samting bai kamap i go inap long Armagedon. Taim bagarap i painim king bilong not, “i no gat wanpela bai i helpim em”!

[Futnot]

YU BIN KISIM WANEM SAVE?

• Wanem senis i kamap long husat i stap king bilong not bihain long Namba Tu Pait?

• Bihain wanem samting bai painim king bilong not na king bilong saut?

• Taim yu bin putim gut yau long tok profet bilong Daniel long dispela resis namel long tupela king, dispela i helpim yu olsem wanem?

[Sat/Piksa long pes 284]

OL KING LONG DANIEL SAPTA 11

Daniel 11:5 Selukus 1 Naikato Tolemi 1

Daniel 11:​7-9 Selukus 2 Tolemi 3

Daniel 11:​10-12 Antiokus 3 Tolemi 4

Daniel 11:20 Ogastus

Daniel 11:​21-24 Taiberius

[Futnot]

[Piksa i karamapim pes olgeta long pes 271]

[Ol Piksa long pes 279]

King bilong saut i “subim” king bilong not long ol kain rot olsem lukstil long ol samting na long tok strong long kirapim sampela pait