Harim Gut Tok Bilong Jehova, Long Wanem Pinis i Klostu
“Ol man i save harim gut tok bilong mi ol i ken amamas. . . . Ol man i kisim mi, ol i save kisim laip.”—PROVEP 8:34, 35.
1, 2. (a) Long bipo na long nau i no gat gutaim, tasol long nau sampela man i tok wanem? (b) Bilong wanem wok bilong ol man i no inap kamapim gutaim tru?
BIPO i no gat gutaim na nau long taim bilong yumi, planti pait moa yet i bin kamap, tasol sampela man i tok, ol man i wok long painim rot bilong stretim dispela hevi. Ol i tingim ol samting ol bikpela bos bilong graun i bin mekim, em ol i bin bung wantaim na pasim tok long kamapim gutaim na ol i bin sainim ol pepa. Na Yunaitet Nesen i bin makim yia 1986 i olsem “Yia Bilong Gutaim long Olgeta Hap”! Ol i ting olsem nau bai ol lain man i kirap na wok strong moa long kamap wanbel wantaim ol narapela lain, na liklik taim tasol bai gutaim i kamap.
2 Tasol olsem wanem long ol wok ol man i bin mekim long bipo bilong kamapim gutaim long graun? Ol i bin kamapim gutaim tru bilong i stap oltaim? Sapos ol man inap kamapim kain gutaim olsem, orait longtaim pinis, taim i no gat yet 5 bilion manmeri i stap long graun, em ol i bruk bruk long 160 lain na long kain kain tingting politik na wok bisnis na lotu, bai ol i kamapim pinis dispela gutaim. Tasol ol i no bin kamapim gutaim; na ol wok ol bikpela bos bilong dispela graun i mekim i no inap kamapim gutaim. Bilong wanem ol i no inap kamapim? Wanpela as bilong dispela i olsem: Long nau ol hevi bilong graun i go bikpela olgeta na ol man yet i no inap tru long stretim. Jeremaia 10:23 (NW) i tok stret olsem: “I no wok bilong man long bosim wokabaut bilong em.”
Bilong Wanem Wok Bilong Ol Man i No Inap Kamapim?
3. I gat wanem narapela as na ol man na ol lain man i no inap kamapim gutaim tru?
3 Tasol i gat narapela as na ol man na ol lain man i no inap kamapim gutaim tru long graun. Long 1 Jon 5:19 Baibel i tok: “Seten i stap het bilong olgeta man bilong graun.” Na Revelesen 12:9 i kamapim long ples klia dispela samting. Revelesen i tok Seten “em i man bilong giamanim olgeta manmeri bilong graun.” Na long 2 Korin 4:4 Baibel i kolim Seten olsem “god giaman bilong dispela graun.” Olsem na olgeta gavman na bikpela bisnis na lotu i bosim dispela graun na i kamapim pasin bilong pait na bagarapim man, ol i stap aninit long strong bilong Seten. Wok bos bilong Seten i bin kamapim pasin nogut nau i stap long graun; i no wok bos bilong God. Olsem na Baibel i stori long save i kam long God na i tok, i no gat wanpela hetman bilong dispela graun em i bin kisim dispela save.—1 Korin 2:8; Luk 4:5, 6.
4. Taim namba wan tumbuna papamama bilong yumi i no harim moa tok bilong Jehova, wanem samting i kamap?
4 Seten i bikhet long God na em i pulim namba wan man na meri, em tumbuna papamama bilong yumi, na tupela tu i bikhet long God. Tupela i harim tok bilong Seten na sakim tok bilong God. Dispela samting i nogutim olgeta manmeri na inap olsem 6,000 yia ol i bin karim bikpela pen na hevi. Baibel i tok klia olsem Seten i giamanim ol man na ol i ting, sapos ol i sakim tok bilong Man bilong wokim ol, dispela bai helpim ol. (Jenesis 3:1-5) Jehova i gat gutpela save na tingting na em i larim ol man i bosim wokabaut bilong ol yet i kam inap long nau. Ol samting i bin kamap insait long dispela planti handet yia i go pinis i kamapim long ples klia olsem ol man i no inap bosim gut dispela graun.—Diuteronomi 32:5; Eklisiastis 8:9.
