Holimpas Pasin Bilong “Bel i Stap Klin” Long Dispela Taim Nogut

“I NO GAT wanpela man inap tok, pasin doti i no save kamap insait long Misin long nau.” Wanpela niusman bilong Misin Katolik, Vittorio Messori, em i bin tok olsem taim em i toktok long ol pasin sem olsem pasin pamuk samting i bin kamap insait long Misin long Itali. “Na sapos ol i pinisim lo bilong misin i tambuim ol pris long marit, dispela i no inap stretim dispela hevi, long wanem, inap 80 pesen bilong ol pris i mekim dispela kain pasin, ol i man bilong slip wantaim ol man na ol mangi tu.”​—Nius La Stampa.

Pasin nogut i kamap long olgeta hap em i wanpela mak bilong taim bilong “las de” nau yumi stap long en. (2 Ti. 3:​1-5) Olsem ripot bilong ol nius i kamapim, ol dispela pasin nogut i save nogutim tingting na pasin bilong ol manmeri na bilong ol man i save tok ol i mekim wok bilong God. Bel bilong ol i nogut na i no klin liklik na dispela i kirapim ol long mekim ol kain kain pasin nogut i gat sem. (Ef. 2:2) I gat as tru na Jisas i mekim tok lukaut olsem “olkain samting i save kamap long tingting bilong man, em ol samting olsem, ol tingting nogut na pasin bilong kilim man i dai na olkain pasin pamuk na pasin bilong bagarapim marit na pasin bilong stil na pasin bilong tok giaman long kot na pasin bilong tok nogut long ol arapela.” (Mt. 15:19) Tasol God Jehova i laik bai ol wokman bilong em i laikim tumas pasin bilong “[“bel,” NW] i stap klin.” (Snd. 22:11) Olsem na nau long dispela taim nogut, olsem wanem Kristen inap holimpas pasin bilong bel i stap klin?

Mining Bilong Tok “Bel Bilong Ol i Klin”

Long Baibel, planti taim ol i yusim dispela tok “bel” olsem tok piksa. Wanpela buk i tok, dispela tok bel long Baibel i makim “insait tru long bel bilong man,” na “dispela hap insait long man em i bikpela samting tru long God, na tingting bilong pas gut wantaim God na lotuim em i kamap long dispela hap na i skelim wanem kain pasin bai man i bihainim.” Bel i makim pasin tru bilong yumi. Olsem tok bilong dispela man i raitim buk i kamapim, em dispela bel tasol em Jehova i save skelim long ol wokman bilong em na amamas long en.​—1 Pi. 3:4.

Long Baibel, dispela tok “klin” em inap makim skin o klos o haus samting i stap klin. Tasol em inap makim tu samting i no gat hap doti o bagarap long en​—olsem pasin bilong man o lotu bilong em. Long Bikpela Tok Long Maunten, Jisas i tok: “Ol manmeri bel bilong ol i klin, em ol i ken amamas.” Em i toktok long ol manmeri em bel bilong ol i stap klin. (Mt. 5:8) Olgeta laik na tingting bilong ol i klin. Pasin laikim na pasin bilong tenkyu i kirapim ol long laikim tru Jehova long bel olgeta bilong ol, na ol i no gat tupela tingting. (Lu. 10:27) Yu laik i stap klin olsem, a?

Hatwok Bilong “Bel i Stap Klin” Oltaim

Wokman bilong Jehova i mas i stap olsem man i no gat asua long “mekim pasin nogut,” na “bel bilong en i klin.” (Sng. 24:​3, 4) Tasol long nau ol wokman bilong God i gat hatwok tru long holimpas pasin bilong “bel i stap klin.” Satan wantaim lain bilong em long graun, na sin i stap long skin bilong yumi, ol dispela samting i strong tru long pulim yumi long lusim Jehova. Bilong sakim ol dispela samting i laik pulim yumi, em i bikpela samting long yumi mas laikim tumas pasin bilong “bel i stap klin” na holimpas dispela pasin. Dispela bai lukautim yumi na helpim yumi long i stap yet olsem pren bilong God. Olsem wanem yumi ken holimpas pasin bilong bel i stap klin?

