Ol i Amamas, Maski Ol Man i Mekim Nogut Long Ol
“Sapos ol i lukim yupela i stap long lain bilong mi, na ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas.”—MATYU 5:11.
1. Jisas i mekim wanem tok promis long ol disaipel bilong em long pasin bilong amamas na pasin bilong ol man long mekim nogut long ol?
NAMBA WAN taim Jisas i salim ol aposel bilong em i go autim tok bilong Kingdom, em i toksave long ol olsem ol man bai birua long ol. Em i tokim ol: “Olgeta man bai i bel nogut tru long yupela, long wanem, nem bilong mi em i stap long yupela.” (Matyu 10:5-18, 22) Tasol paslain long dispela, long Bikpela Tok Long Maunten, Jisas i tok promis long ol aposel na ol arapela disaipel olsem maski ol man i birua long ol, i no olsem dispela i mas tekewe amamas bilong ol. Jisas i kamapim klia olsem ol Kristen i kisim hevi long han bilong ol birua, ol i ken amamas! Olsem wanem pasin bilong ol man long mekim nogut long ol inap kamapim amamas?
Karim Pen Long Mekim Stretpela Pasin
2. Olsem Jisas na aposel Pita i tok, wanem kain pen na hevi i save kamapim amamas?
2 Jisas i tok namba 8 as na ol man i ken amamas, i olsem: “Ol manmeri i save bihainim stretpela pasin na long dispela as ol i kisim hevi long ol arapela, em ol i ken amamas. Kingdom bilong heven em i bilong ol.” (Matyu 5:10) Pen na hevi man i kisim, dispela samting yet i no samting bilong amamas. Aposel Pita i tok: “Sapos yupela i mekim pasin nogut na ol i paitim yupela, na yupela i karim dispela pen, bai yupela i kisim wanem samting long dispela? Tasol sapos yupela i mekim gutpela pasin na ol i paitim yupela, na yupela i karim dispela pen, orait God i laikim dispela pasin.” Em i tok moa: “Yupela i mas lukaut, nogut ol i givim pen long yupela, long wanem, yupela i bin kilim man i dai o stilim ol samting o mekim ol arapela kain pasin nogut o yupela i bin paulim wok bilong ol arapela. Tasol sapos man em i Kristen, na long dispela as em i karim pen, orait em i no ken sem. Nogat. Em i mas amamas long dispela nem Kristen, na litimapim nem bilong God.” (1 Pita 2:20; 4:15, 16) Jisas i bin tok, taim man i bihainim stretpela pasin na long dispela as em i karim pen na hevi, em i ken amamas.
3. (a) Wanem insait bilong dispela tok, kisim hevi long bihainim stretpela pasin? (b) Hevi ol Kristen bilong pastaim i kisim long han bilong ol arapela i bin mekim wanem long ol?
3 Man i bihainim stretpela pasin, em i save bihainim laik bilong God na ol lo bilong em. Olsem na pen na hevi em man i kisim long bihainim stretpela pasin, em i kisim long wanem, em i sakim ol man i strong long em i mas brukim ol lo bilong God. Ol aposel i no laik lusim wok bilong autim tok long nem bilong Jisas, na long dispela as ol hetman Juda i bin mekim nogut long ol. (Aposel 4:18-20; 5:27-29, 40) Olsem wanem? Dispela i bin tekewe amamas bilong ol o pinisim wok bilong ol long autim tok? Nogat tru! “Ol aposel i lusim kaunsil na i go ausait. Na ol i amamas long God i ting ol inap long kisim sem long nem bilong Jisas. Na long olgeta de, ol i save go long tempel na long ol haus bilong ol manmeri, na ol i wok long skulim ol manmeri. Ol i no lusim wok bilong autim gutnius. Nogat. Ol i tokaut klia olsem, Jisas em i dispela man God i bin promis long salim i kam bilong kisim bek ol manmeri bilong en.” (Aposel 5:41, 42) Dispela hevi i bin kamapim amamas long ol na i kirapim ol long givim bel gen long wok autim tok. Bihain, ol Kristen bilong pastaim i kisim hevi long han bilong ol Rom, long wanem, ol i no lotuim empera.
