Sapta 17

Ol Mak Bilong Lain i Lotu Tru Long God Long Taim Bilong Pinis

 1. Daniel sapta 7 i tok, long taim bilong yumi wanem ol narapela kain samting tru i mas painim wanpela liklik lain i olsem ol i no gat helpim?

WANPELA strongpela gavman i mekim nogut tru long wanpela liklik lain i olsem ol i no gat helpim. Tasol dispela liklik lain i stap yet na ol i kamap strong​—i no long strong bilong ol yet, nogat​—God Jehova i save laikim tru ol na ol i stap yet. Daniel sapta 7 i tok profet long ol dispela samting, em ol i bin kamap long 1914 samting. Dispela liklik lain ol i husat? Dispela sapta bilong Daniel i kolim ol olsem “ol manmeri bilong God Antap Tru,” em God Jehova. Na dispela sapta i kamapim tu olsem dispela lain bai mekim wok king wantaim long Kingdom bilong Mesaia!​—Daniel 7:​13, 14, 18, 21, 22, 25-27.

 2. (a) Jehova i gat wanem tingting long ol wokboi bilong em em i bin makim ol long spirit holi? (b) Em savepasin long bihainim wanem rot long dispela taim yumi stap long en?

² Long Daniel sapta 11 yumi kisim save pinis olsem king bilong not bai traim long bagarapim gutpela sindaun bilong spirit, olsem gutpela ples, dispela gutpela lain i stap long en, na bihain em bai bagarap olgeta. (Daniel 11:45; skelim wantaim Esekiel 38:​18-23.) Yes, Jehova i save lukautim gut ol Kristen em i makim na ol i stap gut long em. Song 105:​14, 15 i tok: “Em [Jehova] i helpim ol na em i krosim ol king i laik mekim nogut long ol. Em i tokim ol dispela king olsem, ‘Mi makim ol dispela manmeri bilong mekim wok bilong mi na yupela i no ken mekim pasin nogut long ol. Yupela i no ken mekim nogut long ol profet bilong mi.’ ” Olsem na long dispela taim nogut ating bai yu wanbel long ting dispela “bikpela lain” i bihainim savepasin taim ol i poroman gut wantaim lain God i bin makim. (KTH 7:9; Sekaraia 8:23) Jisas Krais i tokim ol man i gat gutpela bel long mekim olsem​—poroman wantaim ol Kristen God i bin makim, olsem ol brata bilong Krais, long rot bilong helpim ol long wok bilong ol.​—Matyu 25:​31-46; Galesia 3:29.

 3. (a) Bilong wanem i hatwok long painim na stap klostu long ol disaipel bilong Jisas, em God i bin makim ol? (b) Olsem wanem Daniel sapta 12 bai helpim yu long mekim olsem?

³ Tasol Birua bilong God, Satan, i bin pait strong tru long ol Kristen God i bin makim. Em i helpim lotu giaman, na ol Kristen giaman i pulap long graun. Olsem na lotu giaman i paulim planti manmeri. Sampela i bel hevi stret na ting ol i no inap painim ol man i bihainim lotu i tru. (Matyu 7:​15, 21-23; KTH 12:​9, 17) Ol man i painim pinis dispela “liklik lain sipsip” na poroman wantaim ol, ol i mas pait strong long stap gut long bilip, long wanem, pasin bilong dispela graun i save wok long olgeta taim long bagarapim bilip. (Luk 12:32) Olsem wanem long yu? Yu painim pinis “ol manmeri bilong God Antap Tru,” na yu wok long poromanim ol? Yu save long ol samting i kamapim klia olsem dispela lain yu painim pinis em dispela lain God i bin makim? Kain save olsem inap strongim bilip bilong yu. Na tu, em inap helpim yu long helpim ol narapela long luksave long ol pasin na bilip bilong ol lotu bilong nau i save paulim ol man. Dispela kain save bilong givim laip long man i pulap long Daniel sapta 12.

MAIKEL I KIRAP MEKIM WOK

 4. (a) Daniel 12:1 i tok profet long wanem tupela samting bilong Maikel? (b) Long Buk Daniel, planti taim dispela tok “sanap pinis i stap” i makim wanpela king i mekim wanem samting?

⁴ Daniel 12:1 (NW ) i tok: “Long dispela taim Maikel bai sanap, em i nambawan prins i sanap pinis i stap bilong helpim lain bilong yu.” Dispela ves i tok profet long tupela samting bilong Maikel: Namba wan, em i “sanap pinis i stap.” Dispela i makim wanpela pasin bai stap inap long wanpela hap taim, kirap long stat bilong dispela hap taim i go inap long pinis bilong en. Namba tu, em “bai sanap.” Dispela i makim wanpela samting bai kamap insait long dispela hap taim. Pastaim, yumi laik save long dispela hap taim Maikel i “sanap pinis i stap bilong helpim lain bilong [Daniel].” Tingim, dispela nem Maikel em i nem bilong Jisas taim em i stap King long heven. Daniel i kolim wankain tok olsem “sanap pinis i stap” long sampela narapela hap bilong buk bilong em. Planti taim dispela i stori long wok wanpela king i mekim, olsem taim em i kisim wok king.​—Daniel 11:​2-4, 7, 20, 21, NW.

