Amamas Long Bung Bilong Ol Kristen
“Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim.”—HIBRU 10:24, 25.
1, 2. (a) Olsem wanem na em i gutpela samting tru long yumi inap i go long wanpela bung bilong ol Kristen tru? (b) Olsem wanem Jisas i stap long ol bung bilong ol disaipel bilong em?
EM I wanpela gutpela samting tru long yumi inap go long wanpela bung bilong ol Kristen, maski i gat 10-pela o sampela tausen i bung bilong lotuim Jehova, long wanem, Jisas i tok: “Sapos tupela o tripela man i kam bung long nem bilong mi, orait mi yet mi stap namel long ol”! (Matyu 18:20) Tru, taim Jisas i mekim dispela tok promis, em i toktok long ol hevi i save kamap insait long kongrigesen na ol elda i mas mekim stret ol samting bilong stretim dispela hevi. (Matyu 18:15-19) Tasol olsem wanem? Dispela tok bilong Jisas i stret tu long olgeta bung bilong ol Kristen em ol i save mekim beten bilong kirapim na pinisim dispela bung? Yes, tok bilong Jisas i stret long dispela tu, long wanem, taim em i givim wok long lain bilong em long kamapim ol disaipel, em i tok promis olsem: “Harim. Mi save stap wantaim yupela olgeta de, i go inap long dispela taim i pinis.”—Matyu 28:20.
2 Yumi save, Het bilong kongrigesen Kristen, em Bikpela bilong yumi Krais Jisas, em i save tingim tru olgeta bung bilong ol disaipel bilong em ol i stap gut long em. Na tu, yumi ken bilip tru olsem em i stap wantaim ol long rot bilong spirit holi. (Aposel 2:33; KTH 5:6) God Jehova tu i laik bai yumi mas bung wantaim long ol miting. Nambawan wok bilong ol dispela miting em bilong yumi ken litimapim nem bilong God “namel long ol manmeri i bung bilong lotu.” (Song 26:12) Taim yumi go long ol miting bilong kongrigesen, dispela i makim olsem yumi laikim em tru.
3. Wanem sampela bikpela as na yumi save amamas long ol miting Kristen?
3 I gat sampela gutpela as moa na yumi save amamas long ol miting Kristen. Taim Krais Jisas i laik lusim graun, em i makim ol disaipel bilong em long mekim wok olsem wanpela “wokboi i gat gutpela tingting,” bilong givim kaikai bilong spirit long ol wanlain bilipman long taim stret ol i mas kisim. (Matyu 24:45) Wanpela bikpela rot bilong givim dispela kaikai bilong spirit long yumi em long rot bilong ol miting bilong kongrigesen na ol bikpela bung, olsem ol liklik kibung na bikpela kibung. Bikpela bilong yumi Krais Jisas i save stiaim dispela wokboi i gat gutpela tingting, na long ol dispela kain bung dispela wokboi i save givim ol bikpela tok long olgeta manmeri ol i laik abrusim bagarap taim God i pinisim dispela pasin nogut bilong nau, na ol inap kisim laip long nupela taim God bai kamapim, i gat stretpela pasin tasol bai stap long en.
4. Baibel i toktok long wanem pasin em inap bagarapim yumi? Wanem samting bai helpim yumi long abrusim dispela pasin?
4 Olsem na ol Kristen i no ken kisim pasin em inap bagarapim ol, em dispela pasin aposel Pol i tok long en, olsem: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.” (Hibru 10:24, 25) Sapos yumi tingim gut long bel ol gutpela samting yumi kisim taim yumi go long ol miting Kristen, dispela bai helpim yumi long givim bel olgeta long go long ol dispela miting.
Ol Miting i Save Strongim Yumi
5. (a) Toktok bilong yumi i mas mekim wanem long ol narapela long miting? (b) Bilong wanem yumi no ken lusim taim long singautim ol nupela man i kam long ol miting?
