“Yupela i Mas Was Gut”
“Yupela i mas was gut. Yupela i no save wanem de Bikpela bilong yupela bai i kam.”—MATYU 24:42.
1. Ol wokman bilong Jehova bilong longtaim ol i ting olsem wanem long ol i bin mekim wok bilong em inap planti yia pinis? Stori long wanpela man olsem.
PLANTI wokman bilong Jehova em ol i bin mekim wok bilong em inap longtaim pinis, ol i bin kisim save long tok i tru taim ol i yangpela yet. Olsem dispela bisnisman i bin painim wanpela naispela bis i gat bikpela pe bilong en na em i salim olgeta samting bilong em bilong baim dispela bis, olsem tasol ol dispela sumatin bilong Baibel i daunim laik bilong ol yet na ol i givim laip bilong ol long Jehova, olsem dediket long em. (Matyu 13:45, 46; Mak 8:34) Orait ol i ting olsem wanem long ol i bin wet longtaim tru long lukim ol laik bilong God i kamap long graun, na bipo ol i no bin ting ol i mas wet longtaim olsem? Ol i no bel hevi long dispela samting! Ol i wanbel long tok bilong Brata A. H. Macmillan, em i bin mekim wok bilong God inap olsem 60 krismas na em i tok: “Mi strong moa long i stap strong long bilip bilong mi. Dispela i mekim na mi amamas long i stap laip. Bilip i wok yet long helpim mi na mi no pret long ol samting i laik kamap long bihain.”
2. (a) Long taim stret, Jisas i bin givim wanem tok long lain bilong em? (b) Long dispela stori bai yumi skelim wanem ol askim?
2 Orait olsem wanem long yu? Maski yu gat hamas krismas, yu mas tingim tok bilong Jisas, em i tok: “Yupela i mas was gut [olsem “was i stap,” NW ]. Yupela i no save wanem de Bikpela bilong yupela bai i kam.” (Matyu 24:42) I gat wanpela bikpela tok i tru i stap insait long dispela tok bilong Jisas. Yumi no save wanem de Bikpela bai kam bilong pinisim ol pasin nogut bilong dispela graun, na i no gat wok long yumi mas save long dispela samting. Tasol samting yumi mas mekim, em yumi mas bosim gut wokabaut bilong yumi na mekim ol pasin i stret, na taim Bikpela i kam bai yumi no bel hevi long wanpela samting. Orait, i gat wanem ol stori i stap long Baibel em ol bai helpim yumi long was i stap? Jisas i bin mekim wanem tok piksa bilong helpim yumi long mekim olsem? Na long nau yumi lukim wanem ol samting i kamapim long ples klia olsem yumi stap long taim bilong pinis bilong dispela pasin nogut i stap long graun?
Samting i Bin Kamap Bipo na Yumi Mas Tingim Gut
3. Olsem wanem planti manmeri bilong nau i wankain olsem ol lain i bin stap long taim bilong Noa?
3 Long planti samting, ol lain bilong nau i wankain olsem ol man na meri i bin i stap long taim bilong Noa. Long dispela taim bipo pasin bilong pait na bagarapim man i pulap long graun, na “ol manmeri i tingting tasol long ol samting nogut.” (Stat 6:5) Planti ol i tingting tasol long ol wok samting ol i mas mekim long olgeta de. Tasol taim Jehova i no kamapim yet Bikpela Tait Wara, em i givim rot long ol man long ol i ken tanim bel. Em i givim wok long Noa long autim tok, na Noa i bihainim tok bilong em—inap 40 o 50 yia samting Noa i mekim wok olsem “man bilong tokaut long stretpela pasin.” (2 Pita 2:5) Tasol ol man i sakim toksave bilong Noa long bikpela bagarap bai kamap. Ol i no was i stap. Olsem na bihain Noa wantaim lain bilong em tasol i abrusim bagarap taim Jehova i givim strafe long ol man.—Matyu 24:37-39.
4. Olsem wanem yumi ken tok, wok bilong Noa i kamapim gutpela samting? Olsem wanem dispela i stret tu long wok bilong yu long autim tok?