Long Hibru 3:12 i gat wanpela tok lukaut i tok: “Ol brata, yupela i mas was gut. Nogut wanpela brata namel long yupela em i gat tingting nogut long bel bilong en na em i lusim bilip na i givim baksait long God i gat laip.” Yumi no inap holimpas pasin bilong “bel i stap klin” sapos yumi kisim tingting nogut long bel na yumi “lusim bilip.” Satan i bin kamapim wanem kain tingting na bai ol man i no bilip moa long God? Sampela em stori nating bilong evolusen, na dispela tok olsem i no gat lo tru i makim wanem pasin o bilip i stret o i no stret, na ol man i kisim tupela tingting long spirit bilong God i bin kirapim ol man long raitim Baibel. Yumi no ken larim ol dispela kain tingting, em ol tingting bilong kamapim i dai, i go insait long bel bilong yumi. (Kl. 2:8) Pasin bilong ritim Baibel long olgeta de na tingim tingim long bel, em ol bikpela samting bilong banisim yumi na bai ol dispela tingting nogut i no ken kisim yumi olsem spia i sutim yumi. Stretpela save long Tok Bilong God bai strongim pasin bilong yumi long laikim tumas Jehova na yumi ken pilim tru ol gutpela pasin em i save mekim long yumi ol man. Dispela em i bikpela samting tru sapos yumi laik sakim ol tingting giaman na bilip strong long Jehova bambai yumi ken holimpas pasin bilong bel i stap klin.​—1 Ti. 1:​3-5.

Taim Ol Laik Nogut Bilong Skin i Kamap

Ating narapela samting i laik pasim yumi long holimpas pasin bilong “bel i stap klin” em ol laik nogut bilong skin na laik bilong kisim planti mani kago. (1 Jo. 2:​15, 16) Pasin bilong laikim tumas mani o laik bilong bungim planti mani kago em inap paulim tru bel bilong Kristen na kirapim em long mekim ol samting i no stret wantaim laik bilong God. Wan wan ol i bin kisim pasin giaman long ples wok, o mekim pasin giaman long sampela, o stilim mani samting bilong ol man.​—1 Ti. 6:​9, 10.

Tasol taim yumi kisim pasin bilong pret long mekim ol samting Jehova i no laikim, na yumi laikim tumas stretpela pasin, na yumi wok strong bambai bel bilong yumi i stap stret long ai bilong God, yumi soim olsem yumi laikim tru pasin bilong “bel i stap klin.” Dispela laik i kirapim yumi long “wokabaut stret long olgeta taim.” (Hi. 13:18) Taim yumi bihainim pasin i stret, dispela inap litimapim nem bilong Jehova. Wanpela Witnes bilong Itali, Emilio, em i wok olsem draiva bilong wanpela trenspot kampani i gat ol PMV bas, na em i painim wanpela paus i gat olsem 2,000 kina (680 U.S. dola). Ol wanwok i kirap nogut taim em i givim dispela paus mani long bos, na bihain bos i givim long papa bilong dispela mani. Sampela wanwok ol i pilim tru gutpela pasin bilong Emilio, olsem na ol i gat laik long harim tok bilong Baibel na ol i kirap long stadi. Long dispela rot, 7-pela manmeri bilong tupela famili ol i kisim tok i tru. Tru tumas, taim klinpela bel i kirapim Kristen long bihainim pasin i stret, dispela inap kirapim ol narapela long litimapim nem bilong God.​—Ta. 2:10.

Narapela samting em inap nogutim bel bilong Kristen na bai bel i no stap klin moa, em tingting i paul long ol samting bilong maritpasin. Planti manmeri bilong graun ol i orait long man na meri i slip wantaim taim ol i no marit yet, na ol marit i slip wantaim narapela i no poroman tru bilong ol, na man i slip wantaim man, na dispela tingting inap paulim tru bel bilong Kristen. Sapos man o meri i wok long mekim pasin pamuk, ating em inap haitim rong bilong em na mekim olsem em i wokabaut stret. Dispela i no pasin bilong “bel i stap klin,” a?

