“Lusim Olgeta Kain Samting i Mekim Yumi i No Inap Ran Strong”
Maria i bel hevi na em i tok: “Bel bilong mi i pilim neogut na mi no amamas moa long mekim wok.” Dispela meri Kristen i stori long ol wok Kristen yumi mas mekim, na bihain em i tok: “Sampela pren bilong mi i tingting planti long ol dispela wok ol i mas mekim na bel bilong ol i bagarap stret na ol i pilim olsem ol i no inap moa. Mi tu mi pilim olsem hevi bilong dispela wok i bikpela tumas na i mekim skin bilong mi i les na bel bilong mi i hevi. Plis, yupela i mas helpim mi long save bilong wanem mi pilim olsem.”
OLSEM WANEM long yu? Yu tu yu tingting planti na skin bilong yu i les na yu no inap lukautim gut ol wok bilong God yu mas mekim? Sampela taim yu pilim olsem hevi bilong ol wok Kristen yu mas mekim i bikpela tumas na yu no inap karim moa dispela hevi? Planti gutpela Kristen i save bel hevi long sampela taim, long wanem i gat planti samting inap putim hevi long yumi na mekim yumi i no amamas. I hatwok long i stap Kristen tru long dispela taim nau. Olsem na ating sampela taim sampela Kristen i pilim olsem wok Kristen em i bikpela wok tumas na i putim bikpela hevi long ol.
Wok Long Painim As Bilong Dispela Tingting
Baibel i kamapim klia olsem Jehova i no putim bikpela hevi tumas long yumi. Aposel Jon i tok: “Ol lo bilong [God] i no givim hevi long yumi.” (1 Jon 5:3) Na Jisas i mekim wankain tok. Em i tok: “Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo. Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.” (Matyu 11:29, 30) Jehova i no laik bai yumi pilim olsem yumi karim bikpela hevi tumas taim yumi mekim wok bilong em. Nogat.
Orait, wanem samting inap mekim na bai wanpela gutpela Kristen i pilim olsem ol wok Kristen i bikpela wok tumas na i putim hevi long em? Ating i no wanpela samting tasol i mekim. Aposel Pol i tok: “Yumi mas lusim olgeta kain samting i mekim yumi i no inap ran strong, na . . . yumi mas strongim bel na ran strong long dispela resis God i bin makim bilong yumi ran long en.” (Hibru 12:1) Dispela tok bilong Pol i makim olsem sampela taim Kristen i kirap mekim sampela samting i no olsem wanpela wok em i mas mekim, na i olsem em i putim hevi long em yet. Ating i no olsem em i mekim sampela bikpela rong. Nogat. Tasol ating em i kirap mekim sampela samting o kisim sampela wok na em i no tingting gut pastaim, na nau dispela i givim hevi long em na i hatwok long em i ran strong long dispela resis God i bin makim bilong yumi ran long en.
Kisim Stretpela Tingting Long Ol Samting Bilong Skin
Olsem: Tingim wok mani. Long planti kantri i gat hevi long mani na ating Kristen i mas lusim planti aua tru long mekim wok mani; no gat narapela rot. Tasol planti man i save lusim planti aua long mekim wok mani bambai ol inap kisim bikpela wok moa o kisim planti gutpela samting bilong skin i no samting tru bilong helpim ol long i stap laip. Sampela Kristen i bin skelim gut ol samting ol i mas kisim bambai ol inap long i stap laip, na dispela i helpim ol long bihainim gutpela tingting na stretim hamas aua ol i mas lusim long mekim wok mani. Debi wantaim man bilong em i bin mekim olsem, em tupela i Witnes Bilong Jehova. Debi i tok: “Pastaim mipela i sot long samting na mi tu mi mas mekim wok mani. Dispela i helpim mipela na bihain i no gat wok moa long mi mekim wok mani long olgeta de. Tasol mi no laik lusim dispela wok mani bilong mi.” I no longtaim na Debi i kirap long pilim olsem em i gat planti wok tumas na em i no i stap amamas moa. Em i tok: “Long Sarere tasol mi gat taim bilong mekim ol wok bilong mi long haus. Na long taim bilong i go autim tok, planti taim mi pilim olsem mi no laik i go. Mi bel hevi long dispela na bel bilong mi i gat tok. Tasol mi laikim tumas dispela wok mani bilong mi! Bihain mi save mi no ken giamanim moa bel bilong mi. Mi mas lusim dispela wok—i no gat narapela rot. Olsem na mi lusim.” Tru, ating sampela i no inap lusim wok mani olgeta olsem Debi i bin mekim. Tasol sapos yu skelim gut ol wok yu mas mekim, ating bai yu save yu mas stretim taim yu makim bilong mekim ol dispela wok.