5. Sapos ol man inap kamapim gutaim, bai i gat wanem hevi i stap yet?
5 Taim Adam tupela Iv i no harim moa tok bilong Jehova, em i As bilong laip i gutpela olgeta, nau tupela i gat sin na bihain tupela i dai. Olsem na yumi olgeta lain bilong tupela, taim mama i karim yumi, sin i stap long skin bilong yumi na yumi no gutpela olgeta. Yumi olgeta man yumi save sik na i go lapun na i dai. (Rom 5:12) Olsem na sapos ol man inap kamapim gutaim, bai ol i no inap pinisim ol hevi sin i bin kamapim. Bai sik na lapun na dai i painim yet yumi. Seten yet i as bilong dispela, olsem na Jisas i tok: “Seten . . . em i man bilong kilim man i dai [wanpela kilman]. Na em i no bihainim pasin i tru.” (Jon 8:44) Planti milion milion man ol i bin i stap long graun na ol i dai pinis na i olsem Seten yet in bin kilim olgeta i dai.
6. Husat ol i bin bagarapim pasin bilong i stap wanbel na bel isi? Wanem samting bai painim ol?
6 Seten i bin pulim sampela ensel tu long bihainim em. Ol tu i bikhet long God. Olgeta dispela spirit nogut i no laik harim tok bilong Jehova. Olsem na Seten wantaim ol spirit nogut na ol man bilong dispela graun ol i bikhet long God, ol i bin kamapim pasin nogut nau i stap long graun. Inap olsem 6,000 yia ol i bin sakim tok bilong God na traim save bilong ol yet long bosim graun. Olgeta i mas pinis pastaim na bai dispela pasin nogut i pinis. Rom 16:20 i tok promis olsem: “God, em i as bilong bel isi, liklik taim bai em i krungutim Seten” wantaim olgeta spirit nogut na olgeta man i no laik harim taim God yet i tok.—Matyu 25:41.
Yumi Mas Harim Gut Tok Moa Yet long Nau
7. Bilong wanem yumi mas wok strong moa long mekim wok bilong Jehova long nau?
7 Nau yumi stap long pinis tru bilong “las taim.” (2 Timoti 3:1-5) Olsem na yumi mas putim yau moa yet long ol tok Jehova i givim long yumi. Na yumi mas laik moa yet long lusim ol samting bilong yumi yet bambai yumi inap mekim wok bilong Em. Bilong wanem yumi mas wok strong moa long mekim? Long wanem Seten i save em i gat “sotpela taim tasol.” (Revelesen 12:12) Olsem na em i wok strong moa long paulim ol man na pulim ol long mekim pasin nogut na bagarapim ol.
8. (a) Bilong wanem ol birua i no inap pasim wok bilong autim tok? (b) Yumi mas mekim wanem na bai God i sambai yet long yumi?
8 Seten i laik pasim ol Witnes Bilong Jehova bambai i no ken autim gutpela tok bilong Kingdom long ol man. Tasol em i no inap pasim ol, long wanem Jehova i tok promis pinis long ol, olsem: “Olgeta samting ol man i mekim bilong daunim yupela, ol dispela samting bai lus nating.” (Aisaia 54:17, NW) Olgeta man i birua long ol wokboi bilong Jehova ol i “pait long God.” (Aposel 5:38, 39) Spirit bilong Jehova, na Krais Jisas, na ol planti planti strongpela ensel i helpim ol wokboi bilong Jehova hia long graun, olsem na wok bilong autim tok bilong Kingdom i kamap strong moa long olgeta yia. Ol wokboi bilong God i mas bihainim tok bilong Jems 4:7, 8 bambai God i ken sambai yet long ol, em i tok: “Yupela i mas daunim bel na stap aninit long God. Yupela i mas sakim Seten, na bai em i lusim yupela na ranawe. Yupela i mas i go klostu tru long God, na bai em i kam klostu tru long yupela.”