5, 6. (a) Maikel i sanap pinis insait long wanem hap taim? (b) Maikel i “sanap” long wanem taim? Em i “sanap” olsem wanem? Taim em i mekim olsem, wanem ol samting i kamap?

⁵ Long dispela ves, i klia olsem ensel i stori long wanpela hap taim em Baibel i tok profet long en. Jisas i bin kolim dispela hap taim olsem “i kam i stap” bilong em (tok Grik, pa·rou·siʹa), taim em bai mekim wok king long heven. (Matyu 24:​37-39, NW ) Na tu, Baibel i kolim dispela hap taim olsem “taim bilong las de” na “taim bilong pinis.” (2 Timoti 3:1; Daniel 12:​4, 9, NW ) Kirap long stat bilong dispela hap taim long 1914, Maikel i sanap pinis olsem King long heven.​—Skelim wantaim Aisaia 11:10; KTH 12:​7-9.

⁶ Tasol Maikel i mas “sanap” long wanem taim? Taim em i kirap long mekim wanpela bikpela wok. Jisas bai mekim dispela samting long bihain. Kamapim Tok Hait 19:​11-16 i tok profet long Jisas olsem strongpela King Mesaia i sindaun long hos na i go pas long wanpela ami na i wok long bagarapim ol birua bilong God. Daniel 12:1 i tok moa olsem: “Long dispela taim bikpela hevi tru bai i kamap. Bipo kain hevi olsem i no bin kamap long wanpela kantri bilong graun.” Krais, em Man God i makim bilong givim strafe long ol man nogut, em bai pinisim dispela pasin nogut bilong graun long taim bilong “bikpela hevi tru.”​—Matyu 24:21; Jeremaia 25:33; 2 Tesalonaika 1:​6-8; KTH 7:14; 16:​14, 16.

 7. (a) Olgeta man i stap gut long God ol inap wetim wanem gutpela samting long dispela “taim bikpela hevi tru bai i kamap”? (b) Dispela buk bilong Jehova em i wanem samting? Bilong wanem em i bikpela samting long nem bilong yumi mas i stap insait long en?

⁷ Wanem samting bai painim ol man i bilip long God long dispela taim nogut? Ensel i tokim Daniel: “Taim dispela hevi i kamap, God bai i kisim bek olgeta manmeri bilong lain bilong yu, nem bilong ol i stap pinis long buk bilong em, na bai ol i stap gut.” (Skelim wantaim Luk 21:​34-36.) Dispela buk em i wanem samting? Em i makim pasin bilong God Jehova long tingim ol man ol i bin mekim laik bilong em. (Malakai 3:16; Hibru 6:10) Ol man nem bilong ol i stap long dispela buk bilong laip ol i stap gutpela tru, winim olgeta narapela man, long wanem, God i lukautim ol. Ol samting nogut i painim ol, God inap stretim na em bai mekim olsem. Maski ol i dai paslain long taim bilong dispela ‘bikpela hevi tru i kamap,’ ol i stap long tingting bilong Jehova. Em bai tingim ol na kirapim ol bek long Taim Bilong Wan Tausen Yia Bilong Jisas Krais i Stap King.​—Aposel 24:15; KTH 20:​4-6.

OL MAN GOD I MAKIM “BAI KIRAP BEK”

 8. Daniel 12:2 i stori long wanem gutpela samting yumi inap wet long en?

⁸ Pasin bilong bilip olsem ol man i dai pinis bai kirap bek i save mekim gut bel bilong yumi. Daniel 12:2 i stori long dispela olsem: “God bai i kirapim bek bikpela lain manmeri i bin dai pinis. Sampela bilong ol bai i kisim laip bilong i stap oltaim oltaim. Na sampela bai i sem nogut tru na bai ol i stap olsem tasol oltaim oltaim.” (Skelim wantaim Aisaia 26:19.) Ating dispela tok inap kirapim yumi long tingim gutpela tok promis bilong Jisas Krais olsem ol man i dai pinis bai kirap bek. (Jon 5:​28, 29) Man! Em wanpela gutpela samting tru yumi wetim! Tingim: Ol pren na ol wanblut yumi laikim ol tumas​—em ol i dai pinis​—ol inap kisim laip gen long bihain! Tasol dispela promis long Buk Daniel i stori long narapela kain kirap bek​—em wanpela i kamap pinis. Em i kamap pinis olsem wanem?

 9. (a) Bilong wanem yumi ken ting olsem truim bilong Daniel 12:2 i kamap long taim bilong las de? (b) Dispela tok profet i stori long wanem kain kirap bek? Yumi save long dispela olsem wanem?

