Yupela Ol Papamama na Ol Pikinini: Putim God i Stap Namba Wan!
“Yumi mas aninit long God tasol na bihainim ol lo bilong em.”—SAVEMAN 12:13.
WANPELA tok profet long Krais Jisas i tok: “Oltaim em bai i stap aninit [olsem pret] long Bikpela, na dispela pasin bai i mekim em i amamas moa yet.” (Aisaia 11:2, 3) Jisas i daun tru long God, na em i pret long mekim ol samting God i no laikim, long wanem, em i laikim tumas God. Ol papamama wantaim ol pikinini bilong ol, ol tu i mas kisim dispela kain pasin bilong Krais long pret long God, na dispela bai mekim ol i amamas, olsem i bin mekim long Jisas. Ol i mas bihainim ol lo bilong God, na long dispela rot ol i putim God i stap namba wan. Wanpela man bilong raitim Baibel i tok, dispela em i “namba wan samting long laip bilong yumi man.”—Saveman 12:13.
2 Nambawan bikpela lo i stap insait long Lo Bilong Moses i tok, ‘yumi mas laikim God tru long bel bilong yumi na long strong bilong yumi’; God i bin givim dispela lo long ol papamama. Yumi inap save long dispela, long wanem, Lo i tok moa olsem: “Yupela i mas lainim ol pikinini bilong yupela long ol dispela lo [em ol dispela tok long laikim tru Jehova]. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.” (Lo 6:4-7; Mak 12:28-30) Olsem na God i tokim ol papamama, ol i mas putim em i stap namba wan. Bilong mekim olsem, ol yet i mas laikim em tru na ol i mas skulim ol pikinini long mekim olsem.
Wok Bilong Ol Kristen
3 Pasin Jisas i mekim i kamapim klia olsem em i bikpela samting long tingim ol pikinini na skulim ol, maski ol i liklik yet. Wanpela taim, klostu long pinis bilong wok bilong Jisas long graun, ol man i kirap na bringim ol liklik pikinini bilong ol i kam long em. Ating ol disaipel i ting Jisas i gat bikpela wok tumas na em i no inap lusim taim long ol dispela pikinini, olsem na ol i laik pasim ol papamama. Tasol Jisas i tokim ol disaipel: “Yupela larim ol pikinini i kam long mi. Yupela i no ken pasim ol.” Na Jisas i “holim ol pikinini long han bilong en,” na long dispela pasin em i kamapim klia, i bikpela samting long tingim ol pikinini na skulim ol.—Luk 18:15-17; Mak 10:13-16.
4 Na Jisas i kamapim klia tu olsem lain bilong em i gat wok long skulim ol narapela tu—i no ol pikinini bilong ol tasol. Taim em i kirap bek pinis long matmat, “planti brata wantaim i lukim em, namba bilong ol i winim 500”; sampela namel long ol em ol papamama. (1 Korin 15:6) Ating dispela samting i kamap long wanpela maunten long Galili, em 11-pela aposel tu i bung long dispela hap. Nau Jisas i tokim olgeta: “Yupela i mas i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.” (Matyu 28:16-20) I no stret sapos wanpela Kristen i sakim dispela tok! Bilong bihainim dispela tok, ol papamama i mas skulim ol pikinini bilong ol na ol i mas autim tok na skulim ol narapela man tu.
5 Yumi mas tingim ol aposel—ol tu i mas mekim wok bilong ol insait long famili na makim taim tu bilong autim tok na mekim wok wasman bilong lukautim lain bilong God. (Jon 21:1-3, 15-17; Aposel 1:8) Ol i mas mekim olsem, long wanem, klostu olgeta—o ating olgeta wantaim—ol i marit. Olsem na aposel Pol i tok: “Ating i no orait long mipela i maritim Kristen meri na kisim ol i go raun wantaim mipela, olsem ol arapela aposel na ol brata bilong Bikpela na Pita i save mekim?” (1 Korin 9:5; Matyu 8:14) Na ating sampela aposel i gat pikinini tu. Sampela man bilong bipo ol i save raitim stori bilong ol samting i bin kamap, olsem Yusibias, ol i tok Pita i gat pikinini. Olgeta papamama Kristen long dispela taim bipo ol i mas bihainim tok bilong Baibel i tok: “Harim. Sapos wanpela man i no lukautim ol wanblut tru bilong em yet na ol arapela wanlain tu, orait dispela man i lusim pinis bilip bilong em, na em i man nogut tru. Ol haiden yet i no save mekim dispela kain pasin nogut.”—1 Timoti 5:8.
