Tru Yumi Stap Long Taim Bilong Las De?

YU STAP long het bilong kanu na nau wara i kirap long ran strong na i hatwok long stiaim kanu. Ol traipela ston i kamap namel long spet bilong wara i kalap nabaut. Yu mekim wok long pul bilong abrusim ol dispela ston. Man i sindaun baksait long yu i gat wok long helpim yu long stiaim kanu, tasol em i sot long save long mekim olsem. Na tu, yu no gat mep, olsem na yu no save dispela wara bai ran i go long wara i stap isi o long wara i kapsait i go daun long maunten.

Ating yu pret, a? Orait, yumi ken senisim dispela stori liklik. Tingim olsem helpim bilong yu em i save gut long dispela wara, na olgeta ston i stap we. Em i save pinis long kanu bai go long dispela wara i ran strong, na dispela wara bai go we, na ol samting em i mas mekim bilong stiaim gut kanu. Sapos yu gat kain helpim olsem, bai yu stap isi, a?

Wankain samting i painim yumi olgeta. Maski i no asua bilong yumi, yumi stap long taim bilong hevi. Klostu olgeta manmeri i no save ol dispela hevi bai i stap inap hamas yia, na sindaun bilong ol man bai i kamap gutpela o nogat, o long rot bilong i stap gut. Tasol yumi no ken bel hevi tumas o pilim olsem yumi no gat rot. Man bilong wokim yumi i bin givim wanpela helpim long yumi​—⁠dispela helpim i bin tok profet long dispela taim bilong hevi, na em bai pinis olsem wanem, na i kamapim ol gutpela tok bilong helpim yumi long abrusim bagarap. Dispela helpim em wanpela buk, em Baibel. Man bilong wokim dispela buk, em God Jehova, na em i Nambawan Tisa, na long rot bilong Aisaia em i strongim yumi olsem: “Taim yupela i wokabaut na yupela i paul long wanem rot yupela i mas bihainim, rot bilong han sut o rot bilong han kais, orait em bai i stap baksait long yupela na em bai i tokim yupela long rot yupela i mas bihainim.” (Aisaia 30:​20, 21) Olsem wanem? Yu laik kisim kain helpim olsem? Sapos olsem, orait yumi ken skelim: Tru Baibel i tok profet long ol samting i kamap long taim bilong yumi o nogat?

Lain Bilong Jisas i Kamapim Askim

Lain bilong Jisas ol i kirap nogut. Nau tasol Jisas i bin tokaut klia long ol olsem gutpela tempel bilong Jerusalem bai bagarap olgeta! Yes, dispela tok profet em samting bilong kirap nogut tru long en. Bihain liklik, taim ol i sindaun long maunten Oliv, 4-pela disaipel i askim Jisas: “Yu tokim mipela, wanem taim ol dispela samting bai i kamap? Wanem mak bai i kamap pastaim, na mipela i ken save, yu laik i kam bek na [pasin bilong] dispela graun i laik pinis?” (Matyu 24:3; Mak 13:​1-4) Bekim bilong Jisas i gat liklik truim na bikpela truim bilong en; tasol ol disaipel i bin save long dispela samting o nogat, yumi no save.

Bagarap bilong tempel long Jerusalem na pinis bilong ol lo na pasin bilong lain Juda, dispela i no wankain long taim bilong Krais i kam bek na pasin bilong dispela graun i laik pinis, nogat. Tasol long longpela bekim bilong em, Jisas i stori long olgeta dispela samting bilong dispela askim. Em i tokim ol disaipel long wanem ol samting bai kamap paslain long taim Jerusalem i bagarap; na em i tokim ol tu long wanem ol samting bai kamap long taim em i kam bek pinis na stap King long heven na klostu em i laik pinisim olgeta pasin nogut bilong graun.

Jerusalem i Bagarap

Pastaim tingim ol tok Jisas i mekim long Jerusalem na tempel bilong en. Winim 30 yia paslain long dispela samting i kamap, em i tok profet olsem bikpela hevi tru bai painim dispela biktaun. Tingim dispela tok bilong em long Luk 21:​20, 21: “Taim yupela i lukim ol ami i kam raunim Jerusalem i stap, orait yupela i ken save, taim bilong taun i mas bagarap em i klostu nau. Long dispela taim ol manmeri i stap long distrik Judia ol i mas ranawe i go long ples maunten. Na ol man i stap insait long Jerusalem ol i mas lusim taun na i go long narapela hap. Na ol man i stap ausait long taun, ol i no ken i go insait long en.” Sapos ol ami i raunim Jerusalem i stap, olsem wanem “ol man i stap insait long Jerusalem” ol i ken bihainim tok bilong Jisas na “lusim [dispela] taun na i go”? Tok bilong Jisas i makim olsem wanpela rot bai op. Olsem wanem? Wanpela rot i bin op?

