Nambawan Gutpela Man i Kamap Long Graun na Bihain Bai Gutaim i Kamap Long Olgeta Hap
“Wanpela meri i karim pikinini em bilong yumi, ol i givim wanpela pikinini man long yumi; em bai holim wok gavman. Na ol bai kolim nem bilong em Gutpela Tisa, Strongpela God, Papa Bilong Oltaim, King Bilong Gutaim.”—AISAIA 9:6 NW.
1. Husat i mas bosim graun na bai gutaim inap kamap long olgeta hap? Olsem wanem yumi save em bai kamapim tru gutaim?
GUTAIM i kamap long olgeta hap bilong graun! Taim “hetman bilong dispela graun,” em Seten, i stap bos yet, dispela samting i no inap kamap. (Jon 12:31) Tasol taim “King Bilong Gutaim,” em Krais Jisas, i bosim graun, bai olgeta man long olgeta hap i gat gutpela sindaun na i stap bel isi. Gutaim tru bai kamap long olgeta hap bilong graun. Jehova i tok promis olsem taim em i mekim tok profet long dispela “King Bilong Gutaim” long ol wok em bai mekim. Aisaia 9:6,7 (NW ) i tok: “Wanpela meri i karim pikinini em bilong yumi, ol i givim wanpela pikinini man long yumi; em bai holim wok gavman. Na ol bai kolim nem bilong em Gutpela Tisa, Strongpela God, Papa Bilong Oltaim, King Bilong Gutaim. Wok king bilong em bai go bikpela, na gutaim i no ken pinis long sia king bilong Devit na long kingdom bilong em; na long stretpela lo na long stretpela pasin em i ken strongim na helpim dispela kingdom, kirap long nau na inap long taim bihain bihain. Strong bilong Jehova bilong ol ami bai mekim dispela samting.”
2. (a) Wanem ol samting i bin kamap na God i kirap mekim tok profet i stap long Aisaia 9:6, 7? (b) Olsem wanem yumi save Jehova bai truim tok promis em i bin mekim long Devit long kamapim wanpela man long lain bilong Devit bilong i stap king oltaim?
2 Em gutpela tok profet tru! Gutpela sapos yumi skelim dispela tok profet i stori long mama i karim nambawan gutpela man i bin kamap long graun. Tasol pastaim yumi mas save long ol samting i bin kamap na God i kirap mekim dispela tok profet. Long dispela taim bipo, Ehas i stap king bilong lain Juda na planti lain i birua long em. Ehas i no stap gut long Jehova, tasol Jehova i larim em i sindaun long sia king bilong Em, long wanem Jehova i bin mekim wanpela tok promis long tumbuna bilong Ehas, em Devit. Jehova i tok promis olsem: Em bai putim wanpela king long lain bilong Devit bilong i stap king oltaim. Jehova i no orait long Devit i wokim haus lotu bilong Em, tasol Em i givim narapela blesing long Devit. Long maus bilong profet Netan, Jehova i tok promis long Devit, olsem: “Bai mi larim lain bilong yu i stap, na ol i ken kamapim ol tumbuna pikinini bilong yu. Lain bilong yu bai i no inap pinis. Na bai mi mekim ol man long lain bilong yu i kamap king oltaim.” (2 Samuel 7:11, 16) King Devit i amamas tru long dispela tok promis bilong God, olsem na em i wetim dispela gutpela samting i kamap tru olsem God i tok promis pinis long en.
3. (a) Husat dispela man i kamap long lain bilong Devit na em i bilong i stap king oltaim? Olsem wanem dispela kontrak i narapela kain? (b) Seten i laik mekim wanem long kontrak o tok promis bilong Kingdom?
3 Krais Jisas em i dispela man bilong lain bilong Devit em i bilong i stap king oltaim; em i “King Bilong Gutaim.” Ol king i kamap long lain bilong Devit, ol tasol i kisim kontrak bilong wanpela kingdom em bai stap oltaim na kamapim gutaim bilong i stap oltaim. Tasol dispela kontrak i makim olsem dispela Kingdom bai daunim olgeta kingdom bilong dispela graun ol i stap aninit long hetman bilong ol, Seten. Olsem na Seten wantaim ol narapela spirit nogut i laik bagarapim lain bilong Devit bambai i no gat wanpela man bilong dispela lain em inap i stap king oltaim. King Resin bilong Siria na King Pika bilong ol 10-pela lain bilong Isrel na king bilong Asiria ol i kamap olsem gutpela tul bilong Seten bilong mekim dispela wok.