4. Wanem sampela as na ol man i mekim nogut long ol Kristen?
4 Long nau, ol Witnes Bilong Jehova i no laik lusim wok bilong autim “gutnius bilong kingdom,” na long dispela as ol man i bin mekim nogut long ol. (Matyu 24:14) Taim i gat tambu long ol miting Kristen bilong ol, ol i no lusim pasin bilong bung wantaim olsem Baibel i tokim ol long mekim, maski ol i kisim hevi long dispela. (Hibru 10:24, 25) Na tu, ol man i bin mekim nogut long ol, long wanem, ol i bihainim pasin Kristen na ol i no insait long ol samting bilong graun na ol i nolaik tru long mekim nabaut long blut. (Jon 17:14; Aposel 15:28, 29) Tasol maski hevi i bin painim ol, dispela pasin bilong bihainim stretpela pasin i save kamapim bel isi na amamas long lain bilong God long nau.—1 Pita 3:14.
Ol Man i Tok Nogut Long Ol, Long Wanem, Ol i Lain Bilong Krais
5. Wanem nambawan as na lain bilong Jehova long nau i kisim hevi long han bilong ol arapela?
5 Namba 9 as na man i ken amamas em Jisas i stori long en long Bikpela Tok Long Maunten, em tu i toktok long pasin bilong ol man long mekim nogut long ol disaipel. Jisas i tok: “Sapos ol i lukim yupela i stap long lain bilong mi, na ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas.” (Matyu 5:11) Nambawan as na lain bilong Jehova i kisim hevi long ol arapela, i olsem: Ol i no insait long pasin bilong dispela taim nogut bilong nau. Jisas i tokim ol disaipel: “Sapos yupela i stap olsem ol man bilong dispela graun, orait ol manmeri bilong graun ol inap laikim yupela olsem ol lain bilong ol yet. Tasol yupela i no man bilong dispela graun. Nogat. Mi makim yupela pinis bai yupela i lusim pasin bilong dispela graun. Olsem na ol manmeri bilong graun i save birua long yupela.” (Jon 15:19) Na aposel Pita i tok: “Nau yupela i no save mekim ol dispela kain pasin nogut wantaim ol haiden. Na ol i save kirap nogut long dispela, na ol i tok nogut long yupela.”—1 Pita 4:4.
6. (a) I gat wanem as na ol man i tok nogut na mekim nogut long lain remnan na ol poroman bilong ol? (b) Taim ol i tok nogut long yumi, dispela i daunim amamas bilong yumi?
6 Yumi stori pinis olsem ol Kristen bilong pastaim i bin kisim hevi long han bilong ol arapela, long wanem, ol i no laik lusim wok bilong autim tok long nem bilong Jisas. Krais i bin givim wok long ol disaipel bilong em olsem: “Yupela bai i autim tok bilong mi . . . i go inap long olgeta hap bilong graun.” (Aposel 1:8) Lain remnan bilong ol brata bilong Krais em God i bin makim ol, na ol poroman bilong ol bilong lain “planti manmeri tru,” em ol i stap gut long God, ol i bin wok strong long mekim dispela wok. (KTH 7:9) Long dispela as, Satan i save pait “long ol arapela pikinini [em ol pikinini bilong “meri,” hap bilong oganaisesen bilong God long heven] . . . , i save bihainim ol lo bilong God, na ol i save autim tok bilong Jisas na bihainim em.” (KTH 12:9, 17) Yumi ol Witnes Bilong Jehova i save autim tok bilong Jisas, em i King Bilong Kingdom gavman, em bai pinisim ol gavman bilong dispela graun i laik pasim rot long God long kamapim wanpela nupela taim i gat stretpela pasin tasol i stap long en. (Daniel 2:44; 2 Pita 3:13) Long dispela as, ol man i save tok nogut na mekim nogut long yumi, tasol yumi amamas long kisim hevi long yumi holim nem bilong Krais.—1 Pita 4:14.
7, 8. Wanem sampela tok giaman ol birua i bin sutim long ol Kristen bilong pastaim?
7 Jisas i tok ol disaipel bilong em i ken amamas tu taim ol man i lukim ol i stap lain bilong em na long dispela as ol i “sutim kain kain tok giaman” long ol. (Matyu 5:11) Dispela samting i bin painim ol Kristen bilong pastaim. Taim ol i holim aposel Paul long Rom, long 59-61 C.E., ol hetman Juda i toktok long ol Kristen olsem: “Mipela i save, long olgeta ples, ol manmeri i save mekim tok nogut long dispela nupela lain i bin kamap namel long yumi Juda.” (Aposel 28:22) Ol i sutim tok long Pol na Sailas olsem ol i bin “raun na mekim pasin nogut i kamap long olgeta hap bilong graun” na “sakim lo bilong Sisar.”—Aposel 17:6, 7.
