Jehova i Save Mekim Gut Long Yumi
“Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.”—SINDAUN 10:22.
1-3. Planti man i laikim tumas mani kago, tasol olsem wanem long dispela samting?
SAMPELA man i save tingting tumas long mani kago na oltaim ol i save toktok long dispela samting, long wanem, ol i laik kisim planti moa, o ol i sot long en. Long nau, strong bilong mani i go liklik, na bisnis bilong planti kampani i slek na ol i pinisim planti wokman bilong ol. Planti man i ting gutaim bai no ken kamap gen olsem bilong pastaim.
2 I stret yumi mas tingting liklik long ol samting bilong skin na bilong sindaun bilong yumi, tasol yumi mas save, Jehova i as bilong ol dispela samting. Em yet i bin wokim, na em i wokim yumi tu. “God, Bikpela i bin wokim skai na graun na putim i stap long ples bilong ol. Na em i mekim graun i kamapim ol kain kain . . . samting. Em i givim win bilong laip long ol manmeri bilong graun.”—Aisaia 42:5.
3 Jehova i no makim husat i bilong kamap maniman na husat i bilong i stap rabis, nogat. Tasol yumi mas amamas na lukautim gut ol samting bilong skin yumi kisim pinis, em ol dispela ‘kain kain samting graun i kamapim,’ na yumi mas mekim stretpela wok long en, na no ken hambak long en na mekim pasin antap, nogut Jehova i gat tok long yumi. Na sapos yumi givim bel long mani kago, na yumi putim Jehova i go namba tu, i no gutpela. Baibel i tok: “Sapos man i ting mani bilong em tasol inap helpim em long stap gut, orait em bai i lus tru.” (Sindaun 11:28; Matyu 6:24; 1 Timoti 6:9) Sapos yumi gat planti samting bilong skin, tasol yumi no daun long Jehova, ol dispela samting i no ken helpim yumi liklik.—Saveman 2:3-11, 18, 19; Luk 16:9.
Samting i Winim Mani Kago
4. Olsem wanem ol samting bilong spirit i winim ol samting bilong skin?
4 I gat planti samting bilong skin, tasol Baibel i stori tu long planti samting bilong spirit. Dispela i winim tru ol samting bilong skin. (Matyu 6:19-21) Sapos yumi strong long ol samting bilong spirit, dispela bai helpim yumi long i stap gut long Jehova na i stap olsem inap long olgeta taim bihain. (Saveman 7:12) Lain bilong God i gat planti samting bilong spirit, tasol ol i no lus long ol samting bilong skin. Long nupela taim bihain, ol man i stap gut long Jehova bai ol i gat planti samting bilong spirit na bilong skin wantaim. Long nau ol man i mas resis wantaim ol narapela long painim ol samting bilong skin, na wok wantaim sik, na i no gat gutpela sindaun tumas, tasol long nupela taim i no ken olsem. (Song 72:16; Sindaun 10:28; Aisaia 25:6-8) Sapos yumi tingim samting bilong spirit, “Bikpela yet [bai] i givim yumi planti gutpela samting, em i no save larim ol dispela samting i givim hevi long yumi.”—Sindaun 10:22.
5. Jisas i mekim wanem tok promis long ol samting bilong skin?
5 Long nau ol man i save tingim ol samting bilong spirit ol i stap bel isi na ol i no tingting planti long ol samting bilong skin ol i mas kisim. Tru, ol i mas mekim wok mani bilong baim kaikai samting bilong lukautim famili, na ating sampela i no gat wok mani, long wanem, nau long dispela taim mani i sot na ating kampani i bin pinisim ol long wok. Tasol ol i no bel hevi tumas na tingting planti. Ol i bilipim tok bilong Jisas, em i tok: “Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Nogat. . . . Papa bilong yupela i stap long heven em i save pinis, yupela i mas kisim dispela olgeta kain samting. Tasol namba wan samting yupela i mas mekim i olsem. Yupela i mas larim God i stap king bilong yupela, na kisim stretpela pasin bilong em, na bai em i givim dispela olgeta arapela samting tu long yupela.”—Matyu 6:31-33.
