Stap Insait Long Ples Daun Bilong Jehova

1, 2. Wanem pait tru tru bai kamap klostu nau? Bai yumi no inap mekim wanem long dispela pait?

LONG Oktoba 30, 1938, planti milion manmeri long Amerika i wok long harim wanpela program long redio. Long dispela program, ol ekta i kamap olsem ol nius ripota, na ol i mekim wanpela toksave olsem sampela lain long planet Mars i kam daun long graun na i wok long bagarapim graun. Planti man i no save olsem em i wanpela stori nating tasol i kamap long redio. Ol i ting olsem tru tru wanpela pait i kamap, na ol i pret. Sampela i mekim kain kain samting bilong lukautim ol yet bambai ol i no kisim hevi long han bilong ol birua.

² Klostu nau wanpela pait tru tru bai kamap. Tasol planti man i no redi long en. Dispela pait em Armagedon, em pait bilong God bilong bagarapim pasin nogut bilong dispela graun. Em i no wanpela stori nating. Yumi save olsem dispela pait bai kamap, long wanem, long rot bilong tok bilong em long Baibel, God i tokim yumi long dispela pait. (Rev. 16:14-16) Bai yumi no inap insait long dispela pait, nogat. Jehova bai mekim wok long strong bilong en long kisim bek yumi.

 3. Bai yumi skelim wanem tok profet? Olsem wanem dispela tok profet i bikpela samting long yumi long nau?

³ Wanpela tok profet i stap long Sekaraia sapta 14 i stori long dispela pait bilong Armagedon. Dispela tok profet i bikpela samting long yumi long nau, maski ol i bin raitim inap 2,500 yia i go pinis. (Rom 15:4) Em i stori long ol samting i bin kamap long lain bilong God kirap long taim Krais i mekim wok king long heven long 1914. Na tu, em i stori long ol bikpela samting bai kamap klostu nau. Dispela tok profet i stori long “bikpela ples daun” na “gutpela wara.” (Sek. 14:4, 8) Long dispela stadi, bai yumi kisim save long samting dispela ples daun i makim, na olsem wanem dispela ples i stap olsem ples hait bilong ol man i lotuim Jehova. Na tu, bai yumi kisim save long dispela gutpela wara i makim wanem samting, na olsem wanem em inap helpim yumi. Na long dispela rot, bai yumi luksave olsem yumi mas dring dispela wara, na tu, yumi mas i gat laik long dring dispela wara. Orait nau, bai yumi skelim gut dispela tok profet.—2 Pita 1:19, 20.

 4. (a) Wanem taim “De bilong God” i kirap? (b) Inap planti yia paslain long 1914, ol Kristen God i bin makim i tokaut long wanem samting? Ol bikman bilong politik na lotu i bin mekim wanem?

⁴ Kirap bilong tok profet long Sekaraia sapta 14 i tok: “Bikpela De bilong God bai i kamap.” (Ritim Sekaraia 14:1, 2.) Wanem dispela de? Dispela de em i “de bilong Bikpela,” na em i kirap long 1914, taim Jisas i kamap king long Kingdom Bilong God long heven. (Rev. 1:10; 11:15) Inap planti yia paslain long 1914, ol Kristen em God i bin makim, ol i bin tokaut olsem pinis bilong dispela “haptaim bilong ol manmeri bilong ol arapela lain” bai kamap long 1914. Na tu, ol i tokaut olsem kirap long dispela taim na i kam, planti hevi bai kamap long graun winim olgeta taim bipo. (Luk 21:24) Olsem wanem? Ol lain manmeri i putim yau long dispela tok lukaut? Nogat. Ol bikman bilong politik na lotu i tok bilas na mekim nogut long ol dispela Kristen. Taim ol dispela bikman i mekim olsem, i olsem ol i tok bilas long God i Gat Olgeta Strong, long wanem, ol dispela Kristen God i bin makim, ol i stap olsem mausman bilong Kingdom Bilong God.—Hib. 12:22, 28.

