“Lainim Ol Long Bihainim Olgeta Tok Mi Bin Givim Long Yupela”
“Go mekim olgeta lain manmeri i kamap disaipel bilong mi . . . lainim ol long bihainim olgeta tok mi bin givim long yupela.”—MATYU 28:19, 20.
1. Disaipel Filip na man Itiopia i toktok long wanem samting?
MAN Itiopia i bihainim longpela rot na i kam long Jerusalem. Long dispela hap em i lotuim God em i laikim tru, em Jehova. Na tu, em i laikim tumas Tok Bilong God. Taim em i stap long karis bilong em na i laik go bek long ples, em i wok long ritim buk bilong profet Aisaia, na long dispela taim Filip, wanpela disaipel bilong Krais, i bungim em. Filip i askim man Itiopia: “Yu save long as bilong dispela tok yu ritim?” Na man i tok: “Sapos i no gat man i tokim mi long as bilong dispela tok, orait bai mi inap save olsem wanem?” Filip i bin helpim dispela sumatin bilong Baibel long kamap wanpela disaipel bilong Krais.—Aposel 8:26-39.
2. (a) Olsem wanem bekim bilong man Itiopia em i bikpela samting? (b) Yumi bai skelim wanem tupela askim i stret long tok bilong Krais long kamapim ol disaipel?
2 Bekim bilong man Itiopia em i samting bilong tingim. Em i tok: ‘Sapos i no gat man i tokim mi, bai mi inap save olsem wanem?’ Yes, wanpela i mas skulim em. Dispela i kamapim klia olsem wanem wanpela tok Jisas i givim long taim em i stori long wok bilong kamapim ol disaipel em i bikpela samting tru. Em wanem tok? Bilong painim bekim, yumi laik skelim yet tok bilong Jisas i stap long Matyu sapta 28. Stadi paslain long dispela i mekim bikpela stori long tupela askim olsem bilong wanem? na long wanem hap? Nau bai yumi skelim tupela narapela askim i stret long tok bilong Krais long kamapim ol disaipel—wanem tok? na wanem taim?
“Lainim Ol Long Bihainim Olgeta Tok Mi Givim”
3. (a) Man i kamap wanpela disaipel bilong Jisas Krais olsem wanem? (b) Wok bilong kamapim ol disaipel i makim tu wok bilong lainim ol long wanem samting?
3 Wanem tok em yumi laik skulim ol narapela long en bilong helpim ol long kamap disaipel bilong Krais? Jisas i tokim lain bilong em: “Go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:19, 20) Olsem na yumi mas skulim ol man long ol tok Krais i givim.a Tasol wanem samting tru bai helpim man i lainim ol tok bilong Jisas long kamap wanpela disaipel, na long stap olsem inap oltaim? Tok bilong Jisas i kamapim klia wanpela bikpela samting. Tingim, em i no bin tok: ‘Lainim ol long olgeta tok mi givim.’ Nogat. Jisas i bin tok: “Lainim ol long bihainim olgeta tok mi givim.” (Matyu 19:17) Tok hia i makim wanem samting?
4. (a) Bilong bihainim wanpela tok, man i mas mekim wanem? (b) Stori long olsem wanem yumi lainim man long bihainim tok bilong Krais.
4 Bilong bihainim wanpela tok i olsem man i mas “stretim wokabaut bilong em” na bai em inap mekim samting tok i makim. Olsem na bai yumi mekim wanem bilong skulim man long bihainim ol tok Krais i givim? Tingim olsem wanem wanpela tisa bilong lainim man long draiv i skulim ol stiuden bilong em long bihainim ol lo bilong rot. Ating tisa i skulim ol stiuden long ol lo bilong draivim ka long taim ol i stap long klasrum. Tasol bilong skulim ol stiuden bilong em long bihainim ol dispela lo, em i mas givim skul long ol long taim ol yet i draiv na traim mekim ol samting ol i bin lainim. Olsem tasol taim yumi stadi wantaim ol manmeri long Baibel, yumi skulim ol long ol samting Krais i tokim yumi long mekim. Tasol yumi gat wok tu long soim rot long ol long taim ol i traim long bihainim ol dispela tok long wokabaut bilong ol na long wok autim tok. (Jon 14:15; 1 Jon 2:3) Olsem na bilong inapim ol samting Krais i tokim yumi long mekim yumi mas stap olsem tisa na man bilong soim rot. Taim yumi mekim olsem, yumi bihainim pasin bilong Jisas na Jehova yet.—Song 48:14; KTH 7:17.