Planti Samting Bilong Spirit
6, 7. (a) Lain bilong God i gat wanem ol gutpela samting bilong spirit? (b) Long nau truim bilong wanem tok profet i wok long kamap? Olsem na i gat wanem ol askim?
6 Kingdom em i namba wan samting bilong lain bilong Jehova, na ol i amamas long wok bilong ol long kamapim ol disaipel. (Aisaia 60:22) Jehova i save lainim ol, na ol i kisim planti gutpela kaikai bilong spirit long gutpela “wokboi.” (Matyu 24:45-47; Aisaia 54:13) Spirit bilong Jehova i stap long ol, na ol i stap olsem brata brata na ol i stap wanbel.—Song 133:1; Mak 10:29, 30.
7 Ol i stap gutpela tru long ol samting bilong spirit, na mani i no inap baim ol dispela gutpela samting. Dispela i truim wanpela tok promis bilong Jehova, em i tok: “Yupela i mas tilim olgeta samting bilong yupela long 10-pela hap na bringim wanpela hap olgeta long haus bilong mi. Olsem na ol wokman bilong mi bai i gat planti kaikai. Yupela i mekim olsem na bai mi ken givim planti gutpela samting long yupela na yupela i no ken sot.” (Malakai 3:10) Long nau yumi lukim truim bilong dispela tok promis i kamap pinis. Tasol yumi laik save, sapos Jehova i Papa bilong olgeta samting, bilong wanem yumi mas givim “wanpela hap olgeta” long em? Na dispela “hap” i bilong helpim husat? Bilong save long ol dispela samting, yumi mas save, bilong wanem Jehova i bin mekim dispela tok long bipo.
Namba Ten Hap na Ol Ofa
8. Olsem Lo i makim, ol Israel i mas mekim wanem na bai God i ken givim planti samting bilong skin long ol?
8 Long taim bilong Malakai, lain bilong God i stap rabis. Bilong wanem ol i stap olsem? Wanpela as, em ol i gat asua long ol ofa na ol namba 10 hap. Ol i stap aninit long Lo God i bin givim long Moses, olsem kontrak, na God i tok em bai givim planti samting bilong spirit na bilong skin long ol, tasol ol i mas i stap gut long God.—Lo 28:1-19.
9. Bilong wanem Jehova i tokim ol Israel long givim ol ofa na ol namba 10 hap long haus lotu?
9 Lo i tok, ol i mas givim ol ofa na namba 10 hap bilong ol samting long haus lotu. Ol i kukim sampela ofa long alta bilong Jehova, na sampela ol i tilim long ol pris na lain bilong mekim wok long ol ofa, na sampela i bilong givim long Jehova. (Wok Pris 1:3-9; 7:1-15) Moses i givim tok bilong Jehova long ol Israel olsem: “Olgeta kaikai i kamap long gaden, . . . yupela i mas tilim long 10-pela hap na givim wanpela hap long mi Bikpela. I tambu long yupela i kaikai dispela namba 10 hap. Em i samting bilong mi wanpela tasol.” (Wok Pris 27:30) Namba 10 hap i mas i go long ol wokman bilong lain Livai long haus lotu, na ol dispela wokman i mas brukim gen long 10-pela hap na givim wanpela hap i go long ol pris long lain bilong Aron. (Namba 18:21-29) I gat tupela as na ol Israel i mas mekim olsem. Namba wan i olsem: Bilong makim amamas na tenkyu bilong ol long gutpela pasin Jehova i mekim long ol. Na namba tu i olsem: Bilong lukautim lain Livai na bai ol i ken givim bel long mekim wok bilong ol na ol i ken lainim ol man long Lo. (2 Stori 17:7-9) Ol dispela pasin bai helpim lotu bilong ol, na lotu bai helpim olgeta wantaim.