4 Olsem wanem? Wok bilong Noa long autim tok i kamapim gutpela samting? Bilong skelim dispela samting, yumi no ken tingim liklik lain tasol i bin harim gut tok bilong em. Wok bilong Noa long autim tok em inapim pinis samting God i laik bai dispela wok i mekim, maski ol man i harim o nogat. Olsem wanem yumi inap tok olsem? Long wanem, dispela wok i bin givim rot long ol man na ol inap long makim wanem samting ol i laik mekim—ol bai mekim wok bilong Jehova o nogat. Orait olsem wanem long hap yu save autim tok long en? Maski i no gat planti man i laik harim tok bilong yu, wok bilong yu i kamapim gutpela samting. Olsem wanem yumi inap tok olsem? Long wanem, taim yu autim tok long ol man, yu givim tok lukaut bilong God long ol, na taim yu mekim olsem, yu inapim tru dispela wok Jisas i bin givim long ol disaipel bilong em.—Matyu 24:14; 28:19, 20.
Ol i Sakim Ol Profet Bilong God
5. (a) Planti manmeri long Juda ol i bin mekim wanem kain pasin long taim bilong Habakuk? Taim em i autim tok profet long ol, ol i mekim wanem? (b) Ol lain bilong Juda i bin mekim wanem pasin birua long ol profet bilong Jehova?
5 Planti handet yia bihain long Bikpela Tait, ol samting long lain Juda i kamap nogut tru. Planti ol i lotuim ol god giaman, na mekim ol pasin i no stret, na daunim ol narapela, na kilim i dai ol man. Jehova i makim Habakuk long givim tok lukaut long ol man olsem sapos ol i no tanim bel, ol bai kisim nogut long han bilong ol Babilon. (Habakuk 1:5-7) Tasol ol man i no laik harim tok bilong Habakuk. Ating ol i tingting olsem, ‘Inap wan handet yia i go pinis, profet Aisaia i bin autim wankain toksave, tasol i no gat wanpela samting i kamap!’ (Aisaia 39:6, 7) Planti bikman bilong Juda ol i les long harim dispela tok, na tu, ol i mekim pasin birua long ol man i autim dispela tok. Wanpela taim ol i laik kilim i dai profet Jeremaia, na ol inap mekim olsem sapos Ahikam i no bin helpim Jeremaia. King Jehoiakim i belhat long narapela tok profet i kam long God, olsem na em i tok na ol i kilim i dai profet Uria.—Jeremaia 26:21-24.
6. Jehova i strongim Habakuk olsem wanem?
6 Tok bilong Habakuk em i strongpela tok, na ol man i no laikim dispela tok, wankain olsem ol i no bin laikim tok bilong Jeremaia, em spirit bilong God i bin kirapim em long mekim tok profet long Juda bai bagarap na i stap nating inap 70 yia. (Jeremaia 25:8-11) Olsem na yumi inap pilim tru bel hevi bilong Habakuk taim em i krai long Jehova olsem: “Bikpela, planti taim mi singaut long yu. Wanem taim bai yu harim singaut bilong mi na yu helpim mipela, na ol dispela samting nogut i kamap long mipela i no ken bagarapim mipela?” (Habakuk 1:2) Jehova i harim krai bilong Habakuk na em i givim gutpela tok long em bilong strongim bilip bilong em, olsem: “Taim bilong ol dispela samting i mas kamap, em i no yet. . . . Tasol i no longtaim na dispela samting mi laik soim yu long en, em bai i kamap. Yu ting bai em i no inap kamap kwik, tasol yu mas wet liklik na em bai i kamap.” (Habakuk 2:3) Olsem na Jehova i gat “taim” bilong pinisim ol pasin i no stret na pasin bilong daunim ol narapela na mekim nogut long ol. Sapos i olsem dispela samting i no inap kamap kwik, Habakuk i no ken bel hevi, na em i no ken wok isi tasol, nogat. Em i mas “wet liklik,” olsem long olgeta de em i mas wokabaut olsem taim i sot pinis. De bilong Jehova i no ken kam bihaintaim!
