Strongim Bel!

“Yumi ken strongim bel . . . na yumi ken tok olsem, ‘Bikpela i save helpim mi na mi no inap pret.’ ”​—⁠HIBRU 13:⁠6.

MESAIA i kam i stap na em i skulim gut ol disaipel na kirapim wok bilong autim tok. Em taim bilong ol man i mas harim gutpela tok bilong Kingdom bilong God. Olsem na ol manmeri i bin lainim dispela gutpela tok i tru ol i strong long autim long ol narapela man.​—⁠Matyu 28:​19, 20.

² Kingdom i no kamap yet long dispela taim, tasol Jisas i bin tok profet olsem bihain em bai stap King bilong dispela Kingdom, na taim em i kamap King bai i gat bikpela pait na hangre na sik na guria, na bikpela wok long autim gutpela tok bilong dispela Kingdom long olgeta hap. (Matyu 24:​3-14; Luk 21:​10, 11) Yumi ol Witnes Bilong Jehova i mas strongim bel na bai yumi inap karim ol hevi bilong dispela taim na sanap strong taim ol man i mekim nogut long yumi. Olsem na yumi mas stori long ol Kristen bilong bipo ol i bin strongim bel na autim tok bilong Kingdom long ol man.

Strong Long Bihainim Krais

³ Krais Jisas i nambawan gutpela piksa bilong pasin bilong strongim bel. Pol i stori long bikpela lain witnes bilong Jehova i bin stap paslain long taim bilong Jisas, na nau em i tok: “Ol . . . i soim yumi pasin bilong bilip. Olsem na yumi mas lusim . . . olgeta sin i save pas long yumi. Na yumi mas strongim bel na ran strong long dispela resis . . . Yumi mas lukluk i go long Jisas, em i as bilong bilip bilong yumi . . . Jisas i save, sapos em i bihainim tru tok bilong God, orait bihain em bai i stap gut na amamas moa yet. . . . Em i stap strong, na em i karim pen na i dai . . . Jisas i no wari long sem em bai i kisim, na em i dai. . . . Ol man bilong sin bipo ol i birua nogut long Jisas. Tasol em i sanap strong moa. . . . Yupela i no ken les long sanap strong, na bel bilong yupela i no ken guria.”​—⁠Hibru 12:​1-3.

⁴ Taim Jisas i baptais pinis, em i stap 40 de long ples nating na em i tingting strong na beten na em i no kaikai, na nau em i sakim Satan. Satan i tokim em long tanim ston i kamap bret, tasol em i save i no stret long wokim mirakel bilong helpim em yet. Em i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God.” Satan i bringim em i go antap tru long haus lotu na tokim em long kalap i go daun, tasol Jisas i save i no stret sapos em i traim strong bilong God long helpim em na bai em i ken abrusim bagarap. Olsem na em i tok: “Buk bilong God i tok moa olsem, ‘Yu no ken traim strong bilong God.’ ” Nau Satan i laik bai Jisas i brukim skru na lotu long em na bai em i ken larim Jisas i bosim olgeta gavman bilong graun, tasol Jisas i laik i stap gut long God, na em i tok: “Satan, yu klia. Buk bilong God i tok, ‘Yu mas aninit long God, Bikpela bilong yu. Na yu mas lotu long em wanpela tasol.’ ” “Satan i traim Jisas long ol kain kain traim pinis, orait em i lusim Jisas na i wetim narapela taim.”​—⁠Matyu 4:​1-11; Luk 4:⁠13.

⁵ Jisas i stap aninit long Jehova, na em i sakim Satan. Na yumi tu ‘i stap aninit long God, na yumi sakim Satan, na em i lusim yumi.’ (Jems 4:⁠7) Olsem Jisas i bin mekim, yumi tu inap strongim bel na sakim ol traim sapos yumi bihainim ol tok bilong Baibel. Na yumi ken kolim ol skripsa tu long dispela taim. Sapos bel i pulim yumi long stil, ating yumi no inap mekim sapos planti taim yumi kolim lo bilong God i tok: “No ken stil.” Na ating pamuk i no inap pundaunim tupela Kristen sapos wanpela i strongim bel na i kolim lo bilong God i tok: “No ken mekim pasin pamuk.”​—⁠Rom 13:​8-10; Kisim Bek 20:​14, 15.

