Senis Bilong Ol Aposel
Stori: Em wanpela bilip olsem 12-pela aposel i gat ol senis senis bilong ol na God i bin givim namba long ol. Misin Katolik i tok, lain bisop bilong ol i senis bilong ol 12-pela aposel, na pop em i senis bilong Pita. Ol i ting Krais i makim Pita i stap nambawan bilong sios olgeta na ol pop bilong Rom i senis bilong em. I no wanpela tok bilong Baibel.
Pita em i “ston” na sios i stap antap long en o nogat?
Mt 16:18: “Mi tokim yu olsem. Yu Pita, na bai mi wokim sios bilong mi antap long dispela ston. Na bai strong bilong Dai i no inap daunim dispela sios.” (Lukim ol ves klostu [Mt 16:13, 20]—ol dispela ves i tokaut long Jisas em i husat.)
Aposel Pita na Pol i ting dispela “ston” i makim husat?
Ap 4:8-11: “Holi Spirit i pulap long Pita, na em i tokim ol olsem, ‘. . . Yupela i bin nilim Jisas long diwai [pos], tasol God i kirapim em bek long matmat. Jisas em i “dispela ston yupela ol kamda i bin ting em i nogut na yupela i bin rausim. Tasol nau em i kamap nambawan ston bilong strongim banis bilong haus.” ’ ”
1 Pi 2:4-8: “[Krais Jisas] i olsem wanpela ston i gat laip, na yupela . . . tu i olsem ol ston i gat laip, na . . . God i laik mekim yupela i kamap haus bilong em yet. . . . Buk bilong God [i tok], ‘Harim. Mi makim pinis wanpela ston bilong kamap namba wan ston bilong strongim haus. . . . Ol man i bilip long em, ol bai i no inap kisim sem.’ Olsem na long yupela ol man i bilip, Krais em i olsem gutpela ston tru. Tasol long ol man i no bilip, ‘Dispela ston . . . i kamap olsem ston i stap long rot bilong ol, na planti bilong ol bai i sutim lek na pundaun na bagarap.’ ”
Ef 2:20: “Yupela i olsem haus God i wokim. Em i bin planim mipela aposel wantaim ol profet olsem pos bilong dispela haus. Na Krais Jisas em i namba wan pos tru.”
Ogastin (wanpela santu bilong Misin Katolik) em i gat wanem bilip?
Em i tok: “Mi stap pris na mi tu mi raitim wanpela buk . . . [na] mi tok long Aposel Pita olsem: ‘Sios i stap antap long em olsem antap long wanpela ston.’ . . . Tasol bihain, planti taim mi stori long tok bilong Bikpela, ‘Yu Pita, na bai mi wokim sios bilong mi antap long dispela ston,’ na mi tok, yumi mas save Em yet i dispela ston, na Pita i bin tokaut long em olsem, ‘Yu [Krais]. Yu Pikinini Bilong God i gat laip.’ Nem Pita i klostu wankain olsem dispela tok ‘ston’ na Pita i stap olsem maus bilong Sios i stap antap long dispela ston, na em i kisim ‘ol ki bilong kingdom bilong heven.’ Long wanem, Krais i tok, ‘Yu Pita’; em i no tok, ‘Yu dispela ston.’ Tasol ‘dispela ston em Krais,’ na Saimon, em i gat narapela nem Pita, wantaim Sios olgeta i tokaut olsem.”—Buk The Fathers of the Church—Saint Augustine, the Retractations, Buk 1, p. 90.
Ol narapela aposel i ting Pita em i namba wan bilong ol o olsem wanem?
Lu 22:24-26: “Ol [aposel] i stat long pait long toktok long husat em i namba wan bilong ol. Na Jisas i tokim ol olsem, ‘Ol king bilong ol arapela lain manmeri ol i gat namba na ol i bosim ol . . . Tasol yupela i no ken mekim olsem.’ ” (Sapos Pita em i dispela “ston” ol i no ken pait long toktok long husat “em i namba wan bilong ol,” a?)
