Ol Tok Piksa Long Kingdom

Jisas i stap long Kaperneam na em i krosim ol Farisi. Bihain liklik, long dispela de yet, em i lusim haus na i go long raunwara Galili, na bikpela lain manmeri i kam bung long nambis. Jisas i kalap long wanpela bot, na i pul i go longwe liklik long nambis, na em i kirap long skulim ol manmeri. Em i mekim ol tok piksa bilong skulim ol long Kingdom bilong heven. Jisas i stori long ol samting em ol manmeri i mekim wok long en long olgeta de. Olsem na em i isi long ol inap kliagut long ol as tok bilong Kingdom.

Namba 1 tok piksa Jisas i mekim em long wanpela man i planim ol sid. Taim em i wok long tromoi ol sid, sampela sid i pundaun arere long rot na ol pisin i kam kaikai. Na sampela i pundaun long hap bilong ston we i no gat planti graun na rop bilong sid i no go daun tru, olsem na taim san i kukim ol i drai. Na sampela i pundaun namel long rop i gat nil na rop i gat nil i kamap na i karamapim ol. Tasol sampela i pundaun long gutpela graun na ol i karim kaikai, “wanpela i karim 100, narapela i karim 60, na narapela i karim 30.”—Matyu 13:8.

Namba 2 tok piksa Jisas i mekim em long Kingdom bilong heven i olsem wanpela man i tromoi ol sid long graun. Dispela man i slip long nait na i kirap long san, na ol sid i kru na gro i go antap. Tasol “em i no save hau dispela samting i kamap.” (Mak 4:27) Graun yet i save kamapim kaikai isi isi, pastaim dispela sid i kru, bihain het bilong en i kam antap na nau man inap katim wit i redi pinis.

Namba 3 tok piksa Jisas i mekim em long wanpela man i planim ol gutpela sid long gaden. Tasol “taim ol man i slip i stap,” wanpela birua i kam na planim ol gras nogut namel long wit na em i go. Ol wokboi bilong dispela man i askim em, “Yu laik bai mipela i go na kamautim ol dispela gras nogut?” Tasol em i tok: “Nogat. Nogut yupela i kamautim ol wit taim yupela i wok long kamautim ol gras nogut. Larim tupela i gro wantaim inap long taim bilong bungim kaikai. Na long taim bilong bungim kaikai bai mi tokim ol man i mekim dispela wok: Bungim ol gras nogut pastaim na pasim ol long ol bandel na kukim long paia. Na bihain bungim ol wit na putim long bakstua bilong mi.”—Matyu 13:24-30.

Long ol tok piksa bilong Jisas, em i stori long ol man i wok gaden, em samting planti man i klia long en. Na tu, em i stori long liklik sid mastet. Taim dispela sid i gro na i kamap wanpela bikpela diwai, ol pisin i kam na sindaun long ol han bilong en. Jisas i tok: “Kingdom bilong heven i olsem sid mastet, em wanpela man i bin kisim na planim long gaden bilong en.” (Matyu 13:31) Jisas i no stori long ol diwai, nogat. Em i tok piksa long olsem wanem wanpela samting i liklik tru inap kamap bikpela tru.

Bihain Jisas i mekim narapela tok piksa em planti man i save long en. Em i tok, Kingdom bilong heven i olsem “yis wanpela meri i kisim na miksim wantaim bikpela hap plaua inap olsem 3-pela baket.” (Matyu 13:33) Tru man i no inap lukim yis i mekim wok, tasol isi isi yis i mekim plaua olgeta i solap. Olsem tasol, ol man i no luksave long wok Kingdom bilong heven i mekim, tasol insait long planti yia nau wok bilong Kingdom i go bikpela tru.

Bihain long Jisas i skulim ol man, em i salim ol i go na em i go bek long haus em i stap long en. I no longtaim na ol disaipel bilong em i kam long en, ol i laik kisimgut mining bilong tok bilong em.

Ol disaipel i save harim Jisas i mekim ol tok piksa, tasol nau Jisas i mekim planti tok piksa long wankain taim. Ol i askim em: “Bilong wanem yu yusim ol tok piksa taim yu toktok wantaim ol manmeri?”—Matyu 13:10.

Wanpela risen Jisas i mekim ol tok piksa em bilong truim ol tok profet bilong Baibel. Gutnius Bilong Matyu i tok: “Long rot bilong ol tok piksa tasol em i save toktok wantaim ol. Em i mekim olsem bilong truim tok i bin kamap long maus bilong profet, olsem: ‘Bai mi opim maus bilong mi na kamapim ol tok piksa, bai mi autim ol samting i bin stap hait kirap long bipo yet.’”—Matyu 13:34, 35; Song 78:2.

Narapela risen Jisas i mekim ol tok piksa em bilong kamapim pasin tru bilong ol man. Planti man i amamas long Jisas, long wanem, em i man bilong stori gut na em i save wokim ol mirakel. Tasol ol i no laik daunim laik bilong ol yet na bihainim Jisas olsem Bikpela bilong ol. (Luk 6:46, 47) Na tu, ol i no laik senisim ol tingting na pasin bilong ol. Maski ol i harim ol tok bilong em, ol dispela tok i no go daun long bel bilong ol.

