Taitim Bun na Wok Strong
“Yupela i mas taitim bun na wok strong. Tingim dispela tok yupela i bin harim long maus bilong ol profet.”—SEKARAIA 8:9.
1, 2. Bilong wanem yumi mas tingim ol tok i stap long Buk Hagai na Buk Sekaraia?
HAGAI na Sekaraia i raitim ol tok profet bilong ol inap olsem 2,500 yia i go pinis, tasol ol dispela tok inap helpim yumi long nau. Ol stori bilong Baibel i stap long Buk Hagai na Buk Sekaraia ol i no samting bilong bipo tasol. Ol i insait long “olgeta tok bipo ol i bin raitim long buk bilong God . . . bilong skulim yumi.” (Rom 15:4) Planti samting yumi ritim long dispela tupela buk i kirapim yumi long tingim ol samting tru tru i wok long kamap long graun stat long taim Kingdom i kamap pinis long heven long 1914.
2 Aposel Pol i stori long ol samting i bin kamap long lain bilong God long bipo na em i tok: “Dispela ol samting i bin kamap long ol, em i olsem piksa bilong ol arapela man i ken lukim. Ol man i bin raitim ol dispela stori long buk bilong God, bilong givim tingting long yumi ol man i stap long dispela taim nau, em taim dispela graun klostu i laik pinis.” (1 Korin 10:11) Olsem na ating yu laik save: ‘Buk Hagai na Buk Sekaraia inap helpim yumi olsem wanem long nau?’
3. Hagai na Sekaraia i stori long wanem samting?
3 Olsem stori paslain long dispela i bin kamapim, ol tok profet bilong Hagai na Sekaraia i toktok long taim ol Juda i lusim kalabus long Babilon na ol i go bek long graun God i bin givim long ol. Dispela tupela profet i stori long wok bilong wokim gen tempel. Ol Juda i putim ol as ston bilong tempel long 536 B.C.E. Tru, sampela lapun Juda i tingim ol samting bilong bipo, tasol olgeta arapela i “amamas na singaut.” Tasol i gat wanpela samting i bin kamap long taim bilong yumi em i bikpela samting moa yet. Olsem wanem dispela i olsem?—Esra 3:3-13.
4. Bihain liklik long Wol Woa 1, wanem samting i kamap?
4 Bihain liklik long Wol Woa 1, ol Kristen Jehova i bin makim ol long holi spirit ol i lusim kalabus long Bikpela Babilon. Dispela em wanpela bikpela samting i soim olsem Jehova i helpim ol. Paslain long dispela, i luk olsem ol bikman bilong lotu na ol poroman bilong ol long wok politik, ol i bin pinisim wok bilong ol Sumatin Bilong Baibel long autim tok na skulim ol man. (Esra 4:8, 13, 21-24) Tasol God Jehova i rausim olgeta samting i pasim rot bilong mekim wok bilong autim tok na kamapim ol disaipel. Insait long planti yia bihain long 1919, wok bilong autim tok bilong Kingdom na kamapim ol disaipel i wok long i go bikpela moa na i no gat wanpela samting inap pasim.
5, 6. Sekaraia 4:7 i makim wanem gutpela wok tru i kamap?
5 Olsem na yumi ken bilip tru olsem wok bilong autim tok na skulim ol man em ol wokman bilong Jehova i mekim, em bai go yet na Jehova bai helpim ol. Sekaraia 4:7 i tok: “Taim yu putim namba wan ston bilong banis long ples bilong en, orait ol manmeri bai i singaut strong olsem, ‘Em i gutpela haus tru.’ ” Dispela i makim wanem gutpela wok tru i kamap long taim bilong yumi?