⁹ Skelim ol tok i stap klostu long dispela ves. Namba wan ves bilong sapta 12 i stori long pinis bilong dispela pasin nogut bilong nau na tu long dispela hap taim ol i kolim taim bilong las de. Tru tumas, klostu olgeta truim bilong ol tok bilong dispela sapta i kamap long taim bilong pinis, na i no long taim paradais i kamap long graun, nogat. Olsem wanem? I gat wanpela lain i bin kirap bek long matmat long dispela taim? Aposel Pol i bin stori long ‘olgeta lain bilong Krais’ bai kirap bek long “taim em i kam bek” [“taim em i kam i stap,” NW ]. Tasol dispela lain i kirap bek na kisim laip long heven “ol i no inap bagarap moa.” (1 Korin 15:​23, 52) Ol i no kirap bek bilong kisim “sem nogut tru na bai ol i stap olsem tasol oltaim oltaim,” olsem Daniel 12:2 i tok profet long en, nogat. Olsem wanem? I gat narapela kain kirap bek? Sampela taim long Baibel, kirap bek i makim samting bilong spirit. Olsem: Buk Esekiel na Buk Kamapim Tok Hait i gat sampela tok profet i makim wanpela kirap bek long samting bilong spirit.​—Esekiel 37:​1-14; KTH 11:​3, 7, 11.

10. (a) Liklik lain em God i makim, olsem wanem ol i bin kirap bek long taim bilong pinis? (b) Sampela em ol i bin kirap bek long samting bilong spirit, olsem wanem ol i kisim “sem nogut tru na bai ol i stap olsem tasol oltaim oltaim”?

¹⁰ Olsem wanem? Ol Kristen God i bin makim ol i bin kisim laip gen long ol samting bilong spirit long taim bilong pinis? Tru tumas! Long 1918 ol man i mekim nogut tru long wanpela liklik lain Kristen, em ol i stap gut long God, na dispela i pasim ol long mekim wok autim tok long ples klia. Tasol long 1919, ol i kisim laip gen long ol samting bilong spirit, maski i luk olsem dispela samting i no inap kamap. Ol dispela samting i kamap i stret wantaim ol tok bilong kirap bek em Daniel 12:2 i tok profet long en. Sampela em God “i kirapim bek” ol long samting bilong spirit long dispela taim na bihain long en tu. Tasol sori tru, sampela ol i bin kirap bek olsem, tasol bihain ol i givim baksait long King Mesaia na ol i lusim wok bilong God, olsem na ol i kisim pe bilong ol​—ol “i sem nogut tru na bai ol i stap olsem tasol oltaim oltaim,” olsem Daniel 12:2 i tok. (Hibru 6:​4-6) Tasol ol Kristen God i bin makim ol na ol i stap gut long em, ol i bin mekim gutpela wok taim ol i kirap bek na kisim laip gen long samting bilong spirit, na ol i stap gut na helpim King Mesaia. Pasin bilong ol long i stap gut long God i bringim ol long “laip bilong i stap oltaim oltaim,” olsem tok profet i tok. Long nau, ol i gat strong long ol samting bilong spirit maski ol man i birua long ol, na dispela i helpim yumi long luksave long dispela lain.

‘OL BAI LAIT OLSEM OL STA’

11.  “Ol man i gat gutpela save na tingting” ol i husat long nau? Olsem wanem ol i lait olsem ol sta?

¹¹ Ves 3 na 4 bilong Daniel sapta 12 i helpim yumi moa yet long luksave olsem “ol manmeri bilong God Antap Tru” ol i husat. Long ves 3 ensel i tokim Daniel olsem: “Ol man i gat gutpela save na tingting bai ol i lait olsem skai i lait tumas. Na ol man i bin stiaim planti manmeri long bihainim stretpela pasin, ol bai i lait oltaim olsem ol sta.” Long nau, “ol man i gat gutpela save na tingting” ol i husat? Ol samting yumi skelim i soim yumi olsem em “ol manmeri bilong God Antap Tru.” Yumi inap tok olsem, long wanem, dispela liklik lain em God i bin makim ol, ol tasol i gat gutpela save na tingting na ol i luksave olsem Maikel i kirap sanap olsem King long 1914. Taim ol i autim kain tok i tru olsem dispela​—na bihainim pasin Kristen​—ol i stap olsem “ol lait” namel long ol manmeri i stap long tudak bilong spirit. (Filipai 2:15; Jon 8:12) Jisas i bin tok profet long ol olsem: “Long dispela taim ol stretpela manmeri bai i lait olsem san, insait long kingdom bilong Papa bilong ol.”​—Matyu 13:43.

12. (a) Ol Kristen God i bin makim, olsem wanem ol i bin “stiaim planti manmeri long bihainim stretpela pasin” nau long taim bilong pinis? (b) Long Taim Bilong Wan Tausen Yia Bilong Krais i Stap King, olsem wanem ol Kristen God i bin makim ol bai stiaim planti manmeri long bihainim stretpela pasin na ‘lait olsem ol sta’?

