Tingim Gut De Bilong Jehova
“Liklik taim tasol na De bilong [Jehova] bai i kamap long [ples daun bilong mekim kot].”—JOEL 3:14.
1. Pait holi i laik kamap, em Jehova i tokaut long en, olsem wanem dispela bai narapela kain tru long ol pait “holi” bilong ol man?
“GOD i tokim Joel long autim dispela tok long olgeta lain manmeri olsem, ‘Yupela i mas redi long pait.’ ” (Joel 3:9) Olsem wanem? Wanpela pait holi i laik kamap? Taim yumi tingting long ol samting nogut i bin kamap long ol pait bilong lotu, na long tupela bikpela pait bilong olgeta hap—em ol misin i holim nating nem Kristen i bin go pas long ol dispela pait—orait, yumi no laik tru bai narapela pait “holi” olsem i kamap, a? Tasol dispela pait holi em Joel i tok profet long en, em i no wanpela pait bilong ol lain bilong dispela graun, em ol i save birua na mekim pait bilong kisim graun samting bilong narapela lain na ol i giaman na tok, ol i mekim pait bilong helpim lotu. Dispela pait em stretpela pait. Em pait bilong God bilong pinisim ol pasin nogut i stap long graun, olsem pasin mangal, na kros na birua, na pasin giaman, na hatpela pasin. Dispela pait bai kamapim long ples klia olsem Jehova em i Nambawan Bikpela na i stret em i mas bosim olgeta samting em i bin wokim. Dispela pait bai opim rot bambai Kingdom bilong Krais i ken bringim ol man i go insait long Taim Bilong 1,000 Yia, em taim bilong olgeta lain long heven na long graun bai stap wanbel wantaim, na bai olgeta i gat gutpela sindaun na i stap amamas, olsem ol profet bilong God long bipo i bin tok.—Buk Song 37:9-11; Aisaia 65:17, 18; Kamapim Tok Hait 20:6.
2, 3. (a) Wanem dispela “De bilong Bikpela,” em Joel 3:14 i tok profet long en? (b) Bilong wanem i stret samting nogut bilong dispela de i mas painim ol lain bilong dispela graun?
2 Orait, wanem dispela “De bilong Bikpela” o ‘De bilong Jehova,’ em Joel 3:14 i tok profet long en? Jehova yet i tok: “Klostu bai taim nogut i kamap, em De bilong Bikpela. Em i taim bilong Bikpela i mekim save long olgeta lain pipel. Long dispela taim God I Gat Olgeta Strong bai i salim bikpela bagarap i kam . . . Sori tumas, dispela De bai i nogut tru.” Olsem wanem dispela De em i taim bilong bikpela bagarap? Bihain profet i stori moa olsem: “Planti tausen manmeri bai i bung long ples daun bilong mekim kot. Liklik taim tasol na De bilong Bikpela bai i kamap long dispela ples.” (Joel 1:15; 3:14) Dispela De em i taim bilong Jehova i givim strafe long ol planti tausen manmeri i givim baksait long em na ol i no daun long em, em i King tru bilong heven na graun. Jehova i mekim kot na em i tingting pinis long bagarapim pasin Satan i bin kamapim long graun na i kalabusim ol manmeri inap longtaim pinis.—Jeremaia 17:5-7; 25:31-33.
3 Dispela bikpela bagarap i mas painim pasin nogut nau i stap long graun. Tasol tru pasin bilong graun i nogut olgeta na i mas bagarap? Sapos yu skelim ol samting i kamap long graun yu ken save, tru tumas, pasin bilong graun i go nogut olgeta! Long Matyu 7:16, Jisas i kolim lo bilong skelim dispela samting, em i tok, ‘Yupela lukim pasin bilong ol na bai yupela i ken save long ol.’ Skelim pasin i stap long ol biktaun long olgeta hap—pasin nogut na pasin doti tru i pulap long ol dispela biktaun, a? Olsem pasin bilong kisim ol drak, pasin raskol, pret, pasin sem, na pasin bilong tromoi pipia na bagarapim ples. Long planti kantri, nau tasol ol man i kamap fri liklik, tasol wok gavman long ol dispela kantri i paul, na kaikai i sot, na planti manmeri i stap rabis. Winim wan bilion manmeri long graun i kisim liklik skel kaikai tasol na hangre i laik kilim ol i dai. Na sik AIDS i go bikpela, long wanem, planti manmeri i mekim nabaut long ol drak, na mekim pasin pamuk. Dispela bikpela hevi i kamap pinis long planti hap bilong graun. Tru, bipo i gat pasin nogut na hevi, tasol bihain long taim Namba Wan Pait i kirap wantu tasol long yia 1914, pasin bilong graun i wok long i go nogut moa yet, na taim bilong planti hevi tru i bin kamap.—Skelim tok bilong 2 Timoti 3:1-5.