6 Sekaraia 4:7 i makim taim bai kamap na pasin bilong lotu tru long Nambawan Bikpela bai kamap gutpela olgeta insait long banis bilong tempel spirit bilong em long graun. Dispela tempel em rot Jehova i putim bambai yumi ken lotu long em long rot bilong ofa bilong Krais Jisas. Tru, dispela bikpela tempel spirit i bin kamap long taim bilong ol aposel. Tasol wok bilong lotu tru long God insait long banis bilong tempel long graun i mas kamap gutpela olgeta. Planti milion manmeri i lotu long God ol i stap nau insait long banis bilong dispela tempel spirit long graun. Ol wantaim planti manmeri i kirap bek ol bai kamap gutpela olgeta insait long Taim Bilong Wan Tausen Yia Bilong Jisas Krais i Stap King. Long pinis bilong dispela 1,000 yia, ol manmeri i lotu tru long God, ol tasol bai stap long dispela graun i kamap klin pinis.
7. Jisas i mekim wanem wok bilong mekim lotu i tru i kamap gutpela olgeta long taim bilong yumi? Olsem wanem dispela samting i mas strongim bel bilong yumi?
7 Gavena Serubabel na Hetpris Josua i bin stap na lukim wok bilong wokim tempel i pinis long 515 B.C.E. Sekaraia 6:12, 13 i tok profet long wok bilong Jisas long mekim lotu i tru i kamap gutpela olgeta. “Bikpela I Gat Olgeta Strong i tok, dispela man nem bilong en Kru Bilong Diwai, em bai i kamap gutpela tru long ples em i stap long en, na bai em i wokim gen haus bilong mi. Em bai . . . i gat biknem olsem king, na bai em i bosim ol manmeri bilong en. Na wanpela pris bai i sindaun wantaim em long sia king bilong en.” Jisas—nau em i stap long heven na em i mekim na ol king bilong lain bilong Devit i kru na i kamap—em yet i sambai long wok bilong Kingdom long tempel spirit, olsem na yu ting wanpela inap pasim dispela wok? Nogat tru! Olsem na dispela i mas kirapim yumi long mekim yet wok bilong autim tok, na yumi no ken larim sindaun bilong yumi i pulim nabaut tingting bilong yumi.
Ol Bikpela Samting
8. Bilong wanem yumi mas putim wok bilong tempel spirit i stap namba wan long laip bilong yumi?
8 Bilong Jehova i ken helpim yumi na mekim gut long yumi, yumi mas putim wok bilong tempel spirit i stap namba wan long laip bilong yumi. Yumi no ken mekim olsem ol Juda, em ol i tok, “Taim bilong wokim gen haus bilong God, em i no kamap yet.” Yumi mas tingim, nau yumi stap long “taim bilong las de.” (Hagai 1:2; 2 Timoti 3:1) Jisas i tok profet olsem ol gutpela lain bilong em bai autim gutnius bilong Kingdom na kamapim ol disaipel. Yumi mas was gut, nogut yumi les long mekim dispela gutpela wok yumi bin kisim. Wok bilong autim tok na skulim ol man em ol birua i bin pasim inap liklik haptaim na i bin kirap gen long 1919, yumi no pinisim yet dispela wok. Tasol yumi ken bilip tru olsem, bai yumi pinisim!
9, 10. Bilong Jehova i ken mekim gut long yumi, yumi mas mekim wanem? Dispela bai mekim wanem long yumi?
9 Sapos yumi givim bel na wok strong long mekim dispela wok, Jehova bai mekim gut long yumi olgeta wan wan na yumi olsem wanpela lain olgeta. Jehova i bin mekim wanpela tok promis i strongim bel bilong yumi. Taim ol Juda i kirap gen long putim ol as ston bilong tempel na ol i wok strong long mekim na ol i givim bel long lotu, Jehova i tok: “Nau bai mi stat long mekim gut long yupela.” (Hagai 2:19) Em bai orait long ol na mekim gut tru long ol. Orait nau tingim ol blesing God i tok promis long givim long ol: “Bai mi larim ol i stap bel isi na bai ol i ken planim ol gaden bilong ol. Na planti ren bai i kam daun na ol diwai wain bilong ol bai i karim, na ol kaikai samting tu bai i kamap gutpela. Bai mi mekim dispela olgeta gutpela samting long dispela liklik hap lain bilong mi.”—Sekaraia 8:9-13.
