Ol Save Yumi Kisim Long Stori Bilong Taim Mama i Karim Jisas

OL SAMTING i bin kamap long taim mama i karim Jisas i save pulim tingting bilong planti milion man. Dispela i kamap klia long planti piksa na pilai ol i save wokim long olgeta hap long taim bilong Krismas bilong makim taim mama i karim Jisas. Tru, yumi amamas long stori bilong taim mama i karim Jisas, tasol em i no stap long Baibel bilong amamasim nating ol man, nogat. Dispela stori i hap bilong Baibel, em spirit bilong God i bin kamapim bilong skulim yumi na stretim wokabaut bilong yumi.​​—⁠2 Timoti 3:⁠16.

Sapos God i laik bai ol Kristen i tingim de mama i karim Jisas, Baibel bai tokaut long de stret em i bin kamap. Tasol olsem wanem? Baibel i mekim olsem? Wanpela saveman bilong Baibel i bin stap olsem wan handet yia i go pinis, em Albert Barnes, pastaim em i stori long mama i bin karim Jisas na long dispela taim ol wasman bilong sipsip ol i stap ausait long nait na was long ol sipsip bilong ol, na bihain em i tok: “Dispela i kamapim klia tru olsem Man bilong kisim bek yumi em i bin kamap paslain long Disemba 25 . . . Dispela em i taim bilong kol, na em i kol moa long hap bilong ol maunten klostu long Betlehem. God i haitim taim stret em mama i bin karim [Jisas]. . . . Na tu, em i no bikpela samting long yumi mas save long taim bilong dispela samting. Sapos em i bikpela samting, orait God bai kirapim ol man long raitim dispela de long Baibel na em bai stap yet.”

Tasol ol man bilong raitim 4-pela Gutnius ol i toksave klia long de Jisas i bin i dai. Dispela i bin kamap long de Pasova, em ol i bin mekim long namba 14 de bilong mun Nisan bilong ol Juda. Na tu, Jisas i tokim ol disaipel bilong em long makim dispela de bilong tingim em. (Luk 22:19) Tasol Baibel i no kolim wanpela tok bilong Jisas i tok ol disaipel i mas tingim de mama i bin karim em, o tingim betde bilong ol narapela man. Sori tru, ol tok pait i save kamap long de mama i bin karim Jisas, dispela inap karamapim ol bikpela samting tru i bin kamap long dispela taim.

God i Makim Papamama Bilong Em

I gat planti tausen famili long Israel, tasol God i bin makim wanem kain papamama bilong mekim bikpela long Pikinini bilong em? God i bin tingim biknem o planti mani kago i bikpela samting? Nogat. Jehova i tingim pasin bilong dispela papamama long tingim ol samting bilong spirit. Yumi ken skelim singsing Maria i mekim bilong litimapim nem bilong God, olsem i stap long Luk 1:​46-⁠55; em i bin mekim dispela singsing taim ensel i tokim em pinis olsem em bai kamap mama bilong Mesaia. Sampela tok em i mekim i olsem: “Bel bilong mi em i litimapim nem bilong Bikpela. . . . Mi wokmeri bilong en, mi samting nating, tasol em i lukim mi na em i marimari long mi.” Em i mekim pasin daun na em i tingim em yet i olsem “samting nating,” olsem wanpela wokmeri nating bilong Jehova. Na bikpela samting tru i olsem: Ol gutpela tok long singsing Maria i mekim bilong litimapim nem bilong God, dispela i kamapim klia olsem em i meri bilong tingim ol samting bilong spirit na em i gat gutpela save long ol tok bilong buk bilong God. Tru, em i pikinini bilong Adam na em i gat sin, tasol i stret tru em i ken i stap mama bilong Pikinini bilong God long graun.

Orait olsem wanem long man bilong Maria, em i bin kamap waspapa bilong Jisas? Josep i gat save long mekim wok kamda. Em i save mekim strongpela wok long han bilong em, olsem na em inap long lukautim famili bilong em, em bihain famili i go bikpela na em i gat 5-pela pikinini man na sampela pikinini meri, olsem tupela samting. (Matyu 13:​55, 56) Josep i no maniman. Taim Maria i mas bringim namba wan pikinini man bilong em long tempel bilong God, ating Josep i bel hevi long em i no inap givim wanpela sipsip olsem ofa. Tupela i mas bihainim pasin em lo i makim bilong helpim ol rabisman. Taim meri i karim pikinini man, lo bilong God i tok long ol samting em i mas mekim: “Sapos mani bilong dispela meri i sot na em i no inap baim pikinini sipsip, orait em i mas bringim tupela namba wan balus o tupela yangpela namba 2 balus i kam. Narapela balus em i bilong ofa bilong paia i kukim olgeta, na narapela em i ofa bilong rausim sin. Na pris i mas ofaim tupela balus bilong mekim meri i kamap klin.”​—⁠Wok Pris 12:8; Luk 2:​22-24.