Ol i Birua long Kontrak Bilong Kingdom
4. Seten i mekim wanem bambai tok promis bilong Kingdom, em God i givim long Devit, em i no ken kamap tru?
4 Seten i tingting long mekim wanem? Em i laik mekim pretim King Ehas bilong Juda bambai em i pren wantaim king bilong Asiria. Seten i mekim olsem wanem? Em i kirapim King Pika bilong Isrel na King Resin bilong Siria na dispela tupela king i pasim tok long mekim pasin birua long lain bilong Devit. Ol i pasim tok long rausim Ehas long wok king na putim wanpela king ol yet i laikim. Ol i laik putim pikinini man bilong Tabel i stap king. Husat dispela pikinini man bilong Tabel? Em i no bilong lain bilong Devit. Olsem na tok promis bilong God long Kingdom em i no inap kamap tru long rot bilong dispela man. “King Bilong Gutaim” i no ken kamap long lain bilong dispela man. God i no putim dispela man i stap king long Juda; ol man yet i laik putim em i stap king. Olsem na Baibel i kamapim long ples klia wok Seten i mekim bilong pasim wok bilong kontrak bilong Kingdom em God i bin mekim wantaim Devit.
5, 6. Taim sampela lain i pasim tok long mekim pasin birua long lain bilong Devit, King Ehas i mekim wanem? Tasol Jehova i givim wanem tok long em bilong strongim bel bilong em?
5 Taim dispela hevi i kamap, King Ehas i mekim wanem? Em wantaim lain bilong em ol i pret nogut tru. Olsem na Jehova i givim sampela tok long Ehas bilong strongim bel bilong em na pasim em long i go askim king bilong Asiria long helpim em. Jehova i salim profet Aisaia i go bungim Ehas na Aisaia i mekim ol tok i stap long Aisaia 7:4-9 (NW ). Aisaia i tok:
6 “Yu no ken pret ․․․ long Siria wantaim Efrem [em nambawan lain bilong ol 10-pela lain bilong Isrel ] na pikinini man bilong Remalaia [em Pika] i laik mekim nogut long yu, na ol i tok: ‘Kaman, yumi go pait long Juda na brukim olgeta na yumi yet yumi kisim; na yumi mas putim narapela man i stap king long Juda, em pikinini man bilong Tabel.’ Nambawan Bikpela King Jehova i tok olsem: ‘Dispela samting i no ken kamap; nogat tru. ․․․ Tasol sapos yupela i no bilip, bai yupela i no inap i stap longtaim.’”
Samting i Makim Olsem Wok Bilong Ol Birua Bai Lus
7.(a) Wanem samting i kamap na bihain Jehova i mekim tok profet i stap long Aisaia 7:14? (b) Taim mama i karim Emanyuel, dispela i makim wanem samting? Ol pikinini man bilong Aisaia i mas kamap wanem samting?
7 Em nau, Jehova i tok promis olsem em bai rausim ol dispela birua. Na long dispela taim God i kirap mekim wanpela tok profet em i bikpela samting bilong olgeta lain manmeri, long wanem dispela tok profet i makim dispela Man em i bilong kisim ol samting bilong kontrak bilong Kingdom na kamap king olsem God i tok promis pinis long Devit. Tasol wanem samting i kamap pastaim na bihain God i kirap mekim dispela tok profet? Jehova i toktok wantaim King Ehas. Em i laik bai Ehas i kolim wanpela strongpela wok mirakel Jehova i mas wokim bilong makim olsem em bai pinisim tru wok birua ol man i mekim long lain bilong Devit. Tasol Ehas i no laik kolim wanpela samting Jehova i ken mekim olsem mak. Orait, wanem samting i kamap? Aisaia 7:14 (NW ) i tok: “Orait, bai Jehova yet i givim wanpela mak long yupela ol man: Harim! Wanpela yangpela meri em bai i gat bel na i karim pikinini man. Na bai em i kolim nem bilong em Emanyuel.” As bilong dispela nem i olsem: “God I Stap Wantaim Yumi.” Emanyuel na tupela narapela pikinini man bilong Aisaia i mas kamap olsem mak, olsem na long Aisaia 8:18 (NW ) Aisaia i tok: “Yu lukim mi, mi stap. Na ol pikinini God i bin givim long mi, ol tu i stap wantaim mi. Ol i olsem mak o mirakel Jehova bilong ol ami i mekim i kamap long Isrel.” Olsem na taim mama i karim Emanyuel, dispela i makim olsem olgeta birua na olgeta wok birua ol i mekim long kontrak bilong Kingdom na long King bilong en bai lus tru!
