Bai Yu Stap Gut Long God?
HAMAS liklik pisin i bin dai long asde? I no gat man i save long dispela, na ating wan wan man tasol bai tingim, long wanem, i gat planti pisin i stap. Tasol Jehova i tingim. Jisas i bin stori long ol dispela liklik pisin taim em i tokim ol disaipel bilong em olsem: “Papa bilong yupela i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun.” Em i tok moa: “Yupela i no ken pret. Yupela i winim planti lain liklik pisin.”—Matyu 10:29, 31.
Bihain ol disaipel i save gut olsem Jehova i tingim tru ol. Wanpela bilong ol, em aposel Jon, em i tok: “God i gat wanpela Pikinini tasol, na em i salim dispela Pikinini i kam long graun, bai yumi kisim laip long em. Long dispela pasin God i soim yumi olsem em i laikim yumi tru.” (1 Jon 4:9) Jehova i givim dispela pe bilong baim bek man, na tu, em i tokim olgeta wokman bilong em olsem: “Bai mi no lusim yu. Bai mi no larim yu i stap nating. Nogat tru.”—Hibru 13:5.
Tru tumas, pasin bilong Jehova long laikim tru lain bilong em i no inap pinis. Tasol dispela askim i kamap, ‘Yumi stap klostu tru long Jehova na yumi no inap lusim em?’
Ol Wok Bilong Satan Bilong Mekim Yumi Lusim God
Taim Jehova i tokim Satan long lukim pasin bilong Jop long stap gut long em, Satan i tok: “Yu ting bai Jop i aninit long yu sapos em i no kisim wanpela samting long han bilong yu, a?” (Jop 1:9) I kain olsem em i tok ol man i stap gut long God ‘sapos ol i kisim ol gutpela samting long dispela.’ Sapos dispela tok i tru, olgeta Kristen inap lusim pasin bilong stap gut long Jehova, sapos wanpela samting ol i laikim tru i pulim ol.
Tingim Jop, pastaim Satan i tok Jop bai lusim Jehova sapos olgeta mani kago bilong em i lus. (Jop 1:10, 11) Taim dispela tok em i sutim i no kamap tru, Satan i tok: “Sapos wanpela man i laik i stap gut, em inap givim olgeta samting bilong en bilong baim bek laip bilong en.” (Jop 2:4) Sampela inap mekim olsem Satan i tok, tasol Jop i no laik tru long lusim Jehova. Ol rait bilong bipo i kamapim klia dispela. (Jop 27:5; 42:10-17) Olsem wanem? Yu tu i stap gut long God? O bai yu larim Satan i mekim na yu lusim Jehova? Nau tingim yu yet taim yumi skelim sampela samting inap painim olgeta Kristen.
Aposel Pol i bilip olsem pasin bilong ol Kristen tru long stap gut long God inap strong tru. Em i tok: “Mi bilip tru olsem, . . . dai o laip, . . . o samting nau i stap o samting bai i kamap bihain, . . . o ol arapela samting i stap nabaut, dispela olgeta i no inap pasim laik bilong God, em dispela laik em i givim yumi long Krais Jisas, Bikpela bilong yumi.” (Rom 8:38, 39) Yumi tu inap bilip strong olsem sapos yumi laikim tru Jehova. Kain pasin bilong laikim tru Jehova i no inap pinis, indai tu i no inap pinisim.
Sapos yumi stap klostu long Jehova, bai yumi no tok, ‘Sampela yia bihain bai mi mekim yet wok bilong Jehova o olsem wanem?’ Sapos yumi gat tupela tingting, i kain olsem yumi ting ol samting i kamap long laip bilong yumi i mekim na bai yumi stap gut long Jehova o nogat. Sapos tru tru yumi stap gut long Jehova, orait i no gat wanpela samting inap bagarapim dispela. Dispela pasin yumi inap holimpas sapos bel bilong yumi i gutpela. (2 Korin 4:16-18) Sapos yumi laikim tru Jehova long bel olgeta, bai yumi no mekim em i bel hevi.—Matyu 22:37; 1 Korin 13:8.
