Yu Stap “Gutpela Eksampel Long . . . Pasin Bilong Yu Long Toktok”?

 1. Husat i givim yumi pasin bilong toktok?

PASIN bilong yumi long toktok, em wanpela presen i kam long God bilong yumi i gat pasin laikim. Taim God i wokim namba 1 man, Adam, em inap toktok wantaim Papa bilong em long heven. Na tu, em inap kamapim planti moa tok taim em i joinim ol nupela wed. Adam i yusim dispela presen em i kisim long inapim asainmen bilong em long givim nem long olgeta animal. (Stt. 2:19) Na em i amamas tru taim em i toktok wantaim naispela meri bilong em Iv long fes taim!​—Stt. 2:22, 23.

 2. Olsem wanem ol man i no bin yusim gut pasin bilong toktok long bipo na long nau tu?

² Bihain ol man i no yusim gut presen bilong toktok. Satan dispela Devil, em i mekim tok giaman long Iv na dispela tok giaman i kirapim fes man na meri long mekim sin. (Stt. 3:1-4) Adam i no yusim gut toktok bilong em taim em i sutim tok long Iv—na long Jehova tu—long ol popaia bilong em yet. (Stt. 3:12) Kein i mekim tok giaman long Jehova bihain long em i kilim i dai brata bilong em Abel. (Stt. 4:9) Bihain, wanpela tumbuna pikinini bilong Kein em nem bilong em Lamek, em i raitim wanpela poem i soim klia olsem ol man i bin insait tru long pasin bilong pait na kilim man long taim bilong em. (Stt. 4:23, 24) Olsem wanem long taim bilong yumi? Sampela taim ol lida bilong wok politik i no sem long kolim ol tok nogut long ai bilong planti manmeri. Na long nau, i gat planti ol muvi samting em ol i gat ol tok nogut long en. Ol sumatin i save harim ol tok nogut long skul, na ol bikpela manmeri i save harim ol tok nogut long ples wok bilong ol. Sori tru, long nau planti man i save mekim ol tok doti na dispela i soim olsem pasin bilong ol man long dispela graun i wok long i go nogut moa.

 3. (a) Yumi mas was gut long wanem samting? (b) Bai yumi stori long wanem samting long dispela atikol?

³ Sapos yumi no was gut, yumi yet inap mekim ol dispela tok nogut em yumi wok long harim. Yumi ol Kristen i laik amamasim Jehova, so yumi no laik tru long mekim ol tok nogut. Yumi laik yusim gut dispela naispela presen bilong toktok long gutpela rot—long preisim God bilong yumi. Long dispela atikol, yumi bai stori long hau yumi ken mekim olsem long (1) taim yumi autim tok, (2) long ol miting bilong kongrigesen, na (3) long taim yumi toktok wantaim ol narapela. Tasol pastaim, yumi ken stori long wai na toktok bilong yumi i bikpela samting long Jehova.

 4. Olsem Malakai 3:16 i kamapim, wai na toktok bilong yumi i bikpela samting long Jehova?

⁴ Ritim Malakai 3:16. Yu ting wanem wanpela risen na Jehova inap raitim nem bilong ol man em toktok bilong ol i soim olsem ol i pret long em na tingim tingim nem bilong em long “buk i gat nem bilong ol man em i tingim ol”? Ol toktok bilong yumi i kamapim klia wanem samting i stap long bel bilong yumi. Jisas i tok: “Maus i save autim ol tingting i pulap long bel.” (Mat. 12:34) Ol toktok bilong yumi i kamapim klia olsem yumi laikim tru Jehova o nogat. Na Jehova i laik bai ol manmeri i laikim em i stap amamas oltaim long nupela taim.

 5. (a) Hau na pasin bilong toktok i mekim sampela samting long wok lotu bilong yumi? (b) Olsem piksa i soim, yumi mas was gut long wanem samting long pasin bilong toktok?

