“Harim! Mi Stap Wantaim Yupela Olgeta De”

 1. (a) Stori long tok piksa bilong wit na gras nogut. (b) Olsem wanem Jisas i helpim yumi long save long mining bilong en?

WANPELA tok piksa bilong Jisas long Kingdom i stori long fama husat i planim gutpela sid bilong wit na wanpela birua i planim ol gras nogut namel long ol gutpela sid. Gras nogut i kamap bikpela na karamapim ol wit, tasol fama i tokim ol wokboi long “larim tupela i gro wantaim inap long taim bilong bungim kaikai.” Long taim bilong bungim kaikai, ol wokboi bai kukim ol gras nogut long paia, na ol bai bungim ol wit. Jisas yet i stori gut long mining bilong dispela tok piksa. (Ritim Matyu 13:24-30, 37-43.) Dispela tok piksa i skulim yumi long wanem ol samting? (Lukim sat “Wit na Gras Nogut.”)

 2. (a) Ol samting i kamap long gaden bilong fama i soim klia wanem ol samting? (b) Dispela stadi bai stori gut moa long wanem haptaim bilong tok piksa?

² Ol samting i kamap long gaden bilong fama i soim klia olsem wanem na wanem taim Jisas bai bungim lain husat bai stap olsem wit—dispela lain em ol Kristen God i bin makim na ol bai mekim wok king wantaim Jisas long Kingdom. Wok bilong planim sid i bin kirap long Pentikos bilong yia 33 C.E. Wok bilong bungim kaikai bai pinis taim hap lain bilong ol Kristen God i bin makim, em ol i stap yet long graun long pinis bilong dispela haptaim bilong nau, ol i kisim laspela mak bilong ol na ol i go long heven. (Mat. 24:31; Rev. 7:1-4) Wankain olsem man i sanap antap long maunten inap lukim gut ol samting long ples daun, dispela tok piksa i helpim yumi long kliagut long ol wok bai kamap insait long 2,000 yia samting. Orait yumi inap luksave long wanem ol wok bilong Kingdom? Dispela tok piksa i stori long haptaim bilong planim sid, haptaim kaikai i gro, na haptaim bilong bungim kaikai. Dispela stadi bai stori gut moa long haptaim bilong bungim kaikai.a

 3. (a) Wanem samting i bin kamap bihain liklik long yia 100 C.E.? (b) Wanem askim i stap long Matyu 13:28? Husat i givim dispela askim? (Lukim tu blok “Ol Futnot.”)

³ Bihain liklik long yia 100 C.E., “ol gras nogut tu i kamap” taim sampela man i kamap giaman Kristen. (Mat. 13:26) Long yia 300 C.E. samting, ol Kristen husat i stap olsem gras nogut i kamap planti moa winim ol Kristen God i bin makim. Tingim: Long tok piksa, ol wokboi i askim bosman long tok orait long ol long kamautim ol gras nogut. (Mat. 13:28) Bosman i tok wanem?b

 4. (a) Jisas i stap olsem Bosman na tok bilong em i kamapim klia wanem samting? (b) Wanem taim ol man i luksave long ol Kristen em ol i stap olsem wit?

⁴ Long wit na gras nogut, Jisas i tok: “Larim tupela i gro wantaim inap long taim bilong bungim kaikai.” Dispela tok i kamapim klia olsem kirap long taim bilong ol aposel i kam inap long nau, i gat sampela Kristen God i bin makim em ol i stap olsem wit. Dispela tok i stret taim yumi skelim tok em Jisas i bin mekim long ol disaipel, olsem: “Mi stap wantaim yupela olgeta de i go inap long pinis bilong dispela taim.” (Mat. 28:20) Olsem na oltaim Jisas bai lukautim ol Kristen God i bin makim, na em bai lukautim ol i go inap long taim bilong pinis. Insait long dispela longpela haptaim, ol Kristen husat i stap olsem ol gras nogut ol i kamap planti moa, olsem na yumi no save husat ol Kristen i stap olsem wit. Tasol sampela yia paslain long haptaim bilong bungim kaikai i kirap, ol man i luksave long ol Kristen em ol i stap olsem ol wit. Wanem ol samting i mekim na ol man i luksave long ol?