¹² Daniel 12:3 i tokim yumi tu long wok ol dispela Kristen God i bin makim ol bai mekim long taim bilong pinis. Ol bai “stiaim planti manmeri long bihainim stretpela pasin.” Dispela lain Kristen i kirap bungim ol manmeri em ol i stap yet long graun na ol i insait long lain 144,000, em ol bai wok king wantaim Krais. (Rom 8:​16, 17; KTH 7:​3, 4) Taim ol i pinisim dispela wok​—ating long 1935 samting​—ol i kirap bungim dispela “planti manmeri tru” bilong “ol arapela sipsip.” (KTH 7:9; Jon 10:16) Ol tu i bilip long ofa bilong Jisas Krais long baim bek ol man. Olsem na ol i stap klin long ai bilong Jehova. Namba bilong ol i winim sampela milion, na ol i amamas long samting ol i bilip na wet long en, olsem ol bai abrusim bagarap long pinis bilong pasin nogut bilong graun. Long Taim Bilong Wan Tausen Yia Bilong Krais i Stap King, Jisas na 144,000 king na pris wanwok bilong em bai mekim wok long ofa bilong Krais bilong helpim ol man i save bihainim tok na bilip long dispela ofa na bai ol i ken lusim olgeta sin ol i bin kisim long rot bilong Adam. (2 Pita 3:13; KTH 7:​13, 14; 20:​5, 6) Long dispela taim ol Kristen God i bin makim ol bai mekim tru wok bilong “stiaim planti manmeri long bihainim stretpela pasin” na ol bai ‘lait olsem ol sta’ long heven. Yu save pilim tru dispela gutpela samting yu wetim, olsem yu inap i stap laip hia long graun aninit long gavman bilong Krais na ol wanwok bilong em long heven? Em i wanpela gutpela wok tru long helpim “ol manmeri bilong God” long autim gutnius bilong Kingdom Bilong God!​—Matyu 24:14.

OL BAI “RAUN”

13. Olsem wanem tok bilong Buk Daniel i stap hait na buk i pas strong?

¹³ Dispela tokaut ensel i givim long Daniel i bin kirap long Daniel 10:​20, na nau em i pinis taim ensel i mekim dispela tok bilong mekim gut bel bilong Daniel: “Na yu, Daniel, yu mas larim dispela tok i stap hait na pasim strong buk, inap long taim bilong pinis. Planti manmeri bai i raun long olgeta hap, na stretpela save bai kamap planti.” (Daniel 12:​4, NW ) Planti tok God i kirapim Daniel long raitim, ol i stap hait na ol man i no inap save long insait bilong en. Bihain liklik, Daniel yet i tok: “Mi harim dispela tok bilong em, tasol mi no klia gut.” (Daniel 12:8) Inap planti handet yia buk bilong Daniel i pas olsem. Tasol olsem wanem long nau?

14. (a) Long “taim bilong pinis” husat bai “raun”? Ol bai raun olsem wanem? (b) Wanem samting i soim olsem Jehova i bin blesim dispela pasin bilong ol long “raun”?

¹⁴ Yumi amamas olsem yumi stap long dispela “taim bilong pinis” em Buk Daniel i tok profet long en. Olsem tok profet i tok, planti man i stap gut long God ol i bin “raun,” olsem ritim na skelim Tok Bilong God. Ol i mekim olsem na wanem samting i kamap? Jehova i blesim ol na stretpela save i kamap planti. Ol Witnes Bilong Jehova em ol i bilong lain God i makim na ol i stap gut long em, Jehova i givim gutpela save na tingting long ol. Dispela i mekim na ol i kisim save olsem Pikinini Bilong Man i kamap King long 1914, na ol i kisim save olsem ol wel animal long tok profet bilong Daniel i makim wanem samting, na ol i mekim tok lukaut long “dispela samting nogut tru.” Ol dispela samting em liklik hap tasol bilong ol save ol i kisim. (Daniel 11:31) Dispela planti save ol i kisim em i narapela mak bilong luksave long “ol manmeri bilong God Antap Tru.” Tasol Daniel i kisim sampela save moa i makim dispela lain.

OL I ‘PINIS OLGETA’

15. Wanpela ensel i kamapim wanem askim? Dispela askim inap kirapim yumi long tingim husat?

¹⁵ Ensel i givim dispela tok long Daniel taim em i stap arere long “bikpela wara Taigris.” (Daniel 10:4) Nau long dispela hap em i lukim tripela ensel na em i tok: “Orait bihain mi Daniel, mi lukim tupela arapela man i sanap klostu long wara. Wanpela i sanap long sait mi sanap long en, na wanpela i sanap long hapsait. Wanpela bilong tupela i tokim dispela man i pasim gutpela laplap na i stap antap namel long wara. Em i tok olsem, ‘Wanem taim tru bai ol dispela narakain samting i pinis?’ ” (Daniel 12:​5, 6) Dispela askim ensel i mekim inap kirapim yumi long tingim gen “ol manmeri bilong God Antap Tru.” Long kirap bilong “taim bilong pinis,” long 1914, ol i gat bikpela laik long save long wanem taim tru God bai truim ol promis bilong em. Bekim bilong dispela askim i kamapim klia olsem dispela tok profet i stori long ol.