5. Ating i gat wanem as na man i stadi long Baibel i surik long bihainim tok bilong Krais long kamapim ol disaipel?
5 Wok bilong skulim ol narapela long bihainim tok bilong Jisas i makim tu wok bilong helpim ol long bihainim tok long kamapim ol disaipel. Ating sampela em yumi stadi wantaim ol long Baibel bai pret long mekim. Maski sapos ol bin mekim planti wok long sampela lotu bilong Kristendom, no ken ting ol tisa bilong lotu bilong ol bilong bipo i bin lainim ol long kamapim ol disaipel. Sampela hetman bilong lotu i tokaut olsem ol lotu bilong Kristendom i pundaun tru long wok bilong lainim ol sipsip bilong ol long autim tok. Saveman bilong Baibel, em John R. W. Stott, i stori long tok bilong Jisas long go na helpim olgeta kain man long kamap disaipel, em i tok: “Yumi no mekim samting dispela tok i makim, na dispela em i nambawan bikpela hevi bilong ol evanjelikal Kristen long wok evanjelis long nau.” Em i tok moa: “Yumi save stap longwe long man na autim tok long em. Sampela taim yumi luk olsem ol man i sanap long nambis na singaut bikmaus long helpim man i laik dring wara na dai. Yumi no daiv i go insait long wara bilong kisim bek ol. Yumi pret, nogut wara i mekim na yumi wet.”
6. (a) Olsem wanem yumi ken bihainim pasin bilong Filip long taim yumi wok long helpim wanpela Baibel sumatin? (b) Olsem wanem yumi ken kamapim olsem yumi tingim sumatin long taim em i kirap long mekim wok autim tok?
6 Sapos long bipo wanpela em yumi stadi wantaim em long Baibel i bin insait long wanpela lotu we ol lain bilong en i pret long autim tok, ating bai em i hatwok long daunim dispela pret na bihainim tok bilong Krais long kamapim ol disaipel. Em i mas i gat helpim. Olsem na yumi no ken les kwik taim yumi skulim na soim rot long em long pasin i helpim save bilong em i go bikpela na i kirapim em long mekim wok, kain olsem tok bilong Filip i bin givim save long man Itiopia na i kirapim em long kisim baptais. (Jon 16:13; Aposel 8:35-38) Na tu, yumi laik skulim ol sumatin bilong Baibel long bihainim tok long kamapim ol disaipel na dispela i kirapim yumi long stap wantaim ol na soim rot long ol long namba wan taim ol i autim tok long Kingdom.—Saveman 4:9, 10; Luk 6:40.
“Olgeta Tok”
7. Taim yumi skulim ol narapela long “bihainim olgeta tok” dispela i makim olsem yumi lainim ol long wanem tupela lo?
7 Yumi no save skulim ol nupela disaipel long kamapim ol disaipel na em tasol. Jisas i bin tokim yumi long lainim ol man long “bihainim olgeta” tok bilong em. Dispela i makim tu tupela nambawan bikpela lo—long laikim tru God na long laikim tru ol man. (Matyu 22:37-39) Olsem wanem bai yu skulim nupela disaipel long bihainim dispela tupela lo?
8. Mekim tok piksa long olsem wanem tisa i ken skulim nupela disaipel long kamapim pasin laikim.
8 Tingim tok piksa bilong stiuden i lain long draiv. Taim em i draiv raun long rot na tisa i stap wantaim em, em i lain, tok bilong tisa i lainim em, na tu em i lukluk long ol narapela draiva na dispela i lainim em. Ating tisa i tokim stiuden long lukim gutpela pasin wanpela draiva i mekim taim em i givim spes long narapela draiva; o draiva i tingim ol narapela na daunim hetlait bilong ka; o draiva husat i helpim narapela em ka bilong em i bagarap long rot. Kain pasin olsem i lainim stiuden long ol gutpela samting em i ken mekim long taim em i draiv. Olsem tasol wanpela nupela disaipel i stap long rot i go long laip, em i kisim save long tisa bilong em na long gutpela pasin em i lukim long kongrigesen.—Matyu 7:13, 14.