 5. Olsem wanem tok profet bilong Malakai i bin kamap tru long taim bilong ol aposel?

⁵ Planti handret yia paslain long Jisas i mekim tok piksa bilong wit na gras nogut, Jehova i bin kirapim Malakai long mekim tok profet long ol samting bai kamap na dispela i stret wantaim tok piksa bilong Jisas. (Ritim Malakai 3:1-4.) Jon Bilong Baptais em dispela “man bilong bringim tok” na em i bin “redim rot.” (Mat. 11:10, 11) Taim em i kirap mekim wok long 29 C.E., taim bilong skelim lain Israel i kamap klostu pinis. Jisas em i namba 2 man bilong bringim tok. Tupela taim em i bin klinim tempel bilong Jerusalem. Namba 1: Taim em i kirapim wok bilong em long autim tok. Namba 2: Klostu long taim em i dai. (Mat. 21:12, 13; Jon 2:14-17) Olsem na wok bilong Jisas long klinim tempel i kamap insait long wanpela haptaim.

 6. (a) Long bikpela truim bilong tok profet bilong Malakai, wanem ol samting i kamap? (b) Wanem taim Jisas i bin skelim tempel, em pasin bilong mekim lotu? (Lukim tu blok “Ol Futnot.”)

⁶ Long bikpela truim bilong tok profet bilong Malakai, wanem ol samting i kamap? Long ol yia paslain long 1914, C. T. Russell na ol wanwok bilong em i bin mekim wankain wok olsem Jon Bilong Baptais i bin mekim. Ol i mekim bikpela wok bilong kamapim klia ol tok i tru bilong Baibel. Ol Sumatin Bilong Baibel i skulim ol man long stretpela save bilong ofa bilong Krais long baim bek ol man, ol i kamapim klia giaman bilip bilong helpaia, na ol i tokaut long pinis bilong Taim Bilong Ol Arapela Lain. Tasol planti lotu i tok ol i Kristen. Olsem na wanpela bikpela askim i kamap: Husat bilong ol dispela Kristen i stap olsem wit? Bilong bekim dispela askim, Jisas i kirapim wok bilong skelim tempel, em pasin bilong mekim lotu, long 1914. Dispela wok bilong skelim na klinim ol lotu i kamap insait long wanpela haptaim, kirap long 1914 i go inap long 1919 samting.c

 7. Taim Jisas i kirapim wok bilong skelim ol lotu long 1914, em i lukim wanem samting?

⁷ Taim Jisas i kirapim wok bilong skelim ol lotu, em i lukim wanem samting? Em i lukim olsem winim 30 yia pinis, liklik lain Sumatin Bilong Baibel i bin givim bel tru long yusim strong na mani kago bilong ol long helpim wok bilong autim tok. Yumi ken ting olsem Jisas na ol ensel i bin kisim bikpela amamas taim ol i lukim olsem ol Kristen husat i stap olsem wit ol i liklik lain, tasol lain bilong Satan husat i stap olsem gras nogut, ol i no inap daunim ol dispela Kristen! Maski i olsem, i gat wok i stap yet long “rausim pasin doti bilong ol pris,” em ol Kristen God i bin makim. (Mal. 3:2, 3; 1 Pita 4:17) Bilong wanem?d

 8. Wanem ol samting i kamap bihain long 1914?

⁸ Klostu long pinis bilong 1914, sampela Sumatin Bilong Baibel i bel hevi, long wanem, ol i no go long heven. Namel long 1915 na 1916, ol man i mekim pasin birua na dispela i daunim wok autim tok. Bikpela hevi moa i kamap taim Brata Russell i dai long Oktoba 1916 na pasin birua i kamap insait long oganaisesen. Sevenpela brata i mekim wok olsem dairekta bilong Sosaiti Was Taua, na 4-pela bilong ol i no laik bai Brata Rutherford i stap olsem man i go pas long wok. Ol i laik kirapim pasin bilong brukim lain namel long ol brata, tasol long Ogas 1917, ol i lusim Betel—dispela em wanpela rot we oganaisesen i kamap klin! Na tu, sampela Sumatin Bilong Baibel i lusim wok bilong God, long wanem, ol i pret long ol man. Tasol ol Sumatin Bilong Baibel i amamas long larim Jisas i klinim lain bilong ol na ol i mekim sampela bikpela senis. Olsem na Jisas i skelim ol na tok ol i Kristen tru husat i stap olsem wit, tasol em i sakim olgeta giaman Kristen. Na tu, em i sakim olgeta giaman Kristen i stap insait long ol lotu bilong Kristendom. (Mal. 3:5; 2 Tim. 2:19) Wanem samting i kamap bihain long dispela? Bilong kisim bekim bilong dispela askim, yumi ken skelim gen tok piksa bilong wit na gras nogut.

9, 10. (a) Nau yumi bai skelim wanem ol samting? (b) Long haptaim bilong bungim kaikai, wanem namba 1 samting i bin kamap?

⁹ Jisas i tok: “Taim bilong bungim kaikai i makim pinis bilong dispela taim.” (Mat. 13:39) Haptaim bilong bungim kaikai i bin kirap long 1914. Orait yumi bai skelim 5-pela samting em Jisas i tok profet long ol bai kamap long dispela haptaim.

