Yumi No Tingting Moa Long Yumi Yet na Wokabaut
‘Krais i dai bilong helpim yumi ol man i stap laip, bai yumi no ken tingting moa long yumi yet na wokabaut.’—2 KORIN 5:14, 15.
1, 2. Wanem lo bilong Baibel i bin kirapim ol disaipel long taim bilong Krais long daunim pasin bilong tingim ol yet tasol?
EM LASPELA nait bilong Jisas long stap long graun. I no longtaim na Jisas bai i givim laip bilong em bilong helpim ol man i bilip long em. Long dispela nait Jisas i tokim ol gutpela aposel bilong em long planti bikpela samting. Em i kamapim wanpela lo bilong wanpela pasin em bai stap mak tru bilong ol disaipel bilong em. Em i tok: “Nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:34, 35.
2 Ol Kristen tru i mas kamapim pasin bilong laikim tru ol arapela na daunim laik bilong ol yet, na tingim i stap bilong ol brata bilong ol paslain long ol i tingim ol samting bilong ol yet. Ol i no surik long ‘lusim laip bilong ol bilong helpim ol pren bilong ol.’ (Jon 15:13) Dispela nupela lo i bin kirapim ol Kristen bilong pastaim long mekim wanem? Tertullian i bin stap 100 yia samting bihain long Krais, na long buk bilong em i gat biknem, buk Apology, em i kamapim tok ol arapela man i mekim long ol Kristen olsem: ‘Narapela i laikim tru narapela na i redi long i dai bilong helpim em.’
3, 4. (a) Bilong wanem yumi mas sakim pasin bilong tingim yumi yet tasol? (b) Long dispela stadi bai yumi skelim wanem samting?
3 Yumi tu mas “helpim ol arapela long karim hevi bilong ol. Long dispela pasin bai [yumi] inapim tru lo bilong Krais.” (Galesia 6:2) Tasol, man i tingim em yet tasol, dispela i pasim rot bilong em long bihainim lo bilong Krais na ‘laikim tru God long bel na long spirit bilong em na long tingting bilong em, na long laikim ol wantok olsem em i laikim em yet.’ (Matyu 22:37-39) Yumi ol sinman, olsem na yumi gat pasin bilong tingim yumi yet tasol. Hevi bilong ol wan wan de, pasin resis i stap long skul o long ples wok, na hatwok bilong kisim ol kaikai samting yumi mas kisim, ol i mekim na dispela pasin i kamap strong moa long yumi. Dispela pasin bilong man long tingim em yet tasol i no wok long pinis. Aposel Pol i tok: “Long taim bilong las de . . . ol man bai i laikim ol yet tasol.”—2 Timoti 3:1, 2.
4 Taim wok bilong Jisas long graun i laik pinis, em i tokim ol disaipel bilong em long 3-pela samting bilong helpim ol long daunim pasin bilong tingim ol yet tasol. Em wanem 3-pela samting, na olsem wanem tok bilong em i ken helpim yumi?
Samting i Helpim Yumi Tru!
5. Taim Jisas i autim tok long hap not bilong Galili, em i tok wanem long ol disaipel bilong em? Bilong wanem ol i kirap nogut long tok em i mekim?
5 Jisas i autim tok klostu long Sisaria Filipai long hap not bilong Galili. Ating naispela ples hia i kirapim man long tingim amamas na malolo samting, bai em i no tingting long pasin bilong daunim laik bilong em yet. Tasol taim Jisas i stap long dispela hap em i tokim ol disaipel olsem “em i mas i go long Jerusalem, na em i mas karim planti pen long han bilong ol hetman wantaim ol bikpris na ol saveman bilong lo. Na bai ol i kilim em i dai, na long de namba 3 bai em i kirap bek.” (Matyu 16:21) Ating ol disaipel bilong Jisas i kirap nogut tru long dispela tok, long wanem, ol i bin ting Lida bilong ol bai kamapim Kingdom bilong em hia long graun!—Luk 19:11; Aposel 1:6.