9. Olsem wanem wanpela nupela disaipel i lain long man i mas mekim wanem bilong bihainim tok long kamapim pasin laikim?
9 Olsem: Ating Baibel sumatin i lukim wanpela papa o mama wanpis i taitim bun tru long kam long Haus Kingdom wantaim ol liklik pikinini bilong em. O wanpela meri i kam long olgeta miting maski em i hatwok long daunim bel hevi, wanpela lapun wanpis husat i save strong long kalap long bas na bihain wokabaut i go long Haus Kingdom maski skin i no strong, o wanpela yangpela i insait long wok bilong klinim Haus Kingdom. Ating Baibel sumatin i lukim wanpela elda long kongrigesen husat i save go pas long autim tok maski em i gat planti wok insait long kongrigesen. Ating em i bungim wanpela Witnes i gat sampela bagarap long skin na i no inap lusim haus, tasol Witnes hia i save strongim ol lain i kam lukim em long samting bilong spirit. O sumatin i lukim tupela marit i mekim bikpela wok long stretim ol samting na bai ol inap lukautim lapun papamama bilong ol. Em nau, nupela disaipel i lukim ol dispela pasin ol Kristen i kamapim, olsem pasin bilong mekim gut long ol arapela na helpim ol, na long dispela rot em i lain long man i mas mekim wanem bilong bihainim tru tok bilong Krais long laikim tru God na ol arapela, na moa yet ol wanbilip. (Sindaun 24:32; Jon 13:35; Galesia 6:10; 1 Timoti 5:4, 8; 1 Pita 5:2, 3) Long dispela rot, olgeta wan wan long kongrigesen Kristen inap—i mas—stap olsem tisa na man bilong soim rot.—Matyu 5:16.
“I Go Inap Long Dispela Taim i Pinis”
10. (a) Bai yumi mekim wok bilong kamapim ol disaipel i go inap long wanem taim? (b) Olsem wanem Jisas em i stap olsem gutpela piksa long pasin bilong inapim wok?
10 Yumi mas mekim wok bilong kamapim ol disaipel i go inap long wanem taim? Yumi mas mekim i go inap long pasin bilong dispela graun i pinis. (Matyu 28:20) Bai yumi inapim dispela wok Jisas i tok long mekim? Olsem wanpela kongrigesen bilong olgeta hap bilong graun, yumi strong long mekim olsem. Long ol yia i go pinis, yumi bin amamas long lusim taim, strong, na mani samting bilong yumi bilong painim ol man em “bel bilong ol i gutpela tru.” (Aposel 13:48) Long nau, insait long wanpela yia ol Witnes Bilong Jehova i lusim moa long 3 milion aua long olgeta wan wan de bilong autim tok bilong Kingdom na kamapim ol disaipel long olgeta hap. Yumi mekim olsem, long wanem, yumi bihainim pasin bilong Jisas long mekim wok. Em i bin tok: “Kaikai bilong mi, em long bihainim laik bilong em na long pinisim wok em i bin givim mi.” (Jon 4:34) Yumi tu i gat bikpela laik long mekim olsem. (Jon 20:21) Yumi no laik statim tasol dispela wok Jisas i givim long yumi, nogat; yumi laik pinisim.—Matyu 24:13; Jon 17:4.
11. Wanem samting i kamap long sampela brata na sista Kristen bilong yumi? Yumi mas givim wanem askim long yumi yet?
11 Tasol yumi sori long lukim sampela bilong ol wanbilip bilong yumi i no strong moa long samting bilong spirit, olsem na ol i no wok strong moa o ol i no bihainim moa tok bilong Krais long kamapim ol disaipel. Olsem wanem? I gat rot we yumi inap helpim ol long bung gen wantaim kongrigesen na insait gen long wok bilong kamapim ol disaipel? (Rom 15:1; Hibru 12:12) Pasin Jisas i bin mekim bilong helpim ol disaipel bilong em long taim ol i no gat strong i makim samting yumi inap mekim long nau.
Soim Olsem Yu Tingim Ol
12. (a) Paslain long Jisas i dai, ol aposel i bin mekim wanem? (b) Jisas i bin mekim wanem long ol aposel bilong em, maski ol i bin kamapim olsem ol i no strong long sampela samting?