7. Bilong wanem Jerusalem i mas bagarap gen long taim bilong ol aposel?
7 Inap olsem 20 yia bihain long taim Jehova i bin givim tok long Habakuk, nambawan biktaun bilong Juda, em Jerusalem, i bagarap. Bihain ol i wokim gen, na planti pasin nogut em Habakuk i bin bel hevi long en, ol i stretim pinis. Tasol long taim bilong ol aposel dispela taun i mas bagarap gen, long wanem, lain bilong en i no stap gut long Jehova. Tasol long pasin marimari Jehova i stretim rot bambai ol manmeri i gat stretpela bel ol inap abrusim bagarap. Long dispela taim em i mekim wok long nambawan profet tru, em Jisas Krais, long givim toksave long ol. Long yia 33 C.E., Jisas i tokim lain bilong em: “Taim yupela i lukim ol ami i kam raunim Jerusalem i stap, orait yupela i ken save, taim bilong taun i mas bagarap em i klostu nau. Long dispela taim ol manmeri i stap long distrik Judia ol i mas ranawe i go long ples maunten.”—Luk 21:20, 21.
8. (a) Ating wanem samting i bin painim sampela Kristen taim ol yia i kam i go pinis bihain long i dai bilong Jisas? (b) Tok profet bilong Jisas long Jerusalem em i bin kamap tru olsem wanem?
8 Orait ol yia i kam i go pinis na ating sampela Kristen long Jerusalem i tingting long dispela tok profet bilong Jisas, em bai kamap tru long wanem taim. Yumi ken ting ol i bin lusim planti laik bilong ol. Ating rot i op long ol inap kisim sampela gutpela wok bisnis, tasol ol i sakim, long wanem, ol i tingting strong long ol i mas was i stap. Orait taim sampela yia moa i go pinis, yu ting ol i les? Yu ting ol i tingting olsem ol i lusim nating taim bilong ol, na tok bilong Jisas i makim ol lain bai kamap bihain na i no makim ol lain i stap long taim bilong ol yet? Long yia 66 C.E., tok profet bilong Jisas i kirap long kamap tru taim ol ami bilong Rom i kam banisim Jerusalem. Ol manmeri i bin was i stap, ol i luksave long dispela mak na ol i ranawe lusim Jerusalem, olsem na taim ol Rom i bagarapim Jerusalem, ol i no bagarap.
Tok Piksa Long Yumi Mas Was i Stap
9, 10. (a) Bai yu stori olsem wanem long tok piksa bilong Jisas long ol wokboi i wetim bikman bilong ol i marit pinis na em i kam bek? (b) Wanem samting inap mekim na i hatwok long ol wokboi i wetim bikman bilong ol? (c) Sapos ol wokboi i no les long wet, dispela bai helpim ol olsem wanem?
9 Jisas i laik tok strong olsem yumi mas was i stap, olsem na em i tok piksa long ol disaipel bilong em i olsem ol wokboi i wetim bikman bilong ol i marit pinis na i kam bek. Ol i save long wanem nait em bai i kam bek, tasol ol i no save wanem aua stret bai em i kam. Em bai kam long 9 klok? O long biknait? O long taim kakaruk i krai namba wan taim? Ol i no save. Jisas i tok: “Sapos bikman i kam long biknait tru, o long taim kakaruk i krai namba wan taim, na em i lukim ol wokboi i no slip, orait ol dispela wokboi i ken amamas.” (Luk 12:35-38) Man! Ating ol dispela wokboi i amamas tru long tingim bikman bilong ol i laik i kam! Olgeta liklik pairap samting bai mekim na bel bilong ol bai kirap tru na ol bai tingting: ‘Em bikman bilong yumi, o nogat?’
10 Orait olsem wanem sapos bikman i kam long nait tru—long taim bilong Jisas em 9 klok nait i go inap long 12 klok biknait? Ating olgeta wokboi, maski sampela i bin wok strong kirap long moningtaim tru, ol bai redi long bungim em na tok amamas long em, o sampela bai slip? Olsem wanem sapos bikman i kam bek long taim bilong kakaruk i krai namba wan taim—em 12 klok biknait i go inap 3 klok moningtaim? Sampela wokboi bai bel hevi o kros long bikman bilong ol i lusim taim long kam bek?a Ol wokboi i was i stap taim bikman bilong ol i kam bek, ol dispela wokboi tasol i ken amamas. Tok bilong Sindaun 13:12 i stret tru long ol: “Sapos man i ting long kisim wanpela samting na i wet nating longpela taim, bai em i bel hevi moa yet. Tasol sapos em i kisim dispela samting, orait em bai i ting laip bilong en i gutpela tru na em i amamas moa yet.”