8. (a) Aisaia 7:15, 16 i tok wanem samting i mas kamap taim Emanyuel i stap manki yet? Na wanem samting i bin kamap? (b) Ating i gat wanem as na yumi no save gut long Emanyuel em i bin kamap long taim bilong Aisaia?
8 Baibel i no kolim nem bilong mama bilong Emanyuel. Ating em wanpela yangpela meri Juda em i bin kamap namba tu meri bilong profet Aisaia. Tasol dispela tok profet i tok moa olsem: Taim dispela manki i liklik yet na em i no save yet wanem samting i gutpela na wanem samting i nogut, dispela tupela king i bin birua long lain bilong Devit bai ol i bagarap. (Aisaia 7:15, 16) Na ol samting i kamap olsem tasol. Yumi no save gut husat dispela Emanyuel i kamap long taim bilong Aisaia, na ating dispela em bilong helpim ol lain i kamap bihain bambai ol i ken tingim gut Emanyuel Tru em i mas kamap olsem wanpela mak o mirakel i kam long heven.
9. (a) Taim mak i kamap long bipo na wok birua ol man i mekim long kontrak bilong Kingdom i lus, dispela i makim wanem samting? (b) Wanem dispela bikpela wok birua i kamap long nau?
9 Long taim bilong Ehas, liklik hap truim tasol bilong dispela tok profet i kamap. Tasol dispela i makim olsem bihain bai God i mekim tru dispela samting. Bai em i pinisim olgeta wok birua ol man i mekim long kontrak bilong Kingdom na long King bilong dispela Kingdom. Long nau bikpela wok birua tru i kamap, winim olgeta taim bipo. Long nau ol lain long olgeta hap bilong graun ol i sakim dispela samting Jehova i putim bilong kamapim gutaim i no ken pinis, na ol i birua long lain bilong “King Bilong Gutaim.” Ol i birua tru long Man bilong kisim ol samting bilong kontrak bilong Kingdom, em “King Bilong Gutaim.” Tasol olsem wanem long bikpela hap truim bilong tok profet bilong Aisaia long nau? Taim yumi lukim mak i kamap pinis, orait yumi ken save, dispela wok birua ol man i mekim, em bai lus tru.
Mama i Karim “King Bilong Gutaim”
10. (a) Long bikpela truim bilong tok profet bilong Aisaia 7:14, husat i karim dispela pikinini i kamap olsem mak na Man bilong kisim ol samting bilong kontrak bilong Kingdom? (b) Matyu i tok wanem long Emanyuel na long dispela pikinini i kamap long lain bilong Devit?
10 Long bikpela truim bilong dispela tok profet, Maria em i dispela meri i karim pikinini em i kamap olsem mak na Man bilong kisim ol samting bilong kontrak bilong Kingdom. Maria em i wanpela yangpela meri Juda i no bin slip wantaim man na em i bilong lain bilong Devit. Ensel Gebriel i tokim Maria, em bai kisim bel na em bai karim wanpela pikinini man. Na ol i mas kolim nem bilong em, Jisas. Ensel i tok, God Jehova bai “putim em i stap king olsem tumbuna bilong em Devit,” na “kingdom bilong en bai i no pinis.” (Luk 1:26-33) Matyu i tok, dispela pikinini i kamap long lain bilong Devit, em i dispela pikinini i kamap olsem mak, em Emanyuel. Long Matyu 1:20-23 Matyu i tok: “Long driman wanpela ensel bilong Bikpela i kamap long [Josep]. Ensel i tok, ‘Josep, pikinini bilong Devit, yu no ken pret long kisim meri bilong yu Maria. Harim. Dispela pikinini em i kisim pinis long bel bilong en, em Holi Spirit i bin givim long em. Bai em i karim pikinini man, na yu mas kolim nem bilong en Jisas. Long wanem em bai i tekewe sin bilong ol manmeri bilong en na kisim bek ol.’ Dispela olgeta samting i kamap olsem bilong inapim wanpela tok Bikpela i bin mekim long maus bilong profet. Profet i tok olsem: ‘Harim, wanpela meri i no bin slip wantaim man, em bambai i gat bel na i karim pikinini man. Na bai ol i kolim nem bilong en Emanyuel.’ As bilong dispela nem i olsem: God I Stap Wantaim Yumi.”