Long 66 C.E., ol ami bilong Rom em Sestius Galus i bosim ol i ranim ol bikhetman Juda i go bek long Jerusalem na i olsem ol i kalabus i stap insait long dispela taun. Ol Rom i kam insait long Jerusalem tu na kamap long banis bilong tempel. Orait nau Galus i tokim ol soldia long mekim wanpela samting i olsem i no gat as bilong en. Em i tokim ol long lusim Jerusalem i go! Ol soldia Juda i amamas na ol i kirap ranim ol birua Rom na bagarapim planti. Em nau, rot i op olsem tok profet bilong Jisas i makim. Ol Kristen tru ol i kirap na bihainim dispela toksave bilong Jisas na ol i lusim Jerusalem i go. I gutpela tru ol i bin mekim olsem, long wanem, 4-pela yia bihain, ol ami bilong Rom i kam bek, em Jeneral Taitus i bosim ol. Orait nau i no gat rot long lusim Jerusalem.

Ol ami bilong Rom i raunim gen Jerusalem, na ol i sanapim wanpela bikpela banis i raunim dispela taun. Jisas i bin tok profet long Jerusalem olsem: “Bihain wanpela taim bai i kamap, na ol birua bilong yu bai i kam hipim graun raunim bikpela banis bilong yu. Na ol bai i banisim yu tru long olgeta hap.”a (Luk 19:43) I no longtaim na ol i daunim Jerusalem na kukim naispela tempel bilong en long paia. Tru tumas, olgeta tok bilong Jisas i kamap tru!

Tasol Jisas i no tingim bagarap bilong Jerusalem na em tasol. Ol disaipel i bin askim em tu long mak bilong taim em i kam bek. Tasol taim ol i kamapim dispela askim, ol i no save olsem dispela i makim wanpela taim na Jisas bai kamap King long heven. Jisas i tok profet long wanem samting?

Pait Bai Kamap Long Taim Bilong Las De

Sapos yu kaunim Matyu sapta 24 na 25, Mak sapta 13, na Luk sapta 21, bai yu kisim save olsem Jisas i toktok long taim bilong yumi yet. Em i tok olsem taim bilong pait bai kamap​—⁠tasol i no ‘ol pait na tok win bilong ol bikpela pait’ i bin kamap kirap long bipo yet i kamap inap nau, na em tasol; nogat. Jisas i toktok long “ol man bilong sampela lain bai i kirapim pait long ol narapela narapela lain. Na ol lain bilong sampela king bai i kirapim pait long ol lain bilong ol narapela narapela king”​—⁠yes, em ol bikpela pait bilong olgeta hap.​—⁠Matyu 24:​6-8.

Orait, nau tingim olsem wanem pasin bilong pait i bin senis long taim bilong yumi. Long bipo, taim ol ami bilong tupela kantri i pait wantaim long wanpela hap graun bilong pait na mekim wok long bainat o gan, dispela kain pait em i nogut tru. Tasol long 1914, Bikpela Pait i kamap. Narapela kantri i bihainim narapela kantri na insait long dispela pait​—⁠em namba wan pait bilong olgeta hap bilong graun. Ol i wokim ol gan otomatik bilong kilim i dai planti manmeri moa yet em ol i stap longwe tru long gan. Ol masin-gan i save sutim katres hariap hariap na kilim i dai planti manmeri wantaim; ges mastet i kukim na bagarapim skin bilong planti tausen tausen soldia na givim bikpela pen long ol na kilim ol i dai; ol tenk, olsem ol strongpela ka i gat ol bikpela gan, ol i ran i go long ples bilong ol birua na kilim planti i dai. Na ol i mekim wok tu long ol balus na sabmarin, tasol ol i no gat bikpela strong olsem ol balus na sabmarin ol i wokim bihain.

Namba 2 Pait Bilong Olgeta Hap i winim tru Namba Wan Pait​—⁠em i bin kilim i dai planti milion milion manmeri. Ol traipela sip i gat ol balus long en ol i bin raun long solwara na salim ol balus bilong pait i go tromoi bom long ol birua. Ol sabmarin i bin sutim ol bom i go bagarapim ol sip bilong ol birua bilong ol. Na ol i bin tromoi ol bom atom na ol wan wan bom i bin kilim i dai planti tausen manmeri! Olsem Jisas i tok profet, “ol kain kain samting bilong mekim yupela i pret nogut tru” ol i bin kamap long dispela taim bilong pait yumi stap long en.​—⁠Luk 21:⁠11.