Namba Wan Wok
6 Ol elda Kristen bilong nau i gat famili, ol i gat wankain wok olsem ol aposel—ol i mas lukautim famili bilong ol long ol samting bilong spirit na bilong skin, na ol i mas i go autim tok long ol man, na mekim wok wasman na lukautim lain bilong God. Orait, ol i mas putim wanem wok i namba wan? Wastaua (tok Inglis) bilong Mas 15, 1964, i tok: “Namba wan wok bilong [papa] em bilong lukautim meri pikinini bilong em, na sapos em i no mekim dispela wok, em i no inap mekim stret wok elda bilong em.”
7 Olsem na bilong putim God i stap namba wan, ol papa i mas bihainim tok bilong God long ‘stretim gut ol pikinini na skulim ol long tok bilong Jehova.’ (Efesus 6:4) Papa i no ken givim dispela wok long narapela man, maski papa i gat wok olsem wasman bilong lukautim ol wok insait long kongrigesen Kristen. Orait, olsem wanem ol papa inap mekim ol wok bilong ol, olsem lukautim famili long ol samting bilong skin na bilong spirit na helpim ol long i stap bel isi, na mekim tu wok wasman bilong ol insait long kongrigesen?
Bilong Helpim Ol
8 Em nau, yumi save, sapos i gat sampela bilong helpim ol elda i gat famili, em bai gutpela. Dispela Wastaua yumi bin kamapim hap tok bilong en, em i tok, meri Kristen inap helpim gut man bilong em. Wastaua i tok: ‘Meri inap mekim ol samting na bai man bilong em i gat taim bilong redim gut ol tok na mekim ol narapela wok insait long kongrigesen, na meri i ken makim taim bilong mekim olgeta wok bilong em long haus, na redim kaikai long taim stret, na redi long lusim haus long taim stret bilong i go long ol miting bilong kongrigesen. I gat planti samting meri Kristen inap mekim aninit long man bilong em long skulim ol pikinini long ol samting ol i mas mekim na bai Jehova i ken laikim ol.’ (Sindaun 22:6) Yes, Jehova i bin wokim meri olsem “helpim” bilong man bilong em, na sapos man i gat gutpela tingting, em bai amamas long meri i helpim em. (Stat 2:18) Taim meri i helpim man, nau man i gat taim bilong lukautim gut famili na ol wok bilong em long kongrigesen.
9 Tasol i no meri bilong ol elda tasol i gat dispela wok—ol narapela tu inap mekim sampela samting bilong helpim ol elda Kristen long mekim wok bilong ol long “lukautim gut ol manmeri bilong God” na lukautim tu ol wanhaus bilong ol yet. (1 Pita 5:2) Husat moa inap mekim? Aposel Pol i tokim ol brata long Tesalonaika long tingim ol man “i stap hetman” bilong ol. Tasol Pol i tok moa long ol dispela brata yet—em ol brata i no stap wasman—em i tok: “Ol brata, mipela i laik kirapim yupela long stretim pasin bilong ol man i save les nabaut na long strongim bel bilong ol man i save pret na long helpim ol man i no strong. Na yupela i mas isi isi long olgeta man.”—1 Tesalonaika 5:12-14.