⁶ Ol man bilong dispela graun i no laikim yumi ol Kristen, na yumi inap sakim tingting na pasin nogut bilong ol. Jisas i tokim lain bilong em: “Long dispela graun, ol hevi bai i kamap long yupela, tasol bel bilong yupela i ken i stap strong. Mi winim pinis strong bilong dispela graun.” (Jon 16:33) Em i no larim pasin bilong graun i pulim em, olsem na em i “winim pinis strong bilong dispela graun.” Em i holimpas lo bilong God, na dispela pasin bilong em i ken strongim yumi long mekim olsem na i stap narapela kain long ol man bilong graun na no ken larim ol i bagarapim yumi.​—⁠Jon 17:⁠16.

Strong Long Autim Tok

⁷ Jisas na ol disaipel i tingim God bai strongim ol long autim tok maski ol man i mekim nogut long ol. Jisas i pinisim wok bilong em maski ol man i mekim nogut long em, na bihain long Pentikos bilong yia 33 lain bilong em i kisim hevi tu, tasol ol i autim yet tok bilong God, maski ol bikman bilong lotu i laik pasim ol. (Aposel 4:​18-20; 5:29) Ol i beten olsem: “ ‘Bikpela, yu mas tingting nau long olgeta tok ol i mekim bilong pretim mipela, na yu mas helpim mipela . . . na bai mipela i ken strong tru long autim tok bilong yu, na mipela i no ken pret.’ . . . Ol i beten pinis, . . . na Holi Spirit i pulap long ol, na ol i autim tok bilong God. Ol i tokaut strong na ol i no pret.”​—⁠Aposel 4:​24-31.

⁸ Long nau planti man i no laik harim tok bilong Kingdom, olsem na yumi mas strongim bel na bai yumi ken wok yet long autim tok long ol. Taim ol i mekim nogut long yumi ol wokman bilong Jehova, em i mas strongim bel bilong yumi na bai yumi ken autim gut tok bilong em long ol. (Aposel 2:40; 20:24) Strongpela man Pol i tokim yangpela poroman bilong em: “Spirit God i bin givim long yumi, . . . em i Spirit bilong givim strong long yumi . . . Olsem na yu no ken sem long autim tok . . . Yu mas kisim strong bilong God na karim hevi wantaim mi long wok bilong autim gutnius.” (2 Timoti 1:​7, 8) Sapos yumi beten askim God long strongim yumi long autim tok bilong Kingdom maski ol man i mekim nogut long yumi, yumi inap i stap amamas long dispela wok.​—⁠Matyu 5:​10-12.

Stap Strong Wantaim Jehova

⁹ Planti Juda na sampela man moa ol i strongim bel na lusim ol pasin i no stret na bai ol inap baptais na bihainim Krais. Bihain long Pentikos 33, “planti manmeri moa i kamap disaipel . . . na planti pris tu ol i bihainim tok bilong God na ol i bilip.” (Aposel 6:⁠7) Ol dispela Juda i strongim bel na ol i lusim olpela lotu na ol i bilip long Jisas, em Mesaia.

¹⁰ Kirap long yia 36 planti man bilong ol narapela lain nabaut ol i bilip, olsem Kornilius na lain bilong em, na sampela moa. Ol i bilip na ol i “kisim baptais long nem bilong Jisas Krais.” (Aposel 10:​1-48) Long Filipai, woda bilong kalabus na famili bilong em i kisim kwik lotu Kristen na ol i baptais. (Aposel 16:​25-34) Bilong mekim olsem ol i mas i gat strongpela bel, long wanem, ol man i birua long ol Kristen na ol i mekim nogut long ol. Long nau tu i wankain. Sapos yu no dediket yet long God na baptais na kamap Witnes Bilong Jehova, yu mas strongim bel na mekim, a? No ken lusim taim.

