Klia Long Ol God Giaman—Bilong Wanem?
“Ol liklik pikinini bilong mi, yupela i mas i stap longwe long olgeta giaman god.”—1 JON 5:21.
JEHOVA i no wanpela god giaman ol man i bin wokim long ain o diwai o ston samting. Yumi no inap putim em long wanpela haus ol man i bin wokim. Em i strongpela Spirit, na yumi no inap lukim em long ai, olsem na yumi no inap wokim piksa bilong em. Sapos yumi laik lotu tru long em, yumi no ken mekim wok long piksa o imis samting, long wanem, ol dispela kain samting i olsem god giaman.—Kisim Bek 33:20; Aposel 17:24; 2 Korin 3:17.
2 Sapos yu save lotu long Jehova, orait, yu mas save, olsem wanem man i lotuim god giaman? Olsem wanem lain bilong Jehova i bin abrusim dispela pasin long bipo? Bilong wanem yumi mas klia long pasin bilong lotuim god giaman?
Wanem Samting Em i God Giaman?
3 Ol man i save lotuim god giaman, planti ol i save mekim sampela pasin bilong lotu. Na sampela i givim bel long wanpela samting na laikim tumas na litimapim nem bilong en na lotu long en, na nau dispela samting i kamap olsem wanpela god giaman. Sapos man i lotu long piksa o imis o mak bilong wanpela samting, o mekim wanpela pasin bilong lotu long en, orait, dispela samting i kamap olsem wanpela god giaman. Sampela man i litimapim nem bilong wanpela man o animal o oganaisesen em ol i ting i gat wanpela kain strong, na i olsem ol i lotuim god giaman, na sampela i mekim tu long samting bilong graun em i no gat laip long en.
4 Taim Baibel i toktok long god giaman olsem piksa o imis, em ol samting ol i sapim long diwai o wokim long ain o graun samting na lotu long en, Baibel i kolim olsem samting nogut.
5 Tasol sampela piksa ol i wokim, i no bilong lotu long en, olsem na i no nogut. God i bin tokim ol Israel long wokim piksa bilong tupela ensel long gol na putim long bokis kontrak, na wokim piksa bilong ol ensel long laplap bilong karamapim haus sel, na long laplap i stap namel long Rum Holi na Rum Holi Tru. (Kisim Bek 25:1, 18; 26:1, 31-33) Ol dispela piksa i makim ol ensel long heven, na sampela pris tasol i save lukim. (Lukim Hibru 9:24, 25.) Ol dispela piksa i no bilong lotu long en. Ol gutpela ensel i no laik bai yumi lotu long ol.—Kolosi 2:18; KTH 19:10; 22:8, 9.
Jehova i No Laikim God Giaman
6 Lain bilong Jehova i klia long pasin bilong lotuim ol god giaman, long wanem, Jehova yet i nolaik tru long ol god giaman. God i tokim ol Israel, ol i no ken wokim piksa bilong wanpela samting na lotu long en. Em i givim 10-pela Lo long ol, na wanpela i tok: “Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em, long wanem, mi Bikpela, mi God bilong yupela, na mi no inap larim wanpela giaman god i senisim mi. Nogat tru. Na ol manmeri i no laik tru long mi, ol i gat asua long dispela samting na mi bai mekim save long ol na long 3-pela na 4-pela lain tumbuna bilong ol i kamap bihain. Tasol ol manmeri i laikim mi tumas na i save bihainim olgeta lo bilong mi, orait bai mi laikim ol tru na mi laikim ol 1000 lain tumbuna bilong ol i kamap bihain.”—Kisim Bek 20:4-6.
7 Jehova i tambuim pasin bilong lotuim piksa, olsem god giaman, long wanem, em i laik bai ol man i mas lotuim em yet, olsem yumi lukim pinis long namba 2 bilong 10-pela Lo. Na em i tok: “Mi tasol mi Bikpela. [Jehova] em nem bilong mi, na yupela i mas givim biknem long mi wanpela tasol. Yupela i no ken litimapim nem bilong ol giaman god, em ol man yet i wokim.” (Aisaia 42:8) Wanpela taim ol Israel i lusim Jehova na ol i kirap lotuim ol god giaman, na “ol i kilim pikinini man na pikinini meri bilong ol na ofaim long ol giaman god.” (Song 106:36, 37) Ol man i lotuim god giaman ol i givim baksait long God tru, em Jehova, na ol i mekim wok bilong ol birua bilong Jehova, em Satan wantaim ol spirit nogut.