Tasol yumi mas tingim olsem, olgeta taim Satan i mekim ol samting na bai yumi lusim pasin bilong stap gut long God. Em inap kirapim yumi long bihainim laik bilong skin, o bihainim laik bilong ol poroman bilong yumi, o sampela hevi inap painim yumi na yumi lusim tok i tru. Ol man bilong dispela graun i stap longwe long God i olsem nambawan helpim bilong Satan long pundaunim yumi, tasol sin bilong yumi yet i helpim Satan long mekim olsem. (Rom 7:19, 20; 1 Jon 2:16) Tasol i gat sampela samting i helpim yumi long dispela pait, na wanpela bikpela samting olsem, em yumi save pinis long tingting na pasin bilong Satan.—2 Korin 2:11.
Wanem ol tingting na pasin bilong Satan? Long pas Pol i raitim long ol Efesus, em i kolim ol dispela pasin olsem “olgeta kain pasin bilong trik na giaman.” (Efesus 6:11) Satan i giaman na mekim wok long ol trikpasin bilong mekim yumi lusim pasin bilong stap gut long God. Yumi ken amamas long yumi inap luksave long ol dispela trikpasin, long wanem, Tok Bilong God i stori long ol pasin bilong Satan. Pasin Satan i bihainim taim em i laik mekim Jisas na Jop i lusim pasin bilong stap gut long God, i wankain olsem em i save bihainim bilong mekim yumi lusim God.
I No Gat Wanpela Samting Inap Mekim Jisas i Lusim Bilip
Taim Jisas i kirap mekim wok bilong em, Satan i no sem long traim Pikinini bilong God long rot bilong kirapim em long tanim wanpela ston i kamap bret. Man, em trikpasin stret! Jisas i no bin kaikai inap 40 de, olsem na em i hangre tru. (Luk 4:2, 3) Satan i laik kirapim Jisas long inapim laik bilong skin wantu tasol, long rot Jehova i no orait long en. Long nau tu, pasin bilong dispela graun i kirapim yumi long inapim ol laik bilong yumi nau tasol, maski wanem ol samting inap kamap long dispela. Ol i save tok, ‘Yu gutpela man, kisim nau tasol,’ o ‘Mekim tasol!’
Sapos Jisas i bin inapim hangre bilong em na em i no bin tingim wanem samting bai kamap long dispela, bai em i no stap gut long God moa na Satan i win. Jisas i laik mekim pasin Jehova i laikim na em i tok strong olsem: “Buk bilong God i gat tok olsem, ‘Ol manmeri i no inap kisim laip long kaikai tasol.’ ”—Luk 4:4; Matyu 4:4.
Nau Satan i senisim stail bilong em. Satan i paulim mining bilong ol skripsa Jisas i bin kolim, na em i wok long kirapim Jisas long sanap long banis bilong tempel na kalap i go daun. Satan i tok: ‘Wanpela ensel i mas lukautim yu.’ Jisas i no laik askim Papa bilong em long wokim mirakel bilong lukautim em, bilong ol narapela i ken litimapim nem bilong em. Jisas i tok: “Yu no ken traim strong bilong God, Bikpela bilong yu.”—Matyu 4:5-7; Luk 4:9-12.
Laspela samting Satan i mekim bilong traim Jisas i stap ples klia. Em i traim long kirapim Jisas long wok wantaim em, na em i tokim Jisas long lotuim em wanpela taim tasol na em bai givim em olgeta strongpela kantri na ol gutpela samting bilong ol. Dispela em i klostu olgeta samting Satan i holim. Tasol yu ting Jisas inap lotuim nambawan birua bilong Papa bilong em? Nogat tru! Jisas i tokim em: “Yu mas aninit long God, Bikpela bilong yu. Na yu mas lotu long em wanpela tasol.”—Matyu 4:8-11; Luk 4:5-8.
Taim dispela tripela traim i no wok gut, Satan “i lusim Jisas na i wetim narapela taim.” (Luk 4:13) Dispela i soim olsem olgeta taim Satan i bin painim rot long traim pasin bilong Jisas long stap gut long God. Rot i op gen tu na hap yia bihain, taim Jisas i kirap helpim ol disaipel bilong em long tingting stret long indai bilong em, klostu nau bai painim em. Aposel Pita i tok: “Bikpela, nogat tru. Dispela samting i no inap kamap long yu.”—Matyu 16:21, 22.