Mas Strong Sapos Famili i No Bilip

¹¹ Famili bilong Yunis na pikinini bilong em Timoti i no stap wanbel long lotu, na tupela i mas strongim bel long holimpas bilip. Man bilong Yunis em man haiden, tasol Yunis i lainim Timoti long Baibel taim em i liklik yet. (2 Timoti 3:​14-17) Taim Yunis i kamap Kristen em i “bilip tru long Krais.” (2 Timoti 1:⁠5) Em i skulim gut Timoti long tok i tru, na em i daun long man bilong em maski em i no bilip. Yunis i gat strongpela bilip na em i stap strong, olsem na em i kisim gutpela pe; taim Timoti i go bikpela, Pol i kisim em olsem poroman bilong mekim wok misineri. Sapos i gat sampela papa o mama Kristen i stap olsem Yunis, ol i ken tingim ol samting Yunis i bin mekim na dispela bai strongim bel bilong ol.

¹² Maski papamama bilong Timoti i no wanbel long lotu, em i kamap Kristen na i tingim ol samting bilong spirit. Pol i tokim ol brata long Filipai: “Sapos Bikpela Jisas i laik, . . . bai mi salim Timoti i kam long yupela. . . . I no gat narapela man i stap wantaim mi em i wankain olsem Timoti. Em i save wanbel wantaim mi na oltaim em i save tingting long painim rot bilong helpim yupela. Olgeta arapela man i save wari long ol samting bilong ol yet, na ol i no save laik tru long mekim wok bilong Jisas Krais . . . Tasol yupela i save long gutpela pasin bilong Timoti. Yupela i save, em i bin helpim mi long wok bilong gutnius, olsem pikinini i save helpim papa.” (Filipai 2:​19-22) Long nau i gat planti yangpela i strongim bel na kamap Kristen, maski em papa o mama i no bilip. Ol i bihainim pasin bilong Timoti, na yumi amamas long ol i insait wantaim yumi long oganaisesen bilong Jehova!

Strongim Bel na No Ken Pret

¹³ Akwila wantaim meri bilong em Prisila i gat strongpela bel na ol “i bin redi long i dai bilong helpim” wanlotu bilong tupela. Ol i kisim Pol i go long haus bilong ol, na ol i wok wantaim em long wokim ol haus sel, na long kamapim nupela kongrigesen long Korin. (Aposel 18:​1-4) Tripela i bin i stap pren inap 15 yia. Wanpela taim klostu tupela i kisim bagarap long helpim Pol. Taim tupela i bin stap long Rom, Pol i tokim ol Kristen: “Givim gude bilong mi long Prisila na Akwila, tupela wanwok bilong mi long wok bilong Krais Jisas. Tupela i bin redi long i dai bilong helpim mi. Olsem na i no mi tasol i tenkyu long tupela. Nogat. Olgeta [kongrigesen] . . . tu i tenkyu long tupela.”​—⁠Rom 16:​3, 4.

¹⁴ Pasin bilong Akwila na Prisila long helpim Pol maski bagarap i laik painim tupela, dispela i stret wantaim tok bilong Jisas, em i tok: “Nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela.” (Jon 13:34) Dispela “nupela” lo i winim olpela lo bilong Moses i tok, man i mas laikim ol narapela olsem em i laikim em yet. (Wok Pris 19:18) Nupela lo i tok, yumi mas daunim laik bilong yumi yet na bai yumi redi long i dai bilong helpim ol narapela, olsem Jisas yet i bin mekim. Tetulian bilong bipo i bin kolim tok bilong ol man ol i tok, ‘Ol Kristen i laikim tru ol narapela Kristen na ol i redi long i dai bilong helpim ol.’ (Apology, sapta 39, 7) Taim ol man i birua long yumi, em taim bilong strongim bel na sambai long ol brata, maski yumi inap bagarap, na dispela bai kamapim klia olsem yumi laikim tru ol.​—⁠1 Jon 3:⁠16.

Strongim Bel na Amamas

¹⁵ Pol tupela Sailas i strongim bel na karim ol hevi na ol i amamas. Ol majistret long Filipai i tokim ol man long paitim tupela long kanda na kalabusim ol. Tasol tupela i no pret. God i strongim bel bilong ol na ol i karim ol dispela hevi na ol i amamas long i stap gutpela Kristen.