5, 6. (a) Ol birua bilong lain bilong God i mekim wanem? (b) Husat ol dispela ‘hap lain i stap yet long Jerusalem’?

⁵ Sekaraia i tok profet long ol samting em ol birua bilong lain bilong God bai mekim, na em i tok: “Bai ol i winim Jerusalem.” Dispela taun “Jerusalem” i makim Kingdom Bilong God. Ol Kristen God i bin makim em ol i stap yet long graun, ol i hap bilong dispela Kingdom. (Fili. 3:20) Long taim bilong Wol Woa 1, ol i bin arestim ol brata em ol i go pas long wok insait long oganaisesen bilong Jehova na putim ol long kalabus long Atlanta, Georgia long Amerika. Dispela i olsem “ol i winim Jerusalem.” Ol birua i mekim nogut tru long ol Kristen God i bin makim, na ol i putim tambu long ol buk na nius bilong ol, na ol birua i traim long pasim wok bilong autim tok. Taim ol i mekim olsem, i olsem ol i “kisim olgeta samting” long ol haus i stap long Jerusalem.

⁶ Tru ol strongpela birua i mekim nogut long lain bilong God na mekim ol tok giaman long ol. Tasol ol dispela birua i no inap bagarapim lotu i tru, long wanem, i gat ol Kristen God i bin makim em ol i stap gut long God. Olsem Sekaraia i tok, ol dispela Kristen ol i ‘hap lain i stap yet long Jerusalem.’

 7. Olsem wanem ol Kristen God i bin makim i stap gutpela piksa bilong yumi?

⁷ Olsem wanem? Ol birua i no mekim nogut moa long lain bilong God taim Wol Woa 1 i pinis? Nogat. Tok profet bilong Sekaraia long ol bai mekim nogut long lain bilong God i go het yet. (Rev. 12:17) Olsem, long taim bilong Wol Woa 2, ol i mekim nogut tru long ol brata bilong yumi. Ol Kristen God i bin makim i stap gutpela piksa long pasin bilong i stap gut long God, na dispela i strongim yumi tu long nau long karim ol hevi i painim yumi. Ol hevi olsem inap kam long rot bilong ol famili, o ol wanwok, o ol wanskul, em ol i tok bilas long bilip bilong yumi. (1 Pita 1:6, 7) Maski yumi stap long wanem wanem hap, yumi tingting strong long stap gut long God na yumi no larim ol man i birua long yumi i mekim na yumi pret. (Fili. 1:27, 28) Tasol olsem wanem yumi inap stap gut long dispela graun we ol man i heitim yumi?—Jon 15:17-19.

 8. (a) Long Baibel, sampela taim maunten i makim wanem samting? (b) “Maunten Oliv” i makim wanem samting?

⁸ Long dispela tok profet, yumi kisim save olsem “Jerusalem” i makim Kingdom Bilong God. Orait dispela “maunten Oliv klostu long Jerusalem” i makim wanem samting? Olsem wanem bai dispela maunten i “bruk namel” na kamap 2-pela maunten? Na bilong wanem Jehova i kolim dispela 2-pela maunten olsem “maunten bilong mi”? (Ritim Sekaraia 14:3-5.)a Long Baibel, sampela taim dispela tok maunten inap makim ol kingdom, o ol gavman. Na tu, Baibel i kamapim olsem ol blesing i save kam long maunten bilong God na dispela maunten i save lukautim ol lain bilong en. (Sng. 72:3; Ais. 25:6, 7) Olsem na maunten Oliv i makim wok bilong Jehova long bosim olgeta samting em i bin wokim.

 9. Wanem mining bilong dispela tok olsem Maunten Oliv i “bruk namel”?

⁹ Dispela tok profet i tok olsem maunten Oliv bai i “bruk namel.” Wanem mining bilong dispela tok? Dispela i makim olsem Jehova i kamapim nambatu gavman bilong mekim wanpela spesel wok. Dispela gavman i bilong God tu, na Jisas Krais em i King bilong en. Dispela 2-pela gavman wantaim i bilong Jehova, olsem na em i tok dispela 2-pela maunten i “maunten bilong mi.”—Sek. 14:4, 5.