10 Em i gutpela tru taim ol brata insait long kongrigesen i gat pasin sori na dispela i kirapim ol long strongim bel bilong ol man i gat hevi, na helpim ol man i no strong, na stretim ol man i save les nabaut, na isi isi long olgeta man! Ol brata long Tesalonaika i nupela long kisim tok i tru bilong Baibel na ol i bin kisim bikpela pen na hevi long han bilong ol man, tasol ol i bihainim dispela tok bilong Pol. (Aposel 17:1-9; 1 Tesalonaika 1:6; 2:14; 5:11) Yumi save, taim ol i wok gut wantaim olsem, dispela i strongim olgeta insait long kongrigesen na helpim ol long i stap wanbel! Na long nau tu, taim ol brata i strongim na helpim na stretim ol narapela insait long kongrigesen, dispela i helpim gut ol elda, em planti ol i gat famili bilong lukautim, na nau ol i no hatwok long mekim ol wok bilong ol long lukautim kongrigesen.
11 Tasol yumi laik save, ol dispela “brata” em aposel Pol i bin givim tok long ol, sampela em ol meri? Yes, long wanem, i gat planti meri ol i bin kamap bilipmeri. (Aposel 17:1, 4; 1 Pita 2:17; 5:9) Tasol ol dispela meri inap mekim wanem bilong helpim ol narapela? I gat sampela yangpela meri insait long kongrigesen na “bel bilong ol i kirap long marit” na ol i hatwok long bosim skin, na sampela ol i stap bel hevi. (1 Timoti 5:11-13) Long nau tu sampela meri i gat wankain hevi. Ating ol i laik tru bai i gat wanpela ol i ken kamapim hevi bilong ol long em na em bai putim yau na pilim tru ol dispela hevi bilong ol. Strongpela meri Kristen inap helpim gut ol kain meri olsem. Em inap toktok wantaim meri long ol hevi bilong dispela meri; em wanpela wok i no gutpela long man Kristen em wanpela tasol i mekim. Pol i stori long gutpela wok ol meri Kristen inap mekim bilong helpim ol narapela, na em i tok: “Ol lapun meri . . . i mas skulim ol arapela long mekim gutpela pasin, na ol yangpela meri bai i save gut long pasin bilong laikim tru ol man bilong ol na ol pikinini bilong ol. Na ol yangpela meri bai i bosim gut tingting bilong ol yet, na ol bai i stap klin tru long ai bilong God. Na ol bai . . . lukautim gut haus bilong ol, na . . . aninit long ol man bilong ol. Na sapos ol i mekim ol dispela pasin, orait ol man bai i no inap tok nogut long tok bilong God.”—Taitus 2:3-5.
12 Ol sista i gat pasin daun ol i gutpela blesing tru insait long kongrigesen taim ol i helpim na wok gut wantaim man bilong ol na ol elda! (1 Timoti 2:11, 12; Hibru 13:17) Ol elda i gat famili bilong ol yet ol i kisim gutpela helpim tru taim olgeta i wok gut wantaim na narapela i laikim tru narapela, na taim olgeta i daun long ol wasman.—1 Pita 5:1, 2.
Yupela Papamama i Putim Wanem Samting i Stap Namba Wan?
13 Bipo wanpela man i gat nem long mekim pilai em i tok: ‘Mi bin lukim ol man i mekim gut wok bilong ol long bosim kampani i gat planti handet wokman long en; ol i save gut long stretim olgeta kain hevi i kamap, na long pasin bilong stretim na praisim ol man insait long wok bisnis. Tasol nambawan bikpela wok bisnis bilong ol, em famili bilong ol, na ol i pundaun tru long mekim gut dispela wok.’ Bilong wanem i olsem? As bilong en, em ol i putim ol wok bisnis na ol narapela wok i stap namba wan na ol i no tingim tok bilong God, em i tok: “Ol dispela lo nau mi givim long yupela . . . yupela i mas lainim ol pikinini bilong yupela long ol dispela lo.” Na ol i mas mekim olsem long olgeta de. Ol papamama i mas givim taim bilong ol long ol pikinini—na bikpela samting, em ol i mas laikim ol tru na tingim gut ol.—Lo 6:6-9.