¹⁶ Long nait Pol na Sailas i beten na singsing na litimapim nem bilong God, na wantu guria i meknaisim strong haus kalabus, na sen i lus long han bilong tupela, na ol dua i op, na woda i pret. Pol i autim tok long woda wantaim famili bilong em, na ol i kisim baptais na kam insait long lain bilong Jehova, na “ol i amamas tru, long wanem, nau ol i bilip long God.” (Aposel 16:​16-34) Pol na Sailas tu i amamas! Yumi tingim ol dispela wokman bilong Jehova i bin strongim bel, na yumi tingting long olsem wanem yumi tu i ken i stap strongpela wokman bilong Jehova.

Strongim Bel na Stap Olsem

¹⁷ Sapos yumi tingim Jehova, dispela bai strongim yumi. Devit i tok: “Yu mas bilip na wetim Bikpela i kam helpim yu. Sanap strong, yu no ken bel hevi.” (Song 27:14) Devit i tingim Jehova “i helpim bilong” em, olsem na em i “no ken guria long wanpela man.” Jehova bai “lukautim” em na em i “no ken pret long wanpela samting.” (Ves 1) Em i bin lukim God i mekim save long ol birua, na dispela i strongim bel bilong em. (Ves 2, 3) Em i amamas tu long lotu bilong Jehova. (Ves 4) Em i bilip tru olsem Jehova bai helpim na lukautim em. (Ves 5-10) Na em i skul long ol stretpela pasin na lo bilong Jehova. (Ves 11) Em i beten askim Jehova long helpim em na bai ol birua i no ken bagarapim em, na em i bilip na wetim Jehova, na dispela i helpim em long i stap strong. (Ves 12-14) Yumi tu i ken tingim ol dispela samting na kamap strong na “bilip na wetim Bikpela i kam helpim” yumi.

¹⁸ Na sapos yumi bung wantaim ol narapela i save lotu long Jehova, dispela bai helpim yumi long i stap strong. Taim Pol i laik go long Rom bilong lukim Sisar, sampela wanlotu i bungim em long Maket Bilong Apius na long Tripela Haus Pasindia, na “Pol i lukim ol, na em i tenkyu long God, na bel bilong en i kisim strong.” (Aposel 28:15) Taim yumi go long ol miting Kristen yumi bihainim tok bilong Pol olsem: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi . . . no ken lusim pasin bilong bung wantaim . . . Yumi wan wan i mas wok strong moa long strongim bel bilong ol arapela.” (Hibru 10:​24, 25) Bilong “strongim bel” bilong narapela, yumi mas kirapim em long tingim Jehova na ol gutpela samting bilong bihain. I gat planti samting yumi ken mekim bilong strongim ol narapela Kristen, na ol i ken strongim bel bilong yumi tu.

¹⁹ Bilong i stap strong, yumi mas stadi oltaim long Baibel na bihainim ol samting yumi lainim. (Lo 31:​9-12; Josua 1:⁠8) Yumi mas stadi oltaim long ol buk Kristen i gat tok bilong Baibel long en, na dispela tok bai givim strong bilong God long yumi na bai yumi ken sanap strong long bilip na winim ol traim. Yumi bin stori long ol wokman bilong Jehova ol i bin strongim bel na ol i no surik. Ating nau yumi no save dispela inap helpim yumi olsem wanem, tasol tok bilong Baibel i gat strong, na sapos yumi lain long en, em inap helpim yumi long olgeta taim. (Hibru 4:12) Sapos yumi pret long ol man na yumi surik long autim tok, yumi ken tingim Enok i bin strongim bel na bringim tok bilong God i go long ol man i givim baksait long God, na dispela bai strongim bel bilong yumi.​—⁠Jut 14, 15.