6. Bilong wanem Jisas i krosim Pita?
6 Wantu Pita i “kisim Jisas i go long arere na i stat long krosim em olsem, ‘Bikpela, nogat tru. Dispela samting i no inap kamap long yu.’ ” Jisas i mekim wanem? “Jisas i tanim na i tokim Pita olsem, ‘Satan, yu go baksait long mi. Yu laik pasim rot bilong mi. Yu no bihainim tingting bilong God. Nogat. Yu bihainim tingting bilong ol man tasol.’ ” Tingting bilong Pita i narapela kain olgeta long tingting bilong Jisas! Jisas i wanbel tru long lusim ol samting bilong em yet na mekim wok God i givim long em, olsem dai long pos diwai long sampela mun bihain. Pita i no laik bai Jisas i hatwok olsem. Em i tok: “Dispela samting i no inap kamap long yu.” I luk olsem astingting bilong Pita i gutpela. Tasol Jisas i krosim em, long wanem, long dispela samting Pita i larim Satan i stiaim tingting bilong em. Pita i ‘no bihainim tingting bilong God. Nogat. Em i bihainim tingting bilong ol man tasol.’—Matyu 16:22, 23.
7. Olsem Matyu 16:24 i kamapim, Jisas i tok ol disaipel bilong em i mas mekim wanem?
7 Wankain tingting olsem Pita i kamapim long Jisas i stap long nau tu. Ol samting bilong dispela graun i save kirapim man long ‘mekim gut long em yet’ o ‘sakim ol samting i hatwok long mekim.’ Tasol Jisas i kirapim ol man long holim tingting i narapela kain olgeta long dispela. Em i tokim ol disaipel bilong em: “Sapos wanpela man i laik bihainim mi, orait em i mas daunim laik bilong em yet, na em i mas karim diwai kros [“pos,” NW ] bilong en na bihainim mi.” (Matyu 16:24) Wanpela buk (The New Interpreter’s Bible) i tok: “Dispela tok i no bilong kirapim ol man ausait long kamap disaipel, nogat. Em bilong kirapim ol man i bihainim pinis singaut bilong Krais long tingim mining bilong wok disaipel bilong ol.” Tripela samting Jisas i kamapim long dispela ves, i bilong ol bilipman long mekim. Yumi ken skelim dispela tripela samting wan wan.
8. Stori long mining bilong dispela tok, daunim laik bilong yumi yet.
8 Namba wan, yumi mas daunim laik bilong yumi yet. Long tok Grik, dispela tok “daunim laik bilong yumi yet” i makim olsem man i amamas long sakim laik bilong em yet o samting i bilong helpim em yet tasol. Daunim laik bilong yumi yet i no makim olsem wan wan taim yumi lusim sampela amamas; na i no makim olsem yumi lusim olgeta amamas o bagarapim yumi yet. ‘Yumi i no bilong yumi yet,’ long wanem, yumi bin givim yumi yet na olgeta samting bilong laip bilong yumi i go long Jehova. (1 Korin 6:19, 20) Yumi no tingim yumi yet na wokabaut, nogat, yumi tingim laik bilong God na wokabaut. Daunim laik bilong yumi yet i makim olsem yumi strong long bihainim laik bilong God, maski dispela i pait wantaim laik bilong skin bilong yumi i gat sin. Yumi soim olsem yumi bel tru long God taim yumi dediket long em na kisim baptais. Na yumi wok strong long truim dediket bilong yumi inap olgeta yia yumi stap laip.
9. (a) Taim Jisas i stap long graun, diwai pos ol i kilim i dai man long en i makim wanem samting? (b) Olsem wanem yumi karim diwai pos bilong yumi?
9 Namba tu samting em yumi mas karim diwai pos bilong yumi. Long taim bilong ol aposel, diwai pos ol i kilim man i dai long en i makim pasin bilong karim pen na hevi, kisim sem, na dai. Planti taim ol i kilim i dai ol man nogut tasol long diwai pos o hangamapim bodi bilong ol long pos taim ol i dai pinis. Taim Jisas i mekim dispela tok, em i soim olsem wanpela Kristen i mas redi long ol man i mekim nogut long em, birua long em, o long dai tu, long wanem, em i no bilong dispela graun. (Jon 15:18-20) Ol lo Kristen bilong yumi i mekim yumi stap narapela kain, dispela inap mekim na ol man bilong dispela graun i ‘tok nogut long yumi.’ (1 Pita 4:4) Dispela inap kamap long skul, ples wok, o insait long famili. (Luk 9:23) Yumi karim hevi long ol man bilong graun i birua long yumi, tasol yumi orait long dispela, long wanem, yumi no tingim moa laik bilong yumi yet na wokabaut. Jisas i tok: “Sapos ol i lukim yupela i stap long lain bilong mi, na ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas. Yupela i ken belgut na amamas tru, long wanem, bikpela pe i wetim yupela long heven.” (Matyu 5:11, 12) Tru tumas, nambawan bikpela samting em God i amamas long yumi.
