Amamas Long God Bilong Kisim Bek Yumi
“Bai mi amamas na belgut. Long wanem, Bikpela em i God na em i save kisim bek mi.”—HABAKUK 3:18.
1. Paslain long taim Babilon i pundaun long yia 539 B.C.E., Daniel i kisim wanpela driman long wanem samting?
INAP olsem 10-pela yia paslain long taim Babilon i pundaun long yia 539 B.C.E., lapun profet Daniel i lukim samting olsem driman. Dispela driman i tok profet long ol samting i kamap i go inap long taim ol birua bilong Jehova i pait wantaim King em i bin makim, em Krais Jisas. Daniel i mekim wanem? Em i tok: “Mi bel hevi tru . . . na mi wok long tingting planti long dispela driman.”—Daniel 8:27.
2. Wanem pait Daniel i lukim long driman? Dispela pait i kam klostu pinis, na yu gat wanem tingting long dispela?
2 Olsem wanem long yumi? Yumi stap planti handet yia bihain bihain tru long taim bilong Daniel! Orait yumi save mekim wanem taim yumi save dispela pait Daniel i lukim long driman—em pait bilong God long taim bilong Armagedon—i kam klostu pinis? Yumi mekim wanem taim yumi save olsem ol pasin nogut em Habakuk i tok profet long en i kamap bikpela moa yet, olsem na ol birua bilong God i mas bagarap? Ating ol tingting i stap long bel bilong yumi i wankain olsem tingting bilong Habakuk yet, i stap long sapta 3 bilong buk bilong em i gat ol tok profet long en.
Habakuk i Beten Askim God Long Mekim Pasin Marimari
3. Habakuk i beten bilong helpim husat? Ol tok bilong em inap mekim wanem long yumi?
3 Habakuk sapta 3 em i wanpela beten. Olsem ves wan i tok, ol man i singim dispela beten long pasin bilong ol singsing sori. Habakuk i mekim dispela beten na i olsem em i mekim bilong helpim em yet, tasol nogat; em i beten bilong helpim lain bilong God. Long nau, dispela beten inap helpim tru ol manmeri bilong God, em ol i insait long wok bilong autim tok bilong Kingdom. Taim yumi tingim dispela samting na kaunim Habakuk sapta 3, ol tok bilong en i mekim na yumi tingting planti long ol samting bai kamap bihain, tasol yumi amamas tu. Dispela beten bilong Habakuk, olsem singsing sori, i kamapim wanpela bikpela as na yumi mas amamas long Jehova, em God bilong kisim bek yumi.
4. Bilong wanem Habakuk i pret? Yumi ken bilip olsem God bai kamapim strong bilong em na mekim wanem?
4 Olsem tupela stori i kamap paslain long dispela i soim yumi, ol pasin nogut i go bikpela tru long Juda long taim bilong Habakuk. Tasol God i no ken larim dispela pasin nogut i stap. Jehova bai kirap na mekim sampela samting olsem em i bin mekim bipo. Long dispela as Habakuk i singaut: “Bikpela, mi bin harim tok long ol samting yu bin mekim long strong bilong yu na mi kirap nogut”! Em i toktok long wanem samting? Tok bilong ‘ol samting Bikpela i bin mekim,’ em tok ol i bin raitim long ol bikpela wok God i bin mekim long hap bilong solwara Retsi, na long ples drai nating, na long Jeriko. Habakuk i save gut long ol dispela samting Jehova i bin mekim, na ol i mekim em i pret, long wanem, em i save God bai kamapim gen bikpela strong bilong em na mekim save long ol birua bilong em. Taim yumi lukim pasin nogut ol manmeri long nau ol i mekim, yumi tu i save Jehova bai kirap na mekim save long ol man nogut olsem em i bin mekim bipo. Olsem wanem? Dispela i mekim na yumi tingting planti? Tru tumas! Tasol yumi beten olsem Habakuk i bin mekim: “Ol bikpela bikpela samting yu bin mekim bipo, mi laik bai yu mekim gen long taim bilong mipela, bai ol man bilong dispela taim tu i ken save long pasin bilong yu. Tru, yu gat kros long mipela, tasol yu God bilong sori, na mi askim yu long sori long mipela na helpim mipela.” (Habakuk 3:2) Long taim God i makim, yumi laik bai God i kamapim gen bikpela strong bilong em. Na long dispela taim, yumi laik bai em i ken tingim na marimari long ol man i laikim tru em!