16. Ensel i mekim wanem tok profet? Em i mekim wanem bilong strongim dispela tok profet, olsem em bai kamap tru?

¹⁶ Stori bilong Daniel i go moa: “Orait dispela man i pasim gutpela laplap, em i litimapim tupela han bilong en wantaim i go antap long skai, na em i tok olsem, ‘Long nem bilong God i stap oltaim, mi tok tru tumas, ol dispela narakain samting bai i stap inap long 3 na hap yia [“wanpela taim em i makim, na ol taim em i makim, na hap taim,” NW ]. Na taim strong bilong ol manmeri bilong God i pinis olgeta, na ol i bagarap tru, orait ol dispela samting tu bai i pinis.’ ” (Daniel 12:7) Dispela em i bikpela samting. Ensel hia i apim tupela han bilong mekim wanpela tok tru antap, na ating em i apim han bambai tupela ensel i sanap long hapsait bilong bikpela wara ol inap lukim em. Pasin em i mekim i strongim dispela tok profet, olsem em bai kamap tru. Tasol ol dispela hap taim God i makim bai kamap long wanem taim? Yu bai ting em i hatwok long painim bekim bilong dispela askim, tasol i no hatwok tumas.

17. (a) Wanem ol wankain samting i stap long ol tok profet long Daniel 7:​25, na Daniel 12:​7, na Kamapim Tok Hait 11:​3, 7, 9? (b) Dispela tri na hap taim em i makim hamas de?

¹⁷ Dispela tok profet i klostu wankain long tupela narapela tok profet. Wanpela yumi bin skelim long Sapta 9 bilong dispela buk, na i stap long Daniel 7:25; na wanpela i stap long Kamapim Tok Hait 11:​3, 7, 9. Yumi ken skelim sampela samting bilong ol i wankain. Tupela i stori long taim bilong pinis. Tupela tok profet wantaim i stori long ol wokboi bilong God, na ol man i mekim nogut long ol na inap long sotpela taim ol i no inap mekim wok autim tok bilong ol long ples klia. Tupela tok profet i stori olsem ol wokboi bilong God ol i kisim bek laip na i kirap mekim gen wok bilong ol, na ol birua i no inap daunim ol. Na ol dispela tok profet i kolim hap taim ol wokboi bilong God bai karim hevi. Tupela tok profet long Daniel (7:25 na 12:7) i kolim ‘wanpela taim, na ol taim, na hap taim.’ Ol saveman bilong Baibel ol tu i tok dispela i makim tri na hap taim. Kamapim Tok Hait i kolim dispela wankain hap taim olsem 42 mun, o 1,260 de. (KTH 11:​2, 3) Dispela i kamapim klia olsem dispela tri na hap taim long Buk Daniel i makim tri na hap yia, na ol wan wan yia i gat 360 de long en. Tasol dispela 1,260 de i kirap long wanem taim?

18. (a) Olsem Daniel 12:7 i tok, wanem samting bai makim pinis bilong dispela 1,260 de? (b) Wanem taim “strong bilong ol manmeri bilong God i pinis olgeta, na ol i bagarap tru”? Em i kamap olsem wanem? (c) Dispela 1,260 de i kirap long wanem taim? Olsem wanem ol Kristen God i bin makim ol i ‘pasim klos bilong sori na autim tok’ long dispela taim?

¹⁸ Dispela tok profet i tokaut klia tru long wanem taim dispela 1,260 de bai pinis​—em i tok “taim strong bilong ol manmeri bilong God i pinis olgeta, na ol i bagarap tru.” Namel long 1918, ol i putim long kot ol man i go pas long Sosaiti Was Taua, na presiden bilong en, J. F. Rutherford, em i wanpela bilong ol. Ol i sutim tok giaman long ol na kot i makim ol long kalabus inap longpela taim. Tru tumas, wok bilong ol manmeri bilong God “i pinis olgeta,” na strong bilong ol i bagarap. Sapos yumi kirap namel long yia 1918 na kaunim tri na hap yia i go bek, bai yumi kamap klostu long pinis bilong yia 1914. Long dispela taim dispela liklik lain Kristen em God i bin makim, ol i redi long ol man i kirap mekim nogut long ol. Namba Wan Pait i kirap pinis, na pasin bilong birua long wok bilong ol i wok long i go bikpela. Yia-teks ol i makim bilong 1915, em askim Krais i bin givim long ol disaipel bilong em: “Ating yutupela inap dring long dispela kap mi bai dring long en?” (Matyu 20:22) Olsem Kamapim Tok Hait 11:3 i bin tok, dispela 1,260 de em i taim bilong ol dispela Kristen i stap bel hevi​—i olsem ol i pasim klos sori na autim tok profet. Ol man i mekim nogut moa yet long ol. Sampela ol i kalabusim, na sampela ol i bung na paitim ol, na sampela ol i givim bikpela pen long ol. Planti ol i bel hevi taim C. T. Russell, namba wan presiden bilong Sosaiti, i dai long 1916. Long pinis bilong dispela taim nogut wok bilong ol dispela Kristen long autim tok olsem wanpela oganaisesen, i dai pinis. Bihain long dispela, wanem samting bai kamap?

19. Olsem wanem tok profet long Kamapim Tok Hait sapta 11 i helpim yumi long save olsem ol manmeri bilong God i no inap stap nating na pasim maus longpela taim?

¹⁹ Tok profet long Kamapim Tok Hait 11:​3, 9, 11 i soim yumi olsem, taim ol i kilim i dai “tupela man bilong autim tok,” ol bai dai i stap inap sotpela taim tasol​—3 na hap de​—na bihain ol bai kirap bek. Na tok profet bilong Daniel sapta 12 i wankain​—ol manmeri bilong God ol i no inap stap nating na pasim maus, nogat, ol i gat sampela wok moa ol i mas mekim.