4. Jehova i singautim ol lain bilong dispela graun long i kam mekim wanem?
4 Tasol Jehova i bin wok long bungim sampela manmeri bilong olgeta lain na em i mekim ol i kamap wanpela lain, na ol i amamas long em i skulim ol long ol pasin em i laik bai ol i mekim, na ol i wokabaut long rot em yet i makim. Dispela lain ol i stap long olgeta hap na ol i bin paitim ol bainat i kamap olsem ain bilong brukim graun—ol i lusim olgeta pasin pait bilong dispela graun. (Aisaia 2:2-4) Olaman! Ol i mekim ol bainat i kamap olsem ain bilong brukim graun! Tasol dispela i narapela kain olgeta long ol samting Jehova i singautim ol man long mekim long Joel 3:9, 10, a? Em i tok: “Yupela i mas redi long pait. Singautim olgeta soldia i kam bung, na i go bilong pait. Paitim ol bikpela ain bilong brukim graun bai ol i kamap olsem bainat, na paitim ol bikpela naip bai ol i kamap olsem spia.” Dispela tok i go long ol hetman bilong graun—Jehova i singautim ol wantaim olgeta ami bilong ol i kam pait long em long Armagedon. Tasol ol i no inap winim pait! Bai ol i lus olgeta!—Kamapim Tok Hait 16:16.
5. Katim pinis ‘ol pikinini wain bilong diwai wain bilong graun’ na bihain wanem samting i kamap long ol?
5 Ol strongpela hetman bilong graun i bin sakim tok bilong Nambawan Bikpela King Jehova na ol i bin hipim planti samting nogut tru bilong pait. Tasol dispela wok bilong ol bai lus nating! Long Joel 3:13, Jehova i tok: “Ol dispela lain i manmeri nogut tru. Olsem na yupela i mas katim ol olsem man i save katim kaikai i mau pinis. Na krungutim ol strong, olsem man i save krungutim pikinini bilong wain long tang ston na wain i pulap tru na i kapsait. Olsem na bai ol dispela lain i bagarap tru.” Dispela tok i wankain olsem tok i stap long Kamapim Tok Hait 14:18-20, em i tok wanpela ensel i holim naip i sap moa em i mas ‘katim ol pikinini bilong diwai wain bilong graun, long wanem, ol i mau pinis.’ Ensel i katim ol long naip bilong em, na em i tromoi ol dispela bikhet lain i go insait long “bikpela tang ston bilong krungutim ol pikinini wain. Dispela em i makim belhat bilong God.” Long tok piksa, blut i kamap na i lusim tang i kam ausait, na dispela blut i kam antap inap long mak bilong hap ain i stap long maus bilong ol hos, na i ran i go inap 300 kilomita! Em samting nogut tru i laik painim ol lain i bagarapim nem bilong Jehova!
Ol i Bihainim Ol Lo Bilong Kantri
6. Ol Witnes Bilong Jehova i save ting olsem wanem long ol lain man wantaim ol hetman bilong ol?
6 Olsem wanem? Ol Witnes Bilong Jehova i no laik daun long ol lain bilong dispela graun wantaim ol hetman bilong ol? Nogat tru! Tasol ol i nolaik tru long ol pasin nogut em olgeta man inap lukim, na ol i toksave olsem de bilong Jehova bilong givim strafe i wok long i kam klostu hariap. Ol i save mekim pasin daun na bihainim tok bilong Pol long Rom 13:1, olsem: “Olgeta man i mas i stap aninit long ol gavman.” Olsem na ol Witnes i save daun long ol dispela hetman bilong graun, tasol ol i no save lotu long ol. Ol i man bilong bihainim ol lo bilong kantri na ol i save bihainim ol lo bilong Baibel i tok, yumi mas wokabaut stret, na mekim tok i tru tasol, na stap klin, na ol i save lainim famili bilong ol long bihainim ol gutpela stretpela pasin. Ol i save helpim ol narapela bambai ol tu i ken lain long mekim olsem. Ol i save wok long sindaun gut wantaim olgeta man; ol i no save insait long ol bung bilong kros long gavman o insait long wok bilong daunim gavman. Nogat. Ol Witnes Bilong Jehova i wok strong bambai ol inap kisim gutpela nem tru olsem ol man bilong bihainim gut ol lo bilong ol gavman, tasol ol i wetim Nambawan Bikpela, em King Jehova, i kamapim wanpela stretpela gavman bilong bosim graun na kamapim bek gutaim tru long graun.