Jehova i Kirap Mekim Wok!
5. ‘God i lusim Idom na em i kam’ olsem wanem? Dispela i givim wanem tingting long yumi long Armagedon?
5 Taim Jehova i harim yumi beten askim em long mekim pasin marimari, wanem samting bai kamap? Habakuk 3:3, 4 i bekim dispela askim. Pastaim, profet i tok: “God i lusim graun Idom na em i kam gen. God bilong mekim gutpela na stretpela pasin olgeta, em i kirap long maunten Paran na em i kam.” Long taim bilong Moses, taim ol Israel i laik go long Kenan, ol i raun long ples drai nating em Idom na Paran i stap long en. Taim dispela bikpela lain i wokabaut i go, i olsem Jehova yet i wokabaut i go na i no gat wanpela samting inap pasim em. Klostu long taim Moses i dai, em i tok: “Bikpela i stap long maunten Sainai na i kam. Em i kamap olsem san antap long kantri Idom na lait bilong en i stap long maunten Paran na i lait i go long ol manmeri bilong en. Planti tausen bilong ol ensel i bin i stap wantaim em.” (Lo 33:2) Taim Jehova i kam pait long ol birua bilong em long Armagedon, em bai kamapim gen bikpela strong bilong em olsem em i bin mekim bipo.
6. Ol Kristen i gat pasin bilong skelim gut ol samting, i olsem ol i lukim bikpela lait bilong God, na ol i lukim wanem samting moa?
6 Habakuk i tok tu: “Strong bilong [Jehova] i kamap olsem lait na i karamapim olgeta hap bilong skai. Olgeta manmeri bilong graun i lukim bikpela lait bilong en.” Man! Em i gutpela samting tru bilong lukim! Tru, ol man bilong graun i no inap lukim God Jehova—ol man i lukim em ol bai dai. (Kisim Bek 33:20) Tasol ol man i stap gut long God, taim ol i tingim bikpela strong na lait bilong em, i olsem ol i lukim tru long ai bilong ol, na ol i kirap nogut tru long en. (Efesus 1:18) Na ol Kristen i gat pasin bilong skelim gut ol samting, i olsem ol i lukim sampela samting moa. Habakuk 3:4 i tok: “Bikpela lait bilong strong bilong en i sut i go long olgeta hap.” Em nau, yumi lukim olsem Jehova i redi long mekim wok na kamapim strong bilong em.
7. God i save win tru, olsem na wanem samting bai painim ol man i bikhet long em?
7 God i save win tru, olsem na ol man i bikhet long em ol bai painim taim nogut. Habakuk 3:5 i tok: “Em i salim ol kain kain sik i go paslain long en. Bikpela sik bilong kilim ol manmeri i bihainim em i kam.” Taim ol Israel i stap klostu long arere bilong Graun Bilong Promis long yia 1473 B.C.E., planti ol i bikhet—ol i mekim pasin pamuk na lotuim ol god giaman. Olsem na God i salim wanpela bikpela sik i kam na 24,000 i dai. (Namba 25:1-9) Klostu nau, taim Jehova i go long “pait long dispela bikpela de bilong God I Gat Olgeta Strong,” ol man i bikhet long em ol tu bai bagarap long ol rong bilong ol. Ating wanpela sik tru bai painim sampela na ol i dai.—KTH 16:14, 16.
8. Olsem Habakuk 3:6 i tok, wanem samting bai painim ol birua bilong God?
8 Orait nau Habakuk i stori long ol samting Jehova bilong ol bikpela lain ami i mekim. Habakuk 3:6 i tok: “Long taim em [God Jehova] i sanap olgeta graun i save guria. Long taim em i lukim ol manmeri ol i save surik na guria. Ol bikpela strongpela maunten i bruk na pundaun. Ol liklik maunten bipo em i save wokabaut long ol ol i surik i go daun.” Pastaim, Jehova i ‘sanap i stap,’ olsem wanpela jeneral i lukim na skelim gut ples bilong pait. Ol birua bilong em i guria na pret. Ol i lukim husat ol bai pait long en na ol i kirap nogut tru na ol i surik na guria. Jisas i tok profet long taim “olgeta lain manmeri bilong graun bai i krai.” (Matyu 24:30) Ol bai save olsem i no gat wanpela inap sakim Jehova na abrusim bagarap. Ol oganaisesen bilong graun—maski ol i strong olsem “ol bikpela strongpela maunten” na “ol liklik maunten”—ol bai bagarap. Ol samting God bai mekim i wankain olsem ol samting em i bin mekim “bipo.”