OL I ‘KAMAP KLIN, NA WAITPELA, NA GUTPELA TRU’

20. Olsem Daniel 12:10 i stori long en, ol manmeri bilong God bai kisim wanem ol blesing bihain long taim ol i karim ol hevi?

²⁰ Olsem yumi stori pinis, Daniel i bin raitim ol dispela tok tasol em i no inap save long as bilong en. Tasol ating em i laik save olsem ol man nogut bai pinisim ol manmeri bilong God o nogat, long wanem, em i askim ensel olsem: “Ol dispela samting bai i pinis olsem wanem?” Ensel i bekim olsem: “Daniel, yu go nau. Buk i pas pinis na i tambu long opim nau, long wanem, as bilong dispela tok i mas i stap hait inap long taim bilong las de.” “Planti bai mekim ol samting bilong kamap klin na waitpela na gutpela tru. Na ol man nogut bai mekim ol pasin nogut tasol, na i no gat wanpela man nogut bai save long as bilong dispela tok; tasol ol man i gat gutpela tingting na save ol bai save long as bilong en.” (Daniel 12:​8, 9; 12:​10, NW ) I gat gutpela samting tru ol manmeri bilong God inap wetim! Ol i no inap kisim bagarap, nogat, ol bai kamap waitpela na klin, na ol bai kamap stretpela long ai bilong God Jehova. (Malakai 3:​1-3) Gutpela save na tingting bilong ol long ol samting bilong spirit bai helpim ol long bihainim stretpela pasin long ai bilong God. Tasol ol man nogut bai i no gat laik long save long ol samting bilong spirit. Orait ol dispela samting bai kamap long wanem taim?

21. (a) Wanem samting i mas kamap pastaim na bihain dispela 1,290 de Daniel 12:11 i tok profet long en bai kirap? (b) Dispela ‘ofa ol i mekim long God long olgeta de’ i makim wanem samting? Ol i bin rausim dispela ofa long wanem taim? (Lukim blok long pes 298.)

²¹ Ensel i tokim Daniel: “Stat long taim ol birua i tambuim ol Israel long ol i no ken mekim ol ofa long God long olgeta de na ol i sanapim dispela samting nogut tru insait long haus bilong God, 1,290 de i mas i go pinis pastaim.” Olsem na dispela 1,290 de bai kirap taim sampela samting i kamap pinis. Ol i mas rausim dispela ‘ofa ol i mekim long God long olgeta de.’a (Daniel 12:11) Ensel i stori long wanem ofa? Em i no stori long ol animal ol i ofaim long wanpela tempel hia long graun. Dispela tempel i stap long Jerusalem em “piksa tasol bilong haus lotu tru bilong God”​—olsem tempel spirit bilong Jehova, i kirap mekim wok taim Krais i kamap Hetpris bilong en long 29 C.E.! Long dispela tempel spirit, olsem pasin God i kamapim bilong mekim lotu i klin na holi, i no gat wok long mekim ol ofa bilong tekewe sin long olgeta de, long wanem, “wanpela taim tasol Krais i givim em yet long God olsem ofa, bilong karim hevi bilong ol sin bilong planti manmeri.” (Hibru 9:​24-28) Tasol olgeta Kristen tru i save givim ofa long dispela tempel. Aposel Pol i tok: “Oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.” (Hibru 13:15) Olsem na dispela namba wan samting tok profet i tok i mas kamap​—olsem rausim dispela ‘ofa ol i mekim long God long olgeta de’​—i kamap namel long 1918 taim ol i no mekim wok bilong autim tok.

22. (a) Dispela “samting nogut tru” em i wanem samting? Em i kamap long wanem taim? (b) Dispela 1,290 de Daniel 12:11 i tok profet long en, i kirap long wanem taim na i pinis long wanem taim?

²² Olsem wanem long namba tu samting i mas kamap pastaim​—olsem ol bai “sanapim dispela samting nogut tru”? Taim yumi bin skelim Daniel 11:​31, yumi kisim save olsem pastaim dispela samting nogut tru em Lig ov Nesen, na bihain em i kamap gen olsem Yunaitet Nesen. Tupela wantaim ol i samting nogut tru, long wanem, ol man i tok dispela tupela oganaisesen tasol inap kamapim gutaim hia long graun. Olsem na long bel na tingting bilong planti manmeri dispela tupela oganaisesen ol i kisim ples bilong Kingdom bilong God! Ol i bin tokaut long kamapim Lig ov Nesen long Janueri 1919. Em nau, long dispela taim, tupela samting Daniel 12:11 i tok i mas kamap pastaim i kamap pinis. Olsem na dispela 1,290 de i stat klostu long kirap bilong 1919 na i go inap long Septemba samting bilong 1922.

23. Olsem wanem ol manmeri bilong God i bin wok long kamap klin long ai bilong God insait long dispela 1,290 de Daniel sapta 12 i tok profet long en?