Em Bai Givim Strafe Long Ol
7, 8. (a) Olsem wanem ol lain man bai guria na i olsem tudak i karamapim ol? (b) Joel i olsem piksa na i makim wanem lain long nau? God bai mekim gut long dispela lain olsem wanem na em i no ken mekim olsem long ol narapela man long graun?
7 Jehova i mekim strongpela tok piksa na stori moa long strafe em bai givim long ol lain bilong graun olsem em i tingting pinis long mekim long taim em i skelim ol long kot. Em i tok: “Bai san na mun i kamap tudak, na ol sta bai i no lait moa. Bikpela i stap long maunten Saion long Jerusalem na em i bikmaus moa yet. Singaut bilong en i pairap olsem klaut i pairap, na graun wantaim skai i guria. Tasol Bikpela bai i lukautim olgeta manmeri bilong en na ol i no inap bagarap.” (Joel 3:15, 16) Long nau i olsem ol manmeri i gat planti samting na ol i stap long lait, tasol bai samting nogut i painim ol na bai i olsem tudak i laik karamapim ol. Ol lain bilong dispela graun i bruk bruk na bai ol i pret na guria—bikpela bagarap tru bai painim ol olsem bikpela guria i bagarapim ol, na bai ol i pinis olgeta!—Hagai 2:20-22.
8 Tasol tingim gutpela tok promis Jehova i bin mekim. Em i tok, em bai lukautim olgeta manmeri bilong em na ol i no inap bagarap! Bilong wanem Jehova bai mekim olsem? Long wanem, ol i wanpela lain tasol—bilong olgeta hap—na ol i bin bihainim tok bilong Jehova, em i tok, ‘Yupela i mas save, mi Jehova, mi God, Bikpela bilong yupela.’ (Joel 3:17) Insait bilong nem bilong Joel i olsem “Jehova i God,” olsem na Joel i gutpela piksa bilong liklik hap lain Witnes long nau, em Jehova i bin makim ol long spirit holi na ol i wok strong long autim tok na litimapim nem bilong Jehova, em i King tru. (Lukim Malakai 1:11.) Sapos yumi lukim ol tok long kirap bilong tok profet bilong Joel, bai yumi lukim olsem em i stori stret long wok bilong lain bilong God long nau.
Wanpela Lain Grasopa
9, 10. (a) Joel i tok profet long wanem samting nogut bai kamap? (b) I gat wanem tok long Kamapim Tok Hait i wankain olsem bilong Joel? Dispela samting nogut i mekim wanem long ol lain i holim nating nem Kristen?
9 Orait, harim “dispela tok Bikpela i givim long Joel”: “Yupela lapun manmeri, harim. Na yupela olgeta manmeri bilong Juda, harim. Mi laik askim yupela long ol samting nau i kamap. I gat kain samting olsem i bin kamap bipo long taim bilong yupela na long taim bilong ol tumbuna bilong yupela, o nogat? Mi ting nogat. Yupela i mas tokim ol pikinini bilong yupela long ol dispela samting. Na ol i mas tokim ol pikinini bilong ol, na ol pikinini i mas tokim ol lain i kamap bihain. Ol 4-pela kain grasopa i kamap na pinisim tru olgeta lip bilong olgeta samting. Ol samting namba wan lain grasopa i larim i stap, orait ol namba 2 lain i kam pinisim. Na ol namba 3 na namba 4 lain i mekim olsem tasol, na ol i pinisim tru olgeta samting.”—Joel 1:1-4.