9. Bilong wanem yumi no ken ting Seten i no inap giamanim o pundaunim yumi?
9 Tasol yu no ken ting Seten i no inap giamanim yu o pundaunim yu. Baibel, em Tok Bilong God, i toksave olsem: “Yupela i mas tingting stret na was gut. Seten, birua bilong yupela, em i olsem wanpela laion i krai strong. Em i save wokabaut i go, na i laik painim sampela man bilong kaikai. Yupela i mas i stap strong long bilip, na sakim em.” (1 Pita 5:8, 9) Sapos yu save i gat wanpela laion nogut i raun long hap bilong yu, bai yu mekim ol samting bilong lukautim yu yet wantaim famili bilong yu, a? Seten i raun olsem wanpela laion na em i laik kaikai yumi, olsem na yumi mas lukaut gut. Yumi mas was gut moa yet bambai em i no ken bagarapim yumi. Tasol sori, planti man ol i no was gut, long wanem ol i no save Seten em i stap. Bilong wanem ol i no save? Long wanem ol i no laik harim Tok Bilong Jehova. Ol i no tingting gut na wanem samting bai kamap? “Sapos man i planim pikinini bilong kaikai, orait dispela kain kaikai tasol bihain bai em i kamautim.”—Galesia 6:7.
Taim Ol i Tok “Em i Gutaim Nau”
10, 11. (a) Ating sampela wok ol man i mekim bilong kamapim gutaim bai kamap gutpela liklik, tasol yumi no ken lusim tingting long wanem samting? (b) Wanem tok profet long Baibel i stori long wok ol lain man bai mekim long taim bilong yumi bilong kamapim gutaim? (c) Kain gutaim olsem em bilong i stap oltaim o olsem wanem?
10 Ating sampela wok ol man i mekim bilong kamapim gutaim bai kamap gutpela liklik, tasol was gut. Yu no ken lusim tingting olsem Jehova i no bin givim wok long wanpela lain o oganaisesen bilong dispela graun bilong kamapim gutaim. Jehova i gat rot bilong em yet bilong kamapim gutaim. Kingdom bilong Em long han bilong Krais, dispela tasol em i rot bilong kamapim gutaim. Olsem na maski i olsem ol lain man i laik kamapim gutaim, tasol dispela gutaim bai stap liklik taim tasol na i no gutaim tru. Bai i no gat senis tru i kamap. Pasin nogut, na pasin bilong bagarapim man, na pait, na hangre, na i stap rabis, na ol famili i bruk, na pasin pamuk, na sik, na i dai, na Seten wantaim ol spirit nogut, bai ol i stap yet i go inap long taim Jehova i pinisim olgeta dispela samting. “Sapos [Jehova] i no wokim haus, ol kamda i wok nating.”—Sam 127:1.
11 Tru, tok profet bilong Baibel i makim olsem long taim bilong yumi bai ol man i wok strong long kamapim gutaim. Baibel i tok: “Yupela yet i save pinis, De bilong Bikpela bai i kamap olsem stilman long nait. Bai ol i tok, ‘Em i gutaim nau, yumi stap gut.’ Long dispela taim tasol samting bilong bagarapim ol bai i kamap kwiktaim long ol, olsem pen i save kamap long meri i laik karim pikinini. Na ol i no inap abrusim dispela samting.” (1 Tesalonaika 5:2, 3) Tasol taim ol i tok, “Em i gutaim nau,” i no olsem ol samting i kamap gutpela. Nogat. Long 2 Timoti 3:13 Baibel i tok, “Ol man nogut na ol profet giaman bai ol i giamanim ol man. . . . Na pasin bilong ol bai i kamap nogut tru.” Bos bilong wanpela lain bilong lukautim graun samting, em i tok stret olsem: ‘Nambawan bikpela hevi i painim ol man long nau, em olsem: Ol man i bikhet moa yet na ol gavman i no inap bosim ol.’