10. Wanem sampela samting yumi mas mekim bilong bihainim Jisas?
10 Namba tri samting, Jisas i tok yumi mas bihainim em. Wanpela buk (An Expository Dictionary of New Testament Words, by W. E. Vine) i tok mining bilong dispela tok bihainim i olsem poromanim—“man i bihainim wankain rot.” Namba 1 Jon 2:6 i tok: “Sapos wanpela man i tok, ‘Mi pas wantaim God,’ orait dispela man i mas wokabaut olsem Krais i bin wokabaut.” Jisas i wokabaut olsem wanem? Jisas i laikim tru Papa bilong em long heven na ol disaipel bilong em, olsem na em i no inap tingim em yet tasol. Pol i tok: “Krais tu i no bin ting long helpim em yet tasol.” (Rom 15:3) Maski em i skin les o hangre, Jisas i tingim ol samting ol arapela i sot long en i bikpela samting moa long samting em yet i sot long en. (Mak 6:31-34) Na tu, Jisas i givim bel tru long wok bilong autim tok long Kingdom na skulim ol man. Yumi mas bihainim pasin bilong em taim yumi wok strong long inapim wok bilong yumi long ‘mekim olgeta lain manmeri i kamap disaipel na lainim ol long bihainim olgeta tok bilong Jisas.’ (Matyu 28:19, 20) Long ol dispela samting, Krais i soim yumi pasin bilong bihainim, na yumi mas bihainim gut lek mak bilong em.—1 Pita 2:21.
11. Bilong wanem yumi mas daunim laik bilong yumi yet, kisim pos diwai bilong yumi, na oltaim bihainim Jisas Krais?
11 Yumi mas daunim laik bilong yumi yet, kisim pos diwai bilong yumi, na oltaim bihainim Man i stap gutpela piksa bilong yumi. Dispela i helpim yumi long daunim pasin bilong tingim yumi yet tasol—dispela pasin i pasim yumi long laikim tru ol arapela na lusim ol samting bilong yumi yet bilong helpim ol. Jisas i tok: “Sapos wanpela man i laik holimpas laip bilong em yet, laip bilong en bai i lus. Tasol sapos wanpela man i ting long mi na i lusim laip bilong en, em bai i kisim laip bilong en. Sapos wanpela man i kisim olgeta samting bilong graun, tasol laip bilong em yet i lus, orait dispela olgeta samting bai i helpim em olsem wanem? Bai man i givim wanem pe bilong baim bek laip bilong en?”—Matyu 16:25, 26.
Yumi No Inap Mekim Wok Bilong Tupela Bos Wantaim
12, 13. (a) Yangpela man i tingim wanem samting na givim askim long Jisas? (b) Jisas i tokim yangpela man long mekim wanem? Bilong wanem em i tok olsem?
12 Sampela mun bihain long Jisas i tokim ol disaipel long ol i mas daunim laik bilong ol yet, wanpela yangpela maniman i gat namba i kam long Jisas na tok: “Tisa, mi mas mekim wanem gutpela pasin na bai mi kisim laip i stap gut oltaim oltaim?” Jisas i tokim em long “bihainim ol lo bilong God,” na em i kolim sampela bilong ol dispela lo. Yangpela man i tok: “Mi save bihainim tasol dispela olgeta lo.” I luk olsem man i pilim tru ol tok na em i bin wok strong long bihainim Lo. Olsem na em i mekim askim: “Tasol mi sot yet long wanem samting?” Bilong bekim askim, Jisas i singautim em long mekim wanpela samting, Jisas i tok: “Sapos yu laik kamap stretpela olgeta, orait yu go salim olgeta samting bilong yu na dispela mani yu kisim yu mas givim long ol rabisman. Yu mekim olsem, na bai yu gat ol gutpela samting tru long heven. Na yu kam bihainim mi.”—Matyu 19:16-21.