I gat ol narapela samting tu yumi ken mekim na bai yumi no putim bikpela hevi tumas long yumi yet. Olsem: Nogut yumi raun planti taim bilong amamas tasol, na nogut yumi lusim bikpela hap taim tumas long spot o long narapela kain amamas o long lukim televisen. Sapos yumi sotim ol aua yumi lusim long mekim ol dispela kain samting, dispela bai helpim yumi, a? Na taim yumi stretim pinis, ating oltaim yumi mas skelim ol samting yumi mekim bambai yumi inap holimpas dispela stretpela tingting long ol amamas na ol samting bilong skin.
Yu Mas Tingting Gut—Em Bikpela Samting
Sapos yumi tingting gut na lukaut gut long ol dispela kain samting, dispela bai helpim yumi na taim senis i kamap, bai yumi no paul. Bai yumi inap holimpas stretpela tingting long ol wok bilong God yumi mas mekim.—Efesus 5:15-17; Filipai 4:5.
Olsem wanem? Yu lukim sampela i mekim bikpela wok long wok bilong God na yu pilim olsem yu mas subim skin bilong yu na mekim bikpela wok olsem ol? Dispela inap mekim na bai yu tingting planti na bel hevi. Tru, gutpela pasin bilong ol narapela inap kirapim yumi long mekim sampela wok moa, tasol sapos yumi tingting gut bai yumi no tingting long mekim bikpela wok i winim skel bilong yumi. Bai yumi save, yumi olgeta i gat narapela narapela hevi na narapela narapela strong, na bai yumi mekim wok inap tru long skel bilong yumi yet. Baibel i tok: “Olgeta man i mas skelim wok bilong ol yet, em i gutpela o nogat. Man i mekim olsem, em i ken amamas long pasin em yet i mekim na em i no [ken] skelim pasin bilong en wantaim pasin bilong narapela man, long wanem, olgeta man wan wan bai i karim hevi bilong pasin ol yet i mekim.”—Galesia 6:4, 5.
Sampela taim ol pasin tumbuna inap putim hevi long yumi. Long taim bilong Jisas ol hetman bilong lotu i bin kolim planti planti pasin na lo ol man i mas bihainim na dispela i mekim ol man i les olgeta, long wanem, ol dispela pasin na lo i planti tumas na ol man i no inap bihainim. Tasol ol dispela kain pasin giaman bilong lotu i no kalabusim lain bilong Jehova long nau. (Lukim Jon 8:32.) Tasol Kristen i mas was gut, nogut em i kirap na tingting tumas long ol pasin bilong ples. Olsem: Taim ol bikpela samting i kamap long ples, olsem marit samting, i gat kain kain bilaspasin ol manmeri i save bihainim. Ating i no gat rong long ol dispela pasin, tasol nogut Kristen i laik bihainim olgeta dispela pasin na dispela i pinisim taim na mani bilong em; dispela bai putim sampela hevi moa long em.
Tingim ol samting i bin kamap taim Jisas i go lukim wanpela meri, nem bilong em Marta. Marta i no sindaun na harim ol gutpela save bilong God em Jisas i kamapim. “Marta em i tingting planti long bikpela wok em i mekim bilong redim kaikai samting.” Marta i tingting long planti planti liklik samting. (Luk 10:40) Tasol long pasin isi Jisas i tokim em, gutpela sapos em i mekim liklik wok tasol bilong redim kaikai samting bambai em inap harim ol gutpela tok Jisas i lainim ol man long en. (Luk 10:41, 42) Dispela i kamapim klia tru olsem sapos yu tingting gut na skelim gut ol samting yu laik mekim, dispela bai helpim yu long mekim ol wok Kristen bilong yu inap stret long skel bilong yu.—Jems 3:17.
Na yu mas tingting gut taim yu skelim ol manmeri yu laik poroman wantaim ol. Sindaun 27:3 i toksave olsem: “Longlong pasin bilong man i no gat gutpela tingting, em i save givim bikpela hevi long yumi, na dispela hevi i winim hevi bilong bikpela ston na hip wesan.” Ol poroman tru bilong yu inap givim gutpela tingting long yu o tingting nogut. Sapos yu poroman wantaim ol lain i save kros kwik long ol liklik pasin kranki bilong ol narapela long kongrigesen, dispela inap paulim tingting bilong yu na bai yu bel hevi na tingting nogut long ol brata. (1 Korin 15:33) Sapos yu pilim olsem yu gat dispela hevi, gutpela sapos yu lusim ol dispela poroman na kisim ol gutpela poroman. Dispela inap helpim yu long stretim dispela hevi.