11. Olsem wanem beten inap helpim yumi long was i stap?
11 Orait wanem samting bai helpim lain bilong Jisas long was i stap long dispela hap taim i olsem em i lusim taim long kam bek? Taim Jisas i stap long gaden Getsemani na klostu ol birua i laik i kam holim em, em i tokim 3-pela aposel bilong em: “Yupela i mas was na prea i stap. Nogut traim i kamap long yupela na yupela i pundaun.” (Matyu 26:41) Pita i bin stap wantaim Jisas long dispela taim, na planti yia bihain em i givim wankain tok long ol wanbilip Kristen, olsem: “Taim bilong olgeta samting i laik pinis em i klostu nau. Olsem na yupela i mas tingting gut, na bosim gut ol pasin bilong yupela, bai yupela i ken prea gut.” (1 Pita 4:7) Em nau, yumi ol Kristen i mas beten strong long olgeta taim. Oltaim yumi mas krai long Jehova long helpim yumi long was i stap.—Rom 12:12; 1 Tesalonaika 5:17.
12. Olsem wanem pasin bilong skelim skelim taim em i narapela kain long pasin bilong was i stap?
12 Tingim tok bilong Pita, em tu i bin tok: “Taim bilong olgeta samting i laik pinis em i klostu nau.” Em i klostu olsem wanem? Yumi ol man bilong graun i no inap tru long makim de na aua stret. (Matyu 24:36) Tasol pasin bilong skelim skelim wanem de na wanem aua stret pinis bai kamap—em samting Baibel i no laik bai yumi mekim—dispela i narapela kain long pasin bilong tingim na wetim pinis i kamap—em samting Baibel i laik bai yumi mekim. (Skelim wantaim 2 Timoti 4:3, 4; Taitus 3:9.) Wanem wanpela rot bilong helpim yumi long tingim na wetim pinis i kamap? Yumi mas tingim gut ol samting i kamap na i makim olsem pinis i klostu. Olsem na nau yumi ken skelim gen 6-pela samting i kamapim long ples klia olsem yumi stap long taim bilong las de bilong dispela pasin nogut i stap long graun.
Sikspela Samting Yumi Ken Skelim
13. Tok profet bilong Pol long 2 Timoti sapta 3, olsem wanem em i kirapim yu long bilip tru olsem yumi stap long “taim bilong las de”?
13 Namba wan, em yumi lukim klia truim bilong tok profet bilong aposel Pol i toktok long “taim bilong las de.” Pol i tok: “Long taim bilong las de planti hevi nogut tru bai i kamap. Ol man bai i laikim ol yet tasol, na ol bai i laikim tumas long kisim mani. Ol bai i litimapim nem bilong ol yet na hambak nabaut, na ol bai i tok kros na tok nogut long ol arapela. Ol bai i sakim tok bilong papamama, na ol bai i no tok tenkyu long ol manmeri i mekim gutpela pasin long ol. Ol bai i givim baksait long ol pasin bilong God. Ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. Ol bai i mekim nogut long ol pren bilong ol yet, na ol bai i bihainim kwik olgeta kranki tingting bilong ol yet. Ol bai i tingim ol yet i bikpela man tru. Ol bai i laikim tumas ol kain kain pasin bilong amamas bilong dispela graun, na ol bai i no laikim God. Ol bai i bihainim pasin bilong God long skin tasol na ol bai i no save liklik long bikpela strong i stap long pasin tru bilong God. Yu mas stap longwe long ol dispela kain man. Na ol man nogut na ol giaman profet ol bai i wok long giamanim ol manmeri. Na Satan bai i giamanim ol yet tu, na pasin bilong ol bai i kamap nogut tru.” (2 Timoti 3:1-5, 13) Yumi lukim pinis truim bilong dispela tok profet i kamap long taim bilong yumi, a? Ol man i givim baksait long ol samting i kamap, ol tasol bai tok nogat!b
14. Tok bilong Kamapim Tok Hait 12:9 i toktok long Satan, em i kamap tru long nau olsem wanem? Liklik taim nau na wanem samting bai painim em?