Sanap Strong na Winim Traim
8 Sapos yumi stap gut long Jehova, dispela bai helpim yumi long givim baksait long ol god giaman. Daniel sapta 3 i stori long king bilong ol Babilon, em Nebukatnesar, em i putim tok long ol man i gat namba ol i mas i kam bung na lotu long piksa bilong man. Satrak na Mesak na Abetnego tu ol i mas i kam bung, tasol ol i no brukim skru long dispela piksa. God tru bilong ol Babilon, em Satan, em i laik subim dispela 3-pela Hibru long lotuim dispela piksa, em wanpela god giaman.
9 Tingim dispela samting i kamap: Tripela i sanap wantaim ol Babilon long ai bilong dispela traipela piksa, na ol i tingim lo bilong God i tok, no ken wokim piksa na lotu long en. Tasol Nebukatnesar i tok, ‘brukim skru, na sapos nogat, yupela mas dai!’ Tripela i laik i stap gut long Jehova, olsem na ol i tok: “Mipela i save lotu long God tru. Sapos yu mekim long mipela olsem yu tok, orait God bilong mipela em inap long helpim mipela long abrusim paia na strong bilong yu, na em bai i helpim mipela. Tasol sapos em i no helpim mipela, maski, mipela i no inap lotu long ol god bilong yu, na tu mipela i no inap brukim skru long dispela piksa gol yu bin sanapim.”—Daniel 3:16-18.
10 Olsem na ol i tromoi dispela 3-pela gutpela wokman bilong Jehova i go insait long bikpela paia, tasol Nebukatnesar i kirap nogut long taim em i lukim 4-pela man i wokabaut insait long paia na ol i no bagarap. Em i pret na singautim 3-pela long lusim paia na i kam ausait, na em i tok: “Yumi olgeta i mas litimapim nem bilong God bilong Satrak na Mesak na Abetnego. Em i salim ensel bilong en na i helpim dispela tripela man i save lotu na bilip long em. Ol i sakim lo bilong mi na ol i no pret long i dai. Na ol i no lotu long narapela god. Nogat. Ol i lotu tasol long God bilong ol yet. I no gat wanpela god inap long helpim ol manmeri bilong en olsem dispela God [Jehova].” (Daniel 3:28, 29) Dispela stori bilong 3-pela em i strongim bel bilong ol Witnes long nau na bai ol i stap gut long Jehova, na no ken insait long ol pasin bilong graun, na ol i mas givim baksait long ol samting bilong ol god giaman.—Jon 17:16.
Ol God Giaman i Lus Long Kot
11 Na yumi mas givim baksait long pasin bilong lotuim ol god giaman, long wanem, ol i no ken helpim yumi liklik. Sampela god giaman ol man i wokim, ol i gat maus na ai na yau, tasol ol i no inap toktok o lukim wanpela samting o harim wanpela samting. Ol i no inap mekim wanpela samting bilong helpim ol man i save lotu long ol. (Song 135:15-18) Na profet bilong God i bin raitim tok long Aisaia 43:8-28 i stori long Jehova i mekim kot long ol god giaman; i olsem ol i stap long kot, na lain bilong Jehova i sanap long narapela hap na lain bilong graun i sanap long narapela hap, na ol i paitim tok i go i kam. Jehova i tokim ol god giaman long kolim stret tok profet long ol samting i mas kamap, tasol ol i no inap. Orait, nau Jehova i tokim lain bilong em: “Yupela i witnes bilong mi. Mi wanpela tasol mi God.” Tasol lain bilong graun ol i no inap mekim wanpela tok bilong kamapim klia olsem ol god bilong ol i bin i stap paslain long Jehova na ol inap mekim ol tok profet. Tasol taim lain bilong Jehova i stap kalabus long Babilon, Jehova i bin tok profet long ol bai kamap fri na lusim kalabus.
12 Na taim lain bilong Jehova i kamap fri ol bai tok: “Mi bilong Bikpela [Jehova].” Na nau em i tokim ol: “Mi bin stap pastaim tru na bihain bai mi stap las tru. Na i no gat narapela god moa i stap, mi wanpela tasol. . . . Yupela i witnes bilong mi. Ating i gat narapela god olsem mi i stap, a? Mi no save long wanpela. Mi wanpela tasol i stap olsem strongpela ples hait bilong yupela.”—Aisaia 44:1-8.