12 Long taim wok bilong Jisas long graun i laik pinis, na dai bilong em i kam klostu tru, ol aposel i bin ‘lusim Jisas na ranawe.’ Olsem Jisas i bin tok profet long en, ol i ‘go nabaut long ples bilong ol.’ (Mak 14:50; Jon 16:32) Jisas i bin mekim wanem long ol poroman bilong em, em ol i no stap strong tumas long samting bilong spirit? Bihain liklik long em i kirap bek, Jisas i bin tokim sampela lain bilong em: “No ken pret. Yutupela go tokim ol brata bilong mi long ol i mas i go long Galili. Ol bai i lukim mi long dispela hap.” (Matyu 28:10) Maski ol aposel i bin kamapim olsem ol i no strong long sampela samting, Jisas i kolim ol yet olsem ol “brata bilong mi.” (Matyu 12:49) Jisas i bilip yet long ol. Long dispela rot, Jisas i marimari long ol na lusim rong bilong ol, wankain olsem Jehova i save marimari long man na lusim rong bilong em. (2 King 13:23) Olsem wanem yumi ken bihainim pasin bilong Jisas?
13. Yumi mas i gat wanem tingting long ol lain i no strong moa long samting bilong spirit?
13 I stret yumi wari long ol lain i no wok strong olsem bipo o ol i lusim pinis wok autim tok. Yumi tingim yet pasin laikim ol dispela wanbilip i bin kamapim long bipo—sampela i bin mekim inap planti yia tru. (Hibru 6:10) Tru tumas yumi sori long ol i no poromanim yumi moa. (Luk 15:4-7; 1 Tesalonaika 2:17) Tasol yumi ken mekim wanem bilong kamapim olsem yumi tingim ol?
14. Olsem Jisas i bin mekim, yumi inap helpim man i no strong olsem wanem?
14 Ol aposel i bel hevi i stap na Jisas i tokim ol long i go long Galili na ol bai lukim em long dispela hap. I olsem Jisas i singautim ol long kam long wanpela spesel miting. (Matyu 28:10) Na long nau tu, yumi kirapim ol lain i no strong long samting bilong spirit long kam long ol miting bilong kongrigesen Kristen, na yumi no mekim long wanpela taim tasol. Singaut bilong Jisas i karim kaikai, long wanem, “ol 11-pela disaipel i wokabaut i go long Galili, na ol i kamap long dispela maunten Jisas i bin tok bai ol i mas i go long en.” (Matyu 28:16) Yumi amamas tru taim lain i no strong long samting bilong spirit i bihainim singaut bilong yumi na kirap long kam long ol miting gen!—Luk 15:6.
15. Olsem wanem yumi ken bihainim Jisas long tok welkam long ol lain i no strong long taim ol i kam long miting?
15 Bai yumi mekim wanem taim wanpela Kristen i no strong i kam long Haus Kingdom? Jisas yet i bin mekim wanem taim em i lukim ol aposel bilong em—inap sotpela taim bilip bilong ol i no strong—ol i kam long ples bilong bung? “Jisas i kam klostu” long ol na toktok wantaim ol. (Matyu 28:18) Em i no stap longwe na lukluk tasol long ol, nogat, em i bin wokabaut i go long ol. Tingim bel isi ol aposel i bin pilim taim Jisas i go pas long toktok wantaim ol! Yumi tu i laik go pas na amamas long tok welkam long ol man i no strong long samting bilong spirit em ol i wok long kam bek long kongrigesen Kristen.
16. (a) Pasin Jisas i bin mekim long ol lain bilong em i lainim yumi long wanem samting? (b) Olsem wanem yumi ken bihainim tingting bilong Jisas long ol man i no strong? (Lukim sta.)
16 Jisas i bin mekim wanem samting moa? Namba wan, em i mekim toksave: “God i givim mi bikpela namba na strong bilong bosim olgeta samting.” Namba tu, em i givim wanpela wok long mekim: “Go mekim olgeta lain manmeri i kamap disaipel.” Namba tri, em i mekim tok promis: “Mi save stap wantaim yupela olgeta de.” Tasol yu luksave long wanem samting Jisas i no bin mekim? Em i no bin kotim ol disaipel long ol samting ol i pundaun long en na long ol i gat tupela tingting. (Matyu 28:17) Samting Jisas i mekim i wok gut? Yes. I no longtaim na ol aposel i wok gen long ‘skulim ol manmeri na autim gutnius.’ (Aposel 5:42) Taim yumi bihainim wankain tingting bilong Jisas long ol man i no strong na mekim wankain pasin olsem em i bin mekim long ol, ating yumi tu inap lukim wankain gutpela samting i kamap long kongrigesen bilong yumi.b—Aposel 20:35.