8 Saveman K. S. Latourette i stori long ol Kristen long taim Gavman Rom i bosim graun, na em i tok: “Ol man i sutim kain kain tok long ol. Ol i no laik insait long lotu bilong ol haiden, olsem na ol i tok ol Kristen i no bilip long God. Ol i no insait long planti amamas bilong komiuniti—ol bikpela de bilong ol haiden, ol bung bilong amamas . . .—olsem na ol man i sutim tok long ol olsem ol i no laikim ol man. . . . Ol i tok ol man na meri Kristen i save bung long nait . . . na mekim pasin sem. . . . Ol i mekim [Memorial bilong dai bilong Krais] long ai bilong ol bilipman tasol, olsem na dispela i kamapim tok win olsem ol Kristen i save kilim i dai ol bebi na dringim blut na kaikai mit bilong ol.” Na tu, ol Kristen bilong pastaim i no save lotu long empera, olsem na ol man i tok ol i birua bilong Gavman.
9. Ol Kristen bilong pastaim ol i mekim wanem taim ol man i sutim tok giaman long ol, na olsem wanem long nau?
9 Ol dispela tok giaman i no pasim ol Kristen bilong pastaim long mekim wok bilong ol long autim gutnius bilong Kingdom. Long 60-61 C.E., Pol inap tok olsem ol i bin “autim [gutnius] long olgeta manmeri i stap long graun” na “long olgeta hap . . . planti manmeri i bilip na bihainim, na pasin bilong ol i kamap gutpela.” (Kolosi 1:4-6, 23) Wankain samting i save kamap long nau. Ol man i save sutim tok giaman long ol Witnes Bilong Jehova, wankain olsem ol i bin mekim long ol Kristen long taim bilong ol aposel. Tasol wok bilong autim tok bilong Kingdom long nau i go bikpela na em i kamapim bikpela amamas long ol man i insait long dispela wok.
Ol i Amamas Long Ol Man i Mekim Nogut Long Ol Olsem Ol Profet
10, 11. (a) Jisas i tok wanem bilong pinisim tok bilong namba 9 as na ol man i ken amamas? Bilong wanem em i mekim olsem? (b) Bilong wanem ol profet i bin kisim hevi? Stori long sampela.
10 Jisas i pinisim tok bilong namba 9 samting i as na ol man i ken amamas, olsem: “Yupela i ken belgut na amamas tru, long wanem, . . . ol man i bin mekim ol wankain pasin nogut long ol profet i bin i go paslain long yupela.” (Matyu 5:12) Ol profet Jehova i bin salim long givim toksave long ol bikhetman bilong Israel, ol i bin kisim hevi long han bilong ol. (Jeremaia 7:25, 26) Aposel Pol i stori long dispela samting olsem: “Mi no gat taim bilong stori long . . . ol profet . . . ol i bilip long God, olsem na ol i . . . kisim hevi long ol birua i tok bilas long ol na wipim ol na pasim ol long sen na putim ol long kalabus.”—Hibru 11:32-38.
11 Long taim bilong King Ahap, em man nogut, na meri bilong em Jesebel, i gat planti profet bilong Jehova i bin dai long bainat. (1 King 18:4, 13; 19:10) Ol i kalabusim profet Jeremaia na bihain ol i tromoi em i go long wanpela hul wara i gat graun malumalum long en. (Jeremaia 20:1, 2; 38:6) Ol i tromoi profet Daniel i go daun long hul bilong ol laion. (Daniel 6:16, 17) Ol dispela profet paslain long taim bilong ol Kristen, ol i kisim hevi, long wanem, ol i sambai long lotu tru long Jehova. Planti profet i bin kisim hevi long han bilong ol hetman bilong lotu Juda. Jisas i kolim ol saveman bilong lo na ol Farisi olsem “lain pikinini bilong ol man i bin kilim i dai ol profet.”—Matyu 23:31.
12. Bilong wanem yumi ol Witnes Bilong Jehova i amamas long kisim hevi olsem ol profet bilong bipo i bin kisim?
12 Long nau, yumi ol Witnes Bilong Jehova i save givim bel long autim gutnius bilong Kingdom, na planti taim dispela em i as na ol man i mekim nogut long yumi. Ol birua i save sutim tok long yumi olsem yumi “strong long subim ol man long kam insait long lotu bilong yumi,” tasol yumi save ol birua i bin sutim tok giaman long ol man i bin go paslain long yumi, em ol man i bin stap gut long Jehova na lotuim em. (Jeremaia 11:21; 20:8, 11) Yumi amamas yumi kisim pen na hevi long wankain as olsem ol profet bilong bipo i bin kisim. Disaipel Jems i tok: “Ol brata, yupela i mas tingim ol profet bipo ol i bin autim tok long nem bilong Bikpela. Ol birua i bin mekim nogut long ol, tasol ol i bin strongim bel na karim dispela hevi. Yupela i mas kisim dispela pasin bilong ol, na bihainim. Harim. Yumi save tok olsem, ‘Ol man i bin strongim bel na karim hevi, ol i save stap gut na amamas i stap.’ ”—Jems 5:10, 11.