Jisas i bekim tok bilong ol disaipel olsem: “Mi yusim ol tok piksa taim mi toktok wantaim ol manmeri, long wanem, ol i lukluk, tasol ol i lukluk nating, na ol i harim, tasol ol i harim nating, na ol i no kisimgut mining bilong en. Truim bilong tok profet bilong Aisaia i kamap long ol, em i tok: ‘. . .Bel bilong ol dispela pipol i pas.’”—Matyu 13:13-15; Aisaia 6:9, 10.

Tasol dispela tok i no go long ol man i harim tok bilong Jisas na bihainim. Em i tok: “Ai bilong yupela i ken amamas, long wanem, ai bilong yupela i lukim samting, na yau bilong yupela i ken amamas, long wanem, yau bilong yupela i harim samting. Mi tok tru long yupela: Planti profet na planti stretpela man ol i bin i gat bikpela laik long lukim ol samting nau yupela i lukim, tasol ol i no lukim. Na ol i bin i gat bikpela laik long harim ol samting nau yupela i harim, tasol ol i no harim.”—Matyu 13:16, 17.

Ol 12-pela aposel na ol narapela disaipel i gat gutpela bel, long wanem, ol i harim gut tok. Olsem na Jisas i tok: “God i bin larim yupela long kliagut long ol tok hait holi bilong Kingdom bilong heven, tasol em i no mekim olsem long ol dispela manmeri.” (Matyu 13:11) Ol disaipel i gat gutpela bel na ol i laik kliagut long mining bilong ol tok, olsem na Jisas i kamapim gut insait bilong tok piksa long man i tromoi ol sid long graun.

Jisas i tok: “Sid i makim tok bilong God.” (Luk 8:11) Na graun i makim bel bilong man. Dispela i helpim ol disaipel long kliagut long mining bilong tok piksa bilong em.

Long ol sid i pundaun long rot, Jisas i tok: “Satan i kam na rausim dispela tok long bel bilong ol, bai ol i no ken bilip na God i kisim bek ol.” (Luk 8:12) Na long ol sid i pundaun long hap i gat ston, Jisas i tok dispela i makim bel bilong ol man i harim tok na ol i amamas, tasol ol tok i no go daun tru long bel bilong ol. Na “taim tok bilong kingdom i mekim na hevi na pasin birua i kamap,” ol i pundaun. Tru tumas, “taim traim i kamap,” ating wanfamili na ol arapela i birua long ol na ol i pundaun.—Matyu 13:21; Luk 8:13.

Olsem wanem long sid i pundaun namel long ol rop i gat nil? Jisas i tokim ol disaipel bilong em olsem, dispela i makim ol man husat i harim tok, tasol “ol wari bilong laip long dispela taim na strong bilong mani long giamanim man” i pundaunim ol. (Matyu 13:22) Ol tok i go daun long bel bilong ol, tasol ol i tingting long ol dispela samting na tok ol i harim i no karim kaikai.

Long laspela tok piksa, Jisas i stori long sid i pundaun long gutpela graun. Dispela i makim ol man i harim tok na ol i holimpas long bel dispela tok na ol i bihainim. Wanem gutpela samting i kamap? Ol i “karim kaikai.” Krismas na helt bilong ol i no wankain, olsem na ol i no inap mekim wankain wok, wanpela i karim 100, narapela i karim 60 na narapela i karim 30. Tru tumas, ol lain i mekim wok bilong God na i kisim ol blesing em ol “lain husat i harim tok na bel bilong ol i stretpela na i gutpela. Ol i holimpas dispela tok na ol i sanap strong na karim kaikai.”—Luk 8:15.

Ol disaipel i mas amamas tru long harim ol tok Jisas i kamapim bilong skulim ol! Nau ol disaipel i kliagut long mining bilong ol tok piksa bilong em. Jisas i laik bai ol disaipel i kliagut long ol tok piksa bilong em na bai ol tu i ken skulim ol arapela long tok i tru. Jisas i tok: “Ol i no save kisim wanpela lam bilong putim aninit long basket o aninit long bet, a? Ol i save kisim bilong putim antap long tebol, laka? . . . Man i gat yau, em i mas harim dispela tok.”—Mak 4:21-23.

Bihain long ol disaipel i kliagut long tok piksa bilong man i tromoi ol sid, ol i laik kisim sampela save moa. Olsem na ol i tokim Jisas: “Tokim mipela long mining bilong dispela tok piksa bilong gras nogut long gaden.”—Matyu 13:36.

