I Stap na Wok Bilong Jisas

Jisas i Krosim Ol Farisi

JISAS i tok, sapos em i rausim ol spirit nogut long strong bilong Seten, orait lain bilong Seten i bruk pinis. Na Jisas i tok moa olsem: “Sapos diwai i gutpela, bai kaikai bilong en tu i gutpela. Sapos diwai i nogut, orait bai kaikai bilong en tu i nogut. Ol man i lukim kaikai pastaim, na ol i save, diwai i gutpela o nogat.”

Jisas i mekim gutpela wok−em i rausim ol spirit nogut. Ol man i longlong na ol i tok, em i mekim wok bilong man nogut Seten. Sapos kaikai i gutpela, orait diwai i no nogut. Tasol kaikai ol Farisi i kamapim em nogut−ol i sutim longlong tok long Jisas na ol i birua long em na i no gat as long ol i mekim olsem. Kaikai ol i kamapim em nogut, olsem na yumi save, ol yet i man nogut. Jisas i tok: “Yupela i olsem snek nogut. Olsem wanem yupela inap mekim gutpela tok? Na maus bilong man em i save autim kain tingting i pulap long bel.”

Ol tok yumi mekim i kamapim tingting i stap long bel bilong yumi, olsem na God inap skelim yumi long dispela. Jisas i tok: “Mi tokim yupela, long de bilong bikot God bai i skelim ol manmeri long olgeta toktok nabaut ol i bin mekim. Long tok bilong yu yet bambai God i kolim yu stretpela man. Na long tok bilong yu yet bai em i kolim yu man nogut.”

Jisas i mekim planti strongpela wok, tasol ol saveman bilong lo na ol Farisi i tok: “Tisa, mipela i laik yu wokim wanpela mirakel, na mipela i ken lukim.” Ol dispela man i kam long Jerusalem, ating ol yet i no bin lukim Jisas i wokim wanpela mirakel, tasol planti man i bin lukim long ai bilong ol yet. Olsem na Jisas i bekim tok long ol na em i tok: “Lain manmeri nogut i save pamuk nabaut, ol i singaut long lukim mirakel. Tasol bai mi no soim wanpela mirakel long ol. Mirakel bilong profet Jona, em tasol bai mi soim long ol.”

Jisas i kamapim insait bilong dispela tok bilong em, em i tok: “Olsem bipo Jona i stap tripela de na tripela nait insait long bel bilong bikpela pis, olsem tasol bai Pikinini Bilong Man i stap tripela de na tripela nait insait long graun.” Pis i daunim Jona na bihain em i trautim Jona, na i olsem Jona i kirap bek long matmat. Na Jisas i laik tok olsem, bai em i dai na long namba tri de bai em i kirap bek. Tasol bihain, taim Jisas i kirap bek long matmat, ol hetman bilong lain Juda i no bilip long dispela “mirakel bilong profet Jona.”

Olsem na Jisas i tok, ol manmeri bilong Niniva, em ol i bin harim tok Jona i autim long ol na tanim bel, ol bai kirap bek long de bilong kot na bai ol i kamapim pasin nogut ol Juda i bin mekim, em ol i sakim Jisas. Na Jisas i stori tu long kwin bilong hap bilong saut, em i stap long arere tru bilong graun na em i kam harim Solomon i autim gutpela save bilong em. Na Jisas i tok: “Tasol i gat wanpela man i stap hia, em i winim Solomon.”

Bihain Jisas i mekim tok piksa long wanpela man em spirit nogut i bin lusim em. “Haus” bilong dispela man i kamap klin, tasol em i no pulimapim gutpela samting long en, olsem na 7-pela spirit i moa nogut ol i kam i stap long em. Jisas i tok: “Bipo dispela man i stap nogut, tasol nau em i stap nogut moa yet. Olsem tasol bai i kamap long ol manmeri nogut bilong dispela taim.” Lain Isrel i bin kamap klin na ol i stretim sampela pasin bilong ol−i olsem spirit nogut i lusim ol inap liklik taim. Tasol ol i bin sakim ol profet bilong God na nau ol i birua long Krais yet, olsem na ol i stap nogut moa yet winim bilong bipo.

Jisas i givim toktok yet long ol manmeri na mama wantaim ol brata bilong em i kam sanap arere long bikpela lain manmeri ol i bung i stap. Wanpela man i tokim Jisas: “Harim, mama bilong yu na ol brata bilong yu ol i sanap ausait, na ol i laik toktok wantaim yu.”

Jisas i tok: “Husat em i mama bilong mi? Husat i brata bilong mi?” Na em i makim ol disaipel bilong em long han na em i tok: “Lukim mama bilong mi wantaim ol brata bilong mi. Man i bihainim laik bilong Papa bilong mi i stap long heven, em i brata na susa na mama bilong mi.” Long dispela rot Jisas i kamapim long ples klia olsem em i laikim tru mama bilong em na ol brata bilong em, tasol em i laikim moa yet ol disaipel bilong em. Matyu 12:​33-50; Mak 3:​31-35; Luk 8:​19-21.

◆ Ol Farisi i mekim wanem na yumi save ol i olsem diwai nogut i kamapim kaikai nogut?

◆ Wanem dispela “mirakel bilong profet Jona”?

◆ Olsem wanem lain Isrel i kain olsem wanpela man em spirit nogut i bin lusim em?

◆ Jisas i tok wanem na yumi save em i pas tru long ol disaipel bilong em?