Samting i Bikpela Moa Winim Ol Mak Long Skai

KLOSTU olgeta wan wan ples i gat ol savetok bilong ol yet long ol samting bilong win na ren samting, olsem: Sapos skai i retpela long apinun, ol boskru bilong sip i ken amamas; sapos skai i retpela long moning ol boskru i mas was gut. Ol saveman long nau i kamapim as na ol samting inap kamap olsem dispela savetok i tok.

Long taim bilong Jisas tu ol man i save lukim ol mak long skai na skelim, em bai gutpela taim o taim nogut. Jisas i tokim sampela Juda: “Long apinun yupela i save tok, ‘Skai i retpela. Bai gutpela taim nau.’ Na long moningtaim yupela i save tok, ‘Klaut i blak na skai i retpela. Olsem na nau bai i gat win na ren.’ Yes, yupela i save lukim ol mak bilong skai na skelim gut.” Tasol Jisas i tok moa: “Yupela i no save lukim na skelim ol mak bilong dispela taim nau.”​—⁠Matyu 16:​2, 3.

Wanem ol dispela “mak bilong dispela taim nau”? Em ol samting i soim olsem Jisas em dispela Mesaia tru God i bin salim i kam. Ol samting em i mekim i kamapim klia tru em i husat, wankain olsem retpela kala bilong skai i makim em bai wanem kain taim. Tasol klostu olgeta Juda i no tingim ol mak i soim olsem Mesaia i kam pinis​—⁠em samting i bikpela moa winim ol mak ol i lukim long skai.

Long nau tu, i gat wanpela mak em yumi mas skelim na save gut long mining bilong en, na dispela i bikpela moa winim pasin bilong skelim kala bilong skai. Jisas i tok profet olsem ol pasin nogut bilong dispela graun bai pinis na wanpela gutpela taim bai kamap. Em i stori long sampela samting bai kamap em olgeta wantaim bai soim olsem dispela senis i kam klostu pinis. Sampela bilong ol dispela samting em ol bikpela pait na bikpela hangre. Jisas i tok taim yupela i lukim ol dispela samting i kamap, orait taim bilong God long pinisim olgeta pasin nogut bilong dispela graun em i kam klostu pinis.​—⁠Matyu 24:​3-​21.

Olsem wanem? Yu luksave long “ol mak bilong dispela taim nau”?