I Gat Wanem As na Jisas i No Insait Long Wok Politik?

PIKSAIM long tingting samting i bin kamap long yia 32 C.E. Em apinun tru. Jisas, em dispela Mesaia God i bin tok promis long salim i kam, em i gat nem pinis olsem man bilong oraitim ol sikman na kirapim bek ol man i dai pinis. Long dispela de, em i bin wokim ol mirakel na autim tok bilong God na planti tausen manmeri i bin pilim tru. Orait nau Jisas i brukim dispela lain i hangre na putim ol long ol liklik grup. Em i beten long Jehova na long rot bilong mirakel em i givim kaikai long ol. Bihain em i bungim ol hap kaikai i stap yet na bai kaikai i no ken lus nating. Orait nau dispela lain i mekim wanem?​—Jon 6:​1-​13.

Taim ol i lukim pinis ol mirakel bilong Jisas na pasin bilong em long bosim ol bikpela lain na lukautim ol long ol samting ol i nidim, ol i ting Jisas i fit stret long kamap king bilong ol. (Jon 6:​14) Ol i gat dispela tingting, long wanem, ol i gat bikpela laik tru long kisim wanpela gutpela hetman husat inap helpim tru ol. Tingim: Narapela lain i bosim strong kantri bilong ol na mekim nogut long ol. Olsem na ol i traim subim Jisas long insait long wok politik. Tingim dispela samting, na nau tingim samting Jisas i mekim.

Jon 6:​15 i tok: “Jisas i harim dispela tok na em i save, ol i laik i kam holimpas em na mekim em i kamap king bilong ol. Olsem na em i lusim dispela ples na em wanpela tasol i go bek gen long maunten.” Dispela i kamapim klia tingting bilong em. Jisas i no laik tru long insait long ol wok politik bilong kantri bilong em. Em i no bin senisim tingting bilong em. Em i tok ol disaipel bilong em i mas bihainim wankain pasin. (Jon 17:16) Bilong wanem Jisas i gat dispela tingting?

As na Jisas i No Insait Long Wok Politik

Ol stiatok bilong Baibel i as na Jisas i no insait long ol wok politik bilong dispela graun. Tingim tupela stiatok.

“Sampela bikman i wok long daunim ol arapela manmeri na mekim nogut long ol.” (Saveman 8:9) Em tok Baibel i bin mekim long pasin bilong ol man long bosim ol arapela. Tingim, Jisas i bin stap wanpela spirit long heven paslain long em i kam daun long graun olsem man. (Jon 17:5) Olsem na em i save pinis olsem maski man i gat gutpela bel, em i no inap lukautim gut ol bilion bilion manmeri long ol samting ol i mas i gat, na em i save tu, God i no bin wokim man long mekim olsem. (Jeremaia 10:23) Jisas i save olsem ol gavman bilong graun i no inap stretim ol hevi bilong ol manmeri. I gat narapela rot bilong stretim ol hevi.

“Dispela graun olgeta em i stap aninit long strong bilong Satan.” (1 Jon 5:​19) Planti man i kirap nogut tru long dispela tok. Ol i tingim ol man i gat gutpela bel em ol i insait long wok politik, long wanem, ol i laik mekim dispela graun i kamap wanpela gutpela ples bilong stap long en. Tasol maski ol i givim bel tru long mekim dispela wok, ol i no inap sakim strong bilong dispela man em Jisas i kolim “hetman i save bosim dispela graun.” (Jon 12:31; 14:30) Dispela i as na Jisas i tokim wanpela man bilong politik: “Kingdom bilong mi em i no bilong dispela graun.” (Jon 18:36) Jisas em man bilong kamap King long gavman bilong God long heven. Sapos Jisas i bin insait long ol wok politik, dispela inap mekim na em i lusim gutpela pasin bilong em long stap gut long gavman bilong Papa bilong em.

Orait, yu ting Jisas i tokim ol disaipel bilong em long ol i no gat wok long bihainim tok bilong ol gavman bilong graun? Nogat. Em i tokim ol long holim stretpela tingting long wok bilong God ol i mas mekim, na long ol samting em ol gavman bilong graun i tok ol i mas mekim.

