BIHAINIM PASIN KRISTEN

Nupela Hap Bilong Miting i Kamap Namel Long Wik

Kirap long Janueri 2018, stadi nouts na midia long onlain stadi edisen bilong New World Translation of the Holy Scriptures (nwtsty), bai kamap olsem wanpela hap bilong miting maski dispela stadi edisen i no stap yet long tokples bilong yupela. Dispela bai helpim yu long redim gut ol hap bilong miting. Bikpela samting moa, em bai helpim yu long i go klostu moa long gutpela Papa bilong yumi, em Jehova!

STADI NOUTS

Ol stadi nouts bai helpim yumi long save gut long kalsa, ples, na tokples bilong ol stori i stap long Baibel.

Matyu 12:20

Lam em paia long wik bilong en i laik pinis: Lam bilong haus em wanpela liklik sospen graun na ol i save pulapim oliv oil long en. I gat wik i pulim oil i kam antap bambai lam inap lait. Long tok Grik, dispela hap tok “lam em paia long wik bilong en i laik pinis” inap makim wik em smok i kamap long en bikos liklik lait i stap yet taim paia i dai isi isi. Tok profet i stap long Aisaia 42:3 i stori long pasin sori bilong Jisas; em i no inap kilim i dai liklik paia i lait yet long ol man i gat pasin daun na ol man em ol narapela i mekim nogut long ol.

Matyu 26:13

Tok tru: Tok Grik a·menʹ i kam long tok Hibru ʼa·menʹ na i makim olsem “dispela samting i mas kamap” o “i tru.” Planti taim Jisas i yusim dispela tok bilong strongim wanpela tok, promis, o wanpela tok profet na bilong soim klia olsem tok em i mekim i tru na yumi inap bilip long en. Pasin bilong Jisas long yusim “tok tru” na amen long kain rot olsem i stap long Baibel tasol. Taim Jisas i kolim gen dispela tok (a·menʹ a·menʹ) bilong stori long wok bilong em olsem i stap long Gutnius Bilong Jon, ol i trensletim dispela tok olsem “tru tumas.”—Jon 1:51.

MIDIA

Ol foto, ol piksa, na ol vidio i kamapim sampela stori i stap long Baibel.

Betfage, maunten Oliv, na Jerusalem

Dispela vidio i stori long wanpela rot i go long Jerusalem long hap is, long ples nau ol i kolim et-Tur—dispela ples i wankain long Betfage em Baibel i stori long en—na i go antap tru long maunten Oliv. Betani i stap long hap is bilong Betfage long hapsait bilong maunten Oliv. Taim Jisas i stap long Jerusalem, em wantaim ol disaipel i stap wanpela nait long Betani, long nau em taun el-ʽAzariyeh (El ʽEizariya), em nem Arap na i makim “Ples Bilong Lasarus.” Jisas i bin stap long haus bilong Marta, Maria, na Lasarus. (Mt 21:17; Mk 11:11; Lu 21:37; Jon 11:1) Taim em i lusim Betani na i go long Jerusalem, ating Jisas i bin bihainim wankain rot olsem vidio i soim. Long Nisan 9, 33 C.E., taim Jisas i kalap long yangpela donki na i go antap long maunten Oliv na i go daun long Jerusalem, ating em i kirap long Betfage na bihainim dispela rot i go long Jerusalem.

Rot long Betani i go long Betfage
Betfage
Maunten Oliv
Ples daun bilong Kidron
Pletfom Bilong Tempel

Nil i Pas Insait Long Bun Bilong Lek

Dispela em piksa bilong wanpela lek bilong man em ol i sutim nil long en, na longpela bilong nil em 11.5 sentimita. Ol i bin painim dispela nil long yia 1968 long hap not bilong Jerusalem, na ol i painimaut olsem dispela samting i stap long taim bilong ol Rom. Dispela i kamapim klia olsem ol i bin yusim ol nil bilong nilim man long diwai pos taim ol i laik kilim em. Ating dispela nil i wankain long nil em ol soldia bilong Rom i bin yusim long nilim Jisas Krais long diwai pos. Ol i painim dispela nil long wanpela boks ol i wokim long ston, em ol i kolim ossuary, na ol i save putim ol bun bilong daiman bihain long bodi olgeta i kamap graun gen. Dispela i soim klia olsem ating ol i bin nilim wanpela long diwai pos na taim em i dai, ol i planim em.—Mt 27:35.