5 Ol Kristen i save beten bambai spirit holi i ken i stap long ol miting Kristen, olsem na olgeta wan wan i stap long miting ol i mas wok strong long mekim ol samting i stret wantaim dispela spirit na “no ken givim bel hevi long Holi Spirit bilong God.” (Efesus 4:30) Taim aposel Pol i raitim ol dispela tok, em i bin stori long stretpela pasin bilong toktok. Long olgeta taim ol tok yumi mekim i mas “strongim ol man i slek. Dispela kain tok i save bringim marimari bilong God i kam long ol man i harim.” (Efesus 4:29) Em i bikpela samting tru long yumi mas mekim olsem long ol miting Kristen. Long pas Pol i raitim long ol Korin, em i tok strong long ol i mas kamapim ol tok long miting i save strongim ol man, na givim save long ol, na strongim bel bilong ol. (1 Korin 14:5, 12, 19, 26, 31) Ol kain miting olsem i save helpim olgeta wan wan i stap long miting, na ol nupela man tu, em ol bai tingting: “Tru tumas, God i stap namel long yupela.” (1 Korin 14:25) Long dispela as, yumi no ken lusim taim long singautim ol nupela man i kam bung wantaim yumi, long wanem, sapos ol i mekim olsem, dispela inap helpim ol long kamap strong hariap long ol samting bilong spirit.
6. Wanem samting i save mekim na ol miting i strongim ol brata sista?
6 Olgeta brata sista i bin kisim wanpela tok bilong mekim, o ol i mas insait long sampela tok, o mekim ol soim long ol miting Kristen, ol i mas was gut na bai tok bilong ol i strongim ol manmeri i harim, na dispela tok i stret wantaim ol tok bilong God long Baibel. Yumi mas mekim ol tok i stret, na tu, yumi mas mekim ol pasin i stret wantaim gutpela pasin sori bilong God na Krais. Olgeta brata i mekim tok long ol miting, sapos ol i tingting long mekim ol gutpela pasin em spirit holi bilong God i save kamapim, olsem amamas, i no belhat kwik, bilip, orait olgeta long miting ol bai pilim olsem dispela tok i bin strongim ol.—Galesia 5:22, 23.
7. Olgeta brata sista long miting ol inap mekim wanem bilong helpim miting na bai em i ken strongim ol narapela narapela?
7 Tru, wan wan tasol i save kisim wok bilong mekim ol tok long miting, tasol olgeta inap mekim sampela samting bilong helpim miting na bai em i ken strongim ol brata sista. Planti taim ol manmeri i sindaun harim ol tok ol i gat rot long bekim tok. Dispela em i taim bilong tokaut long bilip bilong yumi. (Rom 10:9) Tasol taim yumi bekim tok, yumi no ken kamapim ol tingting bilong yumi yet, o yumi hambak na stori long ol gutpela wok yumi yet i bin mekim, o yumi mekim ol tok i olsem yumi skelim pasin bilong wanpela wanbilip. Dispela pasin bai i givim bel hevi long spirit holi bilong God, a? Sapos i gat hevi namel long tupela wanbilip, i gutpela sapos tupela tasol i stap na stretim dispela hevi long pasin bilong sori. Baibel i tok: “Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol, olsem God i lusim sin bilong yupela long nem bilong Krais.” (Efesus 4:32) Ol miting Kristen i gutpela rot tru bilong yumi ken bihainim dispela tok bilong Baibel! Bilong mekim olsem, planti brata sista ol i save kam long miting paslain long taim miting i kirap, na taim miting i pinis ol i no save go hariap—ol i stap pastaim na toktok wantaim ol narapela. Dispela i save helpim ol nupela man tu, em ol i mas pilim olsem yumi amamas long ol i bin kam. Olsem na olgeta Kristen i dediket pinis ol i gat wok long ‘tingting long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol,’ na long dispela rot ol i helpim miting na em inap strongim ol narapela narapela.
Redim Gut Ol Tok Bilong Miting
8. (a) Sampela i gat wanem hatwok bilong i kam long ol miting? (b) Jehova em i wanem kain wasman?
8 Tru, sampela i no hatwok tumas long kam long ol miting Kristen, tasol sampela i gat hatwok long olgeta taim. Olsem: Sampela mama Kristen i mas mekim wok mani bilong helpim famili long ol samting bilong skin ol i mas kisim, na taim ol i kam bek long haus skin bilong ol i save les. Ating nau ol i mas redim kaikai na helpim ol pikinini long redi long go long miting. Na sampela Kristen ol i gat longwe rot long kam long miting, o ol i gat sik, o ol i lapun, na dispela i givim hatwok long ol. God Jehova i save long hevi bilong olgeta wan wan man na meri ol i save go oltaim long miting, wankain olsem gutpela wasman bilong sipsip i save long ol samting olgeta wan wan sipsip bilong em i mas kisim bilong helpim ol. Baibel i tok: “[Jehova] i save was gut long ol lain manmeri bilong en, olsem wasman bilong sipsip i save lukautim ol sipsip bilong en. Wasman i save putim ol pikinini sipsip long bros na karim wokabaut. Na em i save wokabaut isi na soim rot long ol sipsip i gat liklik pikinini.”—Aisaia 40:11.
