Bilong Wanem Jisas i Bikpela Tisa?

WINIM tu tausen yia i go pinis, wanpela pikinini i narapela kain tru em i kamap long graun, na em i kamap nambawan man tru i winim olgeta arapela man. Long dispela taim bipo, i no gat ol balus o ka. I no gat ol kain samting olsem televisen, kompiuta, na Intenet.

Ol i givim nem Jisas long dispela pikinini. Em i kamap man i gat savetingting, winim olgeta man i bin i stap long graun. Na tu, Jisas i kamap nambawan gutpela tisa. Ol samting ol man i hatwok long kliagut long en, em i save stori long pasin ol man inap kisimgut.

Jisas i skulim ol man long olgeta hap em i bungim ol. Em i skulim ol long nambis na antap long bot. Em i skulim ol long haus bilong ol na long taim em i raun. Jisas i no gat ka, na em i no raun long bas o tren, nogat. Jisas i wokabaut i go long ol ples na skulim ol man.

Yumi save lainim planti samting long ol arapela man. Tasol yumi inap lainim ol nambawan bikpela samting long Bikpela Tisa, Jisas. Baibel em dispela buk yumi inap painim ol tok bilong Jisas long en. Taim yumi ritim ol dispela tok long Baibel, i olsem Jisas i toktok long yumi.

Wanem samting i mekim na Jisas i Bikpela Tisa? Wanpela as i olsem: Jisas yet i bin kisim skul. Na em i save olsem em i bikpela samting long harim tok. Jisas i bin harim tok bilong husat? Husat i bin skulim em?— Papa bilong em i bin skulim em. Na Papa bilong Jisas em God.

Taim Jisas i no kam daun yet long graun olsem wanpela man, em i bin stap wantaim God long heven. Olsem na Jisas em i narapela kain long olgeta arapela man, long wanem, i no gat wanpela man i bin stap long heven na bihain kamap long graun, nogat. Long heven, Jisas i bin stap gutpela Pikinini, em i bin harim tok bilong Papa bilong em. Olsem na Jisas inap skulim ol man long ol samting God i bin skulim em long en. Yu tu inap bihainim pasin bilong Jisas taim yu harim tok bilong papa na mama bilong yu.

Narapela samting i mekim na Jisas i stap Bikpela Tisa i olsem: Em i laikim ol man. Em i laik helpim ol man long kisim save long God. Jisas i laikim ol manmeri i bikpela pinis, tasol em i laikim ol pikinini tu. Na ol pikinini i amamas long stap wantaim Jisas, long wanem, em i save toktok long ol na harim tok ol i mekim.

Wanpela taim, sampela papamama i bringim ol liklik pikinini bilong ol i go long Jisas. Tasol ol pren bilong Jisas i ting Bikpela Tisa em i bisi tumas na em i no gat taim bilong toktok wantaim ol liklik pikinini. Olsem na ol i tokim ol papamama long kisim ol pikinini i go bek. Tasol Jisas i tok wanem?— Jisas i tok: “Yupela larim ol pikinini i kam long mi. Yupela i no ken pasim ol.” Yes, Jisas i laik bai ol liklik pikinini i kam long em. Olsem na maski em i bikman na em i gat bikpela savetingting, Jisas i bin lusim haptaim bilong skulim ol liklik pikinini.—Mak 10:​13, 14.

Yu save long as na Jisas i bin skulim ol pikinini na harim tok ol i mekim? Wanpela as i olsem: Em i laik amamasim ol long rot bilong tokim ol long sampela samting long God, em Papa bilong em long heven. Olsem wanem yu inap mekim ol man i amamas?— Long rot bilong tokim ol long ol samting yu bin kisim save long en long God.

Wanpela taim, Jisas i skulim ol pren bilong em long wanpela bikpela samting long rot bilong wanpela liklik pikinini. Em i kisim dispela pikinini na sanapim em namel long ol disaipel bilong Em. Orait nau Jisas i tok olsem ol dispela bikpela man i mas senisim pasin bilong ol na kamap olsem dispela liklik pikinini.

Wanem mining bilong dispela tok Jisas i mekim? Yu save long olsem wanem wanpela bikpela man o bikpela pikinini inap kamap olsem liklik pikinini?— Liklik pikinini i no gat bikpela save olsem man i bikpela pinis, olsem na em i gat laik long kisim save. Olsem na Jisas i tok ol disaipel i mas mekim pasin daun, olsem ol liklik pikinini. Yes, yumi olgeta inap lainim planti samting long ol arapela man. Na yumi olgeta i mas save olsem ol samting Jisas i skulim yumi long en ol i bikpela samting moa, winim tingting bilong yumi yet.—Matyu 18:​1-5.

Narapela samting i mekim na Jisas em i Bikpela Tisa i olsem: Em i gat save long skulim ol man long pasin i kirapim tingting bilong ol. Em i stori gut long ol samting long pasin i no hatwok long ol man i kliagut long en. Em i stori long ol pisin na ol plaua na ol arapela samting bilong helpim ol man long kisim save long God.

Wanpela taim Jisas i stap long wanpela maunten, na planti manmeri i kam long em. Jisas i sindaun na i mekim tok long ol, olsem yu ken lukim long piksa hia. Ol i kolim dispela tok olsem bikpela tok Jisas i mekim antap long maunten. Em i tok: ‘Yupela lukim ol pisin. Ol i no save planim kaikai. Ol i no save bungim kaikai long ol haus. Tasol God long heven i save givim kaikai long ol. Ating yupela i no winim tru ol pisin, a?’

Jisas i tok tu olsem: ‘Yupela lukim gut ol plaua. Ol i kamap, na ol i no hatwok. Na lukim gutpela bilas bilong ol! King Solomon i gat planti samting tru, tasol bilas bilong ol plaua i winim tru bilas bilong em. Olsem na sapos God i save lukautim gut ol plaua, em bai lukautim yupela tu.’—Matyu 6:​25-33.

Yu kliagut long samting Jisas i laik skulim yumi long en?— Em i no laik bai yumi wari long olsem wanem yumi bai kisim kaikai na klos. God i save olsem yumi mas i gat ol dispela samting. Jisas i no tok olsem yumi no ken mekim wok bilong kisim kaikai na klos, nogat. Em i tok yumi mas putim God i stap namba wan. Sapos yumi mekim olsem, God bai helpim yumi na bai yumi gat kaikai na klos. Yu bilipim dispela tok?—

Taim Jisas i pinisim tok bilong em, ol manmeri i ting olsem wanem?— Baibel i tok ol i kirap nogut tru long pasin bilong em long skulim man. Ol i amamas tru long harim tok bilong em. Ol tok em i mekim i helpim ol man long mekim stretpela pasin.—Matyu 7:28.

Olsem na em i bikpela samting tru long yumi mas kisim skul long Jisas. Yu save long rot bilong mekim olsem?— Ol tok bilong em i stap long wanpela buk. Yu save long nem bilong dispela buk?— Em Baibel Holi. Dispela i makim olsem yumi inap harim tok bilong Jisas taim yumi putim tingting i go long ol tok yumi ritim long Baibel. Baibel i gat wanpela gutpela stori long olsem wanem God yet i tokim yumi long harim tok bilong Jisas. Orait, yumi ken stori long samting i bin kamap.

Wanpela taim Jisas i kisim tripela pren bilong em i go antap tru long wanpela maunten. Nem bilong ol em Jems, Jon, na Pita. Bihain yumi bai kisim sampela save moa long ol dispela man, long wanem, tripela wantaim ol i gutpela pren bilong Jisas. Tasol long dispela taim, pes bilong Jisas i lait tru. Na klos bilong em i lait nogut tru, olsem yu ken lukim long piksa hia.

Bihain liklik, Jisas na ol pren bilong em i harim wanpela nek i kamap long heven. Dispela nek i tok: “Dispela em i Pikinini bilong mi, mi laikim em tumas, na mi amamas long em. Yupela harim tok bilong em.” (Matyu 17:​1-5) Yu save em nek bilong husat?— Em nek bilong God! Yes, God yet i tok long ol i mas harim tok bilong Pikinini bilong em.

Olsem wanem long yumi long nau? Bai yumi bihainim tok bilong God na harim tok bilong Pikinini bilong em, Bikpela Tisa?— Em samting yumi olgeta i mas mekim. Yu tingim yet rot bilong mekim olsem?—

Yes, yumi inap harim tok bilong Pikinini Bilong God taim yumi ritim ol stori bilong Baibel long laip bilong em. I gat planti gutpela samting em Bikpela Tisa i laik tokim yumi long en. Yu bai amamas long kisim save long ol dispela samting i stap long Baibel. Na tu, yu bai kisim amamas sapos yu tokim ol pren bilong yu long ol gutpela samting yu lainim.