10. Wanem samting i kamap taim ol Israel i no givim ofa na namba 10 hap?
10 Tru, bihain ol dispela ofa na namba 10 hap ol i go long ol Livai yet, tasol ol i olsem presen ol i laik givim long Jehova, olsem na ol i mas kisim ol gutpela samting tasol i kam, i no gat liklik bagarap long en. (Wok Pris 22:21-25) Sapos ol i no givim dispela samting long Jehova, o ol i givim ol samting i no gutpela tumas, Jehova i no ken mekim gut long ol; na ol Livai i no gat kaikai tu na ol i mas lusim wok bilong ol na i go painim kaikai, na dispela i mekim nogut long lain Israel olgeta.
“Tingim Gut Ol . . . Samting i Kamap Long Yupela”
11, 12. (a) Taim ol Israel i no bihainim Lo, wanem samting i painim ol? (b) Jehova i laik bai ol i mekim wanem long taim ol i lusim Babilon na kam bek long ples?
11 Sampela Israel i bin wok strong long bihainim stret Lo, na ol i givim namba 10 hap bilong ol samting i go long Jehova. (2 Stori 31:2-16) Tasol planti nogat. Planti taim ol i bikhet na brukim lo bilong Jehova, olsem na long yia 607 paslain long Krais, Jehova i larim ol Babilon i daunim ol na kisim ol i go kalabus long Babilon.—2 Stori 36:15-21.
12 Ol i kisim hevi inap 70 yia, na nau Jehova i larim ol i go bek long ples bilong ol. Planti tok profet long Paradais olsem Aisaia i bin kolim, namba wan truim bilong ol i kamap long taim ol i go bek pinis long ples bilong ol. (Aisaia 35:1, 2; 52:1-9; 65:17-19) Tasol namba wan as na Jehova i bringim ol i go bek gen long ples i olsem: Bilong sanapim gen haus lotu na kirapim gen lotu i tru. (Esra 1:2, 3) Sapos ol i lotuim gen Jehova, em bai mekim gut long ol na ol bai kisim planti gutpela samting bilong spirit na bilong skin. Olsem na long yia 537 paslain long Krais, long taim ol i kamap pinis long ples bilong ol, ol i wokim alta long Jerusalem na ol i kirap long wokim haus lotu. Tasol ol man nabaut i biruaim ol, olsem na ol i lusim dispela wok. (Esra 4:1-4, 23) Olsem na Jehova i no mekim gut long ol.
13, 14. (a) Taim ol i no wokim haus lotu, wanem samting i painim ol? (b) Olsem wanem na ol i kirap wokim haus lotu? Tasol wanem ol narapela rong ol i mekim?
13 Long yia 520 paslain long Krais, Jehova i kamapim profet Hagai na Sekaraia bilong kirapim ol Israel long wok gen long sanapim haus lotu. Hagai i tokim ol, ol i gat hevi na ol i sot long ol samting bilong skin, long wanem, ol i no givim bel long dispela haus lotu bilong Jehova. Hagai i givim tok bilong Jehova long ol olsem: “Yupela i mas tingting planti long ol samting nogut i kamap long yupela. Yupela i bin planim planti kaikai, na liklik kaikai tasol i kamap. Yupela i gat sampela kaikai, tasol em i no inap long yupela. Yupela i gat wain bilong dring, tasol em i no inapim laik bilong yupela. Yupela i gat sampela klos, tasol ol i no inap hatim skin bilong yupela long taim bilong kol. Na ol man bilong wok mani i save kisim mani, tasol mani i save pinis kwiktaim olsem ol i putim long paus mani i gat hul. . . . Yupela i mas tingim gut as bilong ol dispela samting i kamap long yupela. . . . Yupela i mas . . . wokim gen haus bilong mi. . . na bai mi amamas. Na yupela i ken lotu long mi na long dispela pasin bai mi kisim biknem.”—Hagai 1:5-8.
14 Tupela profet i kirapim bel bilong ol, na nau ol i pinisim wok bilong sanapim haus lotu. Tasol 60 yia bihain Nehemia i go long Jerusalem na em i lukim ol i no bihainim moa lo bilong Jehova. Em i stretim ol pinis, tasol taim em i go namba tu taim long ol em i lukim ol i pundaun gen, na em i tok: “Ol Livai na ol lain bilong mekim musik long haus bilong God, ol i bin lusim Jerusalem na i go bek long graun bilong ol, long wanem, ol manmeri i no givim kaikai samting long ol.” (Nehemia 13:10) Nehemia i stretim dispela rong, na nau “olgeta Juda i stat gen long bringim dispela wanpela hap bilong wit na wain na wel bilong oliv, na putim long ol rum . . . long haus bilong God.”—Nehemia 13:12.
