Skul Yumi Kisim Long Jisas

Ol Ensel na Ol Spirit Nogut i Mekim Wanem Long Yumi?

Jisas i stap wantaim Papa bilong em long heven “taim graun i no kamap yet.” (Jon 17:⁠5) Olsem na em i gat save long bekim ol dispela askim:

Yu ting ol ensel i save tingim yumi?

▪ Jisas i skulim yumi olsem ol ensel i save tingim tru ol man. Em i tok: “Amamas i save kamap namel long ol ensel bilong God taim wanpela man bilong mekim sin em i tanim bel.”​—⁠Luk 15:⁠10.

Jisas i kamapim olsem ol ensel i kisim wok bilong helpim ol wokman bilong God long pas gut wantaim God. Olsem na taim Jisas i givim tok lukaut long ol disaipel bilong em long pasin bilong pundaunim ol narapela, em i tok: “Yupela lukaut gut. Nogut yupela i ting wanpela namel long ol dispela liklik pikinini em i olsem samting nating. Nogat. Mi tokim yupela, long heven ol ensel bilong ol, oltaim ol i save stap long pes bilong Papa bilong mi em i stap long heven.” (Matyu 18:​10, 11) Dispela tok bilong Jisas i no makim olsem olgeta wan wan disaipel i gat wasangelo. Tasol Jisas i soim olsem ol ensel husat i wok gut wantaim God ol i save tingim tru olgeta wan wan insait long kongrigesen Kristen.

Satan inap bagarapim yumi olsem wanem?

▪ Jisas i givim tok lukaut long ol disaipel bilong em olsem Satan i traim long stopim ol man long kisim save long tok i tru bilong God. Jisas i tok: “Ol man i harim gutnius bilong kingdom bilong heven na i no save long as bilong en . . . Satan i save kam long ol na kwiktaim em i rausim dispela tok God i bin planim long bel bilong ol.”​—⁠Matyu 13:⁠19.

Jisas i tokaut long wanpela pasin bilong Satan long giamanim ol man taim em i kamapim tok piksa long man i tromoi pikinini wit long gaden bilong em. Dispela man i makim Jisas, na pikinini wit i makim ol Kristen God i makim long holi spirit na ol bai mekim wok king wantaim Jisas long heven. Tasol Jisas i tok wanpela birua i kam na “i tromoi ol pikinini bilong gras nogut namel long wit.” Gras nogut i makim ol Kristen giaman. “Dispela birua i tromoi pikinini bilong gras nogut, em Satan.” (Matyu 13:​25, 39) Wankain olsem gras nogut inap luk olsem wit, ol man i tok ol i Kristen inap luk olsem ol man i lotu tru long God. Ol lotu i skulim ol man long ol bilip giaman, ol i giamanim ol man na bai ol i sakim tok bilong God. Satan i mekim wok long ol lotu giaman na bai ol man i no ken pas gut wantaim Jehova.

Yumi inap mekim wanem na bai Satan i no ken bagarapim yumi?

▪ Jisas i kolim Satan olsem “hetman i save bosim dispela graun.” (Jon 14:30) Long wanpela beten Jisas i mekim long God, em i kamapim klia olsem wanem yumi ken lukautim yumi yet na bai Satan i no ken bagarapim yumi. Jisas i beten long Papa bilong em long heven bilong lukautim ol disaipel bilong em, olsem: “Yu ken lukautim ol, na man nogut i no ken bagarapim ol. Ol i no bilong dispela graun, olsem mi yet mi no bilong dispela graun. Tok bilong yu i tru olgeta, na mi laik bai yu mekim tok tru bilong yu i wok insait long bel bilong ol, na mekim ol i kamap ol lain bilong yu stret.” (Jon 17:​15-17) Taim yumi save gut long Tok Bilong God, dispela inap lukautim yumi na bai pasin bilong dispela graun em Satan i bosim i no ken pulim yumi.

Ol ensel i mekim wanem long yumi long nau?

▪ Jisas i tok: “Long las de bilong dispela graun . . . ol ensel bai i kam na kisim ol man nogut i stap namel long ol stretpela man.” (Matyu 13:49) Nau yumi stap long taim we “dispela graun i laik pinis,” na planti milion manmeri i harim na bilip long gutnius bilong Kingdom Bilong God.​—⁠Matyu 24:​3, 14.

Tasol i no olgeta man i kirap stadi long Baibel, God bai orait long ol, nogat. Ol ensel i stiaim wok bilong ol wokman bilong Jehova, na ol man i laikim tru God ol i stap narapela kain long ol man i no laik bihainim ol samting ol i lainim. Jisas i stori long ol man em God i orait long ol, na em i tok: “Ol i olsem ol man i harim tok na ol i holimpas. Bel bilong ol em i stretpela na i gutpela, na ol i save stap strong na ol i karim kaikai i stap.”​—⁠Luk 8:⁠15.

Bilong kisim sampela save moa, lukim sapta 10 bilong dispela buk em ol Witnes Bilong Jehova i wokim.Tru Tru Baibel i Tok Wanem?

[Piksa long pes 16]

Ol ensel i insait long wok bilong bringim ol man i gat gutpela bel i kam insait long kongrigesen Kristen