Baibel i tok Josep “em i stretpela man.” (Matyu 1:19) Olsem: Em i no bin slip wantaim nupela meri bilong em i go inap long taim meri i karim pinis Jisas. Dispela inap mekim na bai ol man i no paul long husat i Papa tru bilong Jisas. Yumi save, i hatwok long ol nupela marit i stap tambu na i no slip wantaim sapos ol i stap long wanpela haus tasol, tasol dispela i soim olsem tupela i pilim tru olsem em i gutpela samting long God i bin makim ol long mekim bikpela long Pikinini bilong Em.​​—⁠Matyu 1:​24, 25.

Olsem Maria, Josep tu em man bilong tingim ol samting bilong spirit. Long olgeta yia em i save lusim wok na kisim famili bilong em na ol i lusim Nasaret na wokabaut inap 3-pela de i go kamap long Jerusalem bilong mekim Pasova, em i save kamap long olgeta yia. (Luk 2:41) Na i luk olsem Josep i bin skulim Jisas long go mekim lotu long olgeta wik long haus lotu long ples, em ples ol i save ritim tok bilong buk bilong God na kamapim insait bilong en. (Luk 2:51; 4:16) Olsem na yumi ken save tru, God i bin makim gutpela mama na waspapa stret bilong lukautim Pikinini bilong em.

Gutpela Blesing Bilong Ol Wasman Bilong Sipsip

Orait nau Maria i gat bel inap 9-pela mun pinis, tasol maski i hatwok long em, Josep i bihainim lo bilong Sisar na em i go long taun bilong ol tumbuna bilong em, bai gavman i ken kisim nem bilong em. Taim tupela i kamap pinis long Betlehem, ol i no inap painim ples slip long taun, long wanem, i gat planti man tru i stap. Olsem na tupela i mas slip long haus bulmakau, na mama i karim Jisas long dispela hap na slipim em long bokis kaikai bilong bulmakau. Bilong strongim bilip bilong dispela tupela papamama i gat pasin daun, God i salim tok long tupela i strongim tok olsem em laik bilong God na Maria i karim dispela pikinini. Orait yu ting God i salim wanpela lain bikman bilong Betlehem bilong givim dispela toksave long tupela? Nogat. Em i kamapim dispela samting long ol wasman bilong sipsip em ol i stap ausait long nait na was long ol sipsip bilong ol.

Ensel bilong God i kamap long ol na i tokim ol long go long Betlehem na bai ol i lukim nupela pikinini Mesaia “i slip i stap long bokis kaikai bilong bulmakau.” Orait yu ting ol dispela man i gat pasin daun ol i kirap nogut o i sem long harim olsem nupela pikinini Mesaia i stap long wanpela haus bulmakau? Nogat tru! Kwiktaim ol i lusim ol sipsip bilong ol na ol i go long Betlehem. Taim ol i painim pinis Jisas, ol i stori long Josep na Maria long tok bilong ensel bilong God. Yumi save, dispela i bin strongim bilip bilong tupela olsem olgeta samting i wok long kamap stret olsem God i tingting pinis long mekim. “Na ol wasman bilong sipsip i go bek na ol i wok long litimapim nem bilong God. Ol i amamas long God long olgeta samting ol i bin harim na lukim.” (Luk 2:​8-20) Tru tumas, taim Jehova i kamapim dispela samting long ol wasman i save pret long God, em i makim gutpela lain stret.

Dispela stori i lainim yumi long yumi mas i stap wanem kain man na bai Jehova i ken orait long yumi. Yumi no gat wok long painim biknem o planti mani samting, nogat. Olsem Josep na Maria na ol wasman bilong sipsip, yumi mas bihainim tok bilong God na putim ol samting bilong spirit i go pas long ol samting bilong skin, na long dispela rot yumi kamapim klia olsem yumi laikim em tru. Yes, yumi inap lainim planti samting taim yumi tingim tingim stori bilong Baibel long ol samting i bin kamap long taim mama i karim Jisas.

[Piksa long pes 7]

Maria i givim tupela liklik balus olsem ofa, na dispela i makim wanem samting?

[Piksa long pes 7]

Taim mama i karim Jisas, God i kamapim dispela samting long sampela wasman bilong sipsip