Jisas i Krosim Ol Farisi

Jisas i rausim ol spirit nogut long strong bilong God, tasol ol saveman bilong lo na ol Farisi i tok em i mekim long strong bilong Satan, i olsem ol i tok nogut long holi spirit. Olsem na ol bai stap long sait bilong husat, God o Satan? Jisas i tok: “Sapos yu wanpela gutpela diwai, orait yu bai karim gutpela kaikai. Sapos yu wanpela diwai nogut, orait yu bai karim kaikai nogut. Ol man i save lukim prut na ol i save em i wanem kain diwai.”—Matyu 12:33.

Jisas i mekim gutpela wok long rausim ol spirit nogut, tasol ol man i tok em i mekim wok bilong Satan. Long Bikpela Tok Long Maunten, Jisas i tok sapos kaikai i gutpela orait diwai i gutpela. Ol Farisi i birua long Jisas na sutim tok giaman long em, olsem na pasin ol i bihainim i kamapim wanem kain kaikai? Ol i kamapim kaikai nogut. Jisas i tokim ol: “Yupela ol pikinini bilong ol posin snek, yupela ol man nogut, olsem na olsem wanem yupela inap mekim ol gutpela tok? Maus i save autim ol tingting i pulap long bel.”—Matyu 7:16, 17; 12:34.

Ol tok yumi mekim i kamapim klia tingting i stap long bel bilong yumi, God bai skelim yumi long dispela. Olsem na Jisas i tok: “Mi tokim yupela olsem, long De Bilong Kot ol man i mas sanap long kot long olgeta toktok nating ol i bin mekim. Long wanem, long ol tok bilong yu yet God bai kolim yu stretpela man, na long ol tok bilong yu yet em bai kolim yu man nogut.”—Matyu 12:36, 37.

Jisas i mekim planti strongpela wok, tasol ol saveman bilong lo na ol Farisi i tok: “Tisa, mipela i laik bai yu wokim wanpela mirakel olsem mak mipela inap lukim.” Ating ol i no lukim Jisas i wokim ol mirakel, tasol i gat planti aiwitnes i stap. Jisas i tokim ol hetman bilong Juda olsem: “Lain pipol bilong dispela taim ol i lain nogut na ol i no stap gut long God, ol i laik lukim wanpela mirakel olsem mak, tasol i no gat wanpela mak bai kamap long ol. Mak bilong profet Jona tasol bai kamap long ol.”—Matyu 12:38, 39.

Jisas i no laik bai ol i tingting planti long tok em i mekim, na em i tok: “Jona i bin stap insait long bel bilong traipela pis inap 3-pela de na 3-pela nait, olsem tasol Pikinini bilong man bai stap insait tru long graun inap 3-pela de na 3-pela nait.” Jona i stap insait long bel bilong traipela pis inap 3-pela de, na bihain pis i trautim em, i olsem em i kirap bek. Jisas i tok profet olsem em bai dai na long de namba 3, em bai kirap bek. Tasol bihain long taim Jisas i kirap bek, ol hetman bilong lotu Juda i no bilip long “mak bilong profet Jona,” na ol i no tanim bel na senisim pasin bilong ol. (Matyu 27:63-66; 28:12-15) Tasol ol “man bilong Ninive” i bin tanim bel taim Jona i autim tok long ol. Olsem na ol i kamapim rong bilong ol dispela lain manmeri. Na tu, Jisas i tok kwin bilong saut, em tu i kamapim rong bilong ol dispela lain. Taim Solomon i autim gutpela save bilong em, kwin i amamas long harim. Nau Jisas i tokim ol, “man i winim Solomon em i stap long hia.”—Matyu 12:40-42.

Jisas i tok dispela bikhetlain i wankain long wanpela man em spirit nogut i bin lusim em. (Matyu 12:45) Dispela man i no tingim tingim ol gutpela samting, olsem na spirit nogut i kam bek wantaim 7-pela spirit i nogut moa na bosim em. Olsem tasol, lain Israel i kamap klin pinis na ol i kisim ol gutpela pasin, wankain long dispela man em spirit nogut i bin lusim em. Tasol ol i sakim ol profet bilong God na ol i birua long Jisas, em man i mekim ol wok long strong bilong spirit bilong God. Olsem na nau ol i stap nogut moa winim long bipo.

Jisas i toktok long bikpela lain manmeri, na mama bilong em na ol brata bilong em i kam long lukim em. Ol man i sindaun klostu long em i tok: “Mama bilong yu na ol brata bilong yu i sanap ausait, ol i laik lukim yu.” Taim Jisas i bekim tok long ol, em i kamapim klia olsem em i pas gut moa wantaim ol disaipel, ol i olsem brata, susa, na mama bilong em. Em i makim ol disaipel bilong em long han na i tok: “Lain i harim tok bilong God na bihainim, dispela lain ol i mama bilong mi na brata bilong mi.” (Luk 8:20, 21) Jisas i laikim tumas ol wanblut bilong em, tasol tok bilong em i soim olsem em i pas gut moa wantaim ol disaipel bilong em. Olsem na em i bikpela samting long yumi tu i mas pas gut wantaim ol wanbilip bilong yumi, moa yet taim ol narapela i gat tupela tingting long yumi o sutim tok giaman long wok bilong yumi!