10 Jehova i bin promis long givim planti gutpela samting bilong spirit na bilong skin long ol dispela Juda, na olsem tasol em bai mekim gut long yumi taim yumi wok strong na amamas long mekim wok em i bin givim long yumi. Sampela gutpela blesing i olsem: Bel isi i stap namel long yumi, yumi gat planti samting, na lain bilong yumi i go bikpela. Tasol yumi save pinis, bilong Jehova i ken wok yet long mekim gut long yumi, yumi mas mekim wok long tempel spirit long pasin Jehova i laikim.
11. Olsem wanem yumi inap skelim yumi yet?
11 Nau em i taim bilong yumi mas tingim gut ol samting yumi mekim. (Hagai 1:5, 7) Yumi mas skelim gut wanem ol samting i stap namba wan long laip bilong yumi. Bilong Jehova i ken mekim gut long yumi long nau, yumi mas wok strong long litimapim nem bilong em na mekim yet wok bilong yumi long tempel spirit bilong em. Yu ken askim yu yet: ‘Ol samting i bikpela samting tru long mi, em i stap wankain yet long nau? Pasin bilong mi long givim bel tru long Jehova, ol tok tru bilong em, na wok bilong em, dispela i wankain olsem long taim mi kisim baptais? Mi laik kisim gutpela sindaun na mi no tingim tumas Jehova na Kingdom bilong em? Mi larim pasin bilong pret long ol man—olsem ol i gat wanem tingting long mi—i pasim mi long mekim wok?’—KTH 2:2-4.
12. Wanem samting i painim ol Juda olsem Hagai 1:6, 9 i tok?
12 Yumi no laik lusim wok bilong kamapim nem bilong God long ol man na bai em i no ken givim ol blesing bilong em long yumi. Yumi mas tingim ol Juda i bin kam bek pinis long ples, em pastaim ol i givim bel long wokim gen tempel, tasol bihain ol i kirap “wok hat long wokim ol haus bilong [ol] yet,” olsem Hagai 1:9 i tok. Ol i wok long tingim sindaun bilong ol na ol samting ol yet i mas kisim long olgeta de. Olsem na “liklik kaikai tasol i kamap”—ol i sot long ol gutpela kaikai na dring, na ol i sot long klos bilong putim long taim bilong kol. (Hagai 1:6) Jehova i no givim blesing bilong em long ol. Yu ting dispela inap lainim yumi long sampela samting long nau?
13, 14. Olsem wanem yumi inap bihainim tok bilong Hagai 1:6, 9? Bilong wanem dispela i bikpela samting?
13 Ating yumi wanbel long ting olsem bilong kisim yet ol blesing long Jehova, yumi mas sakim pasin bilong tingim ol samting bilong yumi yet tasol na yumi no mekim wok bilong lotu. Yumi no ken larim ol samting i pulim nabaut tingting bilong yumi, olsem pasin bilong wok strong long kisim mani, o insait long ol pasin bilong kamap maniman hariap, o tingting strong long kisim bikpela skul na bai yumi inap kisim wanpela gutpela wok mani, o ol narapela samting bilong inapim ol laik bilong yumi yet.
14 Tru, ating ol dispela samting i no gat rong long en. Tasol taim yumi tingim laip i stap oltaim oltaim, yumi save ol dispela wok “i no gat laip.” (Hibru 9:14) Olsem wanem ol i no gat laip? Ol dispela wok i samting nating, na i no inap kamapim gutpela samting. Sapos man i strong long bihainim ol dispela kain wok, em inap lusim pasin bilong em long pas gut wantaim God. Dispela samting i bin painim sampela Kristen God i bin makim, ol i stap long taim bilong ol aposel. (Filipai 3:17-19) Na em i bin painim sampela long taim bilong yumi tu. Ating yu save long sampela em isi isi ol i lusim ol wok Kristen na kongrigesen, na nau ol i no gat laik long kam bek long wok bilong Jehova. Mipela i laik bai ol i kam bek long Jehova, long wanem, sapos ol i strong long bihainim ol wok “i no gat laip,” ating bai Jehova i no ken orait moa long ol na mekim gut long ol. Sori tru sapos dispela samting i painim ol. Bai ol i no stap belgut na bel isi moa, em ol pasin spirit bilong God i save kamapim. Na ol i no stap olsem lain brata Kristen tru!—Galesia 1:6; 5:7, 13, 22-24.