Olsem wanem? Kirap long taim Namba 2 Pait i pinis, ol pait i wok long pinis? Nogat tru. Sampela taim i gat planti pait insait long wanpela yia​—⁠long ol yia kirap long 1990 i kam inap nau tu​—⁠na ol dispela pait i bin kilim i dai planti milion manmeri. Na tu, senis i bin kamap long wanem kain man i save dai long pait. Bipo, planti man i dai long pait, em ol soldia tasol. Tasol long nau, planti man i dai long pait​—⁠winim 90 pesen​—⁠ol i man nating, ol i no soldia.

Sampela Narapela Hap Bilong Mak

Pait em i wanpela hap tasol bilong dispela mak em Jisas i kolim. Em i toksave tu bai i gat “bikpela hangre.” (Matyu 24:⁠7) Tru tumas, ol bikpela hangre i bin kamap, maski dispela graun i wok long kamapim planti kaikai, winim tru skel bilong olgeta manmeri i stap long graun; na ol didiman i gat bikpela save, winim olgeta taim bipo; na i gat ol balus samting bilong salim kwik kaikai i go long olgeta hap bilong graun. Tasol maski i gat ol dispela samting, wanpela long olgeta 5-pela 5-pela manmeri ol i stap hangre long olgeta de.

Jisas i tok profet tu olsem “long sampela hap” bai i gat “bikpela sik.” (Luk 21:11) Yes, maski long taim bilong yumi i gat ol dokta i gat bikpela save, na ol sut bilong sakim planti kain sik, ol bikpela sik i wok long i go bikpela moa yet. Namba Wan Pait i pinis na kwiktaim bikpela sik kus bilong Spen i kamap na kilim i dai planti manmeri, winim ol manmeri i bin i dai long dispela pait. Dispela sik i save kalap kwik long ol man, olsem na long ol biktaun olsem Nu Yok, sapos man i kus, ating em i mas baim kot o go long kalabus! Long nau sik kensa na sik bilong klok i save kilim i dai planti milion manmeri long olgeta yia. Na sik AIDS i wok yet long kilim i dai planti manmeri, na ol dokta i no inap pasim.

Taim Jisas i stori long taim bilong las de, em i stori long ol hevi samting i mas kamap, tasol aposel Pol i stori long pasin na tingting bilong ol man long dispela taim. Em i tok: “Yu mas save olsem, long taim bilong las de planti hevi nogut tru bai i kamap. Ol man bai i laikim ol yet tasol, na . . . ol bai i no save long pasin bilong i stap pren bilong ol arapela [olsem i no gat pasin sori i stap insait long famili] . . . Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin. Ol bai i mekim nogut long ol pren bilong ol yet.”​—⁠2 Timoti 3:​1-5.

Ating yu save pinis long kain pasin olsem, a? Tingim wanpela samting tasol bilong ol dispela hevi​—⁠famili i wok long bagarap. Planti famili i bruk, paitim poroman marit, mekim pasin nogut long pikinini, mekim nogut long lapun papa na mama​—⁠ol dispela samting i kamapim klia olsem ‘i no gat pasin sori i stap insait long famili,’ na ol manmeri “i pait na bagarapim ol man nabaut” na “mekim nogut long ol pren bilong ol,” na ol i “birua long olgeta gutpela pasin”! Tru tumas, yumi lukim planti manmeri long nau ol i mekim olsem.

Tok Profet Bilong Jisas i Makim Taim Bilong Yumi?

Tasol ating yu tingting olsem, ‘Bipo tu i gat ol dispela kain hevi, a? Olsem wanem yumi inap save ol dispela tok profet bilong bipo ol i makim taim bilong yumi?’ Yumi ken stori long 3-pela samting i kamapim klia olsem Jisas i toktok long taim bilong yumi.

Namba wan samting: Maski hap truim bilong tok bilong Jisas i bin kamap bipo taim Jerusalem na tempel bilong en i bagarap, ol tok bilong em i makim stret wanpela taim bihain long dispela. Winim 30 yia bihain long Jerusalem i bagarap, Jisas i givim lapun aposel Jon wanpela driman i soim olsem ol samting em i bin tok profet long en​—⁠pait, hangre, sik, na dai​—⁠ol bai kamap long olgeta hap bilong graun long bihain. Yes, ol dispela hevi bai kamap long “graun” olgeta; i no long wanpela hap tasol.​—⁠KTH 6:​2-8.