²³ Olsem wanem? Insait long dispela taim ol manmeri bilong God i wok long kamap waitpela na klinpela long ai bilong God o nogat? Yes, ol i mekim olsem! Long Mas 1919 presiden bilong Sosaiti Was Taua wantaim ol wanwok bilong em ol i lusim kalabus. Bihain kot i tokaut olsem ol i no bin mekim rong. Ol i save olsem wok bilong ol i no pinis, olsem na kwiktaim ol i kirap redim ol samting bilong mekim wanpela kibung long Septemba 1919. Long dispela yia stret ol i kirap wokim wanpela nius bilong poromanim nius Wastaua. Pastaim nem bilong dispela nius em The Golden Age (nau ol i kolim Kirap!), na oltaim em i stap olsem helpim bilong Wastaua na tupela nius i no pret long tokaut long ol pasin nogut bilong dispela graun na long helpim lain bilong God long bihainim stretpela pasin. Long pinis bilong dispela 1,290 de, ol manmeri bilong God ol i wok strong long kamap klin na stap gut gen wantaim God. Long Septemba 1922, olsem long pinis bilong dispela 1,290 de, ol i kamapim wanpela bikpela kibung long Sida Poin, Ohaio, long Amerika. Em i strongim tru wok bilong autim tok. Tasol ol i gat wok yet long kamap gutpela moa. Dispela bai kamap insait long narapela hap taim em tok profet i makim.

OL MANMERI BILONG GOD BAI AMAMAS

24, 25. (a) Daniel 12:12 i tok profet long wanem hap taim? Dispela hap taim i kirap na pinis long wanem taim? (b) Ol manmeri bilong God i stap olsem wanem long ol samting bilong spirit taim dispela 1,335 de i kirap?

²⁴ Bilong pinisim tok profet bilong em long ol manmeri bilong God, ensel bilong Jehova i tok: “Ol manmeri i stap strong na i wet long God inap long 1,335 de i go pinis, ol i ken amamas.” (Daniel 12:12) Ensel i no mekim sampela tok bilong makim wanem taim dispela 1,335 de bai kirap o pinis. Taim yumi skelim ol samting i bin kamap long bipo, i luk olsem dispela 1,335 de i kirap stret long taim dispela 1,290 de i pinis. Sapos olsem, dispela 1,335 de i kirap long pinis bilong 1922 na i go inap long kirap bilong 1926. Olsem wanem? Ol manmeri bilong God i bin kamap amamas long pinis bilong dispela 1,335 de? Yes, long sampela bikpela samting bilong spirit, ol i amamas.

²⁵ Bihain long kibung bilong 1922 (lukim piksa long pes 302), sampela manmeri bilong God ol i tingim yet ol samting bilong pastaim. Long ol miting ol i wok long stadi yet long Baibel na ol buk (Studies in the Scriptures) C. T. Russell i bin raitim. Long dispela taim planti i ting taim bilong kirapim bek ol man i dai pinis bai stat long kamap long 1925, na tu, long dispela taim Paradais bai kamap bek long graun. Olsem na planti ol i tingting long mekim wok bilong God i go inap long wanpela yia stret. Sampela i gat pasin antap na ol i tok ol i no inap autim tok long ol man. Ol dispela pasin na tingting i no gutpela.

26. Taim dispela 1,335 de i kirap na i go, olsem wanem i gat ol senis i wok long kamap long ol manmeri bilong God long ol samting bilong spirit?

²⁶ Tasol taim dispela 1,335 de i kirap na i go, i gat ol senis i wok long kamap. Wok bilong autim tok i kamap olsem bikpela samting, na ol i stretim rot bambai olgeta inap insait long en. Ol i kirapim ol miting bilong mekim stadi long Wastaua long olgeta wik. Long Wastaua bilong Mas 1, 1925, i gat wanpela stori (“Birth of the Nation”) i kamapim klia wanem samting i bin kamap namel long 1914 na 1919. Orait bihain long 1925, ol manmeri bilong God ol i no tingting long mekim wok bilong God i go inap long wanpela yia stret na em tasol. Nogat. Nambawan bikpela samting em bilong mekim holi nem bilong Jehova. Long Wastaua bilong Janueri 1, 1926, i gat wanpela stori (“Who Will Honor Jehovah?”) i tokaut strong tru long dispela samting, winim ol narapela taim. Long kibung bilong Me 1926, ol i kamapim buk Deliverance. (Lukim pes 302.) Dispela em i wanpela bilong ol nupela buk ol i kamapim bilong senisim ol buk Studies in the Scriptures. Em nau, ol manmeri bilong God i no tingting moa long ol samting bilong pastaim. Ol i tingting long ol samting bai kamap bihain na wok ol i mas mekim. Olsem tok profet i tok, long pinis bilong dispela 1,335 de ol manmeri bilong God ol i stap amamas.