14 Namba 2, em yumi lukim ol samting i kamap, kirap long taim ol i bin rausim Satan wantaim ol ensel nogut bilong em long heven, olsem Kamapim Tok Hait 12:9 i tok profet long en. Em i tok: “Ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.” Dispela i mekim na bikpela hevi tru i kamap long graun. Tru tumas, kirap long yia 1914 i gat planti hevi tru i painim ol man bilong graun. Tasol dispela tok profet long Buk Kamapim Tok Hait i tok moa olsem, taim ol i rausim pinis Satan long heven, em i save “em i gat sotpela taim tasol bilong i stap.” (KTH 12:12) Insait long dispela sotpela taim, Satan i mekim pait long lain bilong Krais em God i bin makim ol long spirit holi. (KTH 12:17) Yumi lukim pinis ol samting i kamap long dispela pait long taim bilong yumi.c Tasol liklik taim nau na Satan bai kalabus long bikpela hul i no gat as, na bai em i “no inap giamanim moa ol manmeri bilong olgeta lain.”—KTH 20:1-3.
15. Olsem wanem Kamapim Tok Hait 17:9-11 i soim yumi olsem yumi stap long taim bilong las de?
15 Namba 3 i olsem: Nau yumi stap long taim bilong namba 8, olsem laspela,“king” em Kamapim Tok Hait 17:9-11 i tok profet long en. Long dispela tok profet, Jon i stori long 7-pela king, ol i makim 7-pela bikpela gavman bilong graun—Isip, Asiria, Babilon, Midia wantaim Persia, Grik, Rom, Inglan wantaim Amerika. Na Jon i lukim “namba 8 king,” em i “wanlain bilong ol 7-pela king.” Dispela namba 8 king—em laspela king Jon i bin lukim long driman—nau em i makim Yunaitet Nesen. Jon i tok dispela namba 8 king “bai i lus olgeta,” na em i no kolim sampela king moa bilong graun bihain long en, nogat.d
16. Ol samting i bin kamap na i truim ol samting bilong dispela imis long driman bilong Nebukatnesar, olsem wanem ol i makim olsem yumi stap long taim bilong las de?
16 Namba 4, em yumi stap long taim bilong lek daunbilo bilong dispela imis Nebukatnesar i bin lukim long driman. Profet Daniel i kamapim insait bilong dispela narapela kain driman bilong wanpela traipela imis i kain olsem man. (Daniel 2:36-43) I gat 4-pela hap bilong dispela imis ol i wokim long narapela narapela kain ain na ol i makim ol narapela narapela bikpela gavman bilong graun, kirap long het (em gavman bilong Babilon) na i go daun inap long lek daunbilo na pinga bilong lek (em ol gavman bilong nau). Olgeta bikpela gavman bilong graun em dispela imis i makim, ol i kamap pinis. Yumi stap nau long dispela hap taim em lek daunbilo bilong imis i makim. Baibel i no stori long sampela bikpela gavman moa bai kamap.e
17. Wok bilong yumi long autim tok bilong Kingdom, olsem wanem dispela tu i makim olsem yumi stap long taim bilong las de?
17 Namba 5, em yumi lukim wanpela wok bilong autim tok i kamap long olgeta hap bilong graun, em Jisas i tok dispela wok bai kamap klostu long pinis bilong dispela pasin i stap nau long graun. Jisas i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Long nau truim bilong dispela tok profet i wok long kamap bikpela moa yet, winim ol narapela taim bipo. Tru, i gat sampela hap ol i no autim tok yet long en, na long taim Jehova i makim, ating rot bai op bilong mekim bikpela wok moa bilong autim tok. (1 Korin 16:9) Tasol Baibel i no tok Jehova bai wet i go inap long taim ol i autim tok pinis long olgeta wan wan man long graun, nogat. Ol bai autim gutnius inap tru long mak Jehova i laikim. Orait nau pinis bai kamap.—Skelim wantaim Matyu 10:23.
18. Yumi ken ting olsem wanem long sampela bilong lain God i bin makim ol taim bikpela hevi tru i kirap? Olsem wanem yumi inap ting olsem?
