I Stap na Wok Bilong Jisas
Jisas i Givim Kaikai Long Planti Tausen Manmeri
TWELPELA aposel i bin raun autim tok long hap bilong Galili na ol i amamas tru long dispela wok ol i bin mekim. Nau, bihain liklik long taim Herot i kilim i dai Jon, ol i kam bek na tokim Jisas long ol gutpela samting i bin kamap. Jisas i save ol i bin mekim bikpela wok na skin bilong ol i les, na tu planti manmeri i wok long i kam i go na ol aposel i no gat taim bilong kaikai, olsem na Jisas i tokim ol: “Yumi tasol i go long wanpela hap i no gat man, na bai yupela i ken malolo liklik.”
Olsem na ol i kalap long bot long hap bilong Kaperneam bilong i go long wanpela hap i no gat man. Ol i go long hap bilong is long Jordan, lusim Betsaida i go moa. Planti manmeri i lukim ol i go na ol i bihainim nambis na ran i go pas.
Taim Jisas i go sua em i lukim bikpela lain manmeri i stap. Na em i sori tru long ol, long wanem, ol i olsem sipsip i no gat wasman. Olsem na em i mekim orait ol sikman bilong ol, na em i wok long lainim ol.
Sampela aua i go pinis na nau ol disaipel i kam long Jisas na tokim em: “Dispela hap i no gat man, na san i laik i go daun. Mobeta yu salim ol manmeri i go. Ol i ken i go long ol hap nabaut na long ol ples, na baim kaikai bilong ol.”
Tasol Jisas i tokim ol: “Yupela yet givim kaikai long ol.” Jisas i save pinis long ol samting em i laik mekim, na em i tokim Filip: “Bai yumi baim bret we bilong ol dispela manmeri i ken kaikai?” Em i tok olsem bilong traim Filip.
Filip i no save bai ol i mekim wanem, long wanem i gat 5,000 man, na sapos ol i kaunim ol meri pikinini, ating inap olsem 10,000 manmeri olgeta ol i sindaun i stap! Filip i bekim tok, olsem: “Sapos yumi baim bret inap long 200 kina, em bai i no inap long olgeta wan wan man na meri i ken kisim hap liklik kaikai tru.”
Ating Andru tu i pilim olsem ol i no inap givim kaikai long dispela bikpela lain manmeri, na em i tok: “Wanpela manki i stap hia, em i gat 5-pela bret ol i wokim long bali na tupela pis. Tasol bikpela lain manmeri tru i stap. Dispela bret na pis bai i helpim yumi olsem wanem?”
Em taim bilong san, paslain liklik long Pasova long yia 32, olsem na planti gras i stap long dispela hap. Jisas i tokim ol disaipel bilong em long tokim ol manmeri long bung long ol liklik lain olsem 50 50 na 100 100, na sindaun long gras. Na em i kisim 5-pela bret na tupela pis, na em i lukluk i go long heven na i tok tenkyu long God. Na em i brukim bret wantaim pis na i givim long ol disaipel bilong tilim long ol manmeri. Olgeta i kaikai na ol inap pinis.
Bihain Jisas i tokim ol disaipel bilong em: “Yupela bungim olgeta hap kaikai i stap yet. Nogut sampela i lus nating.” Taim ol i bungim ol liklik hap kaikai, ol i pulimapim long 12-pela basket! Matyu 14:13-21; Mak 6:30-44; Luk 9:10-17; Jon 6:1-13.
◆ Bilong wanem Jisas i laik kisim ol aposel i go long wanpela ples i no gat man?
◆ Jisas i kisim ol disaipel i go we? Bilong wanem ol i no inap malolo?
◆ San i laik i go daun, na ol i tokim Jisas long mekim wanem? Tasol Jisas i mekim wanem bilong helpim ol manmeri?