Krais em i het bilong lain Kristen na em i stap laip, olsem na i no gat senis bilong em, a?
Hi 7:23-25: “Bipo planti man i save kamap pris [long Israel], long wanem, ol i save dai na ol i no inap i stap pris oltaim. Tasol Jisas i stap oltaim oltaim. Em i holim wok pris oltaim, na i no gat senis bilong en. Olsem na oltaim em inap tru long kisim bek ol manmeri i kam klostu long God long nem bilong em.”
Ro 6:9: “Yumi save, Krais i kirap bek pinis long matmat, olsem na bai em i no ken i dai moa.”
Ef 5:23: “Krais em i het bilong sios.”
Krais i givim wanem “ol ki” long Pita?
Mt 16:19: “Bai mi givim ol ki bilong kingdom bilong heven long yu. Samting yu pasim long graun, em bai God i pasim long heven tu. Na samting yu lusim long graun, em bai God i lusim long heven.”
Long Kamapim Tok Hait, Jisas i tok long wanpela “ki” em yet i mekim wok long en bilong opim rot long ol man i ken kisim sampela gutpela wok
KTH 3:7, 8: “Mi holi tru, na mi as bilong pasin i tru. Mi holim ki bilong Devit, na samting mi opim, i no inap wanpela man i pasim. Na samting mi pasim, i no inap wanpela man i opim. . . . Long pes bilong yu, mi putim dua i op i stap, na i no gat wanpela man inap long pasim.”
Pita i mekim wok long “ol ki” bilong opim rot (long ol Juda na Samaria na ol narapela lain) bambai ol inap kisim spirit bilong God na go i stap long Kingdom bilong heven
Ap 2:14-39: “Pita i sanap wantaim ol 11-pela arapela aposel na em . . . i tokaut long ol manmeri olsem, ‘Yupela Juda na yupela olgeta man i kam i stap long Jerusalem, yupela . . . olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela. Yupela i mekim olsem, na bai God i givim Holi Spirit long yupela. Bipo God i promis long givim Holi Spirit long yupela, na long ol pikinini bilong yupela, na long olgeta manmeri i stap longwe. God, Bikpela bilong yumi, em i bin promis long givim Holi Spirit long olgeta manmeri em i singautim.’ ”
Ap 8:14-17: “Ol aposel i stap long Jerusalem ol i harim tok long ol Samaria i bin kisim tok bilong God. Olsem na ol i salim Pita wantaim Jon i go long ol. Tupela i go kamap, orait tupela i beten bai God i givim Holi Spirit long ol dispela Samaria, long wanem, Holi Spirit i no bin kam yet long ol. Ol i kisim baptais tasol long nem bilong Jisas. Tupela i beten pinis, orait tupela i putim han antap long ol, na ol i kisim Holi Spirit.” (Ac 8 Ves 20 i makim olsem Pita i man bilong go pas long dispela taim.)
Ap 10:24-48: “Pita wantaim ol dispela man i wokabaut . . . i go kamap long taun Sisaria. Na Kornilius [em i no Juda; em bilong narapela lain na em i no bin katim skin] i wetim ol i stap. . . . Pita i autim tok yet [long ol], na Holi Spirit i kam daun long olgeta manmeri i stap harim tok bilong God.”
Yu ting heven i wetim Pita i pasim tok na ol i bihainim?
Ap 2:4, 14: “Holi Spirit i pulap long olgeta dispela manmeri, na ol i stat long mekim tok long ol kain kain tok ples. . . . Orait [taim Krais, em het bilong lain Kristen, i kirapim ol pinis long rot bilong spirit holi] Pita i sanap wantaim ol 11-pela arapela aposel na em i . . . tokaut long ol manmeri.” (Lukim Ac 2 ves 33.)
Ap 10:19, 20: “Holi Spirit i [tokim Pita] olsem, ‘Harim. Tripela man i kam painim yu. Olsem na yu kirap na yu go daun na go wantaim ol [long haus bilong Kornilius, em man bilong narapela lain]. Yu no ken tingting planti. Mi yet mi bin salim ol i kam.’ ”
Skelim wantaim Matyu 18:18, 19.