10 Dispela em i narapela kain wok tru, na olgeta lain i kamap bihain bai tingim. Planti binatang olsem ol grasopa i kam, narapela lain i bihainim narapela lain i kam, na ol i bagarapim ples. Dispela i makim wanem samting? Kamapim Tok Hait 9:1-12 tu i stori long bikpela lain grasopa i kam, em Jehova i salim ol i kam na ol i gat “wanpela king i stap hetman bilong ol. Dispela king em i ensel bilong dispela hul i go daun moa na i no gat as bilong en.” Dispela king em Krais Jisas. Long tok Hibru ol i kolim nem bilong em, Abadon (tok Grik, “Apolion”); insait bilong dispela nem i olsem “Man Bilong Bagarapim Olgeta Samting.” Ol dispela grasopa i makim liklik hap lain bilong ol Kristen God i bin makim ol, olsem lain remnan. Nau, long de bilong Bikpela, ol i go bagarapim gaden bilong ol misin i holim nating nem Kristen—ol i kamapim long ples klia lotu giaman, na ol i tokaut long Jehova bai bekim pe nogut long en.
11. Husat i kam helpim lain grasopa bilong nau? Tok ol i autim i sutim tru wanem ol lain?
11 Olsem Kamapim Tok Hait 9:13-21 i tok, planti milion soldia i sindaun long ol hos i bihainim ol grasopa i kam na ol tu i bagarapim samting. Dispela i makim stret ol planti milion “arapela sipsip,” winim 4 milion, ol i kam helpim liklik lain remnan, em ol inap sampela tausen tasol. Dispela tupela lain wantaim i olsem bikpela lain soldia tru na ol birua i no inap winim ol long pait! (Jon 10:16) Ol i wok wantaim long tokim ol man, strafe bilong Jehova bai painim ol lain i lotuim ol god giaman na ol i holim nating nem Kristen, na ol manmeri ‘i bin kilim i dai ol arapela, na wokim posin samting, na mekim pasin pamuk, na stil, na ol i no bin tanim bel na givim baksait long ol dispela pasin.’ Ol dispela tok long strafe bilong Jehova i sutim ol man na givim pen nogut long ol. I sutim tu ol bikpela man bilong lotu—Katolik na Talatala wantaim—em ol i bin helpim ol bikpela pait i bin kamap long taim bilong yumi na i kilim i dai planti man, na ol dispela tok i sutim tu ol pris i save mekim pasin sem long ol pikinini, na ol evanjelis long televisen ol i mekim pasin doti tru.
12. Bilong wanem i stret ol bikpela man bilong lotu i gat nem Kristen ol i mas kisim tok long strafe bai painim ol? Klostu nau wanem samting bai kamap long ol wantaim olgeta lain bilong Bikpela Babilon?
12 Jehova i singaut strong long ol dispela man nogut bilong lotu na em i tok: “Yupela ol man bilong spak, yupela kirap na krai. Na yupela ol man i save dring wain, yupela tu i mas krai, long wanem, ol grasopa i bagarapim pinis olgeta pikinini wain bilong wokim nupela wain.” (Joel 1:5) Long taim bilong yumi ol misin i holim nating nem Kristen ol i bin lusim ol lo bilong God long Baibel long stretpela pasin yumi mas bihainim, na ol i bihainim pasin bilong ol manmeri bilong dispela graun, em ol i orait long kain kain pasin nogut. Lotu giaman wantaim lain bilong en ol i amamas long bihainim ol dispela pasin bilong graun; dispela i swit long ol, olsem ol i dring gutpela wain. Tasol sori tru! Samting nogut tru i bin kamap long dispela rot—bikpela sik bilong skin na spirit i bin painim ol! Klostu nau bai ol samting i kamap olsem Kamapim Tok Hait 17:16, 17 i stori long en. God yet bai “givim tingting” long ol hetman politik na bai ol i birua long olgeta lotu giaman, em Bikpela Babilon, na bagarapim lotu giaman olgeta. Long dispela taim tasol, olsem long taim em i lukim strafe bilong Jehova i painim em, bai em i lusim slip bilong pasin bilong spak na “kirap.”