13 Bilong dispela yangpela man i ken givim bel long mekim wok bilong Jehova, Jisas i luksave olsem em i mas lusim bikpela samting i wok long pulim tingting bilong em—mani kago bilong em. Disaipel tru bilong Krais i no inap mekim wok bilong tupela bos wantaim. Em “i no inap i stap aninit long God na long mani wantaim.” (Matyu 6:24) Em i mas i gat ‘gutpela ai,’ olsem ai i lukluk long ol samting bilong spirit. (Matyu 6:22) Man i givim ol samting bilong em long man i stap rabis, dispela em pasin bilong lusim samting em yet i laikim bilong helpim narapela. Sapos yangpela man i mekim olsem, Jisas bai opim rot long em long bungim ol gutpela samting long heven—em ol gutpela samting i givim rot long em long kisim laip oltaim na long mekim wok king wantaim Krais long heven long bihain. Dispela yangpela man i no redi long daunim laik bilong em. ‘Bel bilong yangpela man i hevi, na em i go. Long wanem, em i gat planti samting tru.’ (Matyu 19:22) Tasol ol arapela disaipel bilong Jisas i mekim narapela samting.
14. Fopela man bilong kisim pis i mekim wanem taim Jisas i singautim ol long bihainim em?
14 Tupela yia paslain, Jisas i mekim wankain tok long fopela man bilong kisim pis, em Pita, Andru, Jems, na Jon. Long dispela taim tupela i kisim pis i stap na tupela narapela i wok long stretim umben i bruk. Jisas i tokim ol: “Kam bihainim mi, na bai mi lainim [yupela] long pasin bilong kisim ol manmeri.” Fopela wantaim ol i lusim wok bilong ol long kisim pis na ol i bihainim Jisas i go inap long ol i dai.—Matyu 4:18-22.
15. Wanpela Witnes Bilong Jehova i bin lusim wanem samting na bai em i ken bihainim Jisas?
15 Planti Kristen long nau i mekim wankain pasin olsem fopela man bilong kisim pis, yangpela maniman, nogat. Ol i lusim mani kago na rot bilong kisim biknem long dispela graun na bai ol i ken mekim wok bilong Jehova. Deborah i tok: “Taim mi gat 22 krismas, mi gat bikpela samting tru mi mas makim.” Em i tok: “Mi bin stadi long Baibel inap long sikspela mun, na mi laik dediketim laip bilong mi long Jehova, tasol famili bilong mi i birua tru long dispela. Ol i mani lain stret, na ol i ting bai ol i kisim sem sapos mi kamap wanpela Witnes. Ol i tok mi gat 24 aua long makim samting mi laikim—laip i no gat hatwok long en o tok i tru. Sapos mi no lusim ol Witnes, famili bilong mi bai givim baksait olgeta long mi. Jehova i bin helpim mi long makim samting i stret na em i strongim mi long stap gut long samting mi bin makim. Inap 42 yia pinis mi mekim wok autim tok fultaim, na mi no sori liklik long samting mi bin lusim. Mi givim baksait long pasin bilong tingim mi yet na painim amamas tasol, olsem na mi abrusim ol hevi mi lukim ol wanfamili i karim, ol i pilim olsem laip i no gat as bilong en na ol i stap bel hevi. Mi na man bilong mi i bin helpim planti manmeri long kisim tok i tru, winim 100. Ol dispela pikinini bilong spirit i winim tru mani kago bilong skin.” Planti milion Witnes Bilong Jehova i gat wankain tingting. Olsem wanem long yu?
16. Olsem wanem yumi inap kamapim olsem yumi no tingting moa long yumi yet na wokabaut?
16 Ol i no tingting moa long ol yet na wokabaut, dispela i bin kirapim planti tausen bilong ol Witnes Bilong Jehova long mekim wok painia, o autim tok bilong Kingdom fultaim. Sampela Witnes i no gat rot long autim tok fultaim, ol i wok long kisim tingting olsem bilong ol painia na helpim wok bilong autim tok bilong Kingdom inap long skel tru bilong ol. Ol papamama i kamapim kain tingting olsem taim ol i lusim bikpela haptaim na planti laik bilong ol yet na bai ol i ken skulim ol pikinini bilong ol long ol samting bilong spirit. Yumi olgeta i gat rot long soim olsem ol samting bilong Kingdom i namba wan samting long laip bilong yumi.—Matyu 6:33.
Pasin Laikim Bilong Husat i Kirapim Yumi?