Yu ting Pita em i jas bilong skelim husat inap go insait long Kingdom?
2 Ti 4:1: “[Krais Jisas] bai i skelim pasin bilong olgeta manmeri i stap laip na ol manmeri i dai pinis tu.”
Jo 5:22: “Olgeta wok bilong harim kot, [Papa] i givim pinis long Pikinini.”
Pita i bin stap long Rom o nogat?
Inap 9-pela ves long Baibel i stori long taun Rom, tasol i no gat wanpela i tok, Pita i bin stap long Rom. Namba wan Pita 5:13 i tok, em i bin stap long Babilon. Tasol olsem wanem? Dispela tok “Babilon” em tok bokis long Rom? Ol i makim Pita bilong autim tok long ol Juda (Ga 2:9), olsem na i stret em i go long Babilon, long wanem, planti Juda i stap long dispela taun. Wanpela buk i tok, long taim bilong ol aposel, ol Juda i gat “planti bikpela skul long Babilon.”—Encyclopaedia Judaica bilong Jerusalem (1971), Vol. 15, blok 755.
Kirap long taim bilong Pita i kam inap nau, yu ting long olgeta taim i gat wanpela pop i stap olsem senis bilong Pita?
Wanpela pris Katolik (John McKenzie) em i profesa bilong lotu na em i tok: “I no gat wanpela samting bilong bipo i makim olsem long olgeta taim i gat ol senis i holim namba long misin.”—Buk The Roman Catholic Church, p. 4.
Wanpela buk Katolik i tokaut olsem: “ . . . i no gat planti rait bilong bipo bilong makim lain bisop i bin kamap olsem wanem, olsem na dispela i stap hait . . . ”—New Catholic Encyclopedia (1967), Vol. 1, p. 696.
Ol man i tok God i makim ol bilong mekim wok, sapos ol i no bihainim tok bilong God na Krais, ol i tok nating tasol
Mt 7:21-23: “Man i bihainim laik bilong Papa bilong mi i stap long heven, em tasol bai i go insait long kingdom. Long de bilong bikpela kot bilong God, planti manmeri bai i tokim mi olsem, ‘Bikpela, Bikpela, . . . long nem bilong yu mipela i bin wokim planti mirakel.’ Na long dispela taim mi bai tokaut long ol olsem, ‘Mi no save liklik long yupela. Yupela . . . klia long mi.’ ”
Lukim tu Jeremaia 7:9-15.
Ol man i tok ol i senis bilong ol aposel, yu ting ol i bin bihainim ol tok na pasin bilong Krais na ol aposel?
Wanpela buk Katolik i tok: “Misin Katolik i bihainim ol tok ol Aposel i bin kisim, na em i lukautim na lainim ol man long en—em i no skruim hap tok long en o tekewe hap tok.” (A Catholic Dictionary, p. 176) Yu ting dispela tok i stret?
Ol i tok God em i husat?
“Bilip bilong God Triwan em i as bilip bilong lotu Kristen.”—Buk The Catholic Encyclopedia (1912), Vol. 15, p. 47.
“Dispela tok na bilip bilong God Triwan i no stap long Nupela Testamen . . . Dispela bilip i bin wok long kamap insait long planti handet yia na long rot bilong planti tok pait.”—Buk The New Encyclopædia Britannica (1976), Micropædia, Vol. 10, p. 126.
“Long nau planti man bilong kamapim as bilong tok bilong Baibel, na ol tisa bilong Baibel, na planti Katolik tu, ol i ting yumi no ken strong tumas long tok, Nupela Testamen i tokaut klia long God Triwan . . . dispela bilip i no bin kamap long taim bilong ol Kristen bilong pastaim; em i bin kamap namel long yia 375 na yia 400.”—Buk New Catholic Encyclopedia (1967), Vol. 14, p. 295.