14 Baibel i tok, ol pikinini ol i olsem gutpela presen yumi kisim long Jehova. (Song 127:3) Olsem wanem? Yu save lukautim ol pikinini bilong yu olsem ol i bilong God yet, olsem wanpela presen em i bin givim long yu bilong lukautim? Ating pikinini bilong yu bai amamas tru sapos yu holim em na mekim gut long em, na long dispela pasin yu kamapim klia olsem yu laikim em tru na yu tingim em. (Mak 10:16) Tasol bilong “skulim pikinini bilong yu long bihainim gutpela pasin, na em bai i wokabaut long dispela rot,” yu mas mekim sampela samting moa—i no bilong holim em na kis long em tasol. Bilong givim gutpela na stretpela tingting long pikinini bambai em i ken abrusim ol samting i laik pundaunim em, yu mas stretim em tu. Sapos papa na mama i laikim tru pikinini, bai em i “strong long stretim em.”—Sindaun 13:1, 24; 22:6.
15 Em i bikpela samting long papamama i mas stretim pikinini. Dispela i kamap ples klia long tok bilong wanpela meri i gat wok long skul bilong helpim ol pikinini long hevi bilong ol. Em i stori long sampela i kam long ofis bilong em, na em i tok: ‘Ol i stap tarangu tru, na ol i stap bel hevi, na i olsem tingting bilong ol i paul. Taim ol i toktok long i stap bilong ol, ol i save krai. Planti ol i traim long kilim i dai skin bilong ol yet, long wanem, ol i bel hevi tru na ol i pilim olsem i no gat wanpela i tingim ol; na hevi bilong ol i bikpela tru na ol i no inap karim, long wanem, ol i yangpela tru na ol yet i mas bosim wokabaut bilong ol, na ol i no inap mekim olsem.’ Na em i tok moa: ‘Taim yangpela i ting em yet i mas bosim wokabaut bilong em, em i save pret long dispela samting.’ Tru, ating ol pikinini i no laikim papamama i stretim ol, tasol taim papamama i soim rot long ol na putim sampela lo o tambu long ol, ol i save pilim tru dispela gutpela pasin bilong papamama. Ol i amamas long papamama i save tingim gut ol na putim sampela lo long ol. Wanpela yangpela, em papamama i bin mekim olsem long em na em i tok: ‘Mi no tingting planti moa; nau mi stap bel isi.’
16 Tasol maski papamama i save laikim tru ol pikinini na ol i skulim ol gut, sampela pikinini ol i bihainim pasin bilong yangpela man long tok piksa bilong Jisas, em i sakim ol gutpela tok bilong papa na em i go na paul nabaut. (Luk 15:11-16) Tasol dispela yet i no makim olsem papamama i no mekim gut wok bilong ol long skulim pikinini, olsem Sindaun 22:6 i tok. Dispela tok long ‘skulim pikinini long bihainim gutpela pasin, na em bai i wokabaut long dispela rot,’ em i stret long planti pikinini. Tasol sori tru, sampela pikinini ol i olsem dispela yangpela man i bin lusim papa—ol i ‘sakim tok bilong papa.’—Sindaun 30:17.
17 Papa bilong wanpela bikhetmanki em i bel hevi na i tok: “Mi bin wok strong tru long putim ol tok i go daun long bel bilong em. Mi no save wanem samting bai mi mekim, long wanem, mi bin traim planti samting tru. Tasol wok bilong mi i lus nating.” I gutpela tru sapos bihain ol dispela kain pikinini i ken tingim bek ol gutpela tok papa i bin givim long ol bilong skulim ol na ol bai kam bek, olsem dispela yangpela man i bin mekim long tok piksa bilong Jisas. Tasol sori tru, sampela pikinini i save bikhet na mekim ol pasin sem olsem pamuk samting na ol i bagarapim tru bel bilong papamama. Tasol bilong mekim gut bel bilong ol, ol papamama i ken tingim nambawan tisa tru i bin i stap long graun—wanpela sumatin em i bin skulim em longtaim, em Judas Iskariot, i kamapim em long ol birua. Na yumi ken save, Jehova yet i bel hevi taim planti pikinini bilong em long heven ol i sakim tok bilong em na ol i kamap bikhet, na i no asua bilong em.—Luk 22:47, 48; KTH 12:9.