13 Yumi mas klia long pasin bilong lotuim god giaman, long wanem, dispela em pasin longlong. Wanpela man i sapim hap diwai na wokim wanpela god giaman bambai em i ken lotu long en, na sampela hap moa bilong dispela diwai em i wokim paia long en na kukim kaikai. (Aisaia 44:9-17) Em krankipasin tru! Samting em i wokim na lotu long en, em hap diwai nating na i no gat strong long mekim wanpela samting na bai ol man i ken save em i wanpela god tru. Tasol Jehova i kamapim klia olsem em i God tru. Em i bin tokaut long em bai helpim lain bilong em long lusim kalabus, na bihain em i truim dispela tok na ol i lusim Babilon na ol i go sindaun gen long Jerusalem na wokim gen ol taun long Juda, na em i mekim na bikpela Wara Yufretis i no pasim ol moa. (Aisaia 44:18-27) Na God i bin tok profet tu olsem Sairus bai daunim ol Babilon.—Aisaia 44:28–45:6.
14 Ol god giaman i lus long kot, na God tru, em Jehova, i win. Babilon bilong bipo i bagarap, na Bikpela Babilon bilong nau tu bai kisim bagarap, em olgeta lotu giaman. Ol dispela lotu giaman na god giaman wantaim olgeta bilas na piksa na imis samting bilong ol bai pinis olgeta. (KTH 17:12–18:8) Jehova bai kamapim long ples klia olsem em wanpela tasol em i God tru na em i save truim ol tok em i save mekim.
Mekim Ofa Long Ol Spirit Nogut
15 Spirit bilong Jehova na oganaisesen bilong em i save stiaim lain bilong em, olsem na ol i klia long pasin bilong lotuim god giaman. Lain bilong lukautim ol Kristen long bipo ol i tokim ol olsem: “Holi Spirit i stap wantaim mipela na mipela i pasim tok olsem, mipela i no laik putim planti hevi long yupela. Olsem na yupela i mas bihainim ol dispela pasin tasol. Yupela i no ken kaikai abus ol i bin kilim bilong mekim ofa long ol giaman god. Na yupela i no ken kaikai abus i gat blut i stap yet long en, olsem na yupela i no ken kaikai abus ol man i bin pasim nek bilong en na kilim i dai. Na yupela i mas abrusim olkain pasin pamuk. Sapos yupela i lukaut gut na yupela i abrusim ol dispela pasin, em bai i gutpela. Em tasol tok bilong mipela. Yupela i ken i stap gut.”—Aposel 15:28, 29.
16 Mas klia long ol god giaman, long wanem, ol i samting bilong ol spirit nogut. Pol i tokim ol Kristen long Korin long Kaikai Bilong Bikpela, na em i tok: “Yupela i mas i stap longwe long pasin bilong lotu long ol giaman god. . . . Dispela kap i gat blesing bilong God, na yumi save tok tenkyu long God long en, taim yumi dring long en, em i save bungim yumi wantaim blut bilong Krais. Na dispela bret yumi save brukim, taim yumi kaikai long en, em i save bungim yumi wantaim bodi bilong Krais. I gat wanpela bret tasol, na yumi olgeta i save kaikai long dispela wanpela bret, olsem na yumi planti manmeri yumi stap wanpela bodi tasol. . . . Tasol nogut yupela i ting mi tok olsem, ol ofa ol haiden i save mekim long ol giaman god, ol i samting tru. Na mi no tok olsem ol giaman god, ol i samting tru. Nogat. Mi tok olsem: Samting ol haiden i save ofaim, em ‘ol i ofaim long ol spirit nogut. Ol i no ofaim long God.’ Na mi no laik bai yupela i bung wantaim ol spirit nogut. I no inap yupela i dring long kap bilong Bikpela na long kap bilong ol spirit nogut tu. Na i no inap yupela i kaikai long tebol bilong Bikpela na long tebol bilong ol spirit nogut tu. Ating yumi laik mekim Bikpela i bel nogut na kros long yumi, a?”—1 Korin 10:14-22.