9, 10. Habakuk 3:7-11 i kirapim yumi long tingim wanem samting?
9 Jehova i gat bikpela “kros” long ol birua bilong em. Tasol long bikpela pait bilong em, wanem ol samting bilong pait bai em i mekim wok long en? Harim tok bilong dispela profet taim em i stori long ol, olsem: “Yu bin redim banara bilong yu, na bai yu tok na ol spia bilong yu bai i go long ples yu makim bilong ol. Taim ol maunten i lukim yu, ol i guria. Yu tromoi bikpela wara i go daun long graun na em i katim ol bikpela baret. Bikpela tait i ran strong na i kam. Ol wara aninit long graun tu i pairap na solap i go antap inap long skai. Ol spia bilong yu i lait tumas taim ol i spit i go, na san wantaim mun i sanap nating antap.”—Habakuk 3:7-11.
10 Long taim bilong Josua, Jehova i kamapim bikpela strong bilong em na mekim san na mun i sanap nating. (Josua 10:12-14) Tok profet bilong Habakuk i kirapim tingting bilong yumi olsem Jehova bai mekim wok long dispela wankain strong long taim bilong Armagedon. Long yia 1513 B.C.E., Jehova i kamapim bikpela strong bilong em long bosim solwara taim em i mekim wok long solwara Retsi bilong bagarapim ol ami bilong king bilong Isip. Foti yia bihain long dispela, taim wara Jordan i tait bikpela, dispela i no pasim ol Israel long go insait long Graun Bilong Promis, nogat. (Josua 3:15-17) Long taim bilong profet meri Debora, bikpela ren i kam daun na i rausim ol karis bilong Sisera, em birua bilong ol Israel. (Hetman 5:21) Olsem tasol long Armagedon, Jehova bai mekim wok long ol dispela strong, olsem tait wara, na bikpela ren, na solwara. Klaut na pairap bilong en, em tu i stap long han bilong em, olsem wanpela spia.
11. Taim Jehova i kamapim bikpela strong bilong em, wanem samting bai kamap?
11 Tru tumas, ol man bai kirap nogut tru taim Jehova i kamapim bikpela strong bilong em. Tok bilong Habakuk i makim olsem nait bai kamap olsem taim bilong san, na taim bilong san bai lait moa, winim lait i kam long san yet. Dispela tok profet i stori long Armagedon em i tok piksa o nogat, em yumi no save, tasol yumi ken bilip tru long wanpela samting olsem: Jehova bai winim pait tru na i no gat wanpela birua bai abrusim bagarap.
God Bai Kisim Bek Ol Manmeri Bilong Em!
12. God bai mekim wanem long ol birua bilong em? Tasol em bai kisim bek husat?
12 Habakuk i stori moa long ol samting Jehova bai mekim bilong bagarapim ol birua bilong em. Habakuk 3:12 i tok: “Yu gat bikpela kros long olgeta kantri na yu wokabaut antap long graun na krungutim olgeta ples.” Tasol Jehova i no ken bagarapim nating ol man, nogat. Sampela man bai abrusim bagarap na stap laip. Habakuk 3:13 i tok: “Yu mekim olsem bilong kisim bek ol manmeri bilong yu wantaim dispela king yu bin makim.” Em nau, Jehova bai kisim bek ol wokboi bilong em i stap gut long em. Long dispela taim, Bikpela Babilon, em olgeta lotu giaman, bai bagarap na pinis olgeta. Tasol long nau, ol lain bilong graun i wok strong long pinisim lotu i tru. I no longtaim na ol lain bilong Gok bilong Magok bai kirap na pait wantaim ol wokboi bilong God. (Esekiel 38:1–39:13; KTH 17:1-5, 16-18) Yu ting ol lain bilong Gog bai win? Nogat tru! Long belhat bilong em, Jehova bai kirap na pinisim ol birua bilong em—em bai krungutim ol aninit long lek bilong em olsem wit ol man i save krungutim. Tasol em bai kisim bek ol man i lotu long em long spirit na long pasin i tru.—Jon 4:24.