12. O1 man bai tok, “Em i gutaim nau,” tasol ol wokboi bilong Jehova i save, wanem samting tru bai kamap?
12 Bihain, taim ol i tok, “Em i gutaim nau,” ating bai planti man i bilipim tok bilong ol. Tasol ol wokboi bilong Jehova i no ken bilipim, long wanem ol i save harim gut taim God yet i tok. Ol i save long tok bilong God long Baibel, olsem na ol i save ol man i no inap kamapim gutaim tru. Ol i save, taim ol dispela lain i tok “Em i gutaim nau,” long dispela taim tasol “samting bilong bagarapim ol bai i kamap kwiktaim long ol.” Na dispela samting i olsem mak na i makim olsem “bikpela hevi tru,” em Jisas i tok bai kamap long taim bilong yumi, em i laik kirap kwiktaim. Jisas i tok: “Long dispela taim bai i gat bikpela hevi tru. Long taim graun i nupela yet inap nau, kain hevi olsem i no bin kamap bipo. Na bihain tu bai i no gat hevi olsem.”—Matyu 24:21.
13. Baibel i stori olsem wanem long pinis bilong ol gavman bilong dispela graun?
13 Long taim bilong “bikpela hevi tru” bai olgeta gavman bilong dispela graun i pinis. Ol man i no ken bosim moa dispela graun. Sam 2:2-6 i tok: “Olgeta king bilong ol tu i redi long pait. Na ol hetman i bung na tok nogut long God na long dispela man em i makim pinis na i stap nambawan. Ol i tok, ‘Yumi brukim hankap bilong tupela, na yumi rausim rop bilong tupela i pasim yumi’ God i sindaun long heven, em i lap na em i tok bilas long ol. Em i belhat pinis na i givim strongpela tok long ol. Na bikpela kros bilong em bai i mekim ol i pret nogut. Na bai em i tokim ol olsem: ‘Mi yet mi makim pinis wanpela man bilong i stap king, na mi putim em i stap long Saion [long heven], em i maunten holi bilong mi.’” Na Sam 110:5, 6 i tok moa olsem: “Taim [Jehova] i belhat bai em i pait wantaim ol king nabaut na bai em i winim pait na daunim ol tru. Em bai i bekim rong bilong ol lain manmeri.” Olgeta wok ol lain politik i tingting long mekim bai pinis, long wanem Aisaia 8:9, 10 (NW) i tok: “Pasim let bilong yupela, na bai ol i brukim yupela olgeta! Pasim let bilong yupela, na bai ol i brukim yupela olgeta! Tingim wanpela wok yupela i laik mekim, na bai ol i bagarapim! Mekim wanpela tok, na em bai i lus nating, long wanem God i stap wantaim mipela!”
Yumi Ken Bilip Tru Olsem Sampela Bai Abrusim Bagarap
14. Bilong wanem yumi bilip tru olsem sampela man bai abrusim bagarap taim pasin bilong nau i pinis?
14 Yumi bilip tru olsem Jehova bai givim save long ol wokboi bilong Em bambai ol i ken mekim ol samting ol i mas mekim na abrusim bagarap long taim bilong “bikpela hevi tru.” Bilong wanem yumi ken bilip tru olsem sampela bai abrusim bagarap? Long wanem tok profet i stap long Revelesen 7:9, 14 i makim olsem ‘bikpela lain manmeri’ bai winim taim bilong bikpela hevi. Bilong wanem ol i abrusim bagarap? Long wanem ol i harim gut tok bilong Jehova, na Jehova i skulim ol gut. Long dispela rot ol manmeri bilong ‘bikpela lain’ ol inap mekim ol samting olsem Revelesen 7:15 i tok: “Long san na long nait ol i save lotu long em long haus holi bilong en.” Ol i bihainim laik bilong God, na God i orait long ol, na taim pasin bilong dispela graun i pinis, bai God i lukautim ol na ol i no ken bagarap.—1 Jon 2:15-17.