17 Bipo, taim man i laik lotu long god giaman, em i kilim wanpela animal, na katim, na hap mit i bilong mekim ofa long god giaman, na hap i bilong ol pris, na hap i bilong dispela man yet bilong kaikai, na em i maketim ol narapela hap. I no gutpela sapos Kristen i go long haus lotu bilong god giaman na kaikai mit, maski i no mit ol i bin mekim ofa long en; nogut sampela i hevi long dispela, na nogut em yet i go insait long dispela lotu giaman. (1 Korin 8:1-13; KTH 2:12, 14, 18, 20) Tasol i no gat rong sapos Kristen i baim dispela mit long maket, long wanem, em i mit nating tasol, maski ol i bin ofaim dispela animal long god giaman. Na taim em laik kaikai mit, em i no gat wok long askim ol, ‘Mit i kam we?’ Tasol sapos sampela i tok, ‘Ol i bin mekim ofa long dispela mit,’ orait, em i no ken kaikai, nogut em i pundaunim sampela man.—1 Korin 10:25-29.
18 Bipo ol i bin ting, sapos ol i ofaim mit long wanpela god, em i go insait long mit, na bihain ol i kaikai dispela mit, na dispela god i go insait long ol. Taim ol man i bung na kaikai, wantu dispela i save mekim ol i stap wanbel, na i olsem tu taim ol i bung na ofaim mit long ol god giaman na ol i kaikai dispela ofa, nau ol i stap wanbel wantaim dispela god. Long dispela pasin ol spirit nogut i pasim rot bilong ol man long lotuim trupela God Jehova. (Jeremaia 10:1-15) Olsem na Jehova i bin tambuim lain bilong em long kaikai samting ol man i bin ofaim long god giaman. Long nau ol Kristen i mas larim spirit holi wantaim oganaisesen i stiaim ol na bai ol i stap gut long Jehova na klia long pasin bilong mekim wok bilong ol spirit nogut na lotuim ol god giaman.
Bilong Wanem Yumi Mas Was Gut?
19 Kristen i mas was gut long olgeta pasin bilong lotuim god giaman, long wanem, dispela inap paulim bilip bilong em. Taim aposel Jon i stap long Efesus em i tokim ol Kristen: “Yupela i mas i stap longwe long olgeta giaman god.” (1 Jon 5:21) Planti lotu giaman i bin stap klostu long ol. Long taun Efesus ol man i wokim marila na majik na ol samting bilong ol god giaman. Haus lotu bilong god Artemis i stap, em ples bilong ol raskol i hait long en, na ples bilong mekim ol pasin nogut bilong lotu olsem pamuk. Wanpela saveman i tok, rot i go long alta long dispela haus em i rot tudak na em ples bilong ol man i mekim pasin nogut, na dispela i wankain long pasin ol i mekim insait long haus lotu, em i samting nogut tru. Olsem na ol Kristen long Efesus i mas was gut, nogut ol spirit nogut na pasin nogut na god giaman i paulim ol.
20 Ol Kristen i mas strong tru long ol i no ken mekim wanpela hap pasin bilong lotu giaman, nogut ol i givim rot long Satan na bai em i tok, ol man i no save stap gut long Jehova sapos wanpela traim i painim ol. (Jop 1:8-12) Taim Satan i soim long Jisas “olgeta strongpela kantri bilong dispela graun wantaim ol gutpela samting bilong ol,” Satan i tokim em: “Sapos yu brukim skru na lotu long mi, orait bai mi givim yu dispela olgeta samting.” Tasol Jisas i givim baksait long Satan na Jisas i stap gut long Jehova na helpim tok bilong Jehova, na dispela i kamapim long ples klia olsem Satan em i man bilong tok giaman.—Matyu 4:8-11; Sindaun 27:11.
21 Na lain bilong Jisas long bipo, ol tu i no laik helpim tok bilong Satan liklik. Tru, ol “i stap aninit long ol gavman,” tasol ol i no laik wokim smok i gat gutpela smel bilong litimapim nem bilong king bilong Rom, maski ol i mas dai. (Rom 13:1-7) Daniel Maniks i stori long dispela long buk bilong em na em i tok: ‘Ol Rom i putim ol Kristen insait long banis na tokim ol long wokim smok smel bilong makim olsem God i givim namba long king, na sapos ol i no mekim, ol i mas dai, na sapos ol i mekim, ol i ken kamap fri; na wan wan tasol i pundaun na i mekim.’ (Those About to Die, pes 137) Olsem wanem long yu? Sapos ol i traim yu olsem, bai yu givim baksait long pasin bilong lotuim god giaman?
