Haus Bilong Jehova i Gutpela Moa
“Jehova bilong ol bikpela lain ami i tok olsem, ‘. . . Bai mi pulapim haus bilong mi long ol gutpela gutpela samting.’ ”—HAGAI 2:7, NW.
TAIM wanpela Witnes Bilong Jehova i bin wok long autim tok long ol haus, em i bungim wanpela meri Pentikostal na meri i tok, ‘Mipela i gat spirit holi, tasol yupela yet i mekim wok.’ Long pasin isi, dispela Witnes i tokim em olsem man i gat spirit holi, dispela bai kirapim em long mekim wok bilong God. Jems 2:17 i tok: “Sapos bilip i stap nating, na em i no kamapim gutpela pasin long laip bilong man i bilip, orait dispela bilip em i samting nating.” Spirit bilong Jehova i bin helpim ol Witnes bilong em na ol i kisim strongpela bilip, na em i ‘pulapim haus bilong em long ol gutpela gutpela samting’ long rot bilong ol stretpela wok em i kirapim ol long mekim—bikpela wok em bilong “autim gutnius bilong kingdom bilong God long olgeta hap bilong graun, bai olgeta lain manmeri i ken harim.” Taim ol i mekim dispela wok inap tru long laik bilong Jehova, “bihain tasol bai las de i kamap.”—Matyu 24:14.
2. (a) Sapos yumi wok strong long mekim wok bilong Jehova, dispela bai kamapim wanem blesing? (b) Sampela i ting olsem pinis “i no inap kamap kwik,” tasol bilong wanem yumi ken amamas long dispela samting?
2 Long dispela tok bilong Jisas, yumi ken save olsem nambawan wok yumi mas mekim long nau em bilong autim ‘dispela gutnius God i givim long yumi bilong autim.’ (1 Timoti 1:11) Taim yumi amamas na wok strong long mekim wok bilong Jehova, i olsem pinis i wok long kam hariap moa. Long Habakuk 2:2, 3, Jehova i tok olsem: “Raitim gut dispela tok long wanpela hap ston na wanem man i laik ritim, em i ken lukim gut. Taim bilong ol dispela samting i mas kamap, em i no yet. . . . Tasol i no longtaim na dispela samting mi laik soim yu long en, em bai i kamap. Yu ting bai em i no inap kamap kwik, tasol yu mas wet liklik na em bai i kamap.” Tru tumas, “dispela tok” bai kamap tru, maski yumi “ting bai em i no inap kamap kwik.” Jisas i wok long bosim Kingdom inap olsem 82 yia pinis, olsem na sampela inap ting dispela hap taim bilong pinis yumi stap long en i kalapim pinis mak bilong en. Tasol ating yumi mas amamas olsem pinis i no kamap yet, a? Kirap long 1990 na i kam inap nau, i olsem wanpela mirakel na ol gavman i no tambuim moa wok bilong yumi long autim gutnius long Isten Yurop, na sampela hap bilong Afrika, na sampela kantri moa. Em nau, dispela hap taim em sampela i ting i kalapim pinis mak bilong en em i givim rot long yumi ken bungim planti “sipsip” moa long ol dispela kantri nau i no gat tambu moa.—Jon 10:16.
3. Nupela save yumi bin kisim long “ol manmeri bilong dispela taim,” bilong wanem dispela i mas kirapim yumi long wok hariap long mekim wok bilong God?