Namba tu samting: Long taim bilong yumi sampela hap bilong dispela mak em Jisas i kolim ol i wok long kamap tru tru. Olsem: Ol pait i bin kamap bihain long 1914 ol i nogut moa yet, olsem na ating ol i no inap go moa nogut. Sapos i gat Namba 3 Pait, na olgeta kantri long nau i holim bom nuklia ol i mekim wok long ol dispela bom, ating graun bai paia na stap nating na olgeta manmeri bai pinis long graun. Na tu, Kamapim Tok Hait 11:18 i tok profet olsem, nau long dispela taim bilong ol lain man i “belhat tru,” ol man bai wok long “bagarapim graun.” Nau em namba wan taim na pasin bilong man long bagarapim graun em inap mekim na ating bihain ol man i no inap i stap moa long dispela graun! Em nau, dispela hap tu bilong dispela mak em i wok long kamap tru tru. Yu ting pait na pasin bilong bagarapim graun inap go moa nogut inap long taim man i bagarapim em yet wantaim dispela graun? Nogat; long wanem, Baibel yet i tok olsem dispela graun bai i stap oltaim oltaim, na ol man i gat gutpela bel ol bai stap long en.​—⁠Song 37:29; Matyu 5:⁠5.

Namba tri samting: Yumi mas tingim olgeta samting bilong dispela mak bilong taim bilong las de. Taim yumi skelim olgeta samting bilong mak Jisas i stori long en long tripela Gutnius, na Pol i stori long en long ol pas bilong em, na ol i stap long Kamapim Tok Hait, yumi ken save dispela mak i gat planti hap bilong en. Ating man inap sutim tok long ol wan wan hap, na tok olsem ol man bilong ol narapela taim i bin lukim wankain samting, tasol taim yumi skelim olgeta dispela samting wantaim, dispela i makim wanpela taim tasol​—⁠em taim bilong yumi.

Orait, ol dispela tok i givim wanem tingting long yumi? Yu ting Baibel i makim taim bilong yumi i olsem wanpela taim bilong hevi na i no gat wanpela gutpela samting bilong wetim i kamap? Nogat tru!

Gutpela Tok

Wanpela bikpela hap bilong dispela mak em i stap long Matyu 24:​14: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” Long taim bilong yumi, ol Witnes Bilong Jehova i bin mekim wanpela wok em i no bin kamap bipo. Ol i bilipim ol tok bilong Baibel i stori long Kingdom bilong God Jehova​—⁠em i wanem samting, em i bosim ol man olsem wanem, na ol samting em bai mekim​—⁠na ol i bin tokim ol man long olgeta hap bilong graun long ol dispela samting. Ol i bin wokim planti buk long 300 tok ples i stori long dispela Kingdom, na ol i bin bringim i go long ol man i stap long haus bilong ol o long rot o long ples bisnis bilong ol, long klostu olgeta kantri long graun.

Ol i mekim olsem, na ol i bin truim dispela tok profet. Tasol ol i bin helpim ol man long tingim wanpela gutpela samting tu ol i ken wetim i kamap bihain. Jisas i kolim tok bilong Kingdom olsem “gutnius”​—⁠i no tok bilong samting nogut. Orait, olsem wanem i gat gutnius i stap long dispela taim nogut? I gat, long wanem, nambawan bikpela tok bilong Baibel i no samting bilong taim bilong las de na ol samting nogut i kamap long dispela taim, nogat. Nambawan bikpela tok bilong Baibel em ol samting bilong Kingdom bilong God, na dispela Kingdom bai kamapim wanpela gutpela samting tru long ol man i laikim bel isi​—⁠God bai kisim bek ol.

God bai kisim bek ol man olsem wanem? Na yu mas mekim wanem na bai God i ken kisim bek yu? Plis tingim ol stori i kamap bihain long dispela i stori long dispela samting.

[Futnot]

[Rait long pes 5]

Ol man i laik save long bekim bilong ol dispela askim, Bilong wanem ol samting i stap nogut? Wanem samting bai painim ol manmeri long bihain?

[Rait long pes 6]

Long nau, winim 90 pesen bilong ol man i dai long pait, ol i man nating, ol i no soldia

[Piksa long pes 7]

Tok profet bilong Jisas long Jerusalem bai bagarap, em i kamap tru long olgeta liklik liklik samting bilong en