13. Ol tok bilong Habakuk 3:13 bai kamap tru olsem wanem?
13 Tok profet i stori long ol man nogut bai bagarap olgeta, olsem: “Yu [Jehova] bin paitim strong het bilong haus bilong ol man nogut na yu bagarapim haus olgeta.” (Habakuk 3:13) Dispela “haus” em pasin nogut bilong nau em Satan i bin kamapim. Em bai bagarap na pinis olgeta. “Het bilong haus,” olsem ol bikman i birua long God, em tu bai bagarap na pinis. Olgeta samting Satan i kamapim, na as tu bilong en, ol bai pinis olgeta na i no ken i stap moa. Em bai gutpela tru, a?
14-16. Olsem Habakuk 3:14, 15 i tok, wanem samting bai painim lain bilong Jehova na ol birua bilong ol?
14 Long Armagedon, ol man i laik bagarapim “dispela king [Jehova] i bin makim,” ol bai longlong nabaut. Olsem Habakuk 3:14, 15 i tok, dispela profet i tokim God olsem: “Ol dispela birua i bin kam olsem bikpela win, bilong rausim mipela i go nabaut. Ol i amamas long daunim mipela olsem ol man i hait na wet bilong mekim nogut long ol manmeri i sot long ol samting. Tasol yu bin sutim kepten bilong ami bilong ol birua long ol spia bilong em yet. Yu bin sindaun long ol hos bilong yu na ol i krungutim solwara na i go. Na dispela i mekim biksi i kirap.”
15 Taim Habakuk i tok “ol dispela birua i bin kam olsem bikpela win, bilong rausim mipela i go nabaut,” dispela profet i toktok long ol wokboi bilong Jehova. Wankain olsem ol man i hait na wet bilong stilim samting long ol manmeri, ol lain bilong graun bai ran i go long ol man i lotuim God bilong bagarapim ol. Ol dispela birua bilong God na bilong lain bilong em, ol bai “amamas,” long wanem, ol i bilip olsem ol inap mekim. Long ai bilong ol, ol Kristen i stap gut long God ol i olsem i no gat bun, olsem ol manmeri i “sot long ol samting.” Tasol taim ol birua bilong God i kirap na pait long ol, Jehova bai mekim na ol bai kisim spia na sutim ol yet. Ol bai kisim “ol spia” bilong ol na kilim i dai ol wanlain soldia bilong ol yet.
16 Tasol i gat sampela samting moa bai kamap. Jehova bai kirap na mekim wok long ol ensel i gat bikpela strong na ol bai pinisim ol birua bilong em. “Ol hos” bilong ol ami bilong Krais Jisas long heven bai wok wantaim Jehova na Jehova bai krungutim “solwara” na “biksi,” em ol manmeri i birua long em. (KTH 19:11-21) Orait nau olgeta man nogut bai bagarap na pinis olgeta long graun. Man! Dispela i kamapim bikpela strong bilong God na stretpela pasin bilong em, a?
De Bilong Jehova i Wok Long Kam!
17. (a) Bilong wanem yumi ken bilip olsem ol tok bilong Habakuk bai kamap tru? (b) Olsem wanem yumi ken stap wankain olsem Habakuk taim yumi wetim bikpela de bilong Jehova?
17 Yumi ken bilip tru olsem klostu nau ol tok bilong Habakuk bai kamap tru—i no ken kamap bihaintaim. Yu gat wanem tingting long dispela save yu kisim long samting bai kamap bihain? Tingim, God yet i tokim Habakuk long ol tok em i mas raitim. Tru tumas, Jehova bai kirap na mekim wok, na taim em i mekim olsem, bikpela bagarap bai kamap long graun. Olsem na dispela profet i tok “Mi harim dispela olgeta samting na mi guria. Mi pret na maus bilong mi tu i guria. Hanlek bilong mi i dai na mi no gat strong moa. Mi save, God bai i kam na mekim save long ol man i save bagarapim mipela, olsem na mi stap isi na wetim dispela taim.” (Habakuk 3:16) Habakuk i guria nogut tru. Tasol yu ting em i surik na lusim bilip liklik? Nogat tru! Em i amamas long wetim de bilong Jehova. (2 Pita 3:11, 12) Yumi tu i gat wankain tingting, a? Yumi bilip tru olsem tok profet bilong Habakuk bai kamap tru. Tasol inap long taim dispela samting i kamap, yumi save stap isi na wet.
