Jehova i No Ken Lusim Taim
“Dispela samting mi laik soim yu long en, em bai i kamap. Yu ting bai em i no inap kamap kwik, tasol yu mas wet liklik na em bai i kamap.”—HABAKUK 2:3.
1. Lain bilong Jehova i tingting strong long mekim wanem? Dispela i bin kirapim ol long mekim wanem?
“MI WAS . . . i stap olsem ol soldia i save go antap long ol taua na was long ol birua.” Profet bilong God, em Habakuk, em i tingting strong long mekim olsem. (Habakuk 2:1) Lain bilong Jehova long nau i save tingting strong long mekim wankain samting. Olsem na ol i strong long bihainim dispela singaut i bin kamap long wanpela bikpela kibung long Septemba 1922, olsem: “Nau em i bikpela taim. Harim, King i kirap pinis long mekim wok! Yupela i gat wok bilong autim tok long dispela samting. Olsem na yupela mas autim tok, autim tok, autim tok, na tokim ol man long dispela King na kingdom bilong em.”
2. Bihain long Namba Wan Pait God i strongim bek ol Kristen em i bin makim ol na ol i kirap mekim bikpela wok, olsem na ol inap tok wanem?
2 Bihain long Namba Wan Pait, Jehova i strongim bek liklik hap lain em i bin makim na ol i stap gut long em, na ol i kirap mekim bikpela wok. Olsem na olgeta wan wan inap mekim tok olsem Habakuk i bin mekim: “Mi wetim em i givim tok long mi, bai mi ken bekim tok bilong en gen.” Ol tok Hibru bilong dispela tok “wetim” na ‘was i stap’ ol i stap long planti tok profet.
“Em Bai i Kamap”
3. Bilong wanem yumi mas was i stap?
3 Taim ol Witnes Bilong Jehova long nau i givim toksave bilong God long ol man, ol i mas strong long bihainim laspela tok bilong bikpela tok profet bilong Jisas, em i tok: “Yupela i mas was gut. Yupela i no save wanem taim papa bilong haus bai i kam. Bai em i kam long apinun o long biknait o long taim kakaruk i krai o long moningtaim, em yupela i no save. Nogut em i kam wantu tasol na i lukim yupela i slip. Dispela tok mi givim long yupela, em mi givim long olgeta manmeri. Yupela i mas was i stap.” (Mak 13:35-37) Olsem Habakuk, na stret olsem Jisas i tok, yumi tu mas was i stap!
4. Olsem wanem yumi wankain olsem Habakuk long yia olsem 628 B.C.E. samting?
4 Ating Habakuk i raitim pinis tok profet bilong em long yia 628 B.C.E., taim Babilon i no kamap yet olsem nambawan bikpela gavman. Inap planti yia ol profet i bin tokaut olsem Jehova bai mekim save long lain bilong Jerusalem ol i lusim em pinis. Tasol i no gat wanpela samting i makim wanem taim stret Jehova bai givim strafe long ol olsem kot bilong em i makim. I no gat wanpela i save olsem 21 yia moa na Jehova bai mekim wok long Babilon bilong bagarapim ol. Long nau tu, yumi no save long ‘de na aua’ God i bin makim bilong pinisim ol pasin bilong dispela graun, tasol Jisas i bin toksave long yumi olsem: “Yupela . . . i mas redi. Pikinini Bilong Man bai i kam long wanpela taim yupela i no ting em bai i kam.”—Matyu 24:36, 44.