Ol i tambuim ol pris long marit
Long 1967, Pop Paul Namba 6 i raitim pas (Sacerdotalis Caelibatus) long ol bisop na em i tok orait long lo bilong misin i tambuim ol pris long marit, tasol em i tokaut olsem, “Nupela Testamen, em ol tok bilong Krais na bilong ol Aposel i stap long en, . . . i no kolim klia lo long ol pris i no ken marit . . . Jisas Yet i no putim lo olsem taim Em i laik makim ol Twelpela, na ol Aposel i no tok em i wanpela lo bilong ol wasman bilong ol kongrigesen Kristen bilong pastaim.”—Buk The Papal Encyclicals 1958-1981, p. 204.
1 Ko 9:5: “Ating i no orait long mipela i maritim Kristen meri . . . olsem ol arapela aposel na ol brata bilong Bikpela na Pita i save mekim?” (Lukim tu Mak 1:29-31, i stori long mama bilong meri bilong Saimon, o Pita.)
1 Ti 3:2: “Man i kamap wasman em i mas . . . i stap man bilong wanpela meri tasol.”
Taim lotu Kristen i no kamap yet, lotu Buda i tambuim ol pris na bruder long lain bilong en long marit. (Buk History of Sacerdotal Celibacy in the Christian Church, p. 6) Na paslain tru long dispela, ol bikpris long Babilon i stap tambu na i no ken marit.—Buk The Two Babylons bilong A. Hislop, p. 219.
1 Ti 4:1-3: “Holi Spirit i tok klia olsem, long dispela taim i laik kamap bihain sampela man bai i lusim bilip bilong ol, long wanem, ol bai i putim yau long tok bilong ol spirit bilong giaman . . . Ol dispela man bai i tambuim ol manmeri long ol i no ken marit.”
Klia long pasin bilong graun
Pop Paul Namba 6 i mekim tok long Yunaitet Nesen long 1965 na em i tok: “Ol manmeri bilong graun i lukluk i go long Yunaitet Nesen—ol i bilip olsem i no gat narapela rot bilong kamapim pasin wanbel na gutaim; Mipela i kam hia olsem mausman bilong ol na Mipela tu i laik litimapim nem bilong [Yunaitet Nesen].”—The Pope’s Visit, nius Time-Life Special Report, p. 26.
Jo 15:19: “[Krais Jisas i tok:] Yupela i no man bilong dispela graun. Nogat. Mi makim yupela pinis bai yupela i lusim pasin bilong dispela graun. Olsem na ol manmeri bilong graun i save birua long yupela.”
Je 4:4: “Sapos man i laik pren wantaim ol pasin bilong graun, em bai i kamap birua bilong God.”
Ol i helpim ol pait
Wanpela man bilong raitim stori bilong Misin Katolik long bipo (E. I. Watkin) em i tok: “I hatwok long tokaut, tasol mipela i no ken . . . haitim samting tru i bin kamap, olsem ol Bisop i save helpim olgeta pait em gavman bilong kantri bilong ol i mekim. Mi no save long wanpela taim lain bisop bilong wanpela kantri i bin tokaut olsem wanpela pait em kantri i mekim i no stret . . . Maski Misin yet i ting olsem wanem, long taim bilong pait, ol Bisop Katolik i save bihainim lo olsem, ‘Pasin bilong kantri bilong mi i stret oltaim.’ ”—Buk Morals and Missiles, p. 57, 58.
Mt 26:52: “Jisas i tokim em olsem, ‘Putim bainat bilong yu i go bek long paus bilong en. Olgeta man i pait long bainat, bainat bai i bagarapim ol.’ ”
1 Jo 3:10-12: “Sapos yumi laik save husat em i pikinini bilong God, na husat em i pikinini bilong Satan, orait yumi ken save olsem, . . . man i no save laikim tru ol arapela pikinini bilong God, em tu i no bilong God. . . . Yumi wan wan i mas laikim tru ol arapela. Yumi no ken i stap olsem Kein. Em i man bilong Satan, na em i kilim i dai brata bilong en.”
Yu ting olsem wanem long ol dispela tok? Ol man i tok ol i senis bilong ol aposel, yu ting ol i bin bihainim tru ol tok na pasin bilong Krais na ol aposel?