²⁰ Na yumi mas beten oltaim na bai yumi ken i stap strong olsem wokman bilong Jehova. (Rom 12:12) Jisas i sanap strong na karim ol hevi, long wanem, “em i beten strong long God, na em i singaut strong na i krai planti. Em i save daunim laik bilong em yet na i aninit long God, olsem na God i harim beten bilong em.” (Hibru 5:⁠7) Yumi mas i stap klostu long God long rot bilong beten na bai yumi no ken kisim bagarap wantaim ol man nogut long “namba 2 dai.” (KTH 21:⁠8) God bai lukautim ol wokman bilong em ol i gat strongpela bel na ol bai stap oltaim long nupela taim God bai kamapim.

²¹ Yumi ol Witnes Bilong Jehova i stap gut long em, yumi no ken pret long ol man o ol spirit nogut, long wanem, Jehova i save helpim na strongim yumi. Na yumi ken tingim Jisas tu em i bin strongim bel na em i winim strong bilong dispela graun. Na sapos yumi bung wantaim lain bilong Jehova long ol miting, dispela i save strongim yumi. Na ol save yumi kisim long Baibel na ol buk i gat tok bilong Baibel long en, dispela tu i strongim yumi. Na stori bilong Baibel long ol wokman bilong Jehova long bipo, dispela i strongim yumi long bihainim pasin bilong Jehova na no ken pret. Nau em taim nogut bilong laspela taim, na yumi mas taitim bun na givim bel long wok holi bilong Jehova. Yumi olgeta long lain bilong Jehova i mas strongim bel na sanap strong!

Bai Yu Bekim Olsem Wanem?

◻ Pasin bilong Jisas i strongim yumi olsem wanem?

◻ Wanem samting i strongim Jisas na ol disaipel long autim tok?

◻ Bilong wanem ol Juda na ol narapela i mas strongim bel na bai ol i ken i kam insait long lain bilong Jehova?

◻ Olsem wanem Yunis na Timoti i olsem gutpela piksa bilong pasin bilong strongim bel?

◻ Olsem wanem yumi save yumi inap amamas, maski ol man i mekim nogut long yumi?

[Askim Bilong Stadi]

 1. Ol manmeri long taim bilong ol aposel em ol i bin kisim save long tok i tru, ol i strongim bel na mekim wanem?

 2. Bilong wanem ol Witnes Bilong Jehova long nau i mas i gat strongpela bel?

 3. Husat i bin i stap nambawan gutpela piksa long pasin bilong strongim bel? Pol i tok wanem long dispela long Hibru 12:​1-3?

 4. Jisas i mekim wanem strongpela pasin long taim Satan i bin traim em?

 5. Wanem samting inap strongim yumi long sakim ol traim?

 6. Olsem wanem Jisas i winim strong bilong dispela graun?

7, 8. Wanem samting i ken helpim yumi long autim yet tok, maski ol man i mekim nogut long yumi?

9, 10. (a) Sampela Juda na ol narapela lain bilong bipo ol i mekim wanem na bai ol inap kisim baptais na kamap Kristen? (b) Bilong wanem ol i mas strongim bel na bai ol i ken kamap Kristen?

11. Stori bilong Yunis na Timoti i ken strongim yumi olsem wanem?

12. Timoti i kamap wanem kain man? Husat long nau i wankain olsem Timoti?

13. Akwila tupela Prisila i bin mekim wanem na yumi save ol i gat strongpela bel?

14. Wanem lo Akwila tupela Prisila i bihainim taim ol i redi long i dai bilong helpim Pol?

15, 16. Olsem Aposel 16 i tok, olsem wanem man i ken strongim bel na stap amamas?

17. Olsem Song 27 i tok, olsem wanem pasin bilong tingim Jehova i ken helpim yumi long strongim bel?

18. (a) Olsem wanem yumi ken save, sapos yumi bung wantaim narapela wanlotu, dispela i strongim yumi? (b) Olsem wanem miting i strongim yumi?

19. Olsem wanem Baibel wantaim ol buk Kristen i ken strongim yumi?

20. Bilong wanem beten em i bikpela samting?

21. Wanem ol samting i ken helpim ol Witnes Bilong Jehova long sanap strong?

[Piksa long pes 18]

Olsem Jisas, yumi tu inap sakim traim sapos yumi bihainim na kolim ol tok bilong Baibel