3 Profet i tok, “Yu mas wet liklik na em bai kamap.” Jisas i tok, taim ol manmeri nogut bilong dispela taim i no dai yet, “dispela olgeta samting bai i kamap.” (Matyu 24:34) Olsem wanem? Nupela save yumi bin kisim long dispela tok bilong Jisas, ating dispela i makim olsem yumi no ken wok hariap long autim tok?a Nogat. Ol samting i wok long kamap i soim olsem yumi mas wok hariap moa! Ol manmeri bilong dispela taim bilong yumi ol i wok long go nogut olgeta—ol i mekim ol pasin i no stret, winim olgeta narapela taim bipo. (Skelim wantaim Aposel 2:40.) Taim i sot pinis, olsem na yumi mas wok hariap. (2 Timoti 4:2) Olgeta tok profet i stori long taim bikpela hevi tru i mas kamap, ol i soim olsem em bai kamap wantu tasol, olsem stilman i hait i kam na yumi kirap nogut. (1 Tesalonaika 5:1-4; KTH 3:3; 16:15) “Olsem na yupela tu i mas redi. Pikinini Bilong Man bai i kam long wanpela taim yupela i no ting em bai i kam.” (Matyu 24:44) Ol manmeri bilong dispela taim em ol i givim baksait long God bai ol i bagarap liklik taim, olsem na nogut yumi tromoi dispela gutpela samting yumi wetim, em laip i stap oltaim, na yumi go bek gen na “tantanim nabaut long graun malumalum”—olsem ol pasin nogut bilong dispela graun!—2 Pita 2:22; 3:10; Luk 21:32-36.
4. Wanem samting i mekim na yumi mas kisim planti “kaikai” moa long taim stret? Jehova i mekim wanem bilong inapim yumi long dispela samting?
4 Stret olsem tok profet bilong Jisas i tok, long 1914 ol man i kirap pilim “ol samting em i olsem pen i save kamap pastaim long meri i laik karim pikinini,” long wanem, taim bilong “las de” i kamap pinis. I kam inap long nau ol hevi, na ol bikpela bagarap, na ol pasin nogut i wok long i go bikpela tru. (Matyu 24:3-8, 12) Tasol long wankain taim, Jehova i bin makim lain ‘gutpela wokboi’ bilong skelim “kaikai” bilong spirit long taim stret long ol wokboi bilong Bikman bilong ol, em Krais. (Matyu 24:45-47) Long sia king bilong em long heven, nau dispela King i bosim wok bilong givim kaikai bilong spirit long lain bilong em long olgeta hap.
Planti “Kaikai”
5. Ol i mekim wanem ol wok bilong redim nambawan “kaikai” bilong yumi?
5 Tingim wok bilong redim ol dispela “kaikai.” (Luk 12:42) Nambawan kaikai bilong ol Kristen em Tok Bilong God, em Baibel. Bilong mekim gut wok bilong skulim ol man long Baibel, i mas i gat wanpela Baibel em ol tok bilong en i klia na i stret. Insait long sampela yia, isi isi ol i bin kamapim wanpela Baibel olsem, na dispela wok i kirap long 1950 long taim ol i kamapim Baibel New World Translation of the Christian Greek Scriptures long tok Inglis. Long 1961 ol i kamapim Baibel olgeta long tok Inglis, em Baibel New World Translation; bihain liklik ol i kamapim long sampela narapela bikpela tok ples. Long yia bilong wok bilong 1996 ol i kamapim 3-pela volyum, na taim yumi bungim dispela namba wantaim ol volyum ol i wokim pinis, namba olgeta i olsem 27, na 14 bilong dispela namba em Baibel olgeta. Bilong mekim ol wok bilong kamapim dispela Baibel, na tu ol buk samting i kamapim tok bilong Baibel, inap olsem 1,174 Kristen ol i wok oltaim long tanim tok long 77 kantri.
6. Sosaiti i mekim wanem bilong helpim ol man em ol i laik kisim ol buk samting bilong Baibel?
6 Bilong helpim wok bilong dispela bikpela lain bilong tanim tok, ol 24 brens bilong Sosaiti Was Taua i save prinim ol buk ol i bin wokim planti buk na nius moa yet. Olsem na long ol bikpela brens ol i wok long putim sampela bikpela masin moa bilong wokim ol buk samting. Long olgeta mun, namba bilong ol Wastaua na Kirap! ol i save wokim em i wok long i go antap, na sapos yumi bungim tupela wantaim, long dispela yia ol i bin wokim 943,892,500 nius olgeta—em olsem namba i go bikpela inap 13.4 pesen. Long 1996, namba bilong ol Baibel na ol buk ol i bin wokim long Yunaitet Stets, Brasil, Finlan, Itali, Japan, Jemani, Meksiko, i kamap olsem 76,760,098; dispela namba i antap moa long 1995 inap 40 pesen. Sampela narapela brens tu i bin mekim bikpela wok long helpim dispela wok bilong wokim ol buk samting long i go bikpela.