18. Maski Habakuk i save sampela hevi bai painim em, em i gat wanem tingting?
18 Pait i save kamapim hevi, na dispela hevi i save kisim tu ol man em bihain ol bai winim pait. Ating kaikai i sot. Graun na haus bilong ol man i lus. Ol man i no gat gutpela sindaun moa. Sapos dispela samting i painim yumi, bai yumi mekim wanem? Habakuk i gat stretpela tingting long dispela, na em i tok “Sapos ol diwai fik i no karim pikinini fik na ol diwai wain i no karim pikinini wain, na sapos ol diwai oliv i no karim pikinini na i no gat kaikai long gaden, na sapos olgeta sipsip i dai na haus bilong ol bulmakau tu i stap nating, orait maski dispela olgeta hevi i kamap, bai mi amamas na belgut. Long wanem, Bikpela em i God na em i save kisim bek mi.” (Habakuk 3:17, 18) Habakuk i save sampela hevi, olsem bikpela hangre, bai painim em. Tasol em i no lusim pasin bilong em long amamas long Jehova, em Man bilong kisim bek em, nogat.
19. Wanem sampela hevi i painim planti Kristen? Yumi ken bilip olsem sapos yumi tingim Jehova pastaim long i stap bilong yumi, em bai mekim wanem?
19 Long nau tu, taim Jehova i no kamapim yet pait long ol man nogut, planti man i kisim bikpela hevi. Jisas i tok profet olsem ol bikpela pait, hangre, guria, sik, ol i insait long mak bilong em i kam bek pinis na i stap King. (Matyu 24:3-14; Luk 21:10, 11) Planti wanbilip bilong yumi i stap long ol kantri i gat ol hevi i kamap olsem Jisas i bin tok profet long en, olsem na ol i gat hatwok tru long sindaun bilong ol. Bihain, ating sampela Kristen moa bai hatwok olsem. Na ating long planti bilong yumi, bai i olsem “ol diwai fik i no karim pikinini fik” i go inap long pinis bilong dispela pasin bilong nau. Tasol yumi save long as na ol dispela samting i kamap, na dispela i save givim strong long yumi. Na tu, God bai lukautim yumi. Jisas i tok promis olsem: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Matyu 6:33, Nupela Testamen na Ol Sam, bilong 1978) Dispela i no makim olsem yumi ken save tru bai yumi gat gutpela sindaun, nogat. Tasol yumi ken bilip olsem sapos yumi tingim Jehova pastaim long i stap bilong yumi, em bai was long yumi.—Song 37:25.
20. Maski ol hevi i painim yumi, yumi mas strong long mekim wanem?
20 Maski wanem wanem hevi i painim yumi, bai yumi no lusim bilip olsem Jehova i gat strong long kisim bek yumi, nogat. Planti brata na sista bilong yumi long Afrika, Isten Yurop, na sampela hap moa, ol i gat hatwok tru long sindaun bilong ol, tasol ol i ‘amamas na belgut, long wanem, God bai kisim bek ol.’ Yumi tu i no ken lusim pasin bilong mekim olsem. Tingim, Bikpela King Jehova em i As bilong “strong” bilong yumi. (Habakuk 3:19) Em i no ken lusim yumi. Armagedon bai kamap tru, na bihain long en nupela taim God i tok promis long kamapim em bai kamap tru. (2 Pita 3:13) Na ‘olgeta manmeri long graun bai i save tru long biknem na strong bilong Bikpela. Dispela save bai inapim olgeta hap graun olsem solwara inapim mak bilong en olgeta.’ (Habakuk 2:14) Inap long dispela gutpela taim i kamap, yumi mas bihainim gutpela pasin bilong Habakuk. Oltaim yumi mas ‘amamas na belgut, long wanem, God bai kisim bek yumi.’
Yu Inap Tingim?
• Beten bilong Habakuk inap mekim wanem long yumi?
• Bilong wanem Jehova i kirap mekim wok?
• Tok profet bilong Habakuk i tok wanem long Jehova i kisim bek yumi?
• Yumi mas i gat wanem kain tingting taim yumi wetim bikpela de bilong Jehova?
[Piksa long pes 23]
Long taim bilong Armagedon, God bai mekim wok long wanem ol lain bilong pait long ol man nogut? Yu save?