15. Joel i stori olsem wanem long “krungutim” o pinisim dispela pasin nau i stap long graun? Na wanem samting bai painim ol wokboi bilong God?
15 Joel 3:13-16 (NW) tu i stori long ol wokboi bilong Jehova bai abrusim bagarap taim dispela pasin bilong nau i pinis olsem kaikai bilong rop wain ol i krungutim long tang wain. Em i tok: “Kisim naip na katim kaikai, long wanem kaikai i mau pinis. . . . tang wain i pulap pinis, na wain i kapsait; pasin bilong ol i nogut tru. Bikpela lain, planti man tru, ol i stap long ples daun bilong kot, long wanem de bilong Jehova i klostu long ples daun bilong kot. San na mun bai i tudak, na ol sta bai i no lait. Long Saion [long heven] Jehova bai singaut strong, . . . Heven na graun bai meknais; tasol Jehova bai i stap olsem ples hait bilong lain bilong em.”
16. I gat wanem ol narapela tok profet i makim olsem Jehova bai lukautim lain bilong em na ol i no ken bagarap?
16 Na long Aisaia 26:20, 21 (NW) Jehova i stori long dispela taim bihain na em i tok: “Yupela lain bilong mi, yupela go insait long rum bilong yupela insait long haus na pasim dua. Yupela hait inap liklik taim, inap long taim kros i pinis. Harim! Jehova i laik lusim ples bilong em na i kam, na em i laik givim strafe long ol man bilong dispela graun ol i bin mekim rong.” Olsem na Sefanaia 2:2, 3 (NW) i tok strong olsem: “Taim de bilong kros bilong Jehova i no painim yet yupela, yupela i mas painim Jehova, em yupela olgeta man bilong graun i gat pasin daun na i save bihainim tok bilong Em. Bihainim stretpela pasin na pasin daun. Na olsem ating bai yupela i gat ples hait long de bilong kros bilong Jehova.”
“Ran i Go” long Jehova
17. (a) Yumi mas mekim wanem na bai Jehova i lukautim yumi? (b) Wanem rong bilong ol manmeri i stap long taim bilong Bikpela Tait?
17 Provep 18:10 i tok: “[Jehova] i olsem wanpela strongpela haus. Ol stretpela man i ken ran i go long en na stap gut.” Olsem wanem long yu? Yu “ran i go” long Jehova? Yu tingim ol tok Jisas i mekim long ol manmeri long taim bilong Noa? Em i tok, “ol i kaikai, na ol i dring, na ol i marit, i go inap long taim Noa i go insait long sip. Ol i no ting, na ol i stap olsem tasol, na bikpela tait i kamap nau na i tekewe dispela manmeri olgeta.” (Matyu 24:38, 39) Ol i gat wanem rong? Ol i tingim tumas ol narapela samting na ol i no harim tok bilong God taim em i givim tok long ol long maus bilong wokboi bilong em, Noa, em i “man bilong tokaut long stretpela pasin.” (2 Pita 2:5) Ol i no harim gut tok, olsem na taim Bikpela Tait i kamap em “i tekewe dispela manmeri olgeta.” Ol i bagarap.