Sampela Bikpela As na Yumi Ken Amamas
13. (a) Bilong wanem yumi no bel hevi taim ol man i mekim nogut long yumi? (b) Wanem samting inapim yumi long sanap strong? Dispela i kamapim klia wanem samting?
13 Yumi no bel hevi taim ol man i mekim nogut long yumi, nogat. Yumi save yumi bihainim lek mak bilong ol profet, na ol Kristen bilong pastaim, na Krais Jisas yet, na dispela i mekim gut bel bilong yumi. (1 Pita 2:21) Yumi kisim strong long ol tok bilong Baibel, olsem dispela tok bilong aposel Pita: “Ol brata tru, wanpela traim olsem paia i wok long kamap long yupela. Tasol yupela i no ken kirap nogut na ting em i narakain samting tru i kamap long yupela. Nogat. Yupela i holim nem bilong Krais, na sapos long dispela ol i tok nogut long yupela, orait yupela i ken amamas. Long wanem, yupela i save, Spirit bilong God, em Spirit i gat biknem na strong, em i stap long yupela.” (1 Pita 4:12, 14) Long ol samting i bin painim yumi bipo, yumi save olsem spirit bilong Jehova i stap long yumi na i strongim yumi, na long dispela rot tasol yumi inap sanap strong taim ol man i mekim nogut long yumi. Helpim yumi kisim long holi spirit i kamapim klia olsem blesing bilong Jehova i stap long yumi, na dispela i givim bikpela amamas long yumi.—Song 5:12; Filipai 1:27-29.
14. Wanem sampela as na taim ol man i mekim nogut long yumi long yumi bihainim stretpela pasin, yumi ken amamas?
14 Narapela as na yumi ken amamas taim yumi bihainim stretpela pasin na ol man i mekim nogut long yumi, i olsem: Dispela i kamapim klia olsem yumi bihainim pasin Kristen na pasin bilong givim bel long God. Aposel Pol i tok: “Olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12) Yumi amamas tru long tingim olsem, taim yumi stap gut long Jehova taim traim i painim yumi, dispela i bekim tok Satan i bin sutim, olsem ol man i tingim ol yet tasol na mekim wok bilong God. (Jop 1:9-11; 2:3, 4) Yumi amamas yumi inap mekim sampela samting, maski em i liklik samting tasol, long helpim wok bilong kamapim klia olsem i stret Jehova i stap nambawan bos.—Sindaun 27:11.
Amamas Long Bikpela Pe
15, 16. (a) Jisas i kolim wanem samting i as na yumi ken “belgut na amamas tru”? (b) Ol Kristen God i bin makim ol bai kisim wanem pe long heven, na “ol arapela sipsip” poroman bilong ol, ol tu bai kisim wanem pe?
15 Jisas i kolim narapela samting i mekim na yumi ken amamas taim ol man i tok nogut na mekim nogut long yumi olsem ol i bin mekim long ol profet bilong bipo. Klostu long pinis bilong namba 9 amamas, em i tok: “Yupela i ken belgut na amamas tru, long wanem, bikpela pe i wetim yupela long heven.” (Matyu 5:12) Aposel Pol i tok: “Sin i save givim pe long ol wokboi bilong en. Dispela pe em dai tasol. Tasol God i save givim nating presen long yumi, em laip i stap oltaim. Dispela laip yumi kisim long wok bilong Jisas Krais, Bikpela bilong yumi.” (Rom 6:23) Yes, dispela “bikpela pe” em laip, tasol em i no olsem pe bilong wanpela wok yumi mekim, nogat. Em wanpela presen yumi kisim nating. Dispela pe i kam long Jehova yet, olsem na Jisas i tok dispela pe i “wetim ol long heven.”