10. Dispela “bikpela ples daun” namel long 2-pela maunten i makim wanem samting?

¹⁰ Dispela tok profet i kamapim olsem taim maunten Oliv i bruk long namel, hap bilong maunten bai i go long hap not, na narapela hap bai i go long hap saut, na Jehova i sanap antap long dispela 2-pela maunten. Maunten i bruk na i kamapim “bikpela ples daun” aninit long hap we Jehova i sanap long en. Dispela ples daun i makim wanem samting? Em i makim lukaut bilong Jehova long lain bilong en. Ol manmeri i stap long ples daun bilong 2-pela maunten, ol i save stap gut, na olsem tasol ol wokman bilong God i save stap gut aninit long wok bos bilong en na Pikinini bilong en. Jehova i no inap larim lotu i tru i pinis olgeta. Wanem taim maunten Oliv i bruk? Dispela samting i kamap long 1914 taim Jisas i kirap mekim wok king long heven. Na tu, dispela tok profet i kamapim olsem lain bilong Jehova bai ranawe i go long dispela “bikpela ples daun.” Wanem taim dispela samting i kamap?

11, 12. (a) Long wanem taim lain bilong God i kirap ranawe i go long ples daun? (b) Wanem samting i soim olsem Jehova i save lukautim lain bilong en?

¹¹ Jisas i givim tok lukaut long ol disaipel bilong en olsem: “Ol man bai heitim yupela, long wanem, nem bilong mi i stap long yupela.” (Mat. 24:9) Dispela pasin bilong ol man i heitim lain bilong God i go bikpela moa stat long 1914 em taim las de i kirap. Long taim bilong Wol Woa 1, ol birua i mekim nogut tru long ol Kristen God i bin makim, tasol ol i no bin pinisim lotu i tru. Long 1919, lain bilong God i lusim kalabus bilong Bikpela Babilon, em ol lotu giaman. (Rev. 11:11, 12)b Em long dispela yia, lain bilong God i kirap ranawe i go long ples daun.

¹² Kirap long 1919 na i kam, Jehova i lukautim ol lain i lotu tru long em long olgeta hap bilong graun. Insait long planti yia, planti gavman i traim long pasim wok bilong ol Witnes Bilong Jehova long autim tok na ol i putim tambu long ol buk na nius bilong ol. Dispela i kamap yet long sampela kantri. Tasol Jehova i no larim ol dispela gavman long pinisim lotu i tru. Maski ol gavman bilong ol man i mekim wanem samting, Jehova bai yusim bikpela strong bilong em long lukautim yet lain bilong en.—Lo 11:2.

13. Yumi mas mekim wanem bilong stap insait long ples daun bilong Jehova? Long nau, bilong wanem em i bikpela samting long yumi stap insait long dispela ples daun?

¹³ Sapos yumi stap gut yet long Jehova, bai yumi stap insait long lukaut bilong Jehova, em ples daun bilong en. Jehova wantaim Pikinini bilong en i no inap larim wanpela man o wanpela samting i rausim yumi long lukaut bilong ol. (Jon 10:28, 29) Jehova i givim yumi olgeta samting bilong helpim yumi long stap gut aninit long wok bos bilong en na Pikinini man bilong en. Long taim bilong traipela hevi tru em klostu nau bai kamap, yumi mas kisim helpim bilong God. Olsem na nau winim olgeta taim bipo, em i bikpela samting long yumi mas stap insait long dispela ples daun bilong Jehova, em lukaut bilong en.

14, 15. Long taim Jehova i pait long ol birua bilong en, wanem samting bai painim ol man i no stap insait long lukaut bilong God?

¹⁴ Kirap long nau na i go inap long taim pasin nogut bilong dispela graun i pinis, Satan bai wok strong moa long bagarapim lain bilong God. Tasol klostu nau Satan bai mekim laspela pait bilong en. Long dispela taim, Jehova bai pait na bagarapim olgeta birua bilong en. Olsem Sekaraia i bin tok profet, dispela em “taim bilong pait” bilong God. Jehova bai kamapim klia olsem em i Strongpela Soldia long dispela pait, winim olgeta pait bilong bipo.—Sek. 14:3.