Jisas i Bin Rispek Long Ol Bikman Bilong Gavman

Taim Jisas i stap long tempel na skulim ol man, ol birua i givim wanpela trik askim long em olsem: “Yumi ken givim takis long Sisar, o nogat.” Sapos Jisas i tok nogat, ol inap ting bekim bilong em i makim olsem em i birua long gavman na i laik kirapim ol manmeri long bikhet na rausim ol Rom na bai ol i no ken bosim ol moa. Tasol sapos Jisas i tok yes, planti bai ting olsem em i orait long ol pasin nogut ol Rom i mekim long ol. Bekim bilong Jisas i kamapim gutpela savetingting. Em i tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Luk 20:​21-25) Olsem na i gat ol samting ol disaipel i mas givim long God na ol samting ol i mas givim long Sisar​—olsem gavman.

Ol gavman i putim ol lo na bai ol samting i ken ron gut. I stret ol i tokim ol sitisen long ol i mas bihainim stretpela pasin, baim takis, na bihainim ol lo. Olsem wanem Jisas i stap gutpela piksa long pasin bilong ‘givim samting long Sisar’? Papamama bilong Jisas i save bihainim lo, maski sampela taim dispela i putim hevi long ol. Olsem: Josep na meri bilong em, Maria, husat i gat bel, ol i wokabaut longwe tru, inap olsem 150 kilomita, long i go long Betlehem bambai ol inap bihainim lo bilong mekim sensas ol Rom i putim. (Luk 2:​1-5) Jisas tu i save bihainim lo, em i givim takis, maski i no gat wok long em i mekim olsem. (Matyu 17:​24-​27) Tasol em i no insait long samting em i no gat namba long mekim. (Luk 12:​13, 14) Yes, Jisas i save rispektim ol wok bilong gavman, tasol em i no insait long en. Orait, wanem mining bilong dispela tok bilong Jisas, “Samting bilong God, em yupela i mas givim long God”?

Long Wanem Rot Jisas i ‘Givim Samting Bilong God i Go Long God’?

Wanpela taim ol i askim Jisas long wanem lo i namba wan na i winim olgeta arapela lo em God i givim long man. Krais i bekim tok olsem: “‘Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.’ Dispela lo em i bikpela, na em i namba wan tru. Na namba 2 lo em i wankain olsem dispela. Em i olsem, ‘Yu mas laikim ol wantok olsem yu laikim yu yet.’” (Matyu 22:​37-​39) Jisas i skulim yumi olsem, namba wan samting yumi mas “givim long God,” em pasin bilong laikim em​—olsem givim bel olgeta long em na stap gut long em.

Olsem wanem? Yumi inap stap gut long God Jehova na gavman bilong em long heven na long wankain taim stap gut long wanpela gavman hia long graun? Jisas i kolim dispela stiatok: “I no gat wanpela man inap stap wokboi bilong tupela bosman. Em bai laikim wanpela na i no laikim narapela, o em bai pas long wanpela na les long narapela.” (Matyu 6:​24) Tru, Jisas i toktok long pasin bilong laikim God na mani wantaim, tasol i klia tru olsem em i ting dispela stiatok i stret tu long pasin bilong insait long wok politik. Ol disaipel bilong em long bipo ol tu i gat dispela tingting.

Sampela buk bilong bipo tru i kamapim klia olsem ol disaipel bilong Jisas long bipo i no save insait long wok politik. Ol i lotu long dispela Man em Jisas yet i lotu long en, olsem na ol i no givim hap lotu long gavman Rom na empera bilong en, o insait long ami na wok politik. Dispela i mekim na ol birua i mekim kain kain pasin nogut long ol. Sampela taim ol i sutim tok long ol olsem ol i birua long ol manmeri. Olsem wanem? Dispela tok i stret?

Ol Trupela Kristen i Save Tingim Tru Ol Man

Tingim namba 2 bikpela lo bilong God em Jisas i kolim​—“Yu mas laikim ol wantok olsem yu laikim yu yet.” I klia tru olsem ol disaipel tru bilong Krais ol i no inap birua long ol manmeri. Jisas i laikim tru ol manmeri, em i givim bikpela hap taim na strong bilong em long helpim ol, long ol samting bilong skin tu.​—Mak 5:​25-​34; Jon 2:​1-​10.