¹⁰ Namba 1: Bungim ol gras nogut. Jisas i tok: “Long taim bilong bungim kaikai bai mi tokim ol man i mekim dispela wok: Bungim ol gras nogut pastaim na pasim ol long ol bandel.” Bihain long 1914, ol ensel i kirap long “bungim” ol Kristen husat i stap olsem ol gras nogut, ol i rausim ol namel long “ol pikinini bilong Kingdom.”—Mat. 13:30, 38, 41.

11. I kam inap long nau, wanem samting i mekim na ol Kristen tru i narapela kain long ol giaman Kristen?

¹¹ Taim wok bilong bungim kaikai i wok long go het, em isi moa long luksave long husat ol i Kristen tru na husat ol i giaman Kristen. (Rev. 18:1, 4) Long 1919, ol samting i kamapim klia olsem Bikpela Babilon i pundaun pinis. Wanem samting i mekim na ol Kristen tru i narapela kain long ol giaman Kristen? Wok autim tok. Ol brata husat i go pas long ol Sumatin Bilong Baibel, ol i kirapim olgeta wan wan Kristen long insait long wok bilong autim tok bilong Kingdom. Olsem: Wanpela liklik nius (To Whom the Work Is Entrusted) ol i wokim long 1919 i kirapim olgeta Kristen God i bin makim long ol i mas autim tok long ol haus. Dispela liklik nius i tok: “Dispela em bikpela wok tru, tasol em wok bilong Bikpela, na em bai strongim yumi long mekim dispela wok. Em gutpela samting tru long yu inap mekim dispela wok.” Orait ol Sumatin Bilong Baibel i mekim wanem? Nius The Watch Tower bilong 1922 i stori olsem, kirap long dispela taim ol Sumatin Bilong Baibel i mekim bikpela wok moa long autim tok. I no longtaim, pasin bilong autim tok long ol haus i kamap olsem mak bilong ol dispela gutpela Kristen, na dispela pasin i stap yet i kam inap long nau.

12. Wanem taim ol i bungim ol Kristen em ol i stap olsem wit?

¹² Namba 2: Bungim ol wit. Jisas i tokim ol ensel bilong em olsem: “Bungim ol wit na putim long bakstua bilong mi.” (Mat. 13:30) Kirap long 1919, ol Kristen God i bin makim ol i stat long bung gen long kongrigesen Kristen. Laspela wok bilong bungim ol wit long bakstua bai kamap taim sampela Kristen God i bin makim em ol i stap yet long pinis bilong dispela haptaim bilong nau, ol i kisim pe bilong ol long heven.—Dan. 7:18, 22, 27.

13. Revelesen 18:7 i tok pamukmeri, olsem Bikpela Babilon, na Kristendom i bihainim wanem pasin long nau?

¹³ Namba 3: Krai na sikirapim tit. Bihain long ol ensel i bungim ol gras nogut, wanem samting i kamap? Jisas i stori long ol samting bai painim ol Kristen husat i stap olsem gras nogut, na em i tok: “Long dispela hap ol bai krai na sikirapim tit bilong ol.” (Mat. 13:42) Yu ting dispela samting i wok long kamap long nau? Nogat. Long nau, lain Kristendom em hap bilong pamukmeri, em i tok long em yet olsem: “Mi stap kwin, mi no wanpela wido, na i no gat wanpela taim bai mi krai sori.” (Rev. 18:7) Lain Kristendom i pilim olsem em i gat bikpela strong na namba, olsem em i “stap kwin” winim olgeta arapela lida bilong lain politik. Long nau, ol Kristen husat i stap olsem ol gras nogut, ol i mekim pasin hambak na ol i no krai. Tasol klostu nau senis bai kamap.

14. (a) Wanem taim bai ol giaman Kristen i “sikirapim tit bilong ol”? Bilong wanem? (b) Olsem wanem nupela save yumi kisim long Matyu 13:42 i stret wantaim tok i stap long Song 112:10? (Lukim blok “Ol Futnot.”)

