Bihainim Onest Pasin Long Olgeta Samting

Olgeta man i laikim ol pren i gat onest pasin. Jehova i laik bai ol pren bilong em tu i mekim onest pasin. Tasol i no isi long mekim olsem long dispela graun we planti man i no save mekim onest pasin. Wanem ol gutpela samting i save kamap taim yu mekim onest pasin long olgeta samting?

1. I gat wanem nambawan as long bihainim onest pasin?

Taim yumi mekim onest pasin long ol narapela, yumi soim Jehova olsem yumi laikim na rispektim em. Tingim: Jehova i save long olgeta samting yumi tingting long en na ol samting yumi mekim. (Hibru 4:13) Em i lukim taim yumi mekim onest pasin, na dispela i save mekim em i amamas. Baibel i tok: “Jehova i save heitim man bilong mekim pasin giaman, tasol em i save pas gut wantaim man bilong mekim stretpela pasin.”​—Provep 3:32.

2. Wanem sampela rot yumi ken bihainim onest pasin long olgeta de?

Jehova i laik bai yumi “mekim tok tru tasol long narapela narapela.” (Sekaraia 8:16, 17) Wanem mining bilong dispela tok? Maski yumi toktok wantaim ol wanfamili bilong yumi, o ol wanwok, o ol bratasista Kristen, o ol wokman bilong gavman, yumi no laik giaman o givim ol infomesen we i no tru. Ol man bilong mekim onest pasin i no save stilim ol samting bilong ol arapela o giamanim ol na kisim ol samting bilong ol. (Ritim Provep 24:28 na Efesus 4:28.) Na ol i save baim olgeta takis em ol i mas baim. (Rom 13:5-7) Olsem na ‘long olgeta samting yumi mekim, yumi bihainim onest pasin.’​—Hibru 13:18.

3. Wanem ol gutpela samting i save kamap taim man i mekim onest pasin?

Sapos yumi gat nem olsem man bilong mekim onest pasin, ol arapela bai trastim yumi. Na yumi bai helpim kongrigesen long stap gut, wankain olsem insait long famili. Maus bilong bel bilong yumi bai i stap klin. Na tu, taim yumi mekim onest pasin, yumi “litimapim tok bilong Seivia bilong yumi, God,” na dispela inap kirapim ol narapela long kisim save long Jehova.​—Taitus 2:10.

KISIM SAMPELA SAVE MOA

4. Jehova i laikim onest pasin

Ritim Buk Song 44:21 na Malakai 3:16, na stori long ol dispela askim:

• Long tingting bilong yu, yu ting wai na yumi no inap haitim wanpela samting long ai bilong Jehova?

• Yu ting Jehova i pilim olsem wanem taim yumi mekim tok tru, maski sampela taim i hatwok long mekim olsem?

5. Bihainim onest pasin long olgeta taim

VIDIO: Wanem Samting i Save Kamapim Amamas?​—Maus Bilong Bel i Stap Klin (2:32)

Ritim Hibru 13:18, na stori long olsem wanem yumi ken bihainim onest pasin insait . . .

• long famili bilong yumi.

• long wok o skul.

• long ol narapela taim.

6. Onest pasin i helpim yumi

Taim yumi mekim onest pasin, ating hevi inap kamap. Tasol em gutpela long mekim onest pasin long olgeta taim. Ritim Buk Song 34:12-16, na stori long dispela askim:

• Olsem wanem onest pasin inap helpim yu long stap gut?

1. Taim ol marit i bihainim onest pasin, dispela i save strongim marit bilong ol

2. Ol wokman i bihainim onest pasin, ol bos bilong ol i save trastim ol

3. Ol man i bihainim onest pasin, ol i save kisim gutnem long ai bilong ol wokman bilong gavman

OL BIKPELA POIN

Jehova i laik bai ol pren bilong em i bihainim onest pasin long toktok na long ol samting ol i mekim.

Riviu

• Wanem sampela rot we yumi mekim onest pasin?

• Wai na yu ting yumi no inap haitim wanpela samting long ai bilong Jehova?

• Wai na yu laik mekim onest pasin long olgeta taim?

MEKIM WOK PAINIMAUT

Olsem wanem ol papamama inap skulim ol pikinini bilong ol long bihainim onest pasin?

Mekim Tok Tru Tasol (1:44)

Wai na i gutpela long mekim samting yumi tok promis long mekim?

Inapim Ol Tok Promis, Kisim Blesing (9:09)

Kisim save olsem yumi mas baim takis, o nogat, maski ol i no mekim gutpela wok long en.

“Takis Yu Ting Yu Mas Baim?” (Wastaua, Septemba 1, 2011)

Wanem samting i kirapim wanpela man bilong giaman long senisim laip bilong em na bihainim onest pasin?

“Mi Kisim Save Olsem Jehova i Save Marimari na Fogivim Ol Man” (Wastaua, Me 1, 2015)