11. Wanem taim meri i karim Emanyuel? Na em i karim we?
11 Wanem taim meri i karim Emanyuel? Na em i karim we? Tok bilong Maika 5:2 i helpim olgeta Juda long save long dispela samting. Matyu 2:6 i kolim dispela tok bilong Maika olsem: “Yu Betlehem, long graun bilong Juda, yu no kam bihain tumas long ol bikpela man i bosim Juda. Nogat tru. Long yu bai wanpela bikpela man i kamap, na em bai i stap wasman bilong lain bilong mi, Isrel.” Long yia 2 B.C.E., long taun Betlehem, meri i karim “King Bilong Gutaim,” na ol samting i kirap long kamap olsem Aisaia 9:6, 7 i bin tok profet long en.
12, 13. Taim “King Bilong Gutaim” i kamap long graun, dispela i litimapim tru nem bilong husat? Wanem ol gutpela samting i bin kamap long dispela taim?
12 Sapos yumi inap kamap papa o mama bilong dispela man em i mas kamap “King Bilong Gutaim,” bai yumi pilim olsem dispela em i gutpela samting tru na bai yumi amamas tru, a? Olsem na taim dispela King i kamap long graun, dispela i litimapim tru nem bilong Papa bilong em. Taim mama i karim em, ol gutpela gutpela samting i kamap na i olsem bikpela lait i kamap; no gat narapela man, em kain gutpela samting olsem i bin kamap taim mama i karim em.
13 Ensel bilong Jehova em i kam long sampela wasman bilong sipsip ol i stap ausait long taun Betlehem na ol i was long sipsip bilong ol long nait, na Jehova “i mekim bikpela lait bilong en i kamap raun long ol.” Ensel i tok: “Long dispela de long taun bilong Devit, wanpela meri i karim pikinini. Em i man bilong kisim bek yupela. Em i Krais. Em i Bikpela.” Em gutpela samting tru, tasol nau narapela gutpela samting i kamap. Wantu tasol planti ensel moa i kamap i stap wantaim dispela ensel. Ol i litimapim nem bilong Papa bilong dispela pikinini nau tasol mama i karim em na ol i tok: “Litimapim nem bilong God long antap tru! Na long graun ol manmeri i ken bel isi. God i belgut long ol.” I stret ol ensel i mas tokaut long dispela “King Bilong Gutaim” i kamap pinis long graun, na olgeta man em God i belgut long ol, ol i ken i stap bel isi.—Luk 2:8-14.
14, 15. (a) Wanem ol samting i bin kamap na ol ensel i litimapim nem bilong Jehova? (b) Taim “King Bilong Gutaim” i kamap long graun, olsem wanem dispela i gutpela samting tru?
14 Bipo tru, taim dispela “King Bilong Gutaim” i no kamap yet long graun, wanpela bikpela samting i bin kamap na ol ensel long heven i litimapim nem bilong God. Dispela samting i kamap taim God i wokim dispela graun. (Jop 38:4) Ating yu bin lukim piksa bilong dispela graun, em ol man i raun long roket long ples antap ol i bin kisim? Sapos olsem, yu lukim dispela graun olsem ol ensel tasol i bin lukim bipo. Ol ensel i lukim God i wokim graun na ol i mekim wanem? Jop 38:7 (NW ) i tok: “Long dispela taim ol sta bilong moningtaim i bin amamas na singaut wantaim, na olgeta pikinini bilong God ol i kirap singaut na amamas.”
15 Taim mama i karim dispela man em bai kamap “King Bilong Gutaim,” dispela tu i bikpela samting, olsem na ol ensel i singaut wantaim na mekim singsing bilong litimapim nem bilong God. Taim meri bilong wanpela man long graun i karim namba wan pikinini man bilong em, lain bilong papa ol i save amamas. Na olsem tasol lain bilong God long heven ol i amamas taim dispela Papa long heven i kamapim dispela pikinini long graun. Em namba wan taim God i bin kamapim pikinini long kain rot olsem, na gutpela singsing bilong ol pikinini bilong em long heven i amamasim em! Taim “King Bilong Gutaim” i kamap long graun em gutpela samting tru. No gat wanpela man i winim em; em i nambawan gutpela man.