Ol i Stilim Samting Bilong Jehova
15, 16. Wanem ol rong bilong ol Israel na Jehova i kamapim long ol?
15 Ating Malakai i bin mekim ol tok profet long dispela taim, na em tu i toktok long ol Israel i bikhet na ol i no stap gut long Jehova. Em i kolim tok Jehova i givim long ol, olsem: “Pikinini i save aninit long papa bilong en, na wokman tu i save bihainim tok bilong bosman bilong en. . . . Mi papa bilong yupela. Bilong wanem yupela i no save aninit long mi? Mi bos bilong yupela. Olsem wanem na yupela i no save bihainim tok bilong mi? Yupela i save givim baksait long mi. . . . Yupela i ting alta bilong mi em i samting nating, na . . . yupela i daunim nem bilong mi. Taim yupela i bringim wanpela abus ai bilong en i pas na . . . abus i gat sik, o lek bilong ol i bruk, yupela i ting em i stret, a?”—Malakai 1:6-8.
16 Ol Israel i no daun long Jehova, na ol i givim ol animal nogut nogut long em, olsem na Jehova i tokim ol: “Yupela i givim baksait long ol lo bilong mi, na yupela i no bihainim. Tasol sapos yupela i lusim pasin nogut na kam bek long mi, mi tu bai mi lusim belhat na kisim bek yupela.” Na nau ol i askim em: “Mipela i mas mekim wanem samting bilong mipela i ken kam bek long yu?” Na Jehova i bekim long ol olsem: “Yupela i save stilim ol samting bilong mi. Na yupela i ting dispela em i gutpela pasin, a? Nogat tru. Tasol yupela i no lusim dispela pasin.” Jehova i papa bilong olgeta samting, na olsem wanem ol i stil long em? Em i tokim ol: “Yupela i save holim ol hap samting lo i tok yupela i mas givim long mi.” (Malakai 3:7, 8) Tru tumas, sapos ol i no givim namba 10 hap na ol ofa long Jehova, i olsem ol i stilim ol samting i bilong em.
17. Ol namba 10 hap na ol ofa i bilong mekim wanem wok? Na sapos ol i givim dispela samting long Jehova, em i tok promis long mekim wanem long ol?
17 Wok bilong ol namba 10 hap na bilong ol ofa i bilong tok amamas na tenkyu long Jehova, na bilong helpim ol samting bilong lotu i tru. Olsem na Jehova i tokim ol: “Bringim wanpela hap olgeta long haus bilong mi . . . na bai mi ken givim planti gutpela samting long yupela na yupela i no ken sot.” (Malakai 3:10) Sapos Jehova i mekim gut long ol, ol bai i gat planti samting.
Bikpela Bai Skelim Ol
18. (a) Jehova i tok, husat ‘bai kam’? (b) Wanem taim em bai kam? Husat i insait long dispela samting? Wanem samting i painim ol Israel?
18 Na Jehova i tok, em bai skelim pasin bilong lain bilong em. Long maus bilong Malakai, Jehova i tok: “Bai mi salim wanpela man bilong autim tok bilong mi na em bai i go pas bilong redim rot bilong mi. Yupela i wok long painim mi. Orait wantu bai mi kam. . . . Yupela i laikim tumas long lukim dispela ensel bilong . . . kontrak bilong mi. Orait em bai i kam.” (Malakai 3:1) Jisas i kamapim tok profet bilong Malakai na i tok, dispela “man bilong autim tok” na “go paslain” na “redim rot,” em Jon Bilong Baptais. (Malakai 4:5; Matyu 11:10, 14) Long yia 29 em taim bilong dispela man bai kam na skelim man. Tasol bihain i gat narapela tu bai mekim ol dispela samting na em bai kam wantaim strong bilong Jehova long haus lotu. Dispela man em Jisas. Tupela taim em i bin i go long haus lotu long Jerusalem na skelim ol man na rausim ol man i wok bisnis insait long haus lotu. (Mak 11:15-17; Jon 2:14-17) Jehova i toktok long dispela olsem: “Husat inap winim kot? . . . Husat bai i no inap lus?” (Malakai 3:2) Ol Israel yet i lus long kot. Jehova na Jisas i skelim pasin bilong ol i no stret, na long yia 33 Jehova i rausim ol na em i no laikim ol moa.—Matyu 23:37-39.