“Mi Save Stap Wantaim Yupela Olgeta De”
17, 18. Wanem tok bilong strongim yumi i stap insait long dispela tok, “Mi save stap wantaim yupela olgeta de”?
17 Laspela tok Jisas i mekim, “Mi stap wantaim yupela olgeta de,” em i strongim ol man i wok long inapim wok Krais i givim bilong kamapim ol disaipel. Maski ol birua i mekim wanem bilong sakim wok bilong yumi long autim tok bilong Kingdom na maski ol i sutim kain kain tok giaman long yumi, i no gat as na yumi pret. Bilong wanem? Long wanem Jisas, lida bilong yumi, em i holim “bikpela namba na strong bilong bosim olgeta samting long heven na graun,” em i stap wantaim yumi bilong helpim yumi!
18 Tok promis bilong Jisas olsem “mi save stap wantaim yupela olgeta de,” dispela tu i bikpela samting i mekim gut tru bel bilong yumi. Taim yumi wok long bihainim tok bilong Krais long kamapim ol disaipel, i gat taim bilong yumi long stap amamas, tasol tu, i gat taim we yumi stap bel hevi. (Sindaun 14:10) Sampela bilong yumi i gat taim we yumi bel sori long wanpela yumi laikim tru i dai. (Stat 23:2; Jon 11:33-36) Sampela i karim hevi long lapun, taim helt na strong i no gutpela olsem bipo. (Saveman 12:1-6) Na sampela i gat taim we pasin bilong i stap bel hevi i daunim ol tru. (Aisaia 61:2) Na planti moa bilong yumi i karim bikpela hevi long sot long mani samting. Tasol maski i gat ol hevi olsem, yumi mekim yet wok autim tok, long wanem, Jisas i stap wantaim yumi long “olgeta de,” dispela i makim tu ol de we yumi bagarap tru long ol bikpela hevi.—Matyu 11:28-30.
19. (a) Tok bilong Jisas long kamapim ol disaipel i karamapim wanem ol samting? (b) Wanem samting i inapim yumi long mekim dispela wok Krais i givim long yumi?
19 Olsem yumi lukim long dispela stadi na stadi yumi skelim pinis, tok bilong Jisas long kamapim ol disaipel em i karamapim olgeta samting. Jisas i tokim yumi bilong wanem na long wanem hap yumi mas mekim dispela wok. Na tu, em i tokim yumi long samting yumi mas skulim ol man long en na long yumi mas mekim dispela wok i go inap long wanem taim. Tru, i gat hatwok long inapim dispela bikpela wok. Tasol Krais i holim bikpela namba na em i sapotim yumi na em i stap wantaim yumi, olsem na yumi inap tru long mekim! Yu wanbel long dispela samting, laka?
[Ol Futnot]
a Wanpela buk i tok baptaisim na skulim man “i no olsem . . . tupela samting we wanpela i kamap bihain long narapela na em tasol.” Nogat. “Skulim man em i wanpela wok i go yet, sampela skul i kamap paslain long baptais . . . na sampela skul i kamap bihain long baptais.”
b Sampela save moa long yumi mas ting wanem long ol man i no strong na olsem wanem yumi ken helpim ol i stap long Wastaua, Februeri 1, 2003, pes 15-18.
Bai Yu Bekim Olsem Wanem?
• Olsem wanem yumi skulim ol narapela long bihainim ol tok bilong Jisas?
• Ol arapela bratasista long kongrigesen inap lainim nupela disaipel long wanem ol samting?
• Yumi ken mekim wanem bilong helpim ol lain i no strong moa long samting bilong spirit?
• Tok bilong Jisas “Mi save stap wantaim yupela olgeta de,” i strongim na mekim gut bel bilong yumi olsem wanem?
[Ol Piksa long pes 15]
Yumi mas stap olsem tisa na man bilong soim rot
[Ol Piksa long pes 17]
Wanpela nupela disaipel i lainim ol gutpela samting long pasin ol narapela i mekim