15. Olsem wanem Hagai 2:14 i soim olsem lotu bilong yumi i bikpela samting?
15 Dispela em i bikpela samting. Tok bilong Hagai 2:14 i kamapim tingting bilong Jehova long ol Juda i bin lusim wok bilong wokim haus bilong Jehova na ol i laik wokim ol gutpela haus bilong ol yet. “Bikpela i tok olsem, ‘Ol dispela manmeri i stap hia wantaim olgeta samting ol i mekim, ol i olsem tasol. Tingting na pasin bilong ol i doti, olsem na olgeta ofa ol i mekim long alta, ol tu i doti tasol long ai bilong mi.’ ” Jehova i no laikim ol ofa ol Juda i mekim long alta i stap long Jerusalem, long wanem, ol i slek long mekim wok bilong lotu i tru.—Esra 3:3.
God i Tok Promis Long Helpim Ol Lain i Bihainim Tok
16. Long rot bilong ol samting olsem driman Sekaraia i kisim, ol Juda inap bilip tru long wanem samting?
16 Ol Juda i bihainim tok na i wok long wokim gen tempel bilong God, ol inap bilip tru olsem God bai helpim ol. God i kamapim klia dispela samting long rot bilong 8-pela samting olsem driman em Sekaraia i kisim. Namba wan samting olsem driman i tokaut olsem, ol bai pinisim wok bilong tempel na ol manmeri bilong Jerusalem na Juda bai i gat gutpela sindaun sapos ol Juda i mekim wok bilong ol long wokim tempel. (Sekaraia 1:8-17) Namba tu samting olsem driman i tok promis olsem olgeta gavman i birua long lotu i tru ol bai pinis. (Sekaraia 1:18-21) Ol narapela samting olsem driman i tok long God bai lukautim wok bilong ol long wokim tempel, na taim dispela wok i pinis, ol manmeri bilong planti kantri bai i kam long haus bilong Jehova, na bai i gat bel isi na gutpela sindaun. Na ol samting olsem bikpela maunten i pasim wok bilong God em bai tekewe, na bai i no gat pasin nogut moa, na ol ensel bai bosim ol na lukautim ol. (Sekaraia 2:5, 11; 3:10; 4:7; 5:6-11; 6:1-8) Em nau, God i tok promis long helpim ol, olsem na ol i kirap stretim ol samting long i stap bilong ol na putim tingting i go long mekim wok God i bin givim long ol, em long dispela as tasol na em i bin helpim ol long lusim kalabus.
17. Taim yumi tingim ol samting God i tok promis long en, yumi ken givim wanem ol askim long yumi yet?
17 Na olsem tasol, i gat as na yumi ken bilip olsem lotu i tru bai win olgeta, na dispela i mas kirapim yumi long mekim wok, na kirapim yumi long tingim gut haus bilong Jehova bilong lotuim em long en. Askim yu yet: ‘Sapos mi bilip olsem nau em i taim bilong mekim wok bilong autim gutnius bilong Kingdom na kamapim ol disaipel, olsem wanem long i stap bilong mi? Em i stret wantaim dispela samting mi bilip long en? Mi save lusim haptaim inap long mi ken stadi gut long Baibel, na tingim gut oltaim, na toktok long en wantaim ol wanlain Kristen na ol narapela mi save bungim ol?’