¹⁵ Long taim Jehova i pait long ol birua bilong en, wanem samting bai kamap long ol man i no stap insait long lukaut bilong en? Tok profet i kamapim olsem ol bai i no gat “strongpela lait.” Dispela i makim olsem God i no orait long ol. Sekaraia i tok profet moa olsem “ol hos na ol kamel na ol donki” bai “kol na kamap ais.” Ol dispela samting ol i save yusim long pait bai kol na kamap ais, na dispela i makim olsem ol bai no gat wok moa. Sekaraia i tok profet olsem Jehova bai givim “sik nogut tru,” olsem strafe long ol birua bilong en. Ai na tang bilong ol “bai i sting.” Yumi no save sapos dispela em sik tru tru bai painim ol o nogat. Tasol yumi save olsem ol i no inap mekim nogut long yumi na ol i no inap mekim tok bilong daunim God. (Sek. 14:6, 7, 12, 15)c Olgeta “king bilong graun wantaim ol ami bilong ol” bai stap long sait bilong Satan. Na maski ol i stap long wanem wanem hap bilong graun, ol bai bagarap. (Rev. 19:19-21) “Long dispela taim Bikpela bai i kilim i dai planti manmeri moa na bai bodi bilong ol i stap nabaut long olgeta hap bilong graun.”—Jer. 25:32, 33.

16. Yumi mas givim wanem ol askim long yumi yet? Yumi mas mekim wanem long taim bilong traipela hevi tru?

¹⁶ Long pait, olgeta man i save kisim hevi. Ol man i win, ol tu i save kisim hevi. Long taim bilong traipela hevi tru, yumi inap kisim hevi. Ating bai yumi sot long kaikai. O ating planti samting bilong yumi bai bagarap. O ating bai yumi no gat raits olsem yumi gat long nau. Sapos ol kain hevi olsem i painim yumi, bai yumi mekim wanem? Bai yumi pret na tingting planti? Bai yumi bel hevi na ting i no gat gutpela samting bai painim yumi? Bai yumi lusim wok bilong Jehova? Long taim bilong traipela hevi tru, yumi mas stap insait long lukaut bilong Jehova, em dispela ples daun, long rot bilong stap gut long Jehova na bilip tru olsem em bai lukautim yumi.—Ritim Habakuk 3:17, 18.

17, 18. (a) Dispela “gutpela wara” i makim wanem samting? (b) “Raunwara Detsi” na “Biksolwara Mediterenian” i makim wanem samting? (c) Yumi gat laik long mekim wanem?

¹⁷ Bihain long Armagedon, “gutpela wara” bai lusim Kingdom Bilong Krais na ran i go. Dispela “gutpela wara” i makim olgeta samting em God i givim long ol man bilong ol i ken i stap oltaim oltaim. Long tok profet bilong Sekaraia, “raunwara Detsi” i makim ol manmeri i stap long matmat. “Biksolwara Mediterenian” i pulap long ol samting i gat laip na i makim “bikpela lain manmeri” em ol i abrusim bagarap long Armagedon. (Ritim Sekaraia 14:8, 9; Rev. 7:9-15) Dispela 2-pela lain bai dring dispela “gutpela wara” i kam long “wara bilong laip.” Na dispela bai mekim na olgeta bilong ol bai kamap gutpela olgeta na ol bai stap oltaim oltaim.—Rev. 22:1, 2.

¹⁸ Taim Jehova i pinisim pasin nogut bilong dispela graun, em bai lukautim yumi na kisim yumi i go insait long nupela taim i gat stretpela pasin long en. Maski olgeta lain man bilong dispela graun i heitim yumi, yumi pasim tok pinis long bel olsem yumi bai stap gut long Kingdom Bilong God na bai yumi stap insait long lukaut bilong Jehova, em dispela ples daun bilong en.