“Bikpela Lait” i Kamap
16. Wanem taim i gat narapela truim bilong Aisaia sapta 9? Dispela truim i kamap olsem wanem?
16 Taim Jisas i kirap long autim tok na helpim ol manmeri, nau narapela truim bilong Aisaia sapta 9 i kamap. Ves 1 na 2 (NW ) bilong sapta 9 i stori long “bikpela lait” i mas kamap long ol manmeri i “wokabaut long tudak.” Long Matyu sapta 4 ves 13 i go inap 17, Matyu i stori long truim bilong dispela tok bilong Aisaia. Matyu i tok: “Na [Jisas] i lukim Nasaret na i go sindaun long Kapaneam. Kapaneam em i stap arere long raunwara, long hap bilong Sebyulan na Naptalai. Olsem na em inapim wanpela tok God i bin mekim long maus bilong profet Aisaia, taim em i tok, ‘Hap bilong Sebyulan, na hap bilong Naptalai, long rot i go long raunwara, long Jodan long hap i go, Galili bilong ol arapela lain man. Ol manmeri i sindaun long tudak, ol i lukim pinis bikpela lait! Ol manmeri i sindaun long ples tudak tumas, lait i kamap pinis long ol!’ Long dispela taim Jisas i stat long telimautim tok. Em i tok, ‘Yupela tanim bel! Kingdom bilong heven i klostu pinis.’”
17. Jisas i mekim wanem na i olsem lait i kamap long ol lain bilong Sebyulan na Naptalai? Ol manmeri i sindaun long tudak, dispela lait i helpim ol olsem wanem?
17 Hap bilong Sebyulan na Naptalai i stap long hap bilong not tru long Isrel, na distrik Galili i insait long dispela hap. Naptalai i stap arere long Raunwara Galili long hap bilong san i go daun. Olsem na taim Jisas wantaim ol disaipel bilong em i kirap autim gutpela tok bilong Kingdom bilong God long ol dispela hap, i olsem lait i kamap long ol dispela manmeri, em longtaim pinis ol i sindaun long tudak. Long Jon 8:12, Jisas i tok: “Mi lait bilong graun. Man i bihainim mi, bai em i no wokabaut long tudak. Nogat. Em bai i gat lait bilong laip.” Olsem na long rot bilong Jisas, “ol manmeri i sindaun long ples tudak tumas” ol inap kisim “lait bilong laip,” long wanem Jisas i givim laip bilong em “bilong baim bek planti manmeri.” Jehova i salim em bilong givim save o lait long ol man long rot bilong kisim laip.—Matyu 4:23; 20:28.
18. (a) Olsem wanem na dispela “bikpela lait” i no bilong helpim ol lain bilong Galili tasol? (b) Tok i kamap bihain long dispela bai stori long wanem samting?
18 Dispela “bikpela lait” em inap baim bek ol man long i dai na hevi, em i no bilong helpim ol lain bilong Galili tasol. Nogat. Aisaia i tok profet pinis olsem “King Bilong Gutaim” bai mekim bikpela wok tru, a? Na gutpela wok bilong gavman bilong em bai i go bikpela na i no ken pinis, a? Tru tumas. Aisaia 9:6, 7 (NW ) i tok: “Na ol bai kolim nem bilong em Gutpela Tisa, Strongpela God, Papa Bilong Oltaim, King Bilong Gutaim. Wok king bilong em bai i go bikpela, na gutaim i no ken pinis.” Long tok i kamap bihain long dispela bai yumi stori long ol wok Krais Jisas i mekim olsem “Gutpela Tisa, Strongpela God, Papa Bilong Oltaim,” na “King Bilong Gutaim.”
Yu Tingim?
◻ Wanem wok birua i kamap long taim bilong King Ehas?
◻ Wanem samting i kamap na i olsem liklik hap truim bilong mak Aisaia 7:14 i kolim?
◻ Wanem samting i kamap na i olsem bikpela truim bilong dispela mak?
◻ Taim mama i karim “King Bilong Gutaim,” bilong wanem dispela i gutpela samting tru?