16 Ol Kristen God i bin makim ol long holi spirit, ol i kisim “laip bilong i stap gut oltaim, olsem prais.” Dispela prais em laip oltaim long heven wantaim Krais na ol i no inap i dai moa. (Jems 1:12, 17) Lain bilong i stap long graun, em “ol arapela sipsip,” ol i wet long kisim laip i stap gut oltaim long Paradais long graun. (Jon 10:16; KTH 21:3-5) Long dispela tupela lain wantaim, “pe” ol i kisim i no pe bilong wanpela wok ol i mekim. Ol Kristen God i bin makim na “ol arapela sipsip,” ol i kisim pe long pasin “marimari” bilong Jehova, na dispela samting i kirapim aposel Pol long tok olsem: “Dispela presen God i bin givim yumi, em i bikpela moa, na yumi no inap autim gut olgeta tok bilong en. Yumi mas tenkyu long God long dispela presen.”—2 Korin 9:14, 15.
17. Taim ol man i mekim nogut long yumi, bilong wanem yumi ken “belgut na amamas tru”?
17 Long ol Kristen, em bihain liklik Empera Nero bai mekim nogut tru long sampela bilong ol, aposel Pol i tok: “Yumi ken amamas long ol hevi i kamap long yumi tu, long wanem, yumi save, ol dispela hevi i save strongim bel bilong yumi. Na sapos bel bilong yumi i stap strong, orait yumi inap sakim ol traim i kamap long yumi. Na sapos yumi sakim ol traim, orait yumi save bilip long God na wetim em i helpim yumi na kisim bek yumi. Na sapos yumi wetim God i helpim yumi, orait yumi no save wet nating. Nogat.” Na em i tok: “Yupela i save bilip na wetim Bikpela i mekim gut long yupela, olsem na yupela i mas amamas. Sapos hevi i kamap long yupela, orait yupela i mas sanap strong.” (Rom 5:3-5; 12:12) Maski yumi wet long kisim laip long heven o long graun, pe yumi kisim long holimpas bilip taim traim i painim yumi em i bikpela tru, winim olgeta samting i stret long yumi ken kisim. Amamas bilong yumi i bikpela moa yet taim yumi tingting long kisim laip oltaim na mekim wok bilong gutpela Papa bilong yumi long heven, Jehova, aninit long King Jisas Krais. Yumi “belgut na amamas tru.”
18. Klostu long pinis, ol lain man bai mekim wanem? Jehova bai mekim wanem?
18 Long sampela kantri, ol man i bin mekim nogut long ol Witnes Bilong Jehova na ol i mekim yet. Long tok profet Jisas i mekim long taim bilong pinis, em i tokim ol Kristen tru olsem: “Olgeta lain manmeri bai ol i bel nogut tru long yupela, long wanem, nem bilong mi em i stap long yupela.” (Matyu 24:9) Klostu long pinis, Satan bai kirapim ol lain man, em ol i bel nogut tru long lain bilong Jehova, long pait long ol. (Esekiel 38:10-12, 14-16) Orait nau em taim bilong Jehova long kirap mekim sampela wok. “Bai mi soim olgeta lain manmeri olsem, mi gat bikpela strong na pasin bilong mi i gutpela na stretpela olgeta. Na bai ol i save tru long mi. Na bai ol i save gut olsem, mi yet mi Bikpela.” (Esekiel 38:23) Long dispela pasin, Jehova bai mekim holi gutpela nem bilong em na kisim bek lain bilong em long han bilong ol man i mekim nogut long ol. Olsem na “man i save sanap strong na i karim hevi . . . , em i ken amamas.”—Jems 1:12.
19. Taim yumi wetim bikpela “De” bilong Jehova, yumi mas mekim wanem?
19 Taim dispela bikpela “De” bilong Jehova i wok long kam klostu moa, yumi ken amamas long “God i ting [yumi] inap long kisim sem” long nem bilong Jisas. (2 Pita 3:10-13; Aposel 5:41) Olsem ol Kristen bilong pastaim, yumi tu mas wok long ‘skulim ol manmeri na autim gutnius’ bilong Krais na Kingdom gavman bilong em taim yumi wet long kisim pe long nupela taim Jehova bai kamapim i gat stretpela pasin tasol i stap long en.—Aposel 5:42; Jems 5:11.
Sampela Askim
• Wanem insait bilong dispela tok, karim pen long mekim stretpela pasin?
• Pasin bilong mekim nogut long ol Kristen bilong pastaim i bin mekim wanem long ol?
• Olsem wanem yumi ken tok, ol Witnes Bilong Jehova i save kisim hevi olsem ol profet bilong bipo i bin kisim?
• Bilong wanem yumi ken “belgut na amamas tru” taim ol man i mekim nogut long yumi?
[Ol Piksa long pes 16, 17]
‘Sapos ol i tok nogut long yupela na ol i mekim nogut long yupela, orait yupela i ken amamas’
[Kredit Lain]
Group in prison: Chicago Herald-American