7. Olsem wanem na long nau i bikpela samting moa long bihainim singaut long Aisaia 54:2?
7 Wanpela bikpela as na ol i mas wokim planti buk samting, em ol gavman i no tambuim moa wok bilong ol Witnes Bilong Jehova long Isten Yurop na long Afrika. Long ol dispela hap ol man i hangre tru long ol kaikai bilong spirit. Olsem na i bikpela samting moa yet long bihainim wanpela singaut: “Yu mas opim haus sel bilong yu olgeta, na lusim ol rop i go longpela na planim strong ol stik i go daun long graun, na taitim ol rop na pasim strong long ol dispela stik.”—Aisaia 54:2.
8. Ol brata i givim wanem bikpela helpim long mekim dispela wok?
8 Long dispela as, Sosaiti i mas skruim planti bilong ol 104 brens i go bikpela. Tasol i gat bikpela hevi bilong mani long planti bilong ol dispela kantri em gavman i pinisim tambu long ol, olsem na bikpela hap mani bilong mekim dispela wok i kam long ol kontribusen ol brata i givim bilong helpim wok long olgeta hap, em ol i stap long ol kantri i gat planti mani samting moa. Mipela i amamas olsem ol kongrigesen na ol wan wan brata i bin givim bel long givim ol samting, wankain olsem Kisim Bek 35:21 i tok: “Ol manmeri i bringim ol samting long Bikpela bilong wokim haus sel bilong bung wantaim em.” Mipela i laik tok tenkyu long olgeta i bin insait long dispela wok bilong givim planti samting.—2 Korin 9:11.
9 Long 1996 ol buk samting bilong Sosaiti Was Taua ol i bin tokaut long biknem bilong Jehova na laik bilong em i go inap long olgeta hap bilong graun. I olsem aposel Pol i bin tok profet long en. Em i kolim tok bilong Joel na bilong Song 19 na em i raitim dispela tok: “ ‘Olgeta manmeri i askim [“Jehova,” NW] long helpim ol, em bai i kisim bek ol.’ Tasol mi laik askim olsem, ating ol i no harim dispela gutnius? Nogat. Ol i harim pinis. Yumi save, ‘Ol manmeri long olgeta hap bilong graun i harim pinis nek bilong ol. Na tok bilong ol i go inap long olgeta ples.’ ” (Rom 10:13, 18) Taim lain bilong God i litimapim dispela gutpela nem tru, Jehova, ol i mekim bikpela wok long pulapim haus lotu bilong em long ol gutpela gutpela samting. Tasol yumi laik save, dispela wok i bin kamap bikpela olsem wanem long yia 1996? Plis skelim sat i kamap long pes 18 i go 21.
Bungim Kaikai Long Olgeta Hap
10. Yu lukim wanem ol bikpela wok em lain bilong Jehova i bin mekim, olsem i stap long sat long pes 18 i go inap 21?
10 I no gat wanpela taim bipo em tok bilong Jisas long Luk 10:2 i gat strong olsem long nau: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i ken salim ol wokman i go bungim kaikai bilong en.” Olsem wanem? Yu bihainim dispela singaut? Planti milion long olgeta hap ol i mekim olsem. Yumi ken save long dispela, long wanem, inap 5,413,769 pablisa i bin putim ripot bilong autim tok long 1996, na dispela i winim ol narapela yia bipo. Na tu, 366,579 nupela brata na sista i bin kisim baptais. Yumi amamas tru long ol dispela “gutpela samting bilong olgeta lain,” em ol tu i wok nau long ‘pulapim haus bilong Jehova long ol gutpela gutpela samting’!—Hagai 2:7, NW.