Dispela tok i no stret, tasol i kam long wanpela disaipel i gat laik long helpim Jisas, olsem na yu ting dispela tok inap pulim Jisas? Wantu tasol Jisas i luksave olsem dispela kain tok i kamapim laik bilong Satan na laik bilong Jehova, nogat. Krais i bekim strong tok olsem: “Satan, yu go baksait long mi. Yu laik pasim rot bilong mi. Yu no bihainim tingting bilong God. Nogat. Yu bihainim tingting bilong ol man tasol.”—Matyu 16:23.
Jisas i laikim tru Jehova, olsem na Satan i no inap mekim na em i lusim pasin bilong stap gut long God. Ol samting Satan inap givim em, na olgeta traim, maski ol i bikpela tru, i no inap mekim na Jisas i lusim pasin bilong stap gut long Papa bilong em long heven. Bai yumi sanap strong olsem taim ol traim i mekim na yumi hatwok long stap gut long God? Stori bilong Jop inap helpim yumi long save gut moa long ol hevi inap painim yumi.
Stap Gut Long God Long Taim Bilong Hevi
Olsem Jop i bin kisim save long en, ol hevi inap painim yumi long taim yumi no ting em bai kamap. Em i marit na stap amamas na em i gat tenpela pikinini na em i save tingim ol samting bilong spirit long i stap bilong em. (Jop 1:5) Tasol Jop i no bin save olsem pasin bilong em long stap gut long God i kamap wanpela bikpela tok long heven, na Satan i tingting strong long pundaunim em, maski em i mas bihainim wanem rot bilong mekim olsem.
I no longtaim na olgeta mani kago bilong Jop i lus. (Jop 1:14-17) Tasol Jop i no lusim pasin bilong stap gut long God, long wanem, em i no save bilip olsem mani inap helpim em. Jop i tingim taim em i stap maniman na em i tok: “Mi no bin bilip olsem, ol dispela gutpela gol na mani samting bilong mi inap long helpim mi long stap gut. Sapos mi bin mekim ol dispela pasin, em i olsem mi givim baksait long God Antap Tru.”—Jop 31:24, 25, 28.
Long nau tu, olgeta samting bilong yumi inap lus wantu tasol. Sampela man i bin giamanim wanpela bisnisman, em wanpela Witnes Bilong Jehova, na bikpela hap mani i lus na klostu bisnis bilong em i bagarap olgeta. Em i kamapim bel bilong em: “Klostu tru mi kisim hat-atek. Yes, mi ting sapos mi no bin stap klostu long God hat-atek i painim mi pinis. Tasol dispela samting i bin helpim mi long luksave olsem ol samting bilong spirit i no i stap olsem nambawan samting long laip bilong mi. Amamas bilong kisim planti mani moa i winim ol narapela samting.” Nau dispela Witnes i no wok planti aua tumas long bisnis bilong em, na em i mekim wok painia haptaim, na em i lusim 50 aua o moa long olgeta mun long wok autim tok. Tasol i gat ol narapela hevi inap bagarapim yumi moa yet, winim ol hevi yumi kisim taim mani kago bilong yumi i lus.
Taim Jop i wok long tingim yet mani kago bilong em i lus, em i kisim toksave olsem tenpela pikinini bilong em i dai pinis. Tasol em i tok yet: ‘Litimapim nem bilong Bikpela.’ (Jop 1:18-21) Olsem wanem? Bai yumi stap gut long God sapos wantu planti long famili bilong yumi i lus? Tupela pikinini bilong Francisco, em wanpela elda Kristen long Spen, ol i dai taim bas i bam. Taim em i go klostu moa long Jehova na bisi moa long wok autim tok, dispela i mekim gut bel bilong em.
Maski bel bilong Jop i bagarap stret taim ol pikinini i dai, ol hevi bilong em i no pinis yet. Satan i givim em wanpela sik i nogut tru na em i karim bikpela pen. Long dispela taim stret, meri bilong Jop i mekim sampela tok kranki long em. Em i tok: ‘Lusim God na tok nogut long em na yu ken i dai.’ Jop i no bihainim dispela tok, na em i no “mekim wanpela tok nogut long God.” (Jop 2:9, 10) Jop i stap gut long God, long wanem, em i stap klostu long Em na i no famili bilong em i mekim na em i stap gut long God.