5. Olsem wanem tok bilong God long Habakuk 2:2, 3 em i strongim bel bilong yumi?
5 Olsem na i gat as tru na Jehova i givim wok long profet Habakuk olsem: “Mi laik givim yu sampela tok long wanpela samting olsem driman. Yu raitim gut dispela tok long wanpela hap ston na wanem man i laik ritim, em i ken lukim gut. Taim bilong ol dispela samting i mas kamap, em i no yet. Olsem na yu mas raitim dispela tok na putim i stap. Tasol i no longtaim na dispela samting mi laik soim yu long en, em bai i kamap. Yu ting bai em i no inap kamap kwik, tasol yu mas wet liklik na em bai i kamap.” (Habakuk 2:2, 3) Long nau, pasin nogut na pait na bagarapim man i kamap nogut tru long olgeta hap bilong graun, na dispela i makim olsem “De bilong Bikpela” i klostu pinis. (Joel 2:31) Tok bilong Jehova i strongim tru bel bilong yumi, em i tok: “Em bai i kamap”!
6. Olsem wanem yumi inap abrusim bagarap long de bilong God i givim strafe long ol man?
6 Orait, olsem wanem yumi inap abrusim bagarap long dispela de bilong givim strafe long ol man nogut? Jehova i bekim dispela askim taim em i skelim ol stretpela man wantaim ol man nogut, olsem: “Ol man nogut i save bikhet na ol i no save mekim stretpela pasin. Tasol ol man i bihainim tru pasin bilong God, ol i stretpela man na ol bai i stap laip.” (Habakuk 2:4) Long taim bilong yumi—olsem long taim bilong tupela bikpela pait i bin kamap long olgeta hap na long ol pait bilong kilim i dai wanpela lain olgeta—ol hetman na ol lain i save hambak na mangal ol i bin kapsaitim blut bilong planti milion manmeri i no gat asua. Tasol ol manmeri bilong God i laikim tumas pasin bilong i stap isi ol i bin sanap strong na karim hevi na stap gut long God. Ol i ‘dispela stretpela lain i stap aninit long Bikpela.’ Dispela lain wantaim ol poroman bilong ol, em “ol arapela sipsip,” i save bihainim dispela tok: “Bikpela em i strongpela ples hait bilong yumi. Na em bai i stap olsem oltaim. Olsem na yumi mas bilip tru long em na aninit long em oltaim.”—Aisaia 26:2-4; Jon 10:16.
7. Olsem Pol i tok taim em i kamapim tok bilong Habakuk 2:4, yumi mas mekim wanem?
7 Taim aposel Pol i raitim pas long ol Hibru, em i kamapim tok bilong Habakuk 2:4 na tokim lain bilong Jehova olsem: “Yupela i mas sanap strong, olsem bai yupela i ken bihainim laik bilong God. Na yupela i ken kisim ol gutpela samting, bipo God i promis long givim yupela. Yes, ‘I no longtaim. Liklik taim tasol, na dispela man i laik kam, em bai i kam. Em bai i kam kwik. Tasol stretpela man bilong mi em i bilip, olsem na em bai i stap laip. Na sapos em i surik, orait bai mi no amamas long em.’ ” (Hibru 10:36-38) Dispela taim nau yumi stap long en i no taim bilong slek o larim pasin bilong tingim tumas mani kago o ol amamas bilong dispela graun bilong Satan i pulim yumi. Olsem na inap long dispela “liklik taim” i pinis, yumi mas mekim wanem? Olsem Pol, yumi ol manmeri bilong lain holi bilong Jehova yumi mas “wok strong long kisim dispela samting bai i kamap bihain,” em laip i stap oltaim oltaim. (Filipai 3:13, 14) Na olsem Jisas, yumi ‘save, sapos yumi bihainim tru tok bilong God, orait bihain yumi bai stap gut na amamas moa yet. Yumi tingting long dispela na yumi stap strong.’—Hibru 12:2.