Gabriele i bin kisim baptais taim em i gat 15 krismas na long dispela taim stret em i kirap mekim wok painia. Tasol bihain em i kirap long poroman wantaim ol lain nogut long ol naitklap. (Sng. 26:4) Long dispela taim em i kirap bihainim pasin pamuk, tasol long ai bilong ol brata em i mekim olsem em i wokabaut stret. Olsem na bihain ol i mas rausim em long kongrigesen Kristen. Taim Jehova i stretim em olsem, dispela i mekim na em i tingting gut long bel bilong em. Gabriele i tok: “Mi kirap mekim olgeta samting bipo mi no bin tingim tumas. Mi ritim Baibel long olgeta de na mi putim yau gut long ol tok Jehova i mekim, na mi stadi gut long ol buk samting bilong oganaisesen. Mi lukim olsem pasin bilong stadi i helpim mi tru na mi inap kisim bikpela strong long ritim Baibel na long beten strong.” Dispela i helpim Gabriele long lusim pasin pamuk na kisim gen pasin bilong pas gut wantaim Jehova.

Long nau Gabriele i mekim gen wok painia wantaim meri bilong em. Samting i bin painim em i kamapim klia olsem taim man i stadi long Baibel na ol buk samting em “wokboi i gat gutpela tingting” i givim long yumi, dispela inap helpim em na bai bel bilong em i stap klin na em inap sakim pasin pamuk.​—Mt. 24:45; Sng. 143:10.

“Bel i Stap Klin” Taim Hevi i Kamap

Sampela wokman bilong God i bin kisim hevi long ol birua, hevi bilong mani i painim ol, ol bikpela sik, na dispela i putim bikpela hevi long ol. Sampela taim ol samting i mekim na bel bilong ol i bagarap stret. Kain samting olsem i bin painim King Devit. Em i tok: “Tingting bilong mi i bagarap, na bel bilong mi i hevi moa yet.” (Sng. 143:4) Wanem samting i helpim em long daunim dispela bel hevi? Devit i tingim bek ol samting Jehova i bin mekim bilong helpim ol wokman bilong Em, na olsem wanem Jehova i bin kisim bek em yet long han bilong ol birua. Em i tingim tingim long bel ol samting Jehova i bin mekim bilong litimapim bikpela nem bilong Em. Oltaim Devit i wok long tingim ol bikpela wok bilong God. (Sng. 143:5) Na olsem tasol, sapos yumi tingim tingim long bel dispela Man Bilong Wokim yumi na olgeta samting em i bin mekim na em i mekim yet bilong helpim yumi, dispela bai helpim na strongim yumi long taim hevi i painim yumi.

Taim wanpela i rongim yumi, o yumi ting olsem, dispela inap mekim na bel bilong yumi i nogut. Sapos yumi wok long tingim tingim dispela samting, yumi inap bel nogut long ol brata bilong yumi. Ating bai yumi abrusim ol na stap wanpis na yumi no tingim ol narapela. Tasol yu ting dispela pasin i stret wantaim laik bilong yumi long “bel i stap klin”? I klia tru olsem, laik bilong yumi long bel i stap klin em i insait long ol pasin yumi mekim long ol brata Kristen na pasin yumi mekim sapos ol i no wanbel wantaim yumi long wanpela samting.

Pasin bilong dispela graun i go nogut moa yet, olsem na yumi ol Kristen tru i stap narapela kain, long wanem, yumi laikim tru pasin bilong “bel i stap klin.” Taim yumi kisim bel isi i kamap long rot bilong mekim laik bilong God, dispela i save stiaim wokabaut bilong yumi na bai i stap bilong yumi i kamap gutpela. Na bikpela samting moa, yumi stap pren bilong Man i bin wokim yumi, God Jehova, em i save laikim tru ol man “bel bilong ol i stap klin.” (Sng. 73:1) Tru tumas, yumi inap insait long dispela lain em ol bai stap amamas, long wanem, olsem Jisas i bin promis, “bai ol i lukim God,” taim Em i kirap mekim wok bilong helpim ol man i laikim tumas pasin bilong ‘bel i stap klin.’​—Mt. 5:8.