18. Ating ol i ‘gutpela’ man, tasol bilong wanem dispela samting tasol i no helpim ol long abrusim bagarap?
18 Planti manmeri i bin bagarap long Bikpela Tait, ating ol i no olsem man nogut. Ating ol i ting ol i gutpela man; ol i no save insait long pasin pait i pulap long graun long dispela taim bipo. Tasol dispela samting i no bin helpim ol long abrusim bagarap, long wanem ol i no hevi long pasin nogut ol man i mekim na i olsem ol i orait long en. Na bikpela samting em olsem: Ol i no bin “ran i go” long Jehova; taim wokboi bilong God i autim tok long ol, ol i no harim gut tok. Ol i no mekim ol samting ol i mas mekim bambai ol i no ken bagarap. Tasol ol man i harim gut tok ol i abrusim bagarap na i stap laip.
19. Ol wokboi bilong Jehova i stap gutpela olsem wanem long nau? Bilong wanem ol i stap gutpela olsem?
19 Long nau God i tok long givim bel isi na gutpela sindaun long ol man i harim gut tok bilong em. Na wanem samting bai painim ol? Aisaia 54:13 (NW) i tok: “Jehova bai skulim olgeta pikinini bilong yu, na ol dispela pikinini bilong yu bai stap bel isi tru.” Yes, bai Jehova i blesim ol manmeri bilong em na “ol i stap bel isi.” (Sam 29:11) Olsem na long nau, maski ol Witnes Bilong Jehova i stap namel long ol man i save pait na kros na birua, tasol ol yet i pas gut wantaim na i stap wanbel tru. Ol i stap olsem wanpela bikpela lain brata na narapela i laikim tru narapela. Ol bikpela bos bilong graun na lain bilong ol na ol lotu bilong ol, ol i laik i stap wanbel olsem, tasol ol i no inap. Bilong wanem ol i no inap i stap wanbel? Long wanem, ol i no save harim gut tok bilong God. Olsem na ol i no bihainim tok bilong Em. Tasol ol Witnes Bilong Jehova i save harim gut tok bilong God. Ol i tingim gut tok bilong Eklisiastis 12:13 (NW) i tok: “Yumi mas pret long trupela God na bihainim ol lo bilong em. Long wanem, dispela tasol em i wok bilong man.”
20. Ol man i laik abrusim bagarap na i stap long nupela taim God bai kamapim, olgeta i mas mekim wanem?
20 Olgeta manmeri i laik i stap long nupela taim God bai kamapim, ol i mas bihainim dispela tok. Ol i no ken lusim taim; kwiktaim ol i mas “ran i go” long Jehova. Ol i mas larim gutpela na stretpela tingting God i givim long ol em i stiaim wokabaut bilong ol, em Baibel i tok piksa long en na i tok: “Gutpela na stretpela tingting i skruim tok olsem, ‘․․․ Yupela mas harim gut tok bilong mi na bihainim ol pasin bilong mi. Sapos yupela i mekim olsem, bai yupela i amamas. Yupela mas larim mi skulim yupela, na bai yupela i kisim gutpela tingting na save. Yupela no ken givim baksait long dispela wok. Ol man i save harim gut tok bilong mi ol i ken amamas. . . . Ol man i kisim mi, ol i save kisim laip.’”—Provep 8:32-35.
Bai Yu Bekim Wanem Tok?
◻ Bilong wanem wok ol man i mekim i no inap kamapim gutaim?
◻ Bilong wanem yumi mas harim moa yet tok bilong Jehova long nau?
◻ Taim ol i tok, “Em i gutaim nau,” wanem samting tru bai kamap?
◻ Yumi mas mekim wanem bambai yumi ken abrusim bagarap na i stap long nupela taim God i laik kamapim?
[Picture on Page 18]
Seten i olsem wanpela laion i krai strong; nau em i wok strong moa long pulim ol man long mekim pasin nogut na bagarapim ol
[Picture on Page 19]
Taim dispela pasin bilong nau i pinis olsem kaikai bilong rop wain ol i krungutim, long dispela taim “Jehova bai i stap olsem ples hait bilong lain bilong em”