8. Husat dispela “man” Habakuk 2:5 i stori long en? Bilong wanem em i no inap mekim samting em i gat laik long mekim?
8 Habakuk 2:5 i stori long wanpela ‘man i gat laik long kisim planti samting, olsem [ples matmat] i laik kisim planti manmeri,’ tasol em i no kisim. Dispela man i narapela kain long ol wokboi bilong Jehova. Husat dispela man i no inap kisim ol samting em i mangal long en? Olsem Babilon long taim bilong Habakuk em i laik kisim planti planti samting moa, dispela “man,” em olgeta kain gavman—Fasis, Natsi, Komyunis, na demokratik tu—em i mekim ol pait bilong kisim planti hap graun moa. Na em i kisim ol man i no gat asua na pulapim skin bilong ol long ples matmat. Tasol dispela “man” nogut bilong dispela graun Satan i bosim, em i spak nogut tru na tingim em yet i olsem samting tru, em i no inap mekim “planti kantri” i kamap wanbel olsem em i gat laik long mekim. God Jehova tasol inap mekim olgeta man i kamap wanbel, na em bai mekim dispela samting long rot bilong Kingdom i stap long han bilong Mesaia.—Matyu 6:9, 10.
Namba Wan Bilong Faipela Bikpela Hevi
9, 10. (a) Long maus bilong Habakuk, Jehova i tokaut long wanem samting? (b) Kisim mani long pasin i no stret, olsem wanem long dispela pasin long nau?
9 Long maus bilong profet Habakuk, Jehova i tokaut long 5-pela bikpela hevi i mas kamap olsem kot bilong em i bin makim, bilong redim graun bambai ol man i lotu long God na stap gut long em ol i ken i stap long en. Ol dispela man i gat stretpela bel ol i kamapim tok bilong Jehova i stap long Habakuk 2:6: “Yupela man bilong paulim samting bilong ol arapela lain, bai yupela i bagarap. Wanem taim bai yupela i lusim pasin bilong hariapim ol man long bekim dinau long yupela?”
10 Dispela ves i tok long mani ol man i kisim long pasin i no stret. Long nau, ol maniman i kisim moa moa mani, na ol rabisman i kamap rabis moa yet. Ol man i save maketim ol drak na paulim mani, ol i kisim planti mani moa yet, tasol planti man nating i save hangre. Ol i tok wanpela long olgeta 4-pela 4-pela man ol i stap rabis. Ol man long planti kantri ol i no gat gutpela sindaun. Ol man i gat bikpela laik long stretpela pasin i mas kamap long graun, ol i tok: “Wanem taim” ol dispela pasin nogut bai pinis? Klostu nau! Truim bilong dispela driman ‘bai kamap’—em i no ken kam bihaintaim!
11. Habakuk i tok wanem long pasin bilong kilim man i dai? Olsem wanem yumi inap tok, long nau ol man i gat bikpela asua tru long kapsaitim blut bilong man?
11 Profet Habakuk i tokim ol man nogut: “Yupela i bin pulim olgeta samting bilong ol manmeri bilong planti kantri. Na yupela i bin kilim i dai planti manmeri na bagarapim ol taun bilong ol. Tasol yupela i abrusim sampela man na bihain ol bai i kirap na bekim wankain pasin long yupela olsem yupela i bin mekim long ol arapela lain.” (Habakuk 2:8) Long nau, planti planti man i dai long han bilong ol narapela! Jisas i tokaut stret: “Olgeta man i pait long bainat, bainat bai i bagarapim ol.” (Matyu 26:52) Tasol long dispela taim bilong yumi, ol lain i bin kapsaitim blut bilong planti manmeri, winim 100 milion. Ol man i insait long ol pait i kapsaitim blut bilong ol man, ol i mas lukaut! Ol bai painim taim nogut!
Namba Tu Bikpela Hevi
12. Wanem dispela namba tu bikpela hevi Habakuk i kolim? Olsem wanem yumi inap save ol mani samting ol man i bin kisim long pasin i no stret em i no inap helpim ol?