¹⁴ Long taim bilong traipela hevi tru, taim olgeta lotu giaman i bagarap pinis, ol lain bilong ol bai painim ples hait, tasol i no gat wanpela ples bai stap olsem ples hait bilong ol. (Luk 23:30; Rev. 6:15-17) Orait, taim ol i luksave olsem i no gat ples we ol i ken hait long en na abrusim bagarap, ol bai bel hevi na krai, na kros nogut tru na “sikirapim tit bilong ol.” Olsem Jisas i bin kamapim long tok profet bilong em long traipela hevi tru, long dispela taim bilong bikpela tudak ol “bai paitim bros bilong ol na krai sori.”—Mat. 24:30; Rev. 1:7.e

15. Wanem samting bai painim ol gras nogut? Wanem taim bai dispela samting i kamap?

¹⁵ Namba 4: Tromoi ol i go long bikpela paia. Wanem samting bai painim ol gras nogut em ol i pasim long ol bandel? Ol ensel bai “tromoi ol i go long bikpela paia.” (Mat. 13:42) Dispela i makim olsem ol bai bagarap na pinis olgeta. Olsem na ol manmeri husat i bihainim ol lotu giaman ol bai bagarap na pinis long laspela hap bilong traipela hevi tru, em Armagedon.—Mal. 4:1.

16, 17. (a) Wanem laspela samting bai kamap olsem Jisas i kolim long tok piksa bilong em? (b) Bilong wanem yumi ken tok truim bilong dispela tok profet bai kamap long bihain?

¹⁶ Namba 5: Lait bikpela. Long pinis bilong tok profet bilong Jisas, em i tok: “Long dispela taim ol stretpela man bai lait bikpela olsem san long Kingdom bilong Papa bilong ol.” (Mat. 13:43) Wanem taim bai dispela samting i kamap, na em bai kamap long wanem hap? Truim bilong ol dispela tok i no kamap yet. Jisas i no tok profet long samting i wok long kamap long graun long nau, nogat, em i tok profet long samting bai kamap long heven long bihain. Yumi ken skelim 2-pela samting.f

¹⁷ Namba 1: “Wanem taim” dispela samting bai kamap. Jisas i tok: “Long dispela taim ol stretpela man bai lait bikpela.” Dispela hap tok, “long dispela taim,” i makim taim bilong ‘tromoi ol gras nogut i go long bikpela paia.’ Dispela samting bai kamap long laspela hap bilong traipela hevi tru. Olsem na ol Kristen God i bin makim, ol tu bai “lait bikpela” long bihain. Namba 2: Wanem “hap” dispela samting bai kamap long en. Jisas i tok ol stretpela man bai ‘lait long Kingdom.’ Wanem mining bilong dispela tok? Bihain long namba 1 hap bilong traipela hevi tru i kamap pinis, ol Kristen God i bin makim em ol i stap yet long graun, ol bai kisim laspela mak bilong ol. Bihain, olsem tok profet bilong Jisas long traipela hevi tru i soim, olgeta bai bung long heven. (Mat. 24:31) Long dispela hap, ol bai lait “long Kingdom bilong Papa bilong ol,” na bihain tasol long pait bilong Armagedon, ol bai amamas long stap olsem meri bilong Jisas long “taim bilong Pikinini Sipsip long marit.”—Rev. 19:6-9.

18, 19. Yumi kliagut long tok piksa bilong Jisas long wit na gras nogut, na olsem wanem dispela i helpim yumi olgeta wan wan?

¹⁸ Olsem wanem yumi olgeta wan wan i kisim helpim long gutpela save yumi kisim long rot bilong dispela tok piksa? Yumi kisim helpim long 3-pela rot. Namba 1: Em i helpim yumi long kliagut moa long ol bikpela samting. Dispela tok piksa i kamapim klia wanpela bikpela samting i stap olsem as na Jehova i larim pasin nogut i stap. “Em i no les kwik long ol sospen bilong kisim pe nogut,” nogat, em i larim ol i stap bilong redim “ol sospen bilong kisim marimari,” em ol Kristen husat i stap olsem wit.^[7][2] (Rom 9:22-24) Namba 2: Em i strongim bilip bilong yumi. Taim pinis i wok long kam klostu, ol birua bai mekim bikpela pait moa long daunim yumi, “tasol ol bai i no inap daunim” yumi. (Ritim Jeremaia 1:19.) Bipo Jehova i bin lukautim ol Kristen em ol i stap olsem wit, na olsem tasol, long nau tu Papa bilong yumi long heven i yusim Jisas na ol ensel long stap wantaim yumi long “olgeta de.”—Mat. 28:20.g

¹⁹ Namba 3: Tok piksa i helpim yumi long luksave long ol Kristen husat i stap olsem wit. Bilong wanem dispela em i bikpela samting tru? Taim yumi kisim save long husat ol Kristen i stap olsem wit, dispela bai helpim yumi long kisim bekim bilong askim em Jisas i bin mekim long bikpela tok profet bilong las de. Em i mekim dispela askim: “Husat tru em i gutpela wokboi i gat savetingting?” (Mat. 24:45) Tupela stadi i kamap bihain long dispela bai bekim gut dispela askim.