Tok bilong ol disaipel i soim olsem ol i laik kisim sampela save moa. Pasin ol i mekim i narapela kain long bikpela lain manmeri i stap long nambis em ol i no laik kisim save. I klia tru olsem ol manmeri i harim tok, tasol ol i no gat laik long kisim save long as bilong ol dispela tok piksa na skul ol i kisim. Ol i amamas tasol long harim Jisas i stori long ol tok piksa. Jisas i lukim pasin bilong ol disaipel bilong em i narapela kain long pasin bilong ol dispela manmeri, na em i tok:

“Putim gut yau long ol tok yupela i wok long harim. Skel yupela i givim long ol arapela, em dispela skel ol bai bekim long yupela, yes, bai ol i skruim sampela moa long yupela.” (Mak 4:24) Ol disaipel i putim gut yau long tok Jisas i mekim. Ol i laik kisim sampela save moa, olsem na Jisas i skulim ol long planti samting, na nau ol i kliagut. Bilong bekim askim bilong ol disaipel bilong em long tok piksa bilong wit na gras nogut, Jisas i tok:

“Man i planim ol gutpela sid em Pikinini bilong man. Na gaden em i dispela graun. Na ol gutpela sid em ol pikinini bilong Kingdom, na gras nogut em ol pikinini bilong Satan. Na birua i planim gras nogut, em Satan. Taim bilong bungim kaikai i makim pinis bilong dispela taim. Na ol man bilong bungim kaikai em ol ensel.”—Matyu 13:37-39.

Bihain long Jisas i kamapim ol dispela samting long tok piksa, em i stori long ol samting bai kamap. Em i tok long pinis bilong dispela taim, ol ensel bai kamautim ol giaman Kristen em ol i stap olsem gras nogut namel long “ol pikinini bilong Kingdom.” Ol ensel bai bungim “ol stretpela man” na ol bai lait bikpela olsem san “long Kingdom bilong Papa bilong ol.” Na olsem wanem long “ol pikinini bilong Satan?” Bikpela bagarap bai painim ol na “ol bai krai na sikirapim tit bilong ol.”—Matyu 13:41-43.

Jisas i stori long 3-pela moa tok piksa long ol disaipel bilong em. Namba 1 tok piksa, em i tok: “Kingdom bilong heven i olsem wanpela bokis mani i stap hait long wanpela hap graun. Wanpela man i painim na em i haitim gen. Em i amamas tru, olsem na em i go salim ol samting bilong en na i go baim dispela hap graun.”—Matyu 13:44.

Namba 2 tok piksa, Jisas i tok: “Kingdom bilong heven i olsem wanpela bisnisman i wok long painim ol gutpela bis. Taim em i painim wanpela bis i dia tumas, em i go salim olgeta samting bilong en na em i baim dispela bis.”—Matyu 13:45, 46.

Long dispela tupela tok piksa, Jisas i tok long pasin bilong man long redi long lusim sampela samting bilong em yet bilong kisim samting i dia tumas. Dispela bisnisman i salim “olgeta samting bilong en” na em i go baim wanpela bis i dia tumas. Ol disaipel bilong Jisas i kliagut long tok piksa bilong bis i dia tumas. Na long tok piksa bilong man i painim bokis mani ol i bin haitim long graun, em i “salim ol samting bilong en” na i go baim wanpela bis i dia tumas. Long dispela tupela tok piksa i gat wanpela samting i dia tumas, em samting ol inap kisim na lukautim. Dispela inap makim samting man i lusim bilong kisim ol samting em i nidim bilong pas gut wantaim God. (Matyu 5:3) Sampela man husat i bin harim ol tok piksa Jisas i mekim, ol i lusim pinis sampela samting bilong ol na bai ol i ken pas gut wantaim God na kamap disaipel tru bilong em.—Matyu 4:19, 20; 19:27.

Namba 3 tok piksa, Jisas i tok Kingdom bilong heven i olsem wanpela umben ol i slekim i go daun long raunwara na i bungim olgeta kain pis. (Matyu 13:47) Bihain ol i sindaun na bungim ol gutpela pis long sampela basket, na ol pis nogut ol i tromoi. Jisas i tok, olsem tasol long pinis bilong dispela taim, ol ensel bai rausim ol man nogut i stap namel long ol stretpela man.

Jisas yet i kirapim dispela wok bilong bungim ol man olsem man i kisim pis, na em i skulim ol disaipel long kamap “ol man bilong kisim ol manmeri.” (Mak 1:17) Tasol Jisas i tok dispela tok piksa long umben i makim samting bai kamap bihain, “long pinis bilong dispela taim.” (Matyu 13:49) Olsem na ol aposel na ol arapela disaipel i harim tok bilong Jisas, ol i save olsem planti gutpela samting bai kamap long bihain.

Ol lain husat i harim ol tok piksa Jisas i bin mekim taim em i stap long bot i kisim planti save moa. Baibel i tok: “Taim em na ol disaipel tasol i stap em i save kamapim mining bilong olgeta samting,” dispela i soim olsem em i amamas long skulim ol. (Mak 4:34) Jisas i olsem “papa bilong haus husat i kisim ol samting bilong en i dia tumas i kam ausait, em ol nupela samting na ol olpela samting.” (Matyu 13:52) Taim Jisas i mekim ol tok piksa, i no olsem em i laik soim ol narapela olsem em i gat bikpela save long skulim ol man, nogat. Em i skulim ol disaipel bilong em long tok i tru, em samting i dia tumas. Tru tumas, pasin bilong Jisas long skulim ol man i soim olsem em i winim “olgeta tisa.”