12 Namba tu bikpela hevi, i stap long Habakuk 2:9-11, em i painim ‘ol man i bin kisim planti samting bilong ol arapela lain. Ol i bin givim ol dispela samting long ol lain bilong ol yet. Na ol i bin wokim ol strongpela haus bilong banisim gut ol samting bilong ol na ol i ting long dispela pasin bai ol i abrusim bagarap.’ Ol mani samting ol i kisim long pasin i no stret i no inap helpim ol, olsem man bilong raitim Song i kamapim klia: “Sapos narapela man i kisim planti mani samting, na i wokim bikpela haus na i gat planti bilas, maski, yu no ken wari long dispela. Yu save pinis, bihain em bai i dai, na em i no inap kisim wanpela samting i go wantaim em. Haus na bilas na mani bilong en, dispela olgeta samting i no inap i go wantaim em long ples bilong ol man i dai pinis.” (Song 49:16, 17) Olsem na Pol i tok: “Tokim ol man i gat planti mani samting bilong dispela graun long ol i no ken bikhet na litimapim nem bilong ol yet. Ol i no ken bilip long ol dispela kain samting i save bagarap kwik. Nogat. Ol i mas bilip tru long God, em God i save givim yumi planti gutpela samting bilong mekim yumi amamas.”—1 Timoti 6:17.
13. Bilong wanem yumi mas kamapim yet toksave bilong God olsem bagarap i laik painim ol man?
13 Em i bikpela samting tru long yumi mas tokaut long strafe bilong God bai painim ol man! Taim ol Farisi i kros long ol manmeri i singaut olsem Jisas em “dispela king i kam long nem bilong Bikpela,” Jisas i tok: “Mi tokim yupela, sapos ol i pasim maus, ol ston yet bai i singaut na litimapim nem bilong God.” (Luk 19:38-40) Na long nau tu, sapos ol manmeri bilong God i pasim maus na ol i no kamapim ol pasin nogut bilong dispela graun, orait ‘ol ston ol i banisim ol haus long en, ol bai singaut.’ (Habakuk 2:11) Olsem na yumi mas strongim bel na wok yet long kamapim toksave bilong God olsem bagarap i laik painim ol man!
Namba Tri Bikpela Hevi na Asua Bilong Kilim Man i Dai
14. Olsem wanem ol lotu bilong graun i gat asua long kapsaitim blut bilong planti man?
14 Namba tri bikpela hevi God i tokaut long en long maus bilong Habakuk em i go long ol man i gat asua bilong kilim man i dai. Habakuk 2:12 i tok: “Yupela man i bin kilim i dai planti manmeri bilong mekim taun bilong yupela yet i sanap strong, yupela bai i bagarap. Yupela i tingting long strongim taun bilong yupela, na yupela i bin mekim ol kain kain pasin nogut.” Long dispela graun nau yumi stap long en, planti taim pasin i no stret i poromanim pasin bilong kilim man i dai. Ol lotu bilong graun i gat bikpela asua long kamapim ol pait nogut i bin kapsaitim blut bilong planti planti man. Sampela pait i olsem: Ol man i holim nating nem Kristen i bin pait wantaim ol Muslim long Ol Pait Bilong Lotu; Misin Katolik i bin kamapim Kot Bilong Misin long Spen na Latin-Amerika; ol Talatala na ol Katolik i bin pait wantaim long Pait Bilong 30 Yia i bin kamap long Yurop; na i gat tupela bikpela pait bilong olgeta hap i bin kamap long taim bilong yumi na i winim olgeta narapela pait long kilim i dai ol man—dispela tupela pait i bin kirap long ol kantri i gat nem Kristen.
15. (a) Ol lain i wok yet long mekim wanem na ol misin i helpim o orait long ol i mekim olsem? (b) Yu ting Yunaitet Nesen inap pasim ol man long wokim ol samting nogut bilong pait?