18. Wanem samting bai kamap bihain olsem Sekaraia sapta 14 i tok?
18 Sekaraia i toktok long Bikpela Babilon bai bagarap, na bihain pait bilong Armagedon bai kamap. Baibel i tok: “Long taim tudak i save kamap, lait bai i lait i stap olsem tasol. Olsem na bai i no moa i gat taim bilong san na taim bilong nait. Bikpela wanpela tasol i save wanem taim dispela samting bai i kamap.” Tru tumas, de bilong Jehova em taim bilong tudak na bikpela kol long ol birua bilong Jehova long graun! Tasol long ol manmeri i stap gut long Jehova na lotuim em, em taim bilong lait na taim bilong Jehova i orait long ol. Na tu, Sekaraia i stori long olgeta samting long nupela taim bai tokaut long pasin holi bilong Jehova. Lotu i tru long bikpela tempel spirit bilong God, em dispela kain lotu tasol bai stap long graun. (Sekaraia 14:7, 16-19) Em wanpela gutpela tok promis tru! Samting ol tok profet i bin tok long en, em bai kamap tru long yumi, na yumi bai lukim samting Jehova i mekim bilong kamapim long ples klia olsem i stret em i stap King bilong heven na graun. Dispela de bai i narapela kain tru, em de bilong Jehova stret!
Ol Blesing
19, 20. Olsem wanem Sekaraia 14:8, 9 i strongim bel bilong yu?
19 Taim Jehova i mekim pinis dispela bikpela wok tru, Satan wantaim ol ensel nogut ol bai kalabus na ol i no inap mekim wanpela wok. (KTH 20:1-3, 7) Orait nau ol manmeri bai kisim planti gutpela samting long Taim Bilong Wan Tausen Yia Bilong Krais i Stap King. Sekaraia 14:8, 9 i tok: “Long dispela taim gutpela wara bai i kamap long Jerusalem na i ran i go. Na hap wara bai i go daun long raunwara Detsi, na hap bai i go daun long biksolwara Mediterenian. Dispela wara bai i ran long taim bilong ren na long taim bilong san. Em bai i no inap drai. Na Bikpela bai i stap king bilong olgeta kantri. Na olgeta manmeri bai i lotu long em wanpela tasol, na bai ol i kolim em long wanpela nem tasol.”
20 “Gutpela wara,” o “wara bilong givim laip,” em i makim ol gutpela samting Jehova bai givim long ol man bambai ol i ken i stap laip, na long olgeta taim ol dispela gutpela samting bai kam olsem wara i kamap long ples bilong Kingdom Bilong Mesaia. (KTH 22:1, 2) Bikpela lain manmeri i save lotuim Jehova, em ol i bin abrusim bagarap long Armagedon, ol bai lusim kalabus bilong dai ol i bin kisim long Adam. Ol man i dai pinis ol tu bai kisim gutpela samting long rot bilong kirap bek. Em nau, long dispela taim Jehova bai kirapim nupela hap bilong wok king bilong em long bosim graun. Olgeta man i stap laip ol bai givim biknem long em olsem King bilong heven na graun, na lotu long em wanpela tasol.
21. I gat as tru na yumi ken mekim wanem?
21 Yumi tingim olgeta samting Hagai na Sekaraia i bin tok profet long en na olgeta tok profet i kamap tru pinis na yumi save, i gat as tru na yumi ken wok yet long mekim dispela wok God i bin givim long yumi insait long banis bilong tempel spirit bilong em hia long graun. I go inap long taim lotu i tru i kamap gutpela olgeta, yumi olgeta i mas wok strong long putim ol wok bilong Kingdom i stap namba wan long laip bilong yumi. Sekaraia 8:9 i tokim yumi: “Yupela i mas taitim bun na wok strong. Tingim dispela tok yupela i bin harim long maus bilong ol profet.”
Yu Inap Tingim?
• Buk Hagai na Buk Sekaraia i toktok long wanem samting na i makim ol samting i kamap long nau?
• Olsem wanem Hagai na Sekaraia i skulim yumi long ol bikpela samting yumi mas putim i go pas?
• Taim yumi tingim ol tok bilong Hagai na Sekaraia, olsem wanem dispela i strongim bilip bilong yumi long samting i kamap bihain?
[Piksa long pes 26]
Hagai na Sekaraia i strongim ol Juda long givim bel tru long mekim wok na kisim blesing
[Ol Piksa long pes 27]
Yu save ‘wok hat long wokim haus bilong yu yet’?
[Piksa long pes 28]
Jehova i bin tok promis long givim blesing, na em i givim pinis