11. I gat wanem as na yumi olgeta i ken amamas tru?
11 Yumi kirap nogut long ol ripot bilong wok i go bikpela long ol kantri em gavman i pinisim tambu long wok bilong ol Witnes. Olsem wanem? Ating sampela bilong yumi i mangalim amamas bilong ol Witnes bilong sampela kantri em ol i kamap planti long nau? Nogat. Yumi amamas wantaim ol. Long olgeta kantri, taim wok i bin kirap nupela i gat liklik lain tasol. Sekaraia, em wanpela profet i bin autim tok long wankain taim olsem Hagai, em i tok: “Ol i lukim wok i no go het hariap, olsem na ol i bel hevi.” (Sekaraia 4:10) Yumi amamas tru olsem, long ol kantri em ol i bin mekim wok bilong autim tok inap longtaim, nau i gat planti milion ol i autim tok bilong Kingdom, na ol i save inapim teritori bilong ol planti taim—long sampela bikpela taun ol i mekim long olgeta wik. Long nau Jehova i givim rot long ol man long ol kantri bipo gavman i bin tambuim wok na bai ol inap kisim laip, olsem na yu ting i gat as na yumi ken les na lusim wok long dispela taim? Nogat tru! Jisas i tok: “Gaden em i dispela graun.” (Matyu 13:38) Yumi mas wok strong yet long autim tok, wankain olsem ol disaipel bilong pastaim i bin mekim long las de bilong lain Juda.—Aposel 2:40; 10:42; 20:24; 28:23.
Wokabaut i Go Oltaim
12. Wanem samting i ken kirapim yumi long wokabaut “i go tasol”? (Lukim blok, “Bungim Kaikai ‘Long Arere Tru Bilong Graun.’ ”)
12 Tru tumas, yumi mas wokabaut i go wantaim karis bilong Jehova long heven, wankain olsem ol ensel em ‘ol i go tasol na ol i no save tanim pes bilong ol.’ (Esekiel 1:12) Yumi ken tingim tok bilong Pita, olsem: “Bikpela i no save wok isi isi long kamapim samting em i bin promis long mekim, olsem sampela man i save tok. Nogat. Tasol em i no laik bai wanpela man i lus. Em i laik bai olgeta man i mas tanim bel, olsem na em i isi long yupela na em i wet i stap yet.” (2 Pita 3:9) Ol brata bilong yumi long ol kantri i stap rabis ol i givim bel tru long mekim wok, na dispela pasin bilong ol i mas kirapim yumi long wok i go. Yumi inap ting olsem Armagedon i no kam hariap, tasol dispela i givim rot long planti handet tausen manmeri long ol dispela kantri long kam insait, na tu long ol teritori yumi save inapim planti taim. Yumi no ken giamanim yumi yet long dispela samting: “De bilong Bikpela i mekim kot bilong en, em i klostu nau na dispela De bai i kamap kwiktaim tru.” (Sefanaia 1:14) Na yumi tu i mas wok hariap na bai yumi ken inapim tru wok bilong yumi long autim tok!
13, 14. (a) Olsem wanem long wok bilong tilim ol buk na nius long 1996? (b) Long olgeta yia ol kongrigesen i ken stretim rot long mekim wanem bikpela wok? Yu tingting long mekim wanem na bai yu ken insait long dispela wok?
13 Dispela sat bilong wok i no kamapim, tasol insait long yia i go pinis yumi bin tilim planti Baibel, na buk, na magasin moa. Olsem: Long olgeta hap yumi bin tilim 543,667,923 magasin, na dispela namba i go bikpela inap 19 pesen. Ol magasin bilong yumi i gutpela bilong mekim wok autim tok long kain kain ples—long rot, long ol pak, long ples bilong kisim bas, long ol stua na ofis samting. Ol ripot i soim olsem, long sampela teritori yumi save autim tok planti taim long en, ol bisnisman i laikim tru ol magasin bilong yumi ol i wokim gut, na ol i amamas long stadi long Baibel.