Ol Pikinini—Yupela Laik Mekim Husat i Amamas?
18 Jehova i tokim yupela ol yangpela olsem: “Yupela i mas bihainim tok bilong papamama bilong yupela.” (Efesus 6:1) Taim ol yangpela i mekim olsem, ol i save putim God i stap namba wan. Yu no ken mekim pasin longlong! Baibel i tok: “Man i no gat gutpela tingting i save sakim tok bilong papa bilong en.” Na yu no ken bikhet na ting, i no gat wok long wanpela i mas skulim na stretim yu. Baibel i tok stret olsem: “Sampela manmeri i save ting, ol i no gat asua long wanpela samting. Tasol sin bilong ol i stap yet na ol i doti tru long ai bilong God.” (Sindaun 15:5; 30:12) Olsem na yu mas bihainim tok bilong God long stiaim yu—“harim,” “putim gut long tingting,” “no ken lusim tingting,” “tingim gut,” “harim gut,” “no ken sakim,” ol lo bilong papamama na tok bilong ol bilong stretim yu.—Sindaun 1:8; 2:1; 3:1; 4:1; 6:20.
19 I gat as tru na yu mas bihainim tok bilong Jehova. Em i save laikim yu tru, na ol lo bilong em—wanpela i bilong ol pikinini, olsem ol i mas bihainim tok bilong papamama—em i bin givim bilong lukautim yu na helpim yu long i stap amamas. (Aisaia 48:17) Na em i bin givim Pikinini bilong em bilong i dai na helpim yu bambai yu inap lusim kalabus bilong sin na dai, na yu ken kisim laip i stap oltaim oltaim. (Jon 3:16) Olsem wanem? Yu tenkyu tru long dispela samting? God i stap long heven na i lukluk i stap, na em i skelim bel bilong yu na bai em i ken save, yu laikim em tru na yu tenkyu long ol samting em i bin mekim bilong helpim yu long kisim laip o nogat. (Song 14:2) Satan tu i lukluk i stap, na em i wok long tok bilas long God—em i tok, bai yu no ken bihainim tok bilong God. Taim yu sakim tok bilong God, yu mekim bel bilong Satan i amamas, tasol yu mekim Jehova i “bel hevi.” (Song 78:40, 41) Long pasin sori Jehova i tokim yu: “Pikinini bilong mi, yu mas kisim gutpela tingting na save na bai mi belgut tru [long wanem, yu bihainim tok bilong mi]. Na . . . man i sutim tok long mi, bai mi inap bekim tok long em.” (Sindaun 27:11) Em nau, bikpela askim i olsem: Yu laik mekim husat i amamas—Satan o Jehova?
20 Tru, i hatwok long mekim laik bilong God, long wanem, Satan wantaim lain bilong em long graun ol i save putim planti traim na hevi long yu. Dispela inap mekim na bai yu pret. Wanpela yangpela meri i tok: “Taim yu pret, em i kain olsem skin bilong yu i kol. Yu inap mekim wanpela samting bilong stretim.” Na em i tok: “Taim skin bilong yu i kol, yu save putim kolsinglis, na sapos skin i kol yet, yu save putim narapela. Na yu wok long mekim olsem inap long taim skin bilong yu i no kol moa. Olsem na taim yu pret na yu beten long Jehova, i olsem yu putim wanpela kolsinglis taim yu kol. Taim mi beten pinis na mi pret yet, mi save beten gen, na mi wok long mekim olsem inap long taim mi no pret moa. Na dispela pasin i wok gut. Em i helpim mi long abrusim pasin nogut!”