15 Samting nogut tru i bin kamap long taim bilong Namba Tu Pait i olsem: Long Yurop, ol Natsi i kilim i dai planti milion Juda na planti ol narapela i no gat asua. Nau tasol ol bikman bilong lotu Katolik long Frans ol i bin tokaut long rong bilong ol, olsem taim ol Natsi i salim planti handet tausen Juda i go long ol banis kalabus bilong kilim ol i dai, misin i pasim maus tasol na i no mekim wanpela tok. Tasol ol lain i wok yet long redi long kapsaitim blut bilong ol man, na ol misin i helpim ol o orait long ol i mekim olsem. I no longtaim i go pinis na wanpela nius (Time) i stori long Misin Otodoks Bilong Rasia na i tok: ‘Dispela misin i kirap gen em i gat strong long stiaim ol ami samting bilong Rasia. Ol i save blesim ol balus bilong pait na ples slip bilong ol soldia. Long Novemba, long Haus Bruder Danilovski long Mosko—em ples nambawan hetman bilong misin i sindaun long en—misin i mekim holi ol bom nuklia bilong Rasia.’ Yu ting Yunaitet Nesen inap pasim ol lain long wokim ol samting nogut bilong pait? Nogat tru! Wanpela nius (Guardian) bilong Landon, Inglan, i kamapim tok bilong wanpela man i kisim Prais Nobel long wok bilong em long kamapim gutaim, em i tok: ‘Yumi save tingting planti, long wanem, 5-pela memba bilong Sekyuriti Kaunsil Bilong Yunaitet Nesen ol i go pas long salim ol gan samting long ol narapela kantri.’
16. Jehova bai mekim wanem long ol lain i save kamapim pait?
16 Olsem wanem? Jehova bai givim strafe long ol lain i save kamapim pait? Habakuk 2:13 i tok: “Yupela i bin daunim ol kantri na kalabusim ol manmeri, na ol i hatwok tru long wokim ol samting bilong yupela. Tasol paia bai i kukim olgeta dispela samting na dispela wok ol i mekim bai i lus nating. [“Jehova bilong ol bikpela lain ami,” NW ] bai i mekim dispela samting i kamap.” ‘Jehova bilong ol bikpela lain ami’! Em nau, Jehova i gat bikpela lain ensel long heven i olsem bikpela lain ami, na em bai mekim wok long ol bilong pinisim ol man na ol lain i save kamapim pait!
17. Taim Jehova i givim strafe pinis long ol lain bilong pait, save bilong em bai inapim graun i go inap long wanem mak?
17 Taim Jehova i givim strafe pinis long ol dispela lain bilong pait, wanem samting bai kamap? Habakuk 2:14 i bekim dispela askim olsem: “Olgeta manmeri na olgeta samting long graun bai i save tru long biknem na strong bilong Bikpela. Dispela save bai inapim olgeta hap graun olsem solwara i inapim mak bilong en olgeta.” Em gutpela samting tru yumi inap wet long en, a? Long Armagedon, olgeta man bai save Jehova em i Nambawan Bos na inap long olgeta taim bihain ol man bai save long dispela. (KTH 16:16) Em i tok promis olsem ‘ples em i putim lek bilong em antap long en, em bai mekim i kamap nambawan tru.’ Dispela ples em dispela graun yumi stap long en. (Aisaia 60:13) Olgeta man bai kisim save long rot yumi mas bihainim, em rot God i makim, bambai dispela save long ol gutpela laik bilong Jehova bai inapim olgeta hap graun olsem solwara inapim mak bilong en olgeta.
Namba Foa na Faiv Bikpela Hevi
18. Wanem namba 4 bikpela hevi Habakuk i tokaut long en? Olsem wanem dispela i makim stret pasin bilong ol man long nau?
18 Habakuk 2:15 i stori long namba 4 bikpela hevi, olsem: “Yupela man i gat bikpela kros long ol arapela na yupela i bin mekim nogut tru long ol, yupela bai i bagarap. Belhat bilong yupela i olsem kap wain na yupela i bin mekim nogut long ol olsem man i givim planti wain long ol wantok na mekim ol i spak na lusim laplap samting na ol i sem nogut tru.” Dispela i makim pasin bilong ol man bilong nau ol i save bihainim ol laik nogut bilong skin. Pasin pamuk, em sampela lain lotu i orait long en, em i go bikpela tru. Sik AIDS na sampela narapela sik nogut em pasin pamuk i kamapim, em i wok long kisim planti manmeri long olgeta hap. Pasin bilong ol man bilong nau i no save givim “biknem” long Jehova; ol i save tingim ol yet i nambawan na pasin bilong ol i go nogut olgeta. Olsem na klostu nau strafe bilong God bai painim ol. Jehova ‘bai daunim biknem bilong ol na ol bai sem nogut tru’—ol bai dring long dis i gat belhat bilong Jehova i stap long en, em i makim ol samting em i laik mekim long ol. ‘Biknem bilong ol bai pundaun na ol bai sem moa yet.’—Habakuk 2:16.