“Bikpela Lain”
13. Olsem wanem ol grasopa i olsem “bikpela lain” long ai bilong ol misin i holim nating nem Kristen?
13 Profet bilong Jehova i stori moa long ol grasopa na em i tok, ol i “bikpela lain.” Tru tumas, long ai bilong Bikpela Babilon ol i olsem bikpela lain tru. (Joel 2:2) Ol bikpela man bilong ol misin i gat nem Kristen ol i bel hevi, long wanem, ol i no bin kamapim planti disaipel bilong ol long Japan, em kantri bilong lotu Buda. Tasol long nau, winim 160,000 manmeri bilong Japan em ol i Witnes Bilong Jehova ol i raun long olgeta hap bilong Japan, na ol i mekim Baibel-stadi wantaim ol man long planti famili, winim 200,000. Long Itali i gat 180,000 Witnes Bilong Jehova i stap na ol man i save, dispela lain i namba 2 bikpela lain bilong lotu long dispela kantri; namba wan bikpela lain em ol Katolik. Wanpela pris Katolik long Itali i bel hevi tru, long wanem em i tok, ol Witnes Bilong Jehova i save tekewe ‘10,000 samting gutpela Katolik long misin long olgeta yia.’a Ol Witnes i amamas long ol dispela manmeri i kam insait long lain bilong ol.—Aisaia 60:8, 22.
14, 15. Joel i stori olsem wanem long dispela bikpela lain grasopa? Wanem samting i bin kamap long nau na i truim dispela?
14 Joel 2:7-9 i stori long dispela bikpela lain grasopa, olsem ol Witnes em God i bin makim ol long spirit holi, na i tok: “Ol dispela grasopa i ran i kam olsem ol man bilong pait, na ol i go antap long ol banis bilong taun. Na ol i wokabaut i go stret tasol, olsem ol soldia i mas na wokabaut i go. [Na sapos sampela i pundaun namel long ol spia, ol narapela] i no tanim i go long narapela hap na ol i no pasim rot bilong ol yet. Ol i brukim olgeta banis na i go insait, na i no gat wanpela samting inap long pasim ol. Ol i ran i go long ol taun, na ol i kalapim banis na i go daun insait long taun. Na ol i go antap long ol haus, na i go insait long ol windo olsem ol stilman.”
15 Em gutpela tok piksa tru bilong makim dispela lain “grasopa,” em lain remnan, na nau i gat 4 milion samting poroman i bung wantaim ol, em ol “arapela sipsip”! No gat wanpela “banis,” olsem pasin birua bilong lotu, inap pasim ol. Ol i no pret—ol i wokabaut i go stret tasol—ol i holim strong gutpela pasin ol i kirap pinis long bihainim, em pasin bilong autim tok long ol man na mekim ol narapela wok Kristen. (Lukim Filipai 3:16.) Ol i no laik lusim lo bilong God liklik, na ol i redi long i dai tu bambai ol i ken holimpas. Planti tausen Witnes ‘i bin pundaun namel long ol spia’—ol i bin i dai, long wanem, ol i no laik salut long Hitler taim em i stap bos bilong Jemani, em wanpela Katolik. Lain grasopa i bin autim gut tok long “ol taun,” em ol misin i holim nating nem Kristen. Ol i bin kalapim olgeta samting i laik pasim rot bilong ol. Ol i bin go insait long ol haus olsem stilman, long wanem, ol i bin i go long haus bilong ol man na lusim planti bilion buk na nius bilong Baibel long ol haus. Em laik bilong Jehova long ol i mas mekim dispela wok bilong autim tok, na i no gat wanpela samting long heven o long graun i gat strong inap long pasim dispela wok.—Aisaia 55:11.
“Holi Spirit i Pulap Long Olgeta”
16, 17. (a) Truim bilong ol tok bilong Joel 2:28, 29 i bin kamap long wanem taim? (b) Wanem tok profet bilong Joel i gat hap truim tasol long taim bilong ol aposel?
16 Jehova i tokim ol Witnes bilong em: “Yupela Israel [bilong spirit], yupela bai i save olsem mi stap wantaim yupela, na mi [Jehova], mi tasol mi God bilong yupela.” (Joel 2:27) Lain bilong Jehova i kisim save long dispela gutpela samting taim Jehova i kirap truim tok bilong em long Joel 2:28, 29, olsem: “Bihain bai mi kapsaitim spirit bilong mi long olgeta manmeri. Na ol pikinini man na pikinini meri bilong yupela bai i autim tok bilong mi olsem ol profet.” Dispela samting i bin kamap long de Pentikos long yia 33 (C.E.) long taim ol disaipel bilong Jisas i bung i stap na God i kapsaitim spirit holi long ol na “Holi Spirit i pulap long olgeta dispela manmeri.” Long strong bilong spirit holi ol i autim tok, na long dispela wanpela de tasol inap olsem “3,000 manmeri i kam insait” long lain bilong ol.—Aposel 2:4, 16, 17, 41.