Bihainim Pasin Daun na Stap Wanbel Wantaim God
Tok bilong Maika 6:8 i bekim askim olsem: Jehova i laik bai yumi bihainim wanem kain pasin? Dispela ves i tok: “Em i laik bai yumi . . . daunim tingting bilong yumi yet na i stap wanbel wantaim God bilong yumi.” Wanpela buk i tok, dispela pasin bilong daunim tingting bilong yumi yet i olsem yumi gat pasin daun—yumi no ting save na pasin bilong yumi i winim ol narapela—yumi save i gat sampela samting em yumi no gat save o strong inap long yumi mekim. Ol man i no pilim dispela samting ol i laik mekim planti wok tumas na dispela i putim bikpela hevi tumas long ol. Sampela strongpela Kristen, olsem sampela wasman, ol i bin mekim olsem. Ol i laik mekim planti wok tumas na ol i no inap mekim gut, olsem na dispela i mekim ol i bel hevi, na ol i les, na ol i no amamas moa. Wanpela elda Kristen, nem bilong em Kenet, em i tok, ‘Mi laik mekim planti wok tumas na bihain mi pilim olsem tingting bilong mi i laik bagarap na bel i laik hevi. Orait mi tingting olsem: “Mi no ken larim dispela samting i painim mi.” Olsem na mi pinis long mekim sampela wok, na mi wok strong long mekim ol wok mi inap long mekim.”
Profet Moses em i man bilong pasin daun, tasol em tu i gat tingting kranki—em i ting olsem em wanpela inap mekim olgeta wok. Olsem na em i laik mekim bikpela wok tumas, winim skel bilong em. Tambu papa bilong em, em Jetro, em i helpim Moses long kisim gutpela tingting. Em i tokim Moses: “Olaman. Yu mekim planti tumas wok bilong helpim ol manmeri.” Na em i tok moa olsem: “Dispela wok i bikpela tumas. Yu wanpela tasol i no inap mekim. Sapos yu yet i mekim, bai skin bilong yu i les nogut . . . yu ken makim ol gutpela saveman bai . . . ol dispela man i ken kamap jas bilong ol manmeri. Ol yet i ken stretim ol liklik trabel long kot. Tasol ol bikpela trabel ol i ken bringim long yu bilong stretim. Olsem na bai ol i ken helpim yu long karim hevi bilong dispela wok na bai wok bilong yu i no hat tumas.” Orait, kwiktaim Moses i kirap tilim sampela wok bilong em i go long ol narapela, na dispela i givim malolo long em, long wanem, ol i helpim em long karim hevi bilong dispela wok i kamap bikpela wok tumas long em.—Kisim Bek 18:13-26.
Narapela taim Moses i tokim Jehova: “Mi wanpela tasol mi no inap lukautim ol dispela manmeri. Mi no inap tru.” Jehova tu i tok, em i mas tilim sampela wok bilong em i go long ol narapela. Orait, sapos yu pilim olsem yu gat planti wok tumas, ating yu tu yu ken tilim sampela wok bilong yu i go long ol narapela na dispela bai helpim yu.—Namba 11:14-17.
Jehova i Helpim Yumi Long Karim Ol Hevi Bilong Yumi
Jisas i tok, plang em i putim long nek bilong yumi i isi long karim, na samting em i givim long yumi bilong karim, em i no hevi. Tru, i no hevi tumas, tasol i gat hevi bilong en. Dispela “plang” Jisas i tokim yumi long kisim i no bilong yumi sindaun nating. Nogat. Dispela “plang” i olsem wanpela wok, em wok bilong givim bel olgeta long God na kamap disaipel bilong Krais Jisas. Dispela wok i gat sampela hevi bilong en na yumi mas karim bambai yumi inap i stap Kristen tru. (Matyu 16:24-26; 19:16-29; Luk 13:24) Pasin bilong graun i wok long i go nogut moa yet, na ol samting bilong givim hevi long yumi bai kamap planti moa. Tasol yumi no ken tingting planti, long wanem Jisas yet i singautim yumi long kisim dispela “plang” o wok, na ol tok bilong em i makim olsem em bai helpim yumi long karim hevi bilong en. Olsem na sapos yumi stap aninit long ol tok bilong Jisas, bai yumi inap karim hevi bilong dispela wok, long wanem Jisas bai helpim yumi long karim.
God i save lukautim ol man i laikim em tumas. Na ol man i beten na putim olgeta hevi bilong ol long em, em i save mekim bel na tingting bilong ol i stap isi. (Buk Song 55:22; Filipai 4:6, 7; 1 Pita 5:6, 7) Wanpela man bilong raitim song long Baibel i tok: “Yumi litimapim nem bilong Bikpela. Olgeta de em i save karim ol hevi bilong yumi.” (Buk Song 68:19) Sapos yu lusim olgeta kain samting i mekim yu i no inap ran strong, na nau yu ran strong long resis, orait yu ken bilip tru olsem God bai helpim yu tu long karim ol hevi bilong yu.
[Piksa long pes 24]
Ol elda i gat gutpela tingting ol i save tilim sampela wok i go long ol narapela