18 Namba 6 i olsem: Ol disaipel bilong Krais em God i bin makim ol tru long spirit holi, namba bilong ol i wok long go daun, tasol yumi ken ting sampela bai stap yet long graun taim bikpela hevi tru i kirap. Planti bilong dispela lain i stap yet long graun ol i lapun pinis, na namba bilong ol man em God i bin makim ol tru, em i wok long i go liklik. Tasol taim Jisas i stori long dispela taim bilong bikpela hevi tru, em i tok: “Sapos God i no bin sotim taim bilong ol dispela hevi, orait olgeta manmeri bai i lus. Tasol em i tingting long ol manmeri em i makim pinis. Olsem na bai em i sotim dispela taim.” (Matyu 24:21, 22) Olsem na yumi ken ting sampela bilong ol dispela ‘manmeri God i makim pinis’ ol bai stap yet long graun taim dispela bikpela hevi tru i kirap.f
Wanem Samting Bai Kamap Bihain?
19, 20. Bilong wanem nau yumi mas strong moa long was i stap na no ken slip?
19 Orait bihain wanem ol samting bai kamap? Ol bikpela samting tru bai kamap. Pol i toksave olsem “De bilong Bikpela bai i kamap wantu tasol olsem stilman i kam long nait.” Em i stori long ol man i olsem ol i gat bikpela save bilong dispela graun, na em i tok: “Ol manmeri bai i tok olsem, ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol.” Olsem na Pol i tok strong long ol man i kaunim dispela tok, olsem: “Nogut yumi slip, olsem ol arapela man. Mobeta ai bilong yumi i op i stap, na tingting bilong yumi i klia.” (1 Tesalonaika 5:2, 3, 6) Tru tumas, ol man i wetim ol lain bilong dispela graun i kamapim bel isi na gutpela taim, ol i no tingim ol samting tru tru i wok long kamap. Ol kain man olsem ol i slip i dai olgeta!
20 Wantu tasol bagarap bai painim ol samting bilong dispela graun. Olsem na yumi mas tingim na wetim de bilong Jehova i kamap. God yet i bin tokim Habakuk: “Em bai i kamap”! Tru tumas, nau yumi mas strong moa long was i stap.
[Ol Futnot]
a Bikman i no bin tokim ol wokboi bilong em long taim stret em bai kam bek. Olsem na em i no gat wok long tokim ol long ol samting em i mekim, o tokim ol long as na i olsem em i lusim taim long kam bek.
b Bilong lukim sampela tok moa i stori long dispela tok profet, lukim sapta 11 bilong buk Save i Bringim Man Long Laip Oltaim, em Sosaiti Wastaua Bilong Nu Yok i wokim.
c Bilong kisim sampela save moa long dispela samting, lukim pes 180-186 bilong buk Kamapim Tok Hait—Bikpela Samting Bilong En i Laik Kamap!, em Sosaiti Wastaua Bilong Nu Yok i wokim.
d Lukim buk Kamapim Tok Hait—Bikpela Samting Bilong En i Laik Kamap!, pes 251-254.
e Lukim sapta 4 bilong buk Pay Attention to Daniel’s Prophecy!, em Sosaiti Wastaua Bilong Nu Yok i wokim.
f Long tok piksa bilong ol sipsip na meme, Pikinini bilong man bai kam wantaim bikpela lait long taim bilong bikpela hevi tru, na em bai sindaun bilong mekim kot. Em bai skelim ol man long pasin ol i bin mekim, olsem ol i bin helpim ol brata bilong Krais em God i bin makim ol, o nogat. Tasol dispela pasin bilong skelim ol man, em bai i no gat as sapos long taim bilong kot olgeta brata bilong Krais i lusim pinis graun.—Matyu 25:31-46.
Yu Inap Tingim?
• Wanem sampela stori bilong ol man long Baibel i helpim yumi long was i stap?
• Jisas i mekim wanem tok piksa na bai yumi ken save yumi mas was i stap?
• Wanem 6-pela samting i kamapim long ples klia olsem yumi stap long taim bilong las de?
[Ol Piksa long pes 9]
A. H. Macmillan i bin stap gut long mekim wok bilong Jehova inap olsem 60 krismas
[Piksa long pes 10]
Jisas i tok piksa long ol disaipel bilong em i olsem ol wokboi i was i stap