9, 10. Yumi ken mekim wanem na bai ol miting inap helpim gut yumi?
9 Ol brata sista i gat ol bikpela wok o sampela hevi bilong skin na ol i mas taitim bun tru bilong go oltaim long miting, ating ol i no inap lusim bikpela hap taim long stadi na redim ol tok bai kamap long miting. Tasol taim ol i kaunim ol hap bilong Baibel em sedyul i makim bilong olgeta wik, orait Skul Bilong Wok Autim Tok bai helpim gut ol. Na i wankain tu long ol narapela miting, olsem Stadi Wastaua na Buk-Stadi Bilong Kongrigesen—sapos ol i redim gut ol tok bai kamap long ol dispela miting, dispela bai helpim gut ol. Ol brata sista i mas lusim bikpela hap taim long mekim ol wok bilong lukautim famili, sapos ol i kaunim ol tok ol bai stadi long en long miting, na lukim sampela ves bilong Baibel ol i makim, dispela bai helpim ol long insait long ol dispela bikpela tok bilong Baibel ol brata bai kamapim long miting.
10 Sampela brata sista i no gat planti wok samting i pasim ol, ol inap lusim bikpela hap taim moa long redim ol tok bai kamap long miting. Olsem: Ol i ken skelim gut ol ves bilong Baibel i stap long paragraf em ol i no bin kamapim tok bilong en. Long dispela rot olgeta i ken redi gut long mekim ol tok bilong ol o bekim sampela tok, na nau ol miting inap helpim gut ol na ol i ken insait long wok bilong strongim kongrigesen. Taim ol elda na wokman i redim gut ol tok bai kamap long miting, ol bai stap olsem gutpela piksa long pasin bilong bekim ol sotpela tok na ol i no bilasim tumas. Ol manmeri i sindaun long miting ol bai tingim ol gutpela kaikai bilong spirit Jehova i givim long ol, olsem na long taim bilong miting ol bai abrusim ol pasin i save pulim tingting bilong ol narapela.—1 Pita 5:3.
11. Bilong wanem yumi mas bosim gut skin bilong redim ol tok samting bai kamap long miting?
11 Ol wok na amamas i no save helpim yumi long i stap strong long spirit, ol inap kisim bikpela hap taim bilong yumi. Sapos olsem, orait yumi mas skelim yumi yet na “no ken mekim ol kranki pasin” long lusim nating taim bilong yumi. (Efesus 5:17) Yumi mas tingting olsem yumi bai lusim sampela wok o amamas i no bikpela samting na i save pinisim nating taim bilong yumi, na nau bai yumi “gat taim” bilong stadi long Baibel na redim ol tok bai kamap long miting, na mekim wok bilong autim tok bilong Kingdom. (Efesus 5:16) Tru, sampela taim i hatwok long mekim olsem, na yumi mas bosim gut skin. Ol yangpela i save skelim gut ol hap taim bilong ol na ol i no larim dispela taim i lus nating, dispela bai helpim ol long kamap strong long bihain. Pol i tokim yangpela poroman bilong em, Timoti: “Oltaim yu mas lukautim gut ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim pasin bilong yu yet i kamap gutpela tru.”—1 Timoti 4:15.
Sampela Manmeri i Stap Olsem Gutpela Piksa
12 Tingim gutpela pasin bilong famili bilong Samuel, em olgeta taim ol i bihainim pasin bilong bung wantaim ol wanlotu bilong ol taim haus lotu sel i stap long Silo. Ol man tasol i mas i go long bung bilong ol bikpela de bilong lotu i save kamap long olgeta yia. Tasol papa bilong Samuel, em Elkana, em i save kisim famili bilong em olgeta i go wantaim em taim em “i save lusim taun bilong en na i go long ples Silo na mekim lotu na ol ofa long Bikpela I Gat Olgeta Strong.” (1 Samuel 1:3-5) Ples bilong Samuel, em Rama, ating em i stap klostu long nambis long ples nau ol i kolim Rentis, klostu long “ples maunten bilong Efraim.” (1 Samuel 1:1) Olsem na bilong i go long Silo, ol i mas wokabaut inap 30 kilomita samting, em hatwok long wokabaut longwe olsem long dispela taim bipo. Tasol famili bilong Elkana i bin mekim olsem long olgeta yia, “taim [ol] i go long haus bilong Bikpela.”—1 Samuel 1:7.