14 Long olgeta yia long mun Epril, ol kongrigesen i save stretim rot long mekim bikpela wok long tilim ol magasin, na ol i save makim wanpela de olgeta bilong tilim ol magasin long ol haus na long rot samting. Olsem wanem? Kongrigesen bilong yu bai insait long dispela wok long Epril 1997? Mipela i bin redim ol nambawan Wastaua na Kirap! bilong mun Epril, na taim olgeta i tilim ol dispela magasin long wankain taim long olgeta hap, dispela bai kirapim tru tingting bilong ol man! Long ailan Saiprus, ol kongrigesen i save tingim wanpela tok, olsem: “Painim olgeta man yu inap painim na autim tok bilong Kingdom long ol.” Olsem na long olgeta mun bihain long en ol i bin makim taim bilong mekim bikpela wok magasin, na ol i tilim bikpela namba tru long dispela yia, winim ol narapela yia bipo, inap olsem 275,359, na dispela namba i go bikpela inap 54 pesen.
Ol Laspela Toksave Bilong Hagai
15. (a) Bilong wanem Jehova i bin givim sampela toksave moa long ol Israel long rot bilong Hagai? (b) Namba 3 toksave bilong Hagai i mas skulim yumi long wanem samting?
15 Inap 63 de bihain long Hagai i givim namba 2 toksave, Jehova i salim em long mekim namba 3 toksave—em wanpela toksave yumi ken tingim gut long nau. Ol tok Hagai i mekim i olsem long dispela taim yet ol Juda i wok long putim ol as ston bilong tempel, tasol ol i bin putim inap 17 yia paslain long en. Long dispela taim gen Jehova i kirap mekim sampela samting bilong mekim ol i kamap klin. Ol pris na ol manmeri i slek long mekim wok, olsem na long ai bilong Jehova ol i kamap doti. Olsem wanem? Ating long nau tu sampela long lain bilong Jehova ol i slek long mekim wok, na ol i insait long ol pasin nogut na pasin bilong laikim tumas mani kago olsem ol man bilong dispela graun? Taim i sot pinis na em i bikpela samting long yumi olgeta i mas kirap na tingting strong long mekim ol samting bilong givim biknem long Jehova, na yumi ken bilip tru long tok promis bilong em: “Nau bai mi stat long mekim gut long yupela.”—Hagai 2:10-19; Hibru 6:11, 12.
16 Long dispela de yet, “Jehova bilong ol bikpela lain ami” i givim tok gen long Hagai long namba 4 taim—em laspela taim. Nau em i kamapim klia olsem wanem em bai “seksekim skai na graun,” em i tok: “Mi laik bagarapim strong bilong ol king na bai ol i no gat strong moa. Na bai mi bagarapim ol karis bilong pait wantaim ol soldia i save sanap long ol. Na olgeta hos bilong pait bai i dai, na ol soldia i save sindaun long ol hos, ol bai i kilim ol wanwok bilong ol yet.” (Hagai 2:6, 21, 22) Jehova bai “seksekim” ol samting i go i go inap long taim em i klinim dispela graun olgeta long Armagedon. Long dispela taim “ol gutpela samting bilong olgeta lain” bai ol i kam insait pinis, na ol bai kamap olsem as bilong dispela lain manmeri ol bai i stap long graun long nupela taim. Em sampela gutpela as na yumi ken amamas na litimapim nem bilong Jehova, a?—Hagai 2:7, NW; KTH 19:6, 7; 21:1-4.
17 Bilong pinisim tok profet bilong em, Hagai i tok: “Taim dispela samting i kamap, bai mi kisim yu Serubabel . . . na yu bai i stap olsem ring long pinga bilong mi. Mi God, Bikpela I Gat Olgeta Strong, mi tok pinis.” (Hagai 2:23) Long nau Krais Jisas i stap King na Hetpris long heven, na em i holim dispela tupela wok wantaim em Hetman Serubabel na Hetpris Josua i bin holim long Jerusalem long graun. Olsem wanpela kain ring bilong putim mak i stap long pinga long han sut bilong Jehova, Jisas inap tok “Yes,” long olgeta “promis bilong God,” long wanem, long rot bilong em Jehova bai truim ol dispela promis. (2 Korin 1:20; Efesus 3:10, 11; KTH 19:10) Bikpela tok bilong olgeta tok profet bilong Baibel i olsem: Jehova i givim Krais olsem King na Pris bilong baim bek ol man.—Jon 18:37; 1 Pita 1:18, 19.
