I Stap na Wok Bilong Jisas

Jisas−Ol Man i Gat Narapela Narapela Tingting Long Em

JISAS i kaikai pinis long haus bilong Saimon na bihain liklik em i kirapim namba tu raun bilong em long Galili bilong autim tok. Bipo, long taim Jisas i mekim namba wan raun bilong em long dispela hap, ol nupela disaipel bilong em, em Pita, na Andru, na Jems, na Jon, ol i raun wantaim em. Tasol nau, ol 12-pela aposel wantaim sampela meri i go wantaim em. Sampela bilong ol dispela meri, em Maria bilong Makdala, na Susana, na Joana; Joana em meri bilong wanpela bosman bilong haus bilong King Herot.

Wok bilong Jisas i go bikpela na ol man i gat narapela narapela tingting long dispela wok em i mekim. Ol i bringim wanpela man long Jisas, na dispela man i gat spirit nogut i stap long em na ai wantaim maus bilong em i pas. Jisas i rausim dispela spirit nogut, na em i oraitim dispela mauspas na nau mauspas i toktok na i lukluk. Bikpela lain manmeri ol i bung i stap ol i lukim dispela wok Jisas i mekim na ol i kirap nogut tru. Ol i tok, “Ating dispela man em i Pikinini Bilong Devit, o nogat?”

Bikpela lain manmeri i wok long bung bung ausait long haus Jisas i stap long en, olsem na Jisas na ol disaipel i no gat taim bilong kaikai. Ol man i bung ausait ol i gat narapela narapela tingting long Jisas. Sampela i ting Jisas em i “Pikinini Bilong Devit.” Tasol sampela, olsem ol saveman bilong lo na ol Farisi, ol i bin lusim Jerusalem i kam bilong sutim tok long Jisas. Taim ol wanblut bilong Jisas i harim tok long bikpela toktok i kamap long Jisas, ol i kam bilong kisim em i go. I gat wanem as na ol i laik kisim em i go?

Long dispela taim ol brata bilong Jisas ol i no bilip olsem em i Pikinini Bilong God. Na ol samting Jisas i mekim i kamapim bikpela toktok na ol man i bung na paitim tok i go i kam na sampela i kros long em. Dispela ol samting i narapela kain tru na i no olsem pasin Jisas i bin mekim taim em i yangpela yet na em i stap wantaim ol long Nasaret. Olsem na ol brata bilong Jisas i ting Jisas i gat bikpela sik long tingting. Ol i tok, “Em i longlong pinis.” Olsem na ol i laik kisim em i go.

Tasol taim Jisas i oraitim dispela man spirit nogut i stap long em ol man i bin lukim long ai bilong ol yet. Na ol saveman bilong lo na ol Farisi i save ol i no inap tok olsem Jisas i no bin wokim dispela mirakel na ol narapela mirakel. Olsem na ol i sutim tok long Jisas na ol i tok: “Dispela man i rausim ol spirit nogut long strong bilong Bielsebul tasol, em hetman bilong ol spirit nogut.”

Tasol Jisas em i save long tingting bilong ol, na em i singautim ol i kam na tokim ol, “Sapos ol man bilong wanpela kingdom ol i bruk tupela lain na ol i pait, bai dispela kingdom i bagarap. Na sapos ol man bilong wanpela taun o wanpela haus ol i bruk tupela lain na ol i pait, dispela taun o haus i no inap i stap. Na sapos Seten i rausim Seten, orait lain bilong en i bruk pinis. Olsem na kingdom bilong em i ken i stap strong olsem wanem?”

Tok Jisas i mekim em stret tru! Ol Farisi i tok sampela long lain bilong ol ol tu i bin rausim ol spirit nogut, olsem na Jisas i tok: “Na sapos tru Bielsebul i helpim mi na mi rausim ol spirit nogut, orait husat i save helpim ol pikinini bilong yupela, na ol i rausim spirit nogut?” I olsem Jisas i laik tok, sapos ol i tok Bielsebul i helpim em long rausim spirit nogut, ating Biesebul tasol i helpim ol tu long mekim. Na bihain em i toksave long ol, olsem: “Tasol, sapos Spirit bilong God i helpim mi na mi rausim ol spirit nogut, orait yupela i ken save, kingdom bilong God i kam pinis long yupela!”

Taim Jisas i rausim ol spirit nogut dispela i makim olsem: em i gat strong long daunim Seten tu. Bilong kamapim klia dispela samting Jisas i mekim wanpela tok piksa na em i tok: “Olsem wanem na wanpela man em inap i go insait long haus bilong strongpela man na tekewe samting bilong en? Em i mas pasim dispela strongpela man long baklain pastaim. Em i mekim olsem, na bai em inap tekewe ol samting i stap long haus bilong en. Man i no pren bilong mi, em i birua bilong mi. Man i no bungim samting wantaim mi, em i tromoi i go nabaut.” Tru tumas, ol Farisi ol i birua bilong Jisas, olsem na ol i lain bilong Seten. Ol i “tromoi i go nabaut” ol Isrel bambai ol i no bihainim Jisas.

Olsem na Jisas i givim strongpela tok long ol olsem: “Man i tok bilas long Holi Spirit, bai God i no tekewe sin bilong dispela man. Man i mekim wanpela tok nogut long Pikinini Bilong Man, bai God i tekewe dispela sin bilong em. Tasol man i mekim tok nogut long Holi Spirit, bai God i no tekewe dispela sin bilong em nau na long taim bihain tu.” Spirit holi i as bilong ol mirakel Jisas i wokim, tasol ol saveman bilong lo na ol Farisi i tok, Seten i as bilong ol dispela mirakel. Olsem na ol i mekim bikpela sin tru long spirit holi na God i no inap tekewe dispela kain sin. Matyu 12:​22-32; Mak 3:​19-30; Jon 7:⁠5.

◆ Olsem wanem na namba tu raun bilong Jisas long Galili em i narapela kain long namba wan raun bilong em?

◆ Bilong wanem ol wanblut bilong Jisas i laik kisim em i go?

◆ Ol Farisi i sutim wanem tok long Jisas bilong daunim wok mirakel bilong Jisas? Jisas i tok wanem bilong daunim tok bilong ol?

◆ Ol Farisi i mekim wanem kain sin? Na olsem wanem long dispela kain sin?