21 Sapos yumi wok strong long putim God i stap namba wan, Jehova bai sambai long yumi. Em bai strongim yumi, na sapos yumi sot long helpim, em bai salim ol ensel bilong helpim yumi, olsem em i bin mekim long Pikinini bilong em. (Matyu 18:10; Luk 22:43) Orait yupela ol papamama na ol pikinini, yupela strongim bel. Yupela mas pret long God olsem Krais i bin mekim, na dispela bai mekim yupela i amamas. (Aisaia 11:3) Tru tumas, “namba wan samting long laip bilong yumi man i olsem. Yumi mas aninit [olsem pret] long God tasol na bihainim ol lo bilong em.”—Saveman 12:13.
Yu Inap Bekim?
◻ Ol disaipel bilong Jisas long bipo i gat wanem ol wok ol i mas makim taim bilong mekim?
◻ Ol papamama Kristen i gat wanem wok ol i mas mekim?
◻ I gat wanem helpim i stap bilong ol elda Kristen i gat famili?
◻ Wanem gutpela wok ol sista inap mekim insait long kongrigesen?
◻ Ol pikinini i mas bihainim wanem tok bilong stretim ol na bilong soim rot long ol?
[Askim Bilong Stadi]
1. Ol papamama wantaim ol pikinini i mas kisim wanem kain pret? Dispela bai mekim wanem long ol?
2. Wanem nambawan bikpela lo insait long Lo Bilong Moses? God i givim dispela lo long husat tru?
3. Jisas i mekim wanem na em i kamapim klia olsem yumi mas tingim ol pikinini tu?
4. Dispela tok bilong Jisas olsem “mekim olgeta lain manmeri i kamap disaipel bilong mi,” em i bin givim long husat? Olsem na ol i mas mekim wanem?
5. (a) Olsem wanem yumi save, klostu olgeta aposel—o ating olgeta wantaim—ol i marit na ating ol i gat pikinini? (b) Wanem tok ol het bilong famili i mas tingim gut?
6. (a) Wanem bikpela wok ol elda Kristen i gat famili ol i mas mekim? (b) Wanem namba wan wok bilong elda?
7. Olsem wanem ol papa Kristen i ken putim God i stap namba wan?
8. Meri bilong elda i ken helpim em olsem wanem?
9. Insait long kongrigesen bilong Tesalonaika, Pol i tokim husat long helpim ol narapela bilong kongrigesen?
10. Taim olgeta brata i helpim ol narapela narapela, dispela i save helpim kongrigesen olsem wanem?
11. (a) Olsem wanem i stret yumi ken tok, dispela tok “brata” i makim ol meri tu? (b) Ol strongpela meri Kristen i ken mekim wanem bilong helpim ol yangpela meri long nau?
12. Olgeta insait long kongrigesen i mas bihainim tok bilong husat?
13. Olsem wanem planti papa i no mekim wok bilong ol insait long famili?
14. (a) Ol papamama i mas mekim wanem bilong lukautim gut ol pikinini bilong ol? (b) Bilong skulim gut ol pikinini, papamama i mas mekim wanem samting tu?
15. Olsem wanem yumi ken save, papamama i mas stretim ol pikinini?
16. (a) Wanem samting i save painim sampela pikinini ol i go bikpela insait long famili Kristen? (b) Sapos pikinini i bikhet na sakim tok, bilong wanem dispela i no makim olsem papamama i no bin skulim em gut?
17. Ol papamama i gat pikinini i save bikhet na sakim tok bilong ol, ol i ken tingim wanem samting na dispela bai mekim gut bel bilong ol?
18. Olsem wanem ol pikinini i ken kamapim klia olsem ol i putim God i stap namba wan?
19. (a) Wanem sampela bikpela as na ol pikinini i mas bihainim tok bilong Jehova? (b) Olsem wanem ol yangpela inap kamapim klia olsem ol i tenkyu long God?
20. Wanpela yangpela meri i save mekim wanem bilong strongim bel na mekim yet wok bilong Jehova, maski em i pret?
21. Olsem wanem Jehova bai sambai long yumi sapos yumi putim em i stap namba wan?
[Piksa long pes 15]
Strongpela meri Kristen inap helpim yangpela meri
[Piksa long pes 17]
Wanem ol stori bilong Baibel inap mekim gut bel bilong ol papamama em pikinini i save bikhet?