13. Taim Jisas i stap long graun, ol Juda i stap gut long God ol i mekim wanem na ol i stap olsem gutpela piksa?
13 Jisas tu i go bikpela insait long wanpela bikpela famili. Long olgeta yia em wantaim famili bilong em i save lusim Nasaret na wokabaut i go long hap saut inap 100 kilomita bilong go long bung bilong Pasova long Jerusalem. Yumi ken ting i gat tupela rot ol inap bihainim. Bilong i go stret long Jerusalem, ol i mas wokabaut i go daun long maunten i go long ples daun bilong Megido na bihain ol i mas wokabaut i go antap inap 600 mita na brukim graun bilong ol Samaria na go kamap long Jerusalem. Na narapela rot em planti man i bihainim, em dispela rot Jisas i bin wokabaut long en taim em i mekim laspela raun bilong em i go long Jerusalem long yia 33 C.E. Bilong mekim olsem, em i mas wokabaut i go daun long ples daun bilong Jordan daunbilo long mak bilong solwara, na bihain em i kamap long “hap bilong distrik Judia . . . long hapsait bilong wara Jordan.” (Mak 10:1) Kirap long dispela hap, “rot . . . i go long Jerusalem” em longwe olsem 30 kilomita, na em i mas wokabaut i go antap inap olsem 1,100 mita. (Mak 10:32) Long olgeta taim i gat bung bilong ol bikpela de bilong lotu, planti manmeri tru ol i wokabaut long dispela longwe rot, kirap long Galili i go inap long Jerusalem. (Luk 2:44) Ol i stap olsem gutpela piksa tru bilong ol wokboi bilong Jehova long nau i stap long ol kantri i gat planti samting bilong skin na planti ol i no gat hatwok long i go long ol miting Kristen, long wanem, i gat ol ka na bas samting i stap!
14, 15. (a) Ana i bin mekim wanem na em i stap olsem gutpela piksa? (b) Gutpela tingting bilong sampela nupela man i save kam long miting em inap skulim yumi long wanem samting?
14 Na wanpela meri lapun i gat 84 krismas, nem bilong em Ana, em tu i stap olsem gutpela piksa. Baibel i tok em “i no save lusim tempel.” (Luk 2:37) Na tu, Ana i save tingim tru ol narapela. Taim em i lukim liklik pikinini Jisas na em i kisim save olsem dispela pikinini em Mesaia God i tok promis long salim i kam, em i mekim wanem? Em i tenkyu long God na em i kirap “autim tok bilong dispela pikinini long olgeta manmeri i wet long God i kisim bek ol manmeri bilong Jerusalem.” (Luk 2:38) Em i gat gutpela tingting tru na em i stap olsem gutpela piksa ol Kristen i ken bihainim long nau!
15 Tru tumas, yumi mas amamas tru long i go long ol miting, olsem na yumi no laik lusim wanpela, olsem Ana i no laik lusim. Planti nupela man ol i gat dispela tingting. Ol i bin lusim tudak na kam insait long gutpela lait bilong God, olsem na ol i laik kisim gutpela save long Baibel, na planti ol i kamapim bel bilong ol olsem ol i amamas tru long go long ol miting Kristen. Tasol sampela em ol i bin i stap longtaim long tok i tru, ol i mas was gut, nogut ol i lusim dispela laik ol i bin holim ‘taim ol i bilip nupela.’ (KTH 2:4) Tru, sampela ol i gat bikpela sik o narapela hevi, na sampela taim dispela i pasim ol na ol i no inap i go long miting. Tasol yumi no ken larim pasin bilong laikim tumas mani kago, o ol amamas, o pasin bilong les i mekim na yumi no redim ol tok bai kamap long miting, o yumi les na sindaun nating tasol, o yumi lusim sampela miting.—Luk 8:14.
Nambawan Gutpela Piksa
16, 17. (a) Jisas i gat wanem tingting long ol bung bilong lotu? (b) Wanem gutpela pasin olgeta Kristen i mas wok strong long bihainim?
