Tok Bilong Katim Marit na Laikim Ol Pikinini

Jisas wantaim ol disaipel bilong em i lusim Galili na ol i wokabaut i go brukim Wara Jordan, na ol i go long hap saut bilong Perea. Taim Jisas i stap long Perea, em i toktok wantaim ol Farisi long stretpela pasin bilong katim marit. (Luk 16:18) Na nau ol i kamapim gen dispela tok bilong traim Jisas.

Moses i bin tok man inap katim marit sapos em i “painim wanpela rong” long meri bilong em. (Lo 24:1) Ol man i gat narapela narapela tingting long pasin bilong katim marit. Sampela i ting dispela i makim olgeta liklik pasin kranki tu. Olsem na ol Farisi i askim Jisas: “Ating lo i orait long man i ken katim marit long olgeta kain samting o nogat?”—Matyu 19:3.

Bekim bilong Jisas i kamapim tingting bilong God long taim em i kamapim marit long pastaim tru. Em i tok. “Ating yupela i no ritim tok olsem man husat i bin wokim ol long pastaim tru, em i bin wokim ol i kamap man na meri? Na ating yupela i no bin ritim tok bilong em olsem: ‘Long dispela as man bai lusim papa na mama bilong en na pas wantaim meri bilong en, na tupela bai kamap wanpela bodi’? Tupela i no stap olsem tupela moa, ol i kamap wanpela bodi tasol. Olsem na samting God i pasim pinis, man i no ken katim.” (Matyu 19:4-6) Taim God i kamapim namba wan marit na em i givim Iv long Adam, em i no tok tupela i ken katim marit, nogat.

Ol Farisi i tok pait wantaim Jisas, na ol i tok: “Orait bilong wanem Moses i tok long man i ken givim setifiket bilong katim marit na rausim meri?” (Matyu 19:7) Jisas i tokim ol: “Het bilong yupela i strong, olsem na Moses i larim yupela i katim marit. Tasol long pastaim tru i no gat kain pasin olsem.” (Matyu 19:8) Dispela tok “pastaim tru” i no makim taim bilong Moses, nogat, em i makim dispela taim God i bin kamapim namba wan marit long gaden Iden.

Jisas i kamapim wanpela bikpela tok i tru, em i tok: “Mi tokim yupela, sapos meri i no mekim pasin pamuk [tok Grik, por·neia], na man i katim marit na maritim narapela meri, orait dispela man i mekim pasin adaltri.” (Matyu 19:9) Baibel i tokaut klia olsem dispela tasol em as na ol man i ken katim marit.

Ol disaipel i tok: “Sapos marit i olsem, ating i no gutpela long marit.” (Matyu 19:10) Tru tumas, taim man i laik marit, em i mas save olsem marit i bilong stap oltaim!

Nau Jisas i toktok long pasin bilong i stap singel. Em i tok sampela i no marit, long wanem, ol i gat bagarap long bodi taim mama i karim ol. Na sampela em ol man i bin katim ol na ol i no inap marit na kamapim pikinini. Maski i olsem, sampela i tambuim ol yet na ol i no laik marit na bai ol inap putim tingting olgeta i go long wok bilong Kingdom. Jisas i tokim ol man i harim tok bilong em olsem, “Man husat inap [stap singel], gutpela em i mekim olsem.”—Matyu 19:12.

Ol manmeri i kirap long bringim ol liklik pikinini bilong ol i kam long Jisas. Tasol ol disaipel i tok strong long ol manmeri, ating ol i laik bai Jisas i malolo, long wanem, em i mekim planti wok. Jisas i lukim dispela, na em i no amamas, em i tokim ol: “Larim ol pikinini i kam long mi, no ken pasim ol. Kingdom bilong God i bilong ol lain i kain olsem ol dispela pikinini. Mi tok tru long yupela: Man i no kisim Kingdom bilong God long wankain pasin olsem wanpela pikinini i save kisim ol samting, bai em i no inap i go insait long en, nogat tru.”—Mak 10:14, 15; Luk 18:15.

Yumi kisim gutpela skul! Bilong kisim Kingdom Bilong God, yumi mas bihainim pasin bilong ol liklik pikinini, ol i gat pasin daun na ol i larim ol arapela man i skulim ol. Orait nau Jisas i putim han bilong en antap long ol na blesim ol bilong soim olsem em i laikim tru ol. Na em i gat wankain pasin bilong laikim ol man i “kisim Kingdom bilong God long wankain pasin olsem wanpela pikinini.”—Luk 18:17.