⁵ Pasin bilong yumi long toktok bai makim olsem Jehova bai orait long lotu bilong yumi o nogat. (Jems 1:26) Sampela man em ol i no laikim God ol i save toktok long pasin we i soim olsem ol i gat hatpela pasin, ol i kros, na ol i gat pasin antap. (2 Tim. 3:1-5) Yumi no laik bihainim pasin bilong ol. Yumi laik amamasim Jehova long ol toktok bilong yumi. Tasol olsem wanem? Jehova bai amamas long yumi sapos yumi mekim ol gutpela tok long taim bilong ol miting Kristen o long wok autim tok, tasol yumi mekim ol hatpela tok na ol tok i no soim pasin laikim taim yumi stap wantaim ol wanfamili bilong yumi?​—1 Pita 3:7.

 6. Wanem gutpela samting i kamap taim Kimberly i yusim gut presen bilong toktok?

⁶ Taim yumi yusim gut presen bilong toktok, yumi kamapim klia olsem yumi lotuim Jehova. Yumi helpim ol man long luksave olsem “pasin bilong man i mekim wok bilong God i narapela kain long pasin bilong man i no mekim wok bilong God.” (Mal. 3:18) Lukim olsem wanem dispela i kamap tru long wanpela sista nem bilong em Kimberly.b Ol i makim em long wok wantaim wanpela klasmeit bilong em long haiskul long wanpela projek. Bihain long tupela i wok wantaim, dispela klasmeit i luksave olsem Kimberly i no wankain olsem ol narapela sumatin. Em i no mekim ol tok bilong daunim ol narapela, em i mekim ol gutpela tok long ol narapela, na em i no mekim ol tok nogut. Klasmeit bilong Kimberly i kirap nogut long dispela na i no longtaim em i kirap stadi long Baibel. Jehova i amamas tru taim yumi toktok long pasin we i kirapim ol man long kisim save long em!

 7. Yu laik mekim wanem long presen bilong toktok em God i givim yu?

⁷ Yumi olgeta i laik toktok long pasin we i givim ona long Jehova na i mekim yumi pas gut moa wantaim ol bratasista bilong yumi. So nau yumi ken stori long sampela rot we yumi ken wok yet long stap olsem “gutpela eksampel long . . . pasin bilong [yumi] long toktok.”

 8. Olsem wanem Jisas i stap gutpela eksampel long yumi long pasin bilong toktok taim em i autim tok?

⁸ Toktok long gutpela pasin na pasin rispek taim ol narapela i sikirapim bel bilong yu. Taim Jisas i mekim wok autim tok, ol man i bin sutim tok giaman long em olsem em i man bilong dring spak na kaikai planti, em i wokman bilong Devil, man bilong brukim lo bilong Sabat, na man bilong tok bilas long God. (Mat. 11:19; 26:65; Luk 11:15; Jon 9:16) Maski i olsem, Jisas i no kros na bekim ol hatpela tok long ol. Olsem Jisas, sapos ol man i mekim ol hatpela tok long yumi, yumi no ken bekim kros long ol. (1 Pita 2:21-23) Tru, em i no isi long mekim olsem. (Jems 3:2) Tasol wanem samting inap helpim yumi?

 9. Wanem samting inap helpim yumi long bosim gut toktok taim yumi autim tok?

⁹ Taim wanpela i tok hat long yu taim yu autim tok, no ken larim dispela i mekim yu kros. Wanpela brata nem bilong em Sam, em i tok: “Mi save traim long tingim olsem dispela man i mas harim tok i tru na mi save tingim olsem bihain em inap senisim pasin bilong em.” Sampela taim man bilong haus i tok hat bikos yumi go kamap long rong taim. Taim yumi bungim wanpela man i kros, yumi ken mekim samting em wanpela sista nem bilong em Lucia i save mekim. Yumi ken mekim sotpela beten na askim Jehova long helpim yumi long stap isi na no ken mekim ol tok i daunim ol o i no soim rispek long ol.

10. Olsem 1 Timoti 4:13 i kamapim, yumi mas putim wanem mak?

¹⁰ Kamap gutpela tisa moa. Timoti em wanpela Kristen i save gut long autim tok, tasol em i gat wok yet long kamap gutpela moa long skulim man. (Ritim 1 Timoti 4:13.) Olsem wanem yumi ken kamap gutpela tisa moa long wok autim tok? Yumi mas redi gut. Gutpela tru olsem yumi gat planti tul we i ken helpim yumi long kamap ol gutpela tisa. Yu bai kisim helpim taim yu ritim buklet Kamap Gutpela Moa Long Pasin Bilong Rit na Skulim Man. Na tu, yu bai kisim gutpela trening taim yu skelim hap “Mekim Wok Autim Tok” long Kristen Laip na Wok Autim Tok—Miting Wok Buk. Yu save yusim gut ol dispela tul? Taim yumi redi gut, yumi no inap pret na yumi bai strongim bel na autim tok.