18 Tru tumas, long taim bilong yumi haus lotu spirit bilong Jehova i kamap gutpela moa yet, winim ol narapela haus! Na klostu nau, taim Jehova i rausim pinis graun bilong Satan olgeta, bai i gat narapela gutpela truim bilong Hagai 2:9: “Na long dispela ples bai mi givim bel isi na planti gutpela samting long ol manmeri bilong mi. Mi God, Bikpela I Gat Olgeta Strong, mi tok pinis.” Bel isi bai kamap tru!—em bai stap oltaim, long olgeta hap bilong heven na graun, na Jehova i tok promis olsem em bai kamapim long rot bilong man i stap olsem “ring” bilong em, em Krais Jisas, em “King bilong kamapim gutpela sindaun na bel isi.” Baibel i tok long em olsem: “Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim. . . . Bikpela i Gat Olgeta Strong . . . em bai i mekim ol dispela samting i kamap.” (Aisaia 9:6, 7) Inap long olgeta taim bihain bikpela lait bilong dispela haus lotu bilong Jehova bai kamap long olgeta hap Jehova i bosim, em King bilong heven na graun. Gutpela sapos yumi ken stap oltaim long dispela haus!—Song 27:4; 65:4; 84:10.
[Futnot]
a Lukim stori “God i Kisim Bek Yumi Long ‘Lain Manmeri Nogut’ ” na “Taim Bilong Was i Stap” long Wastaua bilong Novemba 1, 1995.
Yu Inap Stori Long Dispela?
◻ Long nau, olsem wanem Jehova i wok long ‘pulapim haus bilong em long ol gutpela gutpela samting’?
◻ Bilong wanem long nau yumi mas wok hariap moa long autim tok, winim ol narapela taim bipo?
◻ Olsem wanem Ripot Bilong Yia Bilong Wok Bilong 1996 i ken kirapim yumi long wok hariap?
◻ Olsem wanem na Krais i stap olsem “ring” bilong Jehova bilong putim mak?
1. Olsem wanem yumi ken bungim spirit holi wantaim bilip na wok?
9. Olsem wanem truim bilong Rom 10:13, 18 i kamap long nau?
16. Klostu nau Jehova bai “seksekim” wanem ol samting? Dispela bai mekim wanem?
17. Olsem wanem Jehova i mekim Jisas i kamap olsem wanpela ‘ring bilong putim mak’?
18. Olsem wanem laspela toksave bilong Jehova bai i gat gutpela truim bilong en?
[Blok long pes 15]
Bungim Kaikai “Long Arere Tru Bilong Graun”
LONG Aisaia 43:6, Jehova i tok olsem: “Bai mi tokim ol man long hap not na hap saut long larim yupela i kam bek. Maski ol manmeri bilong mi i stap longwe tru long arere tru bilong graun, bai mi bringim ol i kam bek.” Long nau long Isten Yurop, dispela skripsa i wok long kamap tru moa yet. Yumi ken tingim kantri Moldova, em bipo ol Komyunis i bosim. Long sampela liklik ples inap 50 pesen bilong ol man ol i Witnes. Ol i mas raun i go longwe tru bilong painim ol hap bilong autim tok, tasol ol i no les! Planti pablisa long ol dispela kongrigesen, papamama bilong ol i bin go kalabus long Saibiria long 1952 samting. Nau ol pikinini bilong ol i go pas long wok bilong bungim kaikai. Inap 1,917 bilong ol 12,565 pablisa ol i bin kisim baptais long yia i go pinis. I gat 43 kongrigesen na inap olsem 150 pablisa long olgeta wan wan, na ol i kamapim sampela sekit moa; pastaim i gat 4-pela sekit, tasol nau long nupela yia bilong wok i gat 8-pela.