Winim tenpela yia i go pinis, man bilong Flora na namba wan pikinini man bilong em i lusim lotu Kristen tru, olsem na Flora inap pilim wari bilong Jop. Em i tok: “Taim wantu tasol famili bilong yu i no inap strongim yu moa, em i hatwok tru. Tasol mi save olsem mi no inap painim amamas ausait long oganaisesen bilong Jehova. Olsem na mi sanap strong na putim Jehova olsem nambawan samting na mi wok strong long stap olsem gutpela meri marit na mama. Mi beten olgeta taim na Jehova i strongim mi. Mi amamas, long wanem, mi lain pinis long stap klostu long Jehova na bilip long em, maski man bilong mi i wok long birua.”
Nau Satan i traim narapela samting bilong mekim Jop i lusim pasin bilong stap gut long God, em long rot bilong tripela poroman bilong em. (Jop 2:11-13) Jop i bel hevi stret taim tripela pren i kirap sutim tok long em. Sapos em i bin bilipim tok bilong ol, em bai lusim bilip bilong em long God Jehova. Tok nogut bilong ol inap daunim em stret na inap mekim em i lusim pasin bilong stap gut long God, na long dispela rot Satan i win.
Tasol Jop i tok: “Bai mi mekim wankain tok tasol i go inap taim mi dai.” (Jop 27:5) Em i no tok, ‘Mi no inap larim yupela man i mekim na mi lusim God!’ Jop i save olsem bilong em i ken stap gut long Jehova, em yet mas mekim ol samting na laikim tru Jehova.
Olpela Trik Bilong Pundaunim Sampela Moa
Satan i yusim yet ol tok kranki o tok i bagarapim bel em ol pren na ol wanbilip i save mekim. Bel hevi yumi kisim long rot bilong ol narapela long kongrigesen inap daunim yumi moa, i winim ol bel hevi ol man ausait i putim long yumi. Wanpela elda, bipo em insait long ami na em i lukim ol pait tru, em i skelim ol dispela pait wantaim bel hevi em i kisim long rot bilong toktok na pasin bilong sampela brata Kristen bilong em. Taim em i tingim bel hevi ol brata i kamapim, em i tok: “Dispela i winim olgeta narapela hevi mi bin karim.”
Narapela samting tu inap kamap, yumi inap tingting planti long ol popaia bilong ol wanbilip bilong yumi na nau yumi no laik toktok moa wantaim ol o yumi no laik go moa long ol miting Kristen. Ating yumi ting wok bilong mekim gut bel bilong yumi em i nambawan bikpela samting. Tasol sori tru sapos yumi kirap tingting olsem na yumi larim pasin o toktok bilong ol narapela i bagarapim nambawan gutpela samting yumi holim, em pasin bilong yumi long pas gut wantaim Jehova. Sapos yumi larim dispela samting i kamap, yumi larim Satan i giamanim yumi long rot bilong wanpela olpela trik bilong em.
Tru, yumi laik ol stretpela pasin i mas i stap insait long kongrigesen Kristen. Tasol sapos yumi ting olsem ol brata sista bilong yumi i mas bihainim stretpela pasin tasol maski ol i gat sin, bai yumi bel hevi. Tasol Jehova i narapela kain, em i gat stretpela tingting long ol samting em i laik bai ol wokboi bilong em i mas mekim. Sapos yumi bihainim pasin bilong em bai yumi no les kwik long ol popaia bilong ol. (Efesus 4:2, 32) Aposel Pol i mekim dispela tok: “Sapos bel bilong yupela i hat, orait yupela lukaut. Nogut yupela i mekim sin. Nogut yupela i belhat yet i stap na san i go daun. Nogut yupela i opim dua long Satan.”—Efesus 4:26, 27.
Olsem Baibel i soim yumi, Satan i yusim kain kain trikpasin bilong save—sapos em inap—i gat wanem rot bilong mekim yumi Kristen i lusim pasin bilong stap gut long God. Sampela trik bilong em i bilong inapim laik nogut bilong skin, na sampela em bilong givim pen long yumi. Long ol tok yumi bin stori pinis long en, yu ken luksave olsem i gat as na yu mas was gut i stap. Laikim tru God long bel bilong yu, na tingting strong long kamapim klia olsem Satan em man bilong tok giaman na mekim bel bilong Jehova i amamas. (Sindaun 27:11; Jon 8:44) Tingim, maski wanem wanem traim i painim yumi, yumi no ken lusim pasin Kristen tru, em pasin bilong stap gut long God.