11. Olsem wanem sampela Kristen i kamap gutpela tisa?

¹¹ Narapela samting tu, yumi ken kamap gutpela tisa taim yumi lukim ol narapela insait long kongrigesen na yumi kisim skul long ol. Sam, em yumi stori pinis long em, em i laik save wanem samting i mekim na sampela Kristen i kamap ol gutpela tisa. Em i save lukim gut pasin bilong ol long mekim gut wok tisa na bihainim pasin bilong ol. Wanpela sista nem bilong em Talia, em i save skelim gut hau ol brata i gat ekspiriens i save mekim ol pablik tok. Dispela i helpim em long lain long pasin bilong stori gut na eksplenim ol topik em planti man i gat askim long en.

12. Sampela i bungim wanem ol hatwok?

¹² Yumi olgeta inap mekim ol miting bilong kongrigesen i kamap gutpela moa taim yumi apim nek na singsing na taim yumi givim ol bekim em yumi bin redim gut. (Sng. 22:22) Sampela i pilim hatwok long singsing o long bekim tok long ai bilong ol narapela. Yu save pilim olsem? Sapos olsem, kisim save long samting i bin helpim ol narapela long no ken pret long singsing na long bekim tok long ol miting na dispela bai helpim yu.

13. Wanem samting inap helpim yu long givim bel long singsing long ol miting?

¹³ Givim bel long singsing. Taim yumi singim ol Kingdom song bilong yumi, nambawan samting yumi laik tingim em olsem yumi laik preisim Jehova. Wanpela sista nem bilong em Sara, em i no ting olsem em i gat gutpela nek bilong singsing. Maski i olsem, em i laik preisim Jehova long rot bilong singsing. Olsem na em i luksave olsem, i gutpela long em i redim singsing tu long haus, wankain olsem em i save redim ol narapela hap bilong miting. Em i save mekim prektis long ol singsing na traim long lukim hau ol tok bilong singsing i go gut wantaim topik em ol bai stori long en long miting. Em i tok: “Dispela i helpim mi long putim tingting long ol tok bilong singsing na mi no tingting tumas long nek bilong mi i krai olsem wanem.”

14. Sapos yu gat pasin bilong pret, wanem samting inap helpim yu long bekim tok long ol miting?

¹⁴ Bekim tok oltaim. Tru, sampela i pilim hatwok long mekim olsem. Talia em yumi stori pinis long em, em i tok: “Mi save pret long toktok wantaim ol narapela, tasol ol narapela i no luksave long en bikos mi save toktok isi. So mi save hatwok tru long bekim tok.” Maski i olsem, dispela i no pasim Talia long bekim tok. Taim em i redim miting, em i save tingim olsem fes bekim i mas sotpela na bekim stret askim. Em i tok: “Em orait sapos bekim bilong mi i sotpela, simpol, na mi bekim stret askim bikos kondakta i laikim kain bekim olsem.”

15. Yumi mas tingim wanem samting taim yumi laik bekim tok?

¹⁵ Ol Kristen em ol i no save sem, sampela taim ol tu inap pilim hatwok long bekim tok long ol miting. Wai? Wanpela sista nem bilong em Juliet, em i tok: “Sampela taim mi no laik bekim tok bikos mi save pret olsem bekim bilong mi em simpol o em i no gutpela tumas.” Tasol tingim olsem, Jehova i laik bai yumi givim bel tru na bekim tok inap long skel bilong yumi.c Em i amamas tru long yumi tingting strong long preisim em long ol miting bilong kongrigesen na yumi no larim pasin bilong sem o pret i pasim yumi.

