• “Harim! Mi Stap Wantaim Yupela Olgeta De”
    Wastaua—2013 | Julai 15

    • 13. Revelesen 18:7 i tok pamukmeri, olsem Bikpela Babilon, na Kristendom i bihainim wanem pasin long nau?

      13 Namba 3: Krai na sikirapim tit. Bihain long ol ensel i bungim ol gras nogut, wanem samting i kamap? Jisas i stori long ol samting bai painim ol Kristen husat i stap olsem gras nogut, na em i tok: “Long dispela hap ol bai krai na sikirapim tit bilong ol.” (Mat. 13:42) Yu ting dispela samting i wok long kamap long nau? Nogat. Long nau, lain Kristendom em hap bilong pamukmeri, em i tok long em yet olsem: “Mi stap kwin, mi no wanpela wido, na i no gat wanpela taim bai mi krai sori.” (Rev. 18:7) Lain Kristendom i pilim olsem em i gat bikpela strong na namba, olsem em i “stap kwin” winim olgeta arapela lida bilong lain politik. Long nau, ol Kristen husat i stap olsem ol gras nogut, ol i mekim pasin hambak na ol i no krai. Tasol klostu nau senis bai kamap.

      14. (a) Wanem taim bai ol giaman Kristen i “sikirapim tit bilong ol”? Bilong wanem? (b) Olsem wanem nupela save yumi kisim long Matyu 13:42 i stret wantaim tok i stap long Song 112:10? (Lukim blok “Ol Futnot.”)

      14 Long taim bilong traipela hevi tru, taim olgeta lotu giaman i bagarap pinis, ol lain bilong ol bai painim ples hait, tasol i no gat wanpela ples bai stap olsem ples hait bilong ol. (Luk 23:30; Rev. 6:15-17) Orait, taim ol i luksave olsem i no gat ples we ol i ken hait long en na abrusim bagarap, ol bai bel hevi na krai, na kros nogut tru na “sikirapim tit bilong ol.” Olsem Jisas i bin kamapim long tok profet bilong em long traipela hevi tru, long dispela taim bilong bikpela tudak ol “bai paitim bros bilong ol na krai sori.”—Mat. 24:30; Rev. 1:7.e

      15. Wanem samting bai painim ol gras nogut? Wanem taim bai dispela samting i kamap?

      15 Namba 4: Tromoi ol i go long bikpela paia. Wanem samting bai painim ol gras nogut em ol i pasim long ol bandel? Ol ensel bai “tromoi ol i go long bikpela paia.” (Mat. 13:42) Dispela i makim olsem ol bai bagarap na pinis olgeta. Olsem na ol manmeri husat i bihainim ol lotu giaman ol bai bagarap na pinis long laspela hap bilong traipela hevi tru, em Armagedon.—Mal. 4:1.

  • “Harim! Mi Stap Wantaim Yupela Olgeta De”
    Wastaua—2013 | Julai 15

    • e Paragraf 14: Dispela em nupela save yumi kisim long tok bilong Matyu 13:42. Bipo ol buk na nius bilong yumi i tok ol giaman Kristen i bin “krai na sikirapim tit bilong ol” inap planti yia pinis. Ol i krai na tok “ol pikinini bilong Kingdom” i bin tokaut klia long ol i wanem kain lain—ol i stap olsem “ol pikinini bilong Satan.” (Mat. 13:38) Tasol nau yumi mas tingim olsem pasin bilong sikirapim tit em samting ol man i save mekim taim bagarap i laik painim ol. Song 112:10 i tok: “Man nogut yet bai lukim na em bai belhat nogut tru. Em bai sikirapim tit bilong em na em bai pinis olgeta. Laik bilong ol man nogut bai pinis olgeta.”—New World Translation of the Holy Scriptures.