17. Wanem samting i kirapim yumi long lusim ol samting bilong yumi yet?
17 Laikim tru narapela na lusim ol samting bilong yumi yet bilong helpim ol inap givim hatwok long yumi. Tasol tingim as na yumi mekim olsem. Pol i tok: “Krais i bin givim bel bilong en long mipela, na dispela i save kirapim mipela long wok, long wanem, mipela i save pinis olsem, wanpela man i bin kisim ples bilong yumi olgeta na i dai . . . Dispela man i mekim olsem bilong helpim yumi ol man i stap laip, bai yumi no ken tingting moa long yumi yet na wokabaut. Nogat. Yumi ken tingting long dispela man i kisim ples bilong yumi na i dai pinis, na i kirap bek tu. Yumi ken tingting long em na wokabaut.” (2 Korin 5:14, 15) Pasin laikim bilong Krais i kirapim yumi na yumi no tingting moa long yumi yet na wokabaut. Em strongpela samting tru bilong kirapim yumi! Krais i dai bilong helpim yumi, olsem na i stret yumi pilim olsem yumi mas wokabaut long pasin em i laikim, a? Tru tumas, bikpela pasin laikim God na Krais i mekim long yumi i kirapim yumi long dediketim laip bilong yumi long God na kamap disaipel bilong Krais.—Jon 3:16; 1 Jon 4:10, 11.
18. Bilong wanem yumi ken tok pasin bilong lusim ol samting bilong yumi yet i gat gutpela pe bilong en?
18 Yumi no tingting moa long yumi yet na wokabaut, dispela pasin i gat gutpela pe bilong en? Taim yangpela maniman i sakim tok bilong Krais na lusim em, Pita i tokim Jisas: “Lukim. Mipela i bin lusim olgeta samting na bihainim yu. Bai mipela i kisim wanem samting?” (Matyu 19:27) Pita na ol arapela aposel i bin daunim tru laik bilong ol yet. Ol bai kisim wanem gutpela pe? Pastaim Jisas i kamapim olsem ol bai mekim wok king wantaim em long heven. (Matyu 19:28) Na tu, Jisas i tokaut long ol gutpela samting olgeta long lain bilong em bai kisim. Em i tok: “Olgeta man i bin ting long mi na long gutnius na i lusim haus o brata o susa o mama o papa o pikinini o gaden, bai ol i kisim 100 moa. Taim ol i stap yet long dispela graun God bai i givim ol planti samting tru, i winim ol samting ol i bin i gat bipo. . . . Na long taim i laik kamap bihain ol bai i kisim laip i stap gut oltaim oltaim.” (Mak 10:29, 30) Yumi save kisim planti gutpela samting, winim ol samting yumi bin lusim. Ol papa, mama, brata, susa, na pikinini bilong yumi long spirit ol i gutpela moa winim tru ol samting yumi bin lusim bilong helpim wok bilong Kingdom. Yu ting laip bilong husat i bin i gat ol gutpela samting long en—laip bilong Pita o bilong yangpela maniman?
19. (a) Wanem rot bilong stap amamas tru? (b) Stadi bihain bai stori long wanem samting?
19 Ol tok Jisas i mekim na wokabaut bilong em i soim olsem pasin bilong givim ol samting na helpim ol arapela i kamapim amamas, pasin bilong man long tingim em yet i no save kamapim amamas, nogat. (Matyu 20:28; Aposel 20:35) Taim yumi no tingting moa long yumi yet na wokabaut, na oltaim yumi bihainim Krais, yumi kisim bikpela amamas long nau na yumi inap kisim laip oltaim oltaim long bihain. Tasol taim yumi daunim laik bilong yumi yet, Jehova i kamap olsem Bos bilong yumi. Yumi kamap olsem wokboi bilong God. Bilong wanem dispela em i gutpela samting? Olsem wanem dispela em i bikpela samting long ol samting yumi mas makim bilong mekim? Stadi i kamap bihain long dispela bai bekim ol dispela askim.
Yu Inap Tingim?
• Bilong wanem yumi mas daunim pasin bilong tingim yumi yet tasol?
• Olsem wanem yumi daunim laik bilong yumi yet, kisim pos diwai bilong yumi, na oltaim bihainim Jisas?
• Wanem samting i kirapim yumi na yumi no tingting moa long yumi yet na wokabaut?
• Olsem wanem pasin bilong lusim ol samting bilong yumi yet i gat gutpela pe bilong en?
[Piksa long pes 11]
‘Bikpela, dispela samting i no inap kamap long yu’
[Piksa long pes 13]
Wanem samting i pasim yangpela maniman long bihainim Jisas?
[Ol Piksa long pes 15]
Pasin laikim i kirapim ol Witnes Bilong Jehova long wok strong long autim tok bilong Kingdom