Larim Ol Tok Bilong Jisas i Stiaim Tingting Bilong Yu

“Dispela man God i salim i kam, em i save autim tok bilong God.”​—JO. 3:34.

1, 2. Bilong wanem yumi ken tok olsem “tok bilong God” i as bilong ol tok Jisas i mekim long Bikpela Tok Long Maunten?

TAIM Jisas i mekim Bikpela Tok Long Maunten, em i kamapim planti gutpela tok bilong skulim yumi. Ol dispela tok i gutpela tru, long wanem, Jehova em i As bilong ol tok Jisas i autim! Baibel i tok long Jisas olsem: “Dispela man God i salim i kam, em i save autim tok bilong God.”​—Jo. 3:​34-36.

² Taim Jisas i mekim Bikpela Tok Long Maunten, maski em i bin mekim insait long 20 minit samting, em i bin kolim inap 21 tok bilong 8-pela narapela narapela buk bilong Ol Skripsa Hibru. Olsem na “tok bilong God” i as bilong ol dispela tok Jisas i autim. Orait nau yumi ken stori long olsem wanem yumi ken bihainim sampela bilong ol dispela gutpela tok em Pikinini Bilong God i bin mekim.

“Go Pastaim na Stretim Tok Wantaim Brata Bilong Yu”

 3. Jisas i tokim ol disaipel long ol samting nogut inap kamap long pasin bilong kros na em i givim wanem skultok long ol?

³ Yumi ol Kristen i amamas na stap wanbel, long wanem, holi spirit bilong God i stap wantaim yumi na holi spirit i save kamapim amamas na pasin wanbel. (Ga. 5:​22, 23) Jisas i no laik bai ol disaipel bilong em i lusim pasin bilong i stap wanbel na amamas, olsem na em i tok lukaut long ol samting nogut inap kamap sapos man i pulim kros inap longpela taim. (Ritim Matyu 5:​21, 22.) Em i tok: “Olsem na sapos yu bringim ofa bilong yu i kam long alta, na yu tingim brata bilong yu em i gat tok long yu, orait yu mas lusim ofa bilong yu i stap klostu long alta. Na yu go pastaim na stretim tok wantaim brata bilong yu. Stretim pinis, orait nau yu ken i go na givim ofa bilong yu long God.”​—Mt. 5:​23, 24.

4, 5. (a) Long Matyu 5:​23, 24, Jisas i tok long wanem “ofa”? (b) Bilong wanem em i bikpela samting long stretim tok na kamap wanbel wantaim brata i gat tok long yumi?

⁴ Dispela “ofa” em Jisas i tok long en em ol ofa ol man i bringim i kam long alta long tempel long Jerusalem. Pasin bilong givim ol animal olsem ofa em i bikpela samting, long wanem, em i insait long wok lotu em ol manmeri bilong Jehova i save mekim. Tasol Jisas i kamapim klia samting i bikpela moa​—paslain long yumi givim ofa, yumi mas stretim tok na kamap wanbel wantaim brata i gat tok long yumi.

⁵ Dispela tok “stretim tok” i makim olsem man i mekim ol samting bilong kamap wanbel gen. Dispela tok bilong Jisas i skulim yumi long wanem samting? Pasin yumi mekim long ol arapela, dispela i save mekim sampela samting long pasin bilong yumi long pas gut wantaim Jehova. (1 Jo. 4:20) Long bipo, sapos man i no mekim stretpela pasin long brata bilong em na em i givim ofa long God, orait ofa bilong em i olsem samting nating tasol.​​—Ritim Maika 6:​6-8.

Yumi Mas Mekim Pasin Daun

6, 7. Bilong wanem yumi mas mekim pasin daun taim yumi laik stretim tok na kamap wanbel gen wantaim brata i gat tok long yumi?

⁶ Bilong kamap wanbel wantaim brata i gat tok long yumi, yumi mas mekim pasin daun. Man i gat pasin daun em i no save tok pait wantaim ol wanbilip bilong soim olsem em i ken mekim ol samting em i ting i stret long mekim. Dispela kain pasin bai kamapim hevi, kain olsem hevi i bin i stap namel long ol Kristen long Korin bilong bipo. Pol i tingim dispela hevi na em i mekim dispela tok: “Yupela i save bringim ol arapela manmeri bilong sios i go long kot, na dispela pasin bilong yupela i soim olsem yupela i pundaun pinis long bihainim pasin bilong Krais. Bilong wanem yupela i no larim ol i mekim nogut long yupela? Bilong wanem yupela i no larim ol i pulim ol samting bilong yupela?”​—1 Ko. 6:7.

⁷ Taim yumi go bilong stretim tok wantaim brata bilong yumi, Jisas i no tok long yumi mas soim olsem yumi no gat asua, na brata bilong yumi i gat asua, nogat. Yumi mas tingting long kamap wanbel gen wantaim brata bilong yumi. Bilong kamap wanbel gen, yumi mas kamapim stret tingting i stap long bel bilong yumi. Yumi mas save tu olsem bel bilong brata bilong yumi i bagarap. Na sapos yumi bin mekim rong, orait mobeta yumi mekim pasin daun na tok sori long em.

‘Sapos Ai Long Han Sut i Pulim Yu Long Mekim Sin’

 8. Stori long tok bilong Jisas long Matyu 5:​29, 30.

⁸ Long Bikpela Tok Long Maunten, Jisas i kamapim ol gutpela skultok i stori long stretpela pasin. Em i save olsem sampela hap bilong bodi bilong yumi inap pulim yumi long mekim rong. Olsem na Jisas i tok: “Sapos ai long han sut bilong yu i pulim yu long mekim sin, orait yu mas kamautim na tromoi. Mobeta wanpela hap bodi bilong yu i lus na yu no mekim sin, na bai ol i no tromoi bodi bilong yu olgeta i go long [Gehena]. Na sapos han sut bilong yu i mekim yu i pundaun long sin, orait yu mas katim na tromoi. Mobeta wanpela hap bodi bilong yu i lus, na yu no mekim sin, na bodi bilong yu olgeta i no i go long [Gehena].”​—Mt. 5:​29, 30.

 9. Olsem wanem “ai” o “han” bilong yumi inap “pulim” yumi?

⁹ Jisas i kolim “ai,” na dispela i makim strong bilong ai long lukluk long ol samting, