Ol Man i Mekim Wok Bilong “God Bilong Amamas” Ol i Ken Amamas

 1. Bilong wanem ol manmeri i lotuim Jehova i save amamas? (Lukim piksa long kirap bilong stadi.)

OL WITNES BILONG JEHOVA ol i lain bilong amamas. Long ol miting, ol kibung, na ol bung bilong amamas yu inap lukim ol i toktok na lap wantaim. Bilong wanem ol i stap amamas tru? Nambawan risen em olsem, ol i kisim save long Jehova, mekim wok bilong em, na ol i wok strong long bihainim pasin bilong em, em “God bilong amamas.” (1 Tim. 1:11; Sng. 16:11) God em As bilong amamas, olsem na em i laik bai yumi tu i amamas, na em i givim yumi planti samting bilong mekim yumi amamas.—Lo 12:7; Sav. 3:12, 13.

2, 3. (a) Amamas em wanem samting? (b) Wanem ol samting inap mekim na yumi no stap amamas?

² Olsem wanem long yu yet? Yu stap amamas? Yu inap mekim amamas bilong yu i go bikpela? Dispela tok amamas inap makim “pasin bilong i stap gut long olgeta taim, stap belgut na man i amamas tru long i stap laip, na em i gat bikpela laik long i stap olsem tasol.” Baibel i kamapim klia olsem man inap stap amamas tru taim Jehova i blesim em. Tasol i hatwok long ol manmeri i stap amamas long nau. Bilong wanem?

³ Taim nogut i save painim yumi olgeta na dispela inap pinisim amamas bilong yumi. Olsem, taim wanpela yumi laikim tru i dai o em i raus long kongrigesen, o yumi kisim divos, o bos i pinisim yumi long wok. Hevi insait long famili na pasin bilong i no toktok gut wantaim inap pinisim amamas bilong yumi. Ating ol wanwok o wanklas i tok bilas long yumi, ol man i birua long ol wok lotu bilong yumi, o ol i kalabusim yumi. Olgeta dispela samting inap pinisim amamas bilong yumi. Na tu, taim helt bilong yumi i wok long go nogut, o yumi sik inap longpela taim, o yumi kisim sik dipresen, dispela inap pinisim amamas bilong yumi. Maski i olsem, Jisas Krais em “dispela man bilong amamas, em tasol i Bikpela King,” na em i amamas long helpim ol manmeri long i stap bel isi na stap amamas. (1 Tim. 6:15; Mat. 11:28-30) Long Bikpela Tok Long Maunten, Jisas i kolim sampela pasin em yumi mas bihainim bambai yumi stap amamas maski yumi bungim ol hevi long graun bilong Satan.

4, 5. (a) Olsem wanem yumi inap amamas? (b) Olsem wanem amamas bilong yumi i no inap pinis?

⁴ Namba 1 samting Jisas i kolim em bikpela samting, em i tok: “Ol man i hangre long kisim save long God, ol i ken amamas, long wanem, Kingdom bilong heven em i bilong ol.” (Mat. 5:3) Olsem wanem yumi inap soim olsem yumi laik tru long kisim save long God? Yumi mas kisim kaikai bilong strongim bilip, laikim ol pasin em God i as bilong en, na putim wok bilong lotuim God bilong amamas i stap nambawan samting. Sapos yumi mekim olsem, amamas bilong yumi bai go bikpela. Dispela bai strongim bilip bilong yumi olsem klostu nau God bai truim ol tok promis bilong em. Na tu, Baibel i stori long ol “gutpela samting yumi bilip long en” na dispela bai strongim yumi.—Tai. 2:13.

⁵ Yumi mas strongim pasin pren bilong yumi wantaim Jehova na bai amamas bilong yumi i no inap pinis. Aposel Pol i tok: “Amamas oltaim long Bikpela. Mi tok gen, yupela i mas amamas!” (Fili. 4:4) Sapos yumi laik stap pren bilong God, yumi mas kisim savetingting i kam long em. Baibel i tok: “Man i kisim gutpela tingting na save, em i ken amamas tru. Gutpela tingting i olsem diwai bilong givim laip. Olsem na ol man i holimpas gutpela tingting, ol i gat laip i gutpela tru na ol i amamas.”—Snd. 3:13, 18.

 6. Sapos yumi laik stap amamas oltaim, yumi mas mekim wanem?

⁶ Yumi mas ritim Tok Bilong God na bihainim ol dispela tok, na dispela bai helpim yumi long i stap amamas oltaim. Tok Jisas i mekim i soim olsem yumi mas bihainim ol tok yumi lainim. Em i tok: “Yupela save long ol dispela samting, olsem na yupela bai amamas sapos yupela i mekim ol dispela samting.” (Jon 13:17; ritim Jems 1:25.) Dispela em i bikpela samting long helpim yu long kisim save long God na stap amamas oltaim. Tasol olsem wanem yumi inap i stap amamas sapos planti hevi i kamap na dispela inap pinisim amamas bilong yumi? Yumi bai skelim narapela tok Jisas i mekim long Bikpela Tok Long Maunten.

 7. Olsem wanem ol lain i bel hevi inap amamas?

⁷ “Ol man i bel hevi tru, ol i ken amamas, long wanem, bai i gat man i mekim gut bel bilong ol.” (Mat. 5:4) Ating sampela inap givim kain askim olsem, ‘Olsem wanem man i bel hevi inap stap amamas?’ Taim Jisas i mekim dispela tok, em i no tok long ol man husat i bel hevi long kain kain risen. Ol man nogut tu i bel hevi long ol hevi i painim ol long dispela “taim nogut” na i “givim hatwok long ol.” (2 Tim. 3:1) Tasol pasin bilong ol long tingim ol yet na bel hevi i no helpim ol long i go klostu long Jehova; olsem na ol i no stap amamas. Ating Jisas i tingim ol lain husat i laik tru long kisim save long God, na ol i bel hevi long lukim ol manmeri i givim baksait long God na mekim ol pasin nogut tru. Ating ol i luksave olsem ol i gat sin na ol i lukim ol hevi i kamap long pasin nogut ol manmeri i mekim. Jehova i tingim tru ol man husat i bel hevi long lukim ol pasin nogut bilong dispela graun. Em i save mekim gut bel bilong ol na givim kaikai bilong strongim bilip bilong ol, na ol i stap amamas, na ol i bilip na wet long kisim laip oltaim long bihain.—Ritim Esekiel 5:11; 9:4.

 8. Stori long olsem wanem pasin isi inap strongim pasin bilong amamas?

⁸ “Ol man i bihainim pasin isi, ol i ken amamas, long wanem, ol bai kisim graun olgeta.” (Mat. 5:5) Olsem wanem pasin isi inap strongim pasin bilong i stap amamas? Bihain long man i kisim save long tok i tru, em i save senisim ol pasin bilong em. Ating pastaim em i gat hatpela pasin, na em i save tok pait na belhat kwik. Tasol nau em i kisim ol “nupela pasin,” na em i soim “bikpela pasin sori, pasin helpim, pasin daun, pasin isi, na pasin bilong i no les kwik.” (Kol. 3:9-12) Olsem na em i stap bel isi, laikim ol narapela, na em i stap amamas. Baibel i tok promis olsem ol manmeri i kamapim ol dispela pasin, ol bai “kisim graun olgeta.”—Sng. 37:8-10, 29.

 9. (a) Olsem wanem ol manmeri i bihainim pasin isi inap “kisim graun olgeta”? (b) Bilong wanem “ol man i hangre long stretpela pasin” bai stap amamas?

⁹ Olsem wanem ol man i gat pasin isi “ol bai kisim graun olgeta”? Taim ol Kristen God i bin makim i mekim wok king na pris long heven na bosim graun, i olsem ol i kisim graun olgeta. (Rev. 20:6) Tasol planti milion manmeri em ol bai kisim laip long graun, ol bai kisim graun olgeta taim ol i stap oltaim long en, na ol bai kamap gutpela olgeta, stap bel isi, na stap amamas. Ol dispela manmeri i amamas bikos ol i “hangre long stretpela pasin.” (Mat. 5:6) Long nupela taim, stretpela pasin tasol bai i stap na dispela bai inapim laik bilong ol man i hangre long stretpela pasin. (2 Pita 3:13) Taim God i pinisim olgeta pasin nogut, ol stretpela manmeri bai stap amamas oltaim bikos pasin bilong brukim lo na olgeta kain pasin i no stret bai pinis olgeta.—Sng. 37:17.

10. Dispela tok marimari i makim wanem samting?

¹⁰ “Ol man bilong marimari, ol i ken amamas, long wanem, ol arapela bai i marimari long ol.” (Mat. 5:7) Wanpela tok Hibru ol i tanim olsem marimari i makim “samting i gutpela, pilim tru long bel; . . . pasin bilong sori tru long narapela.” Olsem tasol, tok Grik ol i tanim olsem marimari i makim tu pasin bilong sori tru long narapela. Tasol pasin bilong marimari i no makim samting man i pilim long bel tasol, nogat. Long Baibel, dispela tok marimari i makim tu man i mekim sampela samting bilong soim olsem em i sori tru long narapela.

11. Yumi inap kisim wanem skul long tok piksa bilong man Samaria?

¹¹ Ritim Luk 10:30-37. Tok piksa Jisas i mekim long man Samaria i kamapim klia pasin marimari em wanem samting. Pasin sori i kirapim man Samaria long mekim samting bilong helpim man Juda husat i kisim bagarap long han bilong ol birua. Bihain long Jisas i mekim dispela tok piksa, em i tok: “Yu go na yu tu i mas mekim wankain pasin.” Olsem na yumi ken askim yumi yet: ‘Mi mekim wankain pasin? Mi soim pasin sori long ol narapela olsem man Samaria i mekim? Mi inap mekim sampela samting bilong soim pasin sori na pasin helpim long ol lain husat i karim pen na hevi? Olsem, mi inap helpim ol bratasista i lapun, ol wido, na ol pikinini em papamama i no stap long tok i tru? Mi inap go pas long mekim tok we i “mekim gut bel bilong ol man i bel hevi”?’—1 Tes. 5:14; Jems 1:27.

12. Olsem wanem yumi kisim amamas taim yumi soim pasin sori long ol narapela?

¹² Olsem wanem yumi kisim amamas taim yumi soim pasin sori long ol narapela? Taim yumi soim pasin sori long ol narapela, yumi kisim amamas long pasin bilong givim samting long ol. Bikpela samting em yumi mekim Jehova i amamas. (Apo. 20:35; ritim Hibru 13:16.) King Devit i stori long man husat i save tingim ol narapela, na em i tok: “God bai i lukautim em na strongim laip bilong em. Bikpela bai i mekim em i stap gut long ples bilong em.” (Sng. 41:1, 2) Na tu, taim yumi soim pasin sori long ol narapela, Jehova bai marimari long yumi. Long dispela rot, yumi inap stap amamas inap oltaim oltaim.—Jems 2:13.

13, 14. Olsem wanem ol man i stap klin long bel inap stap amamas?

¹³ Jisas i tok: “Ol man em bel bilong ol i stap klin, ol i ken amamas, long wanem, ol bai i lukim God.” (Mat. 5:8) Sapos yumi laik bai bel bilong yumi i stap klin, orait laik na tingting tu i mas i stap klin na yumi mas laikim ol gutpela na stretpela pasin. Tingting bilong yumi i mas stap klin bambai yumi inap lotuim Jehova long klinpela bel na gutpela maus bilong bel.—Ritim 2 Korin 4:2; 1 Tim. 1:5.

¹⁴ Ol lain em bel bilong ol i stap klin, ol i amamas bikos Jehova i orait long ol, na em i tok: “Ol man i wasim longpela klos bilong ol, ol i ken amamas.” (Rev. 22:14) Bilong wanem Baibel i tok ol i “wasim longpela klos bilong ol”? Ol Kristen God i bin makim i “wasim longpela klos bilong ol,” na dispela i makim olsem ol i stap klin long ai bilong Jehova na ol bai kisim laip olsem spirit na ol i no inap i dai moa, na ol bai stap amamas inap oltaim oltaim long heven. Ol lain husat i bilip na wet long kisim laip oltaim long graun, ol tu inap stap pren bilong God na pas gut wantaim em. Long nau, ol i “wasim longpela klos bilong ol long blut bilong Pikinini Sipsip na klos bilong ol i kamap waitpela.”—Rev. 7:9, 13, 14.

15, 16. Olsem wanem ol lain i stap klin long bel i “lukim God”?

¹⁵ “Sapos wanpela man i lukim pes bilong [God] bai em i dai.” Tasol olsem wanem ol lain i stap klin long bel inap “lukim God”? (Kis. 33:20) Tok Grik ol i tanim olsem “lukim” inap makim “pasin bilong lukim samting long ai bilong tingting, luksave, o save.” Ol lain em ‘bel bilong ol i op na ol i lukim pinis’ God, em ol manmeri husat i save gut tru long em na amamas long ol pasin bilong em. (Efe. 1:18) Jisas i bihainim gut tru ol pasin bilong God, olsem na em i tok: “Man i lukim mi, em i lukim Papa tu.”—Jon 14:7-9.

¹⁶ Ol manmeri i lotu tru long God i “lukim God” taim ol i kisim save long ol pasin bilong em, na ol i lukim ol samting em i mekim bilong helpim ol. (Jop 42:5) Na tu, ol i “lukim God” taim ‘bel bilong ol i op na ol i lukim pinis’ ol gutpela blesing em God bai givim long ol manmeri husat i wok strong long i stap klin na ol i stap gut long God na mekim wok bilong em. Ol Kristen God i bin makim ol bai lukim Jehova taim ol i kisim laip long heven.—1 Jon 3:2.

17. Olsem wanem pasin bilong mekim i dai kros inap mekim yumi stap amamas?

¹⁷ Jisas i tok: “Ol man bilong mekim i dai kros, ol i ken amamas.” (Mat. 5:9) Ol lain husat i go pas long mekim i dai kros, ol i ken amamas. Disaipel Jems i tok: “Ol man husat i kamapim pasin wanbel i olsem ol i planim samting long taim bilong bel isi na ol bai kisim stretpela pasin olsem kaikai.” (Jems 3:18) Sapos yumi gat bel kros wantaim wanpela insait long kongrigesen o long famili, orait yumi ken askim God long helpim yumi long kamapim bel isi. Long dispela rot, holi spirit bilong Jehova, stretpela pasin, na pasin bilong amamas bai stiaim ol samting yumi mekim. Jisas i kamapim klia olsem em i bikpela samting long yumi mas i go pas long mekim i dai kros. Em i tok: “Sapos yu bringim ofa bilong yu i go long alta pinis na yu tingim brata bilong yu em i gat tok long yu, orait lusim ofa bilong yu long ai bilong alta na go. Pastaim stretim tok wantaim brata bilong yu na bihain, taim yu kam bek, orait givim ofa bilong yu.”—Mat. 5:23, 24.

18, 19. Bilong wanem ol Kristen i ken amamas maski ol man i mekim nogut long ol?

¹⁸ “Sapos nem bilong mi i stap long yupela na ol man i krosim yupela na mekim nogut long yupela na giaman na sutim kain kain tok nogut long yupela, orait yupela i ken amamas.” Wanem insait bilong tok bilong Jisas? Em i tok moa olsem: “Yupela i ken belgut na amamas tru, long wanem, pe bilong yupela long heven bai i bikpela tru. Ol man i bin mekim ol wankain pasin long ol profet i bin stap paslain long yupela.” (Mat. 5:11, 12) Taim ol man i paitim ol aposel na tokim ol long no ken autim tok, “ol aposel i lusim Sanhedrin na ol i go. Ol i amamas.” Ol i no amamas bikos ol man i paitim ol, nogat. Ol i amamas bikos “God i ting ol i gutpela inap long ol i ken kisim sem long nem bilong Jisas.”—Apo. 5:41.

¹⁹ Long nau tu, lain bilong Jehova i sanap strong na amamas maski ol traim i painim ol, o ol man i birua long ol bikos ol i holim nem bilong Jisas. (Ritim Jems 1:2-4.) Olsem ol aposel, yumi no save amamas taim ol man i mekim nogut long yumi. Tasol sapos yumi stap gut long Jehova, em bai helpim yumi long sanap strong na maski ol traim i kamap, yumi inap stap amamas yet. Olsem, long Ogas 1944, wanpela lain politik bilong gavman i bosim kantri na ol i salim Henryk Dornik na brata bilong em i go long kalabus. Tasol ol birua i tok: “I hatwok tru long fosim ol long mekim wanpela samting. Pasin bilong tupela long sanap strong na holimpas bilip i mekim na ol i amamas.” Brata Dornik i tok: “Mi no tingting long kisim biknem olsem man i holimpas bilip na i dai, nogat. Mi strongim bel na stap gut long Jehova maski mi karim pen na hevi, na dispela i mekim mi amamas. . . . Pasin bilong beten olgeta taim i helpim mi long i go klostu moa long Jehova, na tru tumas em i stap gutpela Helpim bilong mi.”

20. Bilong wanem yumi amamas long mekim wok bilong “God bilong amamas”?

²⁰ Taim yumi save olsem “God bilong amamas” i orait long yumi, yumi bai stap amamas maski ol man i birua long bilip bilong yumi, ol wanfamili i mekim nogut long yumi, yumi sik, o yumi go lapun. (1 Tim. 1:11) Na tu, yumi amamas bikos yumi save long ol gutpela tok promis i kam long God, “em man i no inap giaman.” (Tai. 1:2) Em bai narakain samting tru taim Jehova i truim ol tok promis bilong em long bihain. Long dispela taim, yumi no inap tingim ol hevi na ol traim i painim yumi long nau. Long Paradais, Jehova bai kamapim ol gutpela blesing em yumi no bin ting bai kamap. Yumi bai kisim wanpela kain amamas i winim tru ol amamas yumi gat long nau. Yes, yumi bai “sindaun gutpela tumas na amamas i stap.”—Sng. 37:11.