Tasol Jisas i gat nem long mekim wanem? Ol man i no kolim em olsem Man bilong oraitim ol sikman, o Man bilong givim kaikai long planti tausen manmeri, o Man bilong kirapim bek ol man i dai pinis, maski em i bin mekim ol dispela samting, nogat. Ol i save kolim em Tisa, na i stret ol i mekim olsem. (Jon 1:​38; 13:13) Jisas i kamapim klia olsem as na em i kam long graun, em bilong lainim ol man long Kingdom Bilong God.​—Luk 4:​43.

Long dispela as ol disaipel tru bilong Krais i save givim bel long mekim wankain wok olsem Bikman bilong ol i bin mekim taim em i stap long graun​—em wok bilong lainim ol man long gutnius bilong Kingdom Bilong God. Jisas Krais i givim wok long olgeta Kristen tru long skulim ol man long olgeta hap long Kingdom Bilong God. (Matyu 24:14; 28:​19, 20) Dispela gavman long heven bai bosim olgeta manmeri long pasin laikim. (Matyu 6:​9, 10; KTH 21:​3, 4) Olsem na Baibel i tok dispela tok bilong Krais em “gutnius”!​—Luk 8:1.

Olsem na sapos yu wok long painim ol disaipel tru bilong Jisas Krais long graun long nau, olsem wanem yu inap luksave long ol? Bai ol i insait long ol samting bilong wok politik bilong dispela graun? O bikpela wok ol i mekim em wankain olsem Jisas i bin mekim​—em wok bilong autim tok na skulim ol man long Kingdom Bilong God?

Olsem wanem? Yu laik kisim sampela save moa long Kingdom Bilong God na olsem wanem em inap helpim yu long nau? Mipela i singautim yu long lukim ol Witnes Bilong Jehova long hap bilong yu o lukim Web sait bilong ol, www.watchtower.org.

[Blok/Ol Piksa long pes 24]

Ol Witnes Bilong Jehova i Save Helpim Komiuniti?

Ol Witnes Bilong Jehova i no save insait long wok politik. Tasol ol i mekim bikpela wok tru bilong helpim ol man bilong olgeta kain skin na sindaun long komiuniti bilong ol. Tingim ol dispela samting:

◼ Ol Witnes Bilong Jehova ol i wanpela lain volantia, winim 7 milion, em ol i save lusim 1.5 bilion aua long olgeta yia long lainim ol man long ol tok bilong Baibel na long olsem wanem Baibel inap helpim ol long lusim ol pasin i save bagarapim man, strongim famili long pas gut wantaim na stap amamas, na mekim i stap bilong ol i kamap gutpela moa.

◼ Ol i prinim na tilim ol buk i no gat pe long planti tok ples, winim 500. Long sampela bilong ol dispela tok ples, i no gat ol narapela buk ol man bilong dispela graun i bin prinim long dispela tok ples.

◼ Ol i gat skul bilong lainim ol man long pasin bilong toktok long ai bilong ol man na dispela i bin helpim planti milion manmeri long lain long kamapim gut ol tok na mekim long gutpela pasin.

◼ Ol i bin stretim rot bilong lainim planti tausen manmeri long olgeta hap long rit na rait.

◼ Ol i bin kamapim 400 Komiti Bilong Wokim Ol Haus Kingdom long olgeta hap bilong graun bilong givim trening long ol volantia long mekim wok konstraksen na bai ol inap wokim planti Haus Kingdom, o haus lotu, we ol man inap kisim save long Baibel. Insait long 10-pela yia i go pinis, ol i bin wokim 20,000 Haus Kingdom.

◼ Ol i stretim rot bilong helpim ol man i kisim hevi long ol bikpela bagarap i kamap long ol hap bilong graun. Dispela wok i helpim ol Witnes na ol narapela lain wantaim. Insait long 2-pela yia bihain long planti saiklon i bin kamap long Amerika, ol volantia Witnes i sanapim gen 90 Haus Kingdom na 5,500 haus em ol i bin kisim bagarap.

[Piksa long pes 23]

Taim ol man i strong long Jisas i mas insait long wok politik, em i lusim ol na “em wanpela tasol i go bek gen long ples maunten”