27. Taim yumi skelim Daniel sapta 12, olsem wanem dispela i helpim yumi long luksave long dispela lain God i bin makim?

²⁷ Tasol i no olgeta manmeri i sanap strong long dispela taim bilong ol bikpela senis. Ating dispela em i as na ensel i tok long ‘stap strong na wet.’ Ol manmeri i bin mekim olsem, God i mekim gut tru long ol. Taim yumi skelim Daniel sapta 12, dispela samting i kamap ples klia. Olsem tok profet i tok, ol manmeri bilong God ol i bin kirap bek, o kisim laip gen, long ol samting bilong spirit. Ol i kisim gutpela save na tingting long Tok Bilong God, i olsem God i givim strong long ol bilong “raun” insait long Baibel, na spirit holi i stiaim ol na ol i bin kisim save long as bilong ol tok i bin i stap hait inap planti handet yia. Jehova i stretim ol na mekim ol i lait olsem ol sta long ol samting bilong spirit. Olsem na ol i stiaim planti manmeri long kamap olsem stretpela man long ai bilong God Jehova.

28, 29. Nau pinis bilong dispela “taim bilong pinis” i laik kamap, olsem na yumi mas i gat wanem tingting?

²⁸ Ol tok profet i kamapim ol dispela mak bilong yumi ken save tru olsem “ol manmeri bilong God Antap Tru” ol i husat, olsem na i no gat as na yumi no luksave long ol na poroman wantaim ol, a? Ol gutpela blesing tru i wetim bikpela lain, em ol i bung na mekim wok bilong Jehova wantaim liklik hap lain bilong ol Kristen em God i bin makim. Yumi olgeta i mas wet i stap long lukim truim bilong ol tok promis bilong God. (Habakuk 2:3) Inap planti yia long taim bilong yumi, Maikel i sanap i stap bilong helpim lain bilong God. Klostu nau em bai kirap mekim dispela wok God i givim long em bilong bagarapim ol lain na ol samting nogut bilong dispela graun. Taim em i mekim olsem, bai yumi stap olsem wanem?

²⁹ Bikpela samting bilong bekim dispela askim em olsem: Bai yumi bihainim pasin bilong i stap gut long God long nau o nogat? Bilong strongim yumi long i stap gut long God nau long “taim bilong pinis,” yumi ken skelim laspela ves bilong Buk Daniel. Taim yumi toktok long dispela ves long sapta bihain, dispela bai helpim yumi long save, Daniel i bin stap olsem wanem long ai bilong God long bipo, na em bai stap olsem wanem long ai bilong God long bihain.

[Futnot]

YU BIN KISIM WANEM SAVE?

• Maikel i “sanap” i stap long wanem taim? Em bai “sanap” long wanem taim? Olsem wanem em bai “sanap”?

• Daniel 12:2 i stori long wanem kain kirap bek long matmat?

• Wanem ol yia i makim kirap na pinis bilong

tri na hap taim em Daniel 12:7 i stori long en?

1,290 de Daniel 12:11 i tok profet long en?

1,335 de Daniel 12:12 i tok profet long en?

• Taim yumi putim yau long tok bilong Daniel sapta 12, dispela i helpim yumi olsem wanem long luksave long ol man i lotu tru long Jehova?

[Blok long pes 298]

OL I RAUSIM OFA BILONG MEKIM LONG OLGETA DE

Long Buk Daniel long ol Baibel ol i bin raitim long bipo, dispela tok “pasin bilong mekim ofa long olgeta de” i stap faipela taim. Dispela i stori long pasin bilong litimapim nem bilong God olsem ofa ol wokboi bilong God Jehova i save givim long em. (Hibru 13:15) Daniel 8:​11, 11:​31, na 12:11 i tok profet olsem ol bai rausim dispela ofa.

Long namba wan na namba tu pait bilong olgeta hap, ol man i bin mekim nogut tru long lain bilong Jehova long hap bilong “king bilong hap not” na “king bilong hap saut.” (Daniel 11:​14, 15) Klostu long pinis bilong Namba Wan Pait, ol i rausim “pasin bilong mekim ofa long olgeta de” taim ol i pasim wok bilong autim tok namel long 1918. (Daniel 12:7) Na tu long taim bilong Namba Tu Pait, Gavman Inglan-Amerika i bin pinisim “pasin bilong mekim ofa long olgeta de” inap 2,300 de. (Daniel 8:​11-14; lukim Sapta 10 bilong dispela buk.) Na “ol soldia” Natsi tu i bin pinisim dispela ofa, tasol hamas de samting, Baibel i no kolim.​—Daniel 11:31; lukim Sapta 15 bilong dispela buk.

[Sat/Ol Piksa long pes 301]

OL HAP TAIM BUK DANIEL I TOK PROFET LONG EN

[Ol Piksa long pes 287]

Ol i sutim tok giaman long sampela brata ol i go pas long wok bilong Jehova na kalabusim ol long haus kalabus bilong nesenel gavman long Atlanta, Jojia, long Amerika. Kirap long han kais: (ol i sindaun) A. H. Macmillan, J. F. Rutherford, W. E. Van Amburgh; (ol i sanap) G. H. Fisher, R. J. Martin, G. DeCecca, F. H. Robison, na C. J. Woodworth

[Ol Piksa long pes 299]

Ol bikpela kibung i bin kamap long Sida Poin, Ohaio, Amerika, long 1919 (antap) na long 1922 (daunbilo)

[Piksa i karamapim pes olgeta long pes 302]