Na wok i go bikpela tu long Albenia. Long dispela kantri wanpela liklik lain Witnes ol i stap gut long God na ol i bin sanap strong na karim hevi inap 50 yia aninit long wanpela gavman dikteta nogut tru. Ol i bin kilim i dai sampela Witnes. Dispela i kirapim yumi long tingim tok promis bilong Jisas, olsem: “Harim. Satan bai i mekim, na ol bai i kalabusim sampela man namel long yupela, bilong traim yupela. Na bai yupela i karim hevi na pen . . . Tasol yu mas holim bilip, i go inap long taim yu dai, na bai mi givim yu laip olsem prais.” (KTH 2:10; lukim tu Jon 5:28, 29; 11:24, 25.) Yumi lukim wanem samting i kamap nau long Albenia? Em gutpela truim bilong tok promis bilong Jehova i stap long Aisaia 60:22: “Ol lain i liklik tru bai ol i kamap planti moa”! Long 1990 i gat wanpela pablisa tasol i bin putim ripot bilong autim tok long Albenia. Tasol planti “wokman” long Itali na long ol narapela kantri ol i bin harim singaut bilong Jisas: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol.” (Matyu 28:19; Luk 10:2) Long taim bilong Memorial bilong i dai bilong Jisas long 1996, inap 773 pablisa ol i wok long autim tok, na ol i bungim inap 6,523 manmeri i kam long ol bung bilong Memorial, em i winim namba bilong ol pablisa inap 8-pela taim! Long ol ples i stap longwe long ol kongrigesen, ol ripot i kamapim olsem i gat bikpela lain i bung long ol dispela ples tu. Long Kukes inap 192 ol i kam bung, na 230 long Divyeke—maski i no gat pablisa long dispela tupela biktaun. Kruja i gat wanpela pablisa tasol, tasol 212 i kam bung. Long Korsa, 30 pablisa i baim wanpela ples bung inap long 300 i ken bung long en. Taim ples bung i pulap pinis, narapela 200 i kam, tasol i no gat spes na ol i mas salim ol i go bek gen. Tru tumas, ol kaikai i mau pinis long dispela hap!
Dispela ripot i kam long Romenia: “Taim mipela i wok long autim tok long ol haus, mipela i bungim wanpela man em i tok em i wanpela Witnes Bilong Jehova na em i sindaun long wanpela liklik taun em mipela i save i no gat ol Witnes long en. Em i tokim mipela olsem, inap planti yia em i save bung wantaim 15 narapela man na ol i save miting long ol Fonde na Sande na ol i bin kirap autim tok long ol haus. Long de bihain mipela i go long dispela taun. Insait long tupela rum, 15 man meri pikinini i wetim mipela, na ol i kisim 20 buk na 20 nupela magasin. Mipela i soim ol long pasin bilong mekim ol Baibel-stadi. Mipela i singsing wantaim na bekim ol askim em ol i laik bai mipela i bekim pastaim. Man i go pas long dispela liklik lain em i tok: ‘Sampela de i go pinis, mi beten na krai wantaim long Jehova na mi askim em long salim wanpela wasman i kam, na Jehova i harim pinis beten bilong mi.’ Mipela i amamas tru, na taim mipela i laik lusim ol, dispela man, olsem wanpela pikinini i no gat papamama tasol bihain em i painim wanpela papa, em i tok: ‘Plis yu no ken lusim tingting long mipela. Kam bek gen na lukim mipela!’ Mipela i bin mekim olsem, na long nau mipela i save lukautim 7-pela Baibel-stadi long dispela taun. Long planti nupela teritori, wok i save kirap pastaim long rot bilong ol buk na nius bilong Baibel, em ol man i laikim tru, na dispela i kamapim klia olsem God i bosim dispela wok.”
[Sat long pes 18-21]
RIPOT BILONG WOK BILONG OL WITNESS BILONG JEHOVA LONG 1996
(Bilong save ol dispela rait i stap we long pes, lukim buk o magasin.)
[Ol Piksa long pes 16, 17]
Ol i wok long bungim “ol gutpela samting bilong olgeta lain” long Ol Ailan Bilong Solwara (1), Saut Amerika (2), Afrika (3), Esia (4), Not Amerika (5), Yurop (6)