19. Olsem wanem na hap lain i kam bek long Jehova? Ol i kisim wanem gutpela samting?
19 Na Malakai i tok profet moa olsem: “Bai [Jehova] i kam bilong skelim pasin bilong olgeta manmeri olsem man i save kukim silva long paia na rausim pipia bilong en. Olsem tasol wokman bilong Bikpela bai i rausim pasin doti bilong ol pris na bai ol inap bringim ol gutpela ofa long Bikpela.” (Malakai 3:3) Long bipo, Jehova i bin rausim planti em ol i bin tok ol i lain bilong em, tasol em i stretim sampela na mekim gut long ol na ol i tanim bel na givim ol gutpela ofa long em. Ol i bin harim tok bilong Jisas, em “dispela ensel bilong autim tok bilong kontrak bilong” Jehova, na long de Pentikos bilong yia 33 inap 120 ol i bung long wanpela rum long Jerusalem na spirit holi i strongim ol na ol i mekim ol gutpela wok olsem “ofa” na lain bilong ol i go bikpela na i go long ol hap em Rom i bosim. (Aposel 2:41; 4:4; 5:14) Em nau, i olsem hap lain i kam bek long Jehova.—Malakai 3:7.
20. Taim olpela lain Israel wantaim haus lotu i kisim bagarap long Jerusalem, olsem wanem long nupela “lain Israel tru bilong God”?
20 Dispela hap lain bilong ol Israel ol i kamap olsem nupela “lain Israel tru bilong God,” em ol Kristen God i bin makim ol long spirit holi. (Galesia 6:16; Rom 11:17) Long yia 70 taim nogut i painim ol narapela Israel olsem “paia i kukim olgeta manmeri bilong bikhet na olgeta manmeri nogut, olsem paia i kukim kunai i drai,” na ol Rom i bagarapim ol wantaim haus lotu bilong ol. (Malakai 4:1; Luk 19:41-44) Tasol olsem wanem long ol Israel bilong spirit? Jehova i “marimari long ol olsem wanpela papa i save marimari long pikinini i mekim wok bilong papa.” (Malakai 3:17) Ol dispela Kristen i bin harim tok bilong Jisas, olsem na ol i no bagarap. (Matyu 24:15, 16) Jehova i wok yet long mekim gut long ol na givim planti samting bilong spirit long ol.
21. I gat wanem tupela askim bilong Malakai 3:1 na 10 em yumi mas save long bekim bilong en?
21 Ol dispela samting i givim biknem long Jehova! Tasol olsem wanem long truim bilong Malakai 3:1 long nau? Na taim Kristen i tingim dispela tok long Malakai 3:10 long kisim namba 10 hap samting bilong em na bringim long haus lotu, em i mas mekim wanem? Bihain bai yumi stori long dispela samting.
Yu Save Long Dispela?
◻ Husat i Papa bilong olgeta samting?
◻ Olsem wanem planti samting bilong spirit i winim planti samting bilong skin?
◻ Ol namba 10 hap na ol ofa i bilong mekim wanem?
◻ Wanem taim Jehova i bin “kam” long haus lotu bilong skelim lain Israel long kot? Na wanem samting i bin kamap?
◻ Husat ol i bin kam bek long Jehova?
[Piksa long pes 10]
“Dispela ensel bilong autim tok bilong kontrak,” em Jisas, em i kam long haus lotu olsem maus bilong Jehova long skelim ol man