16 Jisas em i nambawan gutpela piksa long pasin bilong laikim tru ol bung bilong lotu. Taim em i gat 12-pela krismas tasol, em i kamapim klia olsem em i laikim tumas haus bilong God i stap long Jerusalem. Papamama i no inap painim em, na ol i mekim mekim na bihain ol i painim em insait long haus bilong God, na em i toktok wantaim ol tisa long tok bilong Baibel. Papamama i tingting planti, tasol long gutpela pasin em i tokim tupela: “Ating yutupela i no save, mi mas i stap long haus bilong Papa bilong mi?” (Luk 2:49) Yangpela Jisas i daun long papamama na em i go bek wantaim tupela long Nasaret. Oltaim em i save go long haus lotu long Nasaret na long dispela rot em i kamapim klia olsem em i laikim yet ol miting bilong lotu. Olsem na taim em i kirap mekim wok bilong em long autim tok, Baibel i tok: “Jisas i go long Nasaret. Taim em i pikinini yet, em i stap long dispela taun, na em i bin kamap bikpela long en. Long de Sabat em i go insait long haus lotu, olsem em i save mekim oltaim. Em i sanap bilong ritim tok bilong God.” Taim Jisas i kaunim na kamapim klia tok bilong Aisaia 61:1, 2, ol manmeri i harim dispela tok ol i “tingting planti long ol gutpela tok em i autim.”—Luk 4:16, 22.
17 Ol miting Kristen long nau ol i bihainim wankain pasin olsem dispela. Bilong kirapim miting, ol i save mekim wanpela singsing bilong litimapim nem bilong God, na nau ol i mekim beten. Bihain long dispela ol i save kaunim na kamapim klia sampela ves bilong Baibel (o ol ves i stap long buk o nius ol i stadi long en). Ol Kristen tru i gat wok long bihainim gutpela pasin bilong Krais Jisas long go oltaim long ol bung bilong lotu. Sapos ol inap, ol i save amamas tru long go oltaim long ol miting Kristen.
Sampela Bilong Nau i Stap Olsem Gutpela Piksa
18, 19. Ol brata sista i stap long ol kantri i no gat planti samting bilong skin, olsem wanem ol i stap olsem gutpela piksa long pasin bilong go long ol miting na ol liklik na bikpela kibung?
18 Long sampela hap bilong graun i no gat planti samting bilong skin, planti brata sista bilong yumi ol i stap olsem gutpela piksa long laikim tru ol miting Kristen. Long Mosambik wanpela wasman distrik, Orlando, na meri bilong em, Amélia, ol i lusim 45 aua long wokabaut inap 90 kilomita long wanpela maunten i antap tru bilong go long wanpela kibung. Na ol i mas go bek gen long wankain rot bilong mekim wok long narapela kibung. Long pasin daun Orlando i tok: “Taim mipela i bungim ol brata bilong Kongrigesen Bawa, mipela i pilim olsem mipela i no bin mekim wanpela bikpela samting. Bilong kam long kibung na go bek long ples bilong ol, ol i mas wokabaut long lek inap 400 kilomita, inap 6-pela de olgeta, na wanpela brata namel long ol em i gat 60 krismas!”
19 Na olsem wanem long pasin bilong amamas long go long ol miting bilong kongrigesen? Kashwashwa Njamba em i wanpela sista i winim pinis 70 krismas, na skin bilong em i no strong. Em i save sindaun long Kaisososi, em wanpela liklik ples i stap longwe long Haus Kingdom inap olsem 5-pela kilomita, long Rundu, long hap bilong Namibia. Bilong go long ol miting, em i mas wokabaut inap 10-pela kilomita i go i kam long bus. Long dispela rot bilong bus, sampela i bin kisim nogut long han bilong ol lain olsem raskol, tasol Kashwashwa i save go yet long ol miting. Ol i save mekim planti miting long ol tok ples em i no save harim. Olsem na ol dispela miting i helpim em olsem wanem? Kashwashwa i tok: “Mi save bihainim ol skripsa bilong save ol i toktok long wanem samting.” Tasol em i no save long rit. Olsem wanem na em inap bihainim ol skripsa? Kashwashwa i tok: “Mi putim gut yau bilong harim ol skripsa mi save pinis long tok bilong ol.” Inap planti yia em i bin putim planti tok bilong Baibel long tingting bilong em na em i holim yet i stap. Bilong lain long mekim gut wok long Baibel, em i insait long wanpela skul bilong rit rait em kongrigesen i putim. Em i tok: “Mi save laik tru long go long ol miting. Long olgeta taim i gat ol nupela tok bilong lainim. Mi save laik tru long bung wantaim ol brata sista. Tru, mi no inap toktok wantaim olgeta, tasol oltaim ol i save kam na sekanim mi. Na bikpela samting tru, mi save taim mi go long miting mi mekim bel bilong Jehova i amamas.”