17 Long dispela taim bilong amamas, Pita i kolim tu tok bilong Joel 2:30-32, em God i tok: “Bai mi mekim ol narakain samting i kamap long graun na long skai olsem ol mak bilong dispela De. Blut na paia na bikpela smok bai i kamap. Na san bai i kamap tudak na mun bai i kamap retpela olsem blut. Na bihain bai De bilong Bikpela i kamap. Long dispela bikpela De bai olgeta manmeri i pret nogut tru. Na long dispela taim olgeta manmeri i askim mi long helpim ol, bai mi kisim bek ol. Mi Bikpela, mi tok pinis olsem, sampela manmeri i stap long Jerusalem bai i no ken lus. Ol dispela manmeri mi makim bilong mi yet, ol bai i stap gut.” Hap truim tasol bilong dispela tok i bin kamap long yia 70 (C.E.) taim Jerusalem i bagarap.
18. Bikpela truim bilong Joel 2:28, 29 i kirap long wanem taim?
18 Tasol i gat narapela truim bilong dispela tok bilong Joel 2:28-32. Bikpela truim bilong dispela tok profet i bin kamap long Septemba 1919 na bihain long dispela taim. Long Septemba 1919 lain bilong Jehova i bin mekim wanpela kibung long taun Sida Poin, long Ohaio, long Amerika, na planti ol i tingim yet. Ol samting i kamap long dispela kibung i makim klia olsem spirit bilong God i stap long ol, na dispela i strongim lain remnan na ol i kirap long mekim bikpela wok bilong autim tok long olgeta hap bilong graun, na dispela wok i go yet. Long dispela rot, lain i go bikpela tru! Long dispela kibung long Sida Poin, inap olsem 7,000 ol i bin bung, tasol nau dispela lain i go bikpela na inap olsem 10,650,158 manmeri i bin bung bilong tingim i dai bilong Jisas long Mas 30, 1991. Long dispela bikpela lain, 8,850 tasol i tokaut olsem ol i bilong liklik lain em God i makim ol long spirit holi. Olgeta i amamas tru long lukim dispela “kaikai” i bin kamap long olgeta hap bilong graun long wok bilong strongpela spirit bilong Jehova!—Aisaia 40:29, 31.
19. De bilong Jehova i kam klostu pinis na dispela i mas kirapim yumi olgeta wan wan long mekim wanem?
19 Klostu nau bai “De bilong Bikpela i kamap” na bagarapim olgeta pasin samting Satan i bin kamapim long graun. (Joel 2:31) Tasol gutpela tru, “olgeta manmeri i singaut long Bikpela long helpim ol, em bai i kisim bek ol na bai ol i stap gut.” (Aposel 2:21) Dispela bai kamap olsem wanem? Aposel Pita i tok, “De bilong Bikpela bai i kamap wantu tasol olsem ol stilman i save kam,” na Pita i tok moa olsem: “Sapos dispela olgeta samting bai i pinis long dispela kain pasin, orait yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap, na yupela i mas wok strong long hariapim dispela De.” Yumi mas wok strong long tingim De bilong Jehova i hariap i kam klostu nau, na bai yumi amamas tu long lukim “nupela skai na nupela graun” i kamap olsem Jehova i tok promis pinis.—2 Pita 3:10-13.
[Ol Futnot]
a Nius La Repubblica, bilong Rom, long Itali, Novemba 12, 1985, na La rivista del clero italiano, Me 1985.
Yu Inap Bekim Ol Dispela Askim?
◻ Wanem dispela ‘De bilong Jehova’?
◻ Olsem wanem Jisas bai katim ‘ol pikinini wain bilong diwai wain bilong graun’? Bilong wanem em bai mekim olsem?
◻ Kirap long 1919 na bihain long dispela taim olsem wanem bikpela lain “grasopa” i bin givim hevi long ol misin i holim nating nem Kristen?
◻ Wanem samting i bin kamap taim Jehova i kapsaitim spirit bilong em long lain bilong em long yia 33, na long yia 1919?