Bai Yu Sakim Ol God Giaman?
22 Ol Kristen i mas givim baksait long olgeta kain pasin bilong lotuim god giaman. Jehova i strong long ol i mas lotuim em wanpela tasol. Tripela Hibru i no laik lotuim bikpela piksa em King Nebukatnesar bilong Babilon i bin sanapim, na Aisaia i bin stori long taim ol god giaman wantaim Jehova i olsem i stap long kot, na trupela God Jehova i win na ol god giaman i lus. Na ol Kristen bilong bipo i no laik kisim ol samting ol man i bin ofaim long god giaman. Na taim king i strong long ol i mas mekim wanpela pasin bilong lotu, planti ol i sanap strong na ol i no laik kalapim lo bilong Jehova. Ol i laik pas strong long Jehova na lotu long em wanpela tasol.
23 Orait, olsem wanem long yu? Yu save was gut, nogut yu mekim wanpela samting i olsem yu givim hap bel long lotuim wanpela god giaman? Yu save lotuim Jehova wanpela tasol? Yu save stap aninit long Jehova, em i nambawan King bilong heven na graun? Yu save litimapim nem bilong em na tokaut olsem em wanpela tasol i God tru? Sapos olsem, yu mas strong long sakim olgeta pasin bilong lotuim god giaman. Wanem sampela tok moa bilong Baibel i ken helpim yu long sakim olgeta kain pasin bilong lotuim ol piksa samting, olsem god giaman?
Yu Ting Olsem Wanem?
◻ Man i mekim wanem na em i lotuim god giaman?
◻ Bilong wanem Jehova i tambuim pasin bilong lotu long piksa, olsem god giaman?
◻ Tripela Hibru i mekim wanem?
◻ Sapos man i kaikai mit ol i bin ofaim long god giaman, olsem wanem em i givim rot long ol spirit nogut i pulim em?
◻ Bilong wanem yumi mas klia long pasin bilong lotuim ol piksa samting?
[Askim Bilong Stadi]
1. Bilong wanem yumi no ken mekim wok long ol piksa o imis taim yumi lotu long Jehova?
2. Yumi mas tingim wanem ol askim?
3, 4. God giaman em i wanem samting?
5. Olsem wanem yumi save, i no olgeta piksa i olsem god giaman?
6. Jehova i ting olsem wanem long lotuim piksa?
7. Bilong wanem Jehova i tambuim pasin bilong lotuim piksa, olsem god giaman?
8. Wanem traim i painim 3-pela Hibru?
9, 10. (a) Tripela i mekim wanem? Ol i kisim wanem gutpela pe long dispela? (b) Dispela stori bilong 3-pela Hibru i helpim ol Witnes olsem wanem?
11, 12. (a) Wanem stori bilong Aisaia i toktok long Jehova i skelim ol god giaman long kot? (b) Olsem wanem long ol god giaman taim Jehova i mekim kot long ol?
13. Man i wokim piksa samting na lotu long en, em i mekim wanem kain pasin?
14. Jehova bai kamapim long ples klia wanem samting?
15. Spirit holi wantaim lain bilong bosim ol Kristen bilong pastaim ol i givim wanem save long ol long samting bilong lotu giaman?
16. Pol i ting olsem wanem long mekim ofa long ol god giaman?
17. Long bipo, i orait long Kristen i kaikai wanem kain mit? Bilong wanem i orait long ol i mekim olsem?
18. Sapos man i kaikai mit ol i bin ofaim long wanpela god, olsem wanem dispela i opim rot long ol spirit nogut i ken pulim em?
19. Wanem kain pasin nogut i bin stap long taun Efesus?
20. Bilong wanem Kristen i no ken mekim wanpela liklik hap pasin i olsem lotuim god giaman?
21. Ol Kristen bilong bipo ol i no laik mekim wanem long king bilong Rom?
22, 23. Bilong wanem yu mas klia long olgeta pasin bilong lotuim god giaman?
[Piksa long pes 23]
Ol i tok long kilim i dai 3-pela Hibru sapos ol i no lotu long wanpela god giaman