19. Long ol ves i stori long namba 5 bikpela hevi, Habakuk i tokaut long wanem samting? Olsem wanem ol dispela tok i stret long ol samting ol i mekim long nau?
19 Long ol ves i stori long namba 5 bikpela hevi, i gat strongpela tok lukaut olsem yumi no ken lotuim piksa bilong ol god giaman. Jehova i kirapim profet Habakuk long kamapim dispela strongpela tok: “Yupela man i save tokim ol hap diwai na hap ston olsem, ‘Yu lusim slip na kirap,’ yupela bai i bagarap. . . . Maski yupela i bilasim gut long silva na gol, em i no inap mekim wanpela samting.” (Habakuk 2:18-19) I kam inap long nau, ol lotu i gat nem Kristen na ol lotu haiden tu, ol i wok yet long brukim skru na lotu long ol kruse bilong ol, ol Virgo, ol imis, na ol narapela samting em piksa bilong man o animal. Taim Jehova i kam bilong mekim save long ol, i no gat wanpela bilong ol dispela god giaman inap lusim slip na kirap na helpim ol man i lotu long ol. Gol na silva i bilasim ol i olsem samting nating taim yumi skelim wantaim Jehova, em i God bilong i stap oltaim oltaim, na ol gutpela gutpela samting em i bin wokim na i gat laip. Yumi mas litimapim gutpela nem bilong em i go inap olgeta taim!
20. Yumi amamas tru long mekim wok insait long wanem samting Jehova i putim olsem tempel?
20 Tru tumas, God bilong yumi, Jehova, em inap tru long yumi litimapim nem bilong em. Olsem na yumi mas daun long em na bihainim dispela strongpela tok lukaut yumi kaunim pinis, olsem yumi no ken lotuim ol imis. Tasol harim! Jehova i toktok i go yet: “[Jehova] i stap insait long haus bilong en, na yupela olgeta manmeri bilong graun, yupela i mas i kam klostu long em na yupela i mas pasim maus i stap.” (Habakuk 2:20) Profet Habakuk i tingim tempel i stap long Jerusalem. Tasol long nau yumi amamas tru yumi inap lotu long wanpela tempel i winim dispela, em tempel spirit Jehova yet i bin putim, na Bikpela bilong yumi Krais Jisas i stap Hetpris long en. Insait long banis bilong dispela tempel hia long graun, yumi save bung wantaim, na mekim wok, na beten, na yumi givim biknem long Jehova, em i gat gutpela nem tru. Na yumi kisim bikpela amamas long givim bel long lotuim gutpela Papa bilong yumi long heven!
Yu Inap Tingim?
• Wanem tingting bilong yu long dispela tok bilong Jehova: “Em bai i kamap”?
• Ol bikpela hevi Habakuk i tokaut long en ol i makim wanem samting long nau?
• Bilong wanem yumi mas wok yet long givim toksave bilong Jehova long ol man?
• Yumi inap mekim wok bilong Jehova insait long banis bilong wanem tempel?
[Ol Piksa long pes 15]
Olsem Habakuk, ol wokman bilong God long nau ol i save Jehova i no ken lusim taim
[Ol Piksa long pes 18]
Yu save pilim tru gutpela wok yu holim long lotuim Jehova long ples bung bilong tempel spirit bilong em?
[Piksa Kredit Lain long pes 16]
U.S. Army photo