16. Yumi mas sakim wanem kain ol tok?

¹⁶ Sakim olgeta kain “tok nogut.” (Efe. 4:31) Olsem yumi stori pinis, ol Kristen i no ken mekim ol tok nogut. Tasol i gat ol narapela narapela wei bilong tok nogut em yumi no inap luksave na yumi mas was gut long en. Olsem, taim yumi stori long ol man bilong narapela kalsa, traib, o kantri, yumi mas was gut na no ken skelim skelim ol. Na tu, yumi no laik mekim ol tok bilong bagarapim bel bilong ol narapela. Wanpela brata i tok: “Sampela taim mi save mekim ol tok i bagarapim tru bel bilong ol narapela, mi ting mi mekim ol tok pani na i no gat rong long mekim kain tok, tasol tru tru em i bagarapim bel bilong ol narapela. Long ol yia i go pinis, meri bilong mi i helpim mi tru, taim mitupela yet i stap em i tokim mi long ol tok i no stret em mi save mekim we i bagarapim bel bilong em na ol narapela.”

17. Olsem Efesus 4:29 i kamapim, olsem wanem yumi inap strongim ol narapela?

¹⁷ Mekim tok long pasin i strongim ol narapela. Yu mas hariap long tok amamas long ol narapela na no ken kros o komplein. (Ritim Efesus 4:29.) Lain Israel i gat planti samting em ol i ken tok tenkyu long en, tasol planti taim ol i komplein. Taim yumi komplein, ol narapela inap kisim tu dispela pasin. Tingim, wanpela ripot nogut bilong 10-pela spai i mekim na olgeta Israel i “toktok planti long Moses.” (Nam. 13:31–14:4) Tasol taim yumi tok amamas long ol narapela, dispela bai helpim ol long stap amamas. Yumi ken save tru olsem taim ol pren bilong pikinini meri bilong Jepta i go givim tok amamas long em, dispela i bin strongim em long mekim yet asainmen bilong em. (Het. 11:40) Sara em yumi stori pinis long em, em i tok: “Taim yumi tok amamas long ol narapela, yumi mekim ol i pilim olsem Jehova i laikim ol na ol i dia tumas long oganaisesen bilong em.” Olsem na painim rot bilong mekim ol gutpela tok bilong strongim ol narapela.

18. (a) Olsem Buk Song 15:1, 2 i kamapim, wai na yumi mas mekim tok tru? (b) Dispela i makim wanem samting?

¹⁸ Mekim ol tok tru. Yumi no inap amamasim Jehova sapos yumi no mekim ol tok tru. Em i save heitim olgeta kain tok giaman. (Prov. 6:16, 17) Planti man long nau i ting olsem pasin bilong tok giaman em nomol, tasol yumi laik holim tingting bilong Jehova long dispela samting. (Ritim Buk Song 15:1, 2.) Yumi no laik mekim ol tok giaman, na tu, taim yumi stori wantaim ol narapela yumi no laik haitim sampela tok o senisim stori.

19. Wanem narapela pasin yumi mas sakim?

¹⁹ Sakim pasin bilong tok baksait. (Prov. 25:23; 2 Tes. 3:11) Juliet em yumi stori pinis long em, em i stori long hau pasin bilong tok baksait i no helpim em. Em i tok: “Taim mi putim yau long ol narapela i tok baksait dispela i daunim mi, na mi save pilim olsem mi no inap trastim dispela man o meri i wok long tok baksait. Na mi no inap save sapos em bai tok baksait long mi long ol narapela o nogat.” Taim yu lukim olsem yupela i laik tok baksait long ol narapela, orait senisim stori na toktok long ol gutpela samting.—Kol. 4:6.

20. Yu tingting strong long mekim wanem long pasin bilong yu long toktok?

²⁰ Yumi stap long haptaim we planti man i mekim ol tok nogut, olsem na yumi mas wok strong long mekim ol tok i amamasim Jehova. Tingim, pasin bilong toktok em presen i kam long Jehova, olsem na em i laik yumi yusim gut dispela presen. Em bai blesim hatwok bilong yumi long yusim gut pasin bilong yumi long toktok long taim yumi autim tok, go long ol miting, na taim yumi toktok wantaim ol narapela. Taim God i pinisim pasin nogut bilong dispela graun, em bai isi moa long yumi onarim Jehova long toktok bilong yumi. (Jut 15) Tasol long nau, yu mas tingting strong long mekim “ol tok long maus bilong” yu bilong amamasim Jehova.​—Sng. 19:14.