20. Bilong wanem yumi no ken lusim pasin bilong go long ol bung Kristen bilong yumi?
20 Wankain olsem Kashwashwa, planti manmeri bilong olgeta hap i save lotuim Jehova ol i kamapim klia olsem ol i amamas long go long bung bilong ol Kristen. Klostu nau bagarap bai painim dispela graun bilong Satan, olsem na yumi no ken lusim pasin bilong bung wantaim ol brata. Nogut yumi slip long ol samting bilong spirit—yumi mas was i stap, na yumi mas amamas long ol miting na ol liklik na bikpela kibung. Dispela bai mekim bel bilong Jehova i amamas, na tu, dispela bai helpim yumi tru taim yumi wok yet long kisim ol tok God i skulim yumi long en, em ol tok i save bringim yumi long laip i stap oltaim.—Sindaun 27:11; Aisaia 48:17, 18; Mak 13:35-37.
Ol Askim Bilong Tingim Gen
◻ Olsem wanem na em i gutpela samting tru long yumi inap i go long ol bung bilong ol Kristen?
◻ Olgeta brata sista i kam long miting ol inap mekim wanem na bai miting i strongim ol narapela narapela?
◻ Krais Jisas i bin mekim wanem na em i stap olsem gutpela piksa tru?
◻ Pasin bilong ol brata i stap long ol kantri i no gat planti samting bilong skin, em inap skulim yumi long wanem samting?
12. Famili bilong Samuel i mekim wanem na ol i stap olsem gutpela piksa tru?
[Blok long pes 17]
Ol i Amamas Long Go Long Ol Miting
Long sampela bikpela taun, i gat planti milion manmeri ol i stap rabis na planti pasin raskol. Tasol maski i gat ol dispela hevi, ol Kristen tru i stap namel long ol, ol i kamapim klia olsem ol i save amamas long go long ol miting Kristen. Wanpela elda i stap long wanpela kongrigesen bilong Soweto long Gauteng, Saut Afrika, em i tok: “Long wanpela kongrigesen i gat 60 Witnes na pablisa i no baptais, na i gat olsem 70 o 80 samting i save kam long ol miting bilong mipela. Tru, ol brata sista i no gat longwe rot bilong kam long ol miting, tasol long dispela hap bilong Soweto i gat planti pasin nogut. Ol i bin sutim wanpela brata long naip long baksait bilong em taim em i wokabaut i go long miting. Na ol i bin holim tupela sista bilong kisim mani samting bilong ol. Tasol dispela i no save pasim ol long kam long miting. Long olgeta Sande, taim mipela i mekim pinis beten bilong pinisim miting, mipela i save lainim ol singsing inap 15 minit samting. Klostu olgeta i save stap na mekim olgeta singsing bai kamap long ol miting long wik antap. Dispela i save helpim ol nupela man long lainim ol singsing na ol inap singsing wantaim ol narapela.”
Ol manmeri i sindaun long bus ol i gat ol narapela kain hatwok, olsem ol i gat longwe rot bilong kam long ol miting inap 3-pela taim long olgeta wik. Tupela marit i laik harim tok bilong Baibel, ol i save sindaun longwe long Haus Kingdom long Lobatsi, Botswana, inap olsem 15 kilomita. Insait long yia i go pinis, ol i bin kam long olgeta miting wantaim tupela pikinini bilong ol. Papa bilong famili i save mekim wok mani long stretim ol su. Meri bilong em i save maket long sampela liklik samting bilong helpim famili bambai ol i ken baim rot bilong i go i kam long ol miting.
Wanpela taim long nait, taim ol i miting pinis wantaim wasman sekit, ol i sanap long ples bilong kisim bas. Em 9 klok long nait, tasol em i taim nogut bilong ren, olsem na ol bas i no pinisim raun bilong ol—ol i lusim hariap. Wanpela plisman i pasim ka bilong em na em i askim ol, ol i mekim wanem na ol i sanap long rot. Taim em i harim stori bilong ol, em i sori long ol na kisim ol long ka na draiv inap 15 kilomita i go lusim ol long haus bilong ol. Meri, em wanpela pablisa i no baptais, em i tokim man bilong em: “Em nau, sapos yumi putim ol miting i go pas long ol narapela samting, long olgeta taim Jehova bai wokim rot bilong yumi.” Nau man bilong em i tokaut olsem em tu i laik kamap man bilong autim gutnius.
[Piksa long pes 18]
Ol Witnes kain olsem ol dispela Witnes bilong Romenia ol i stap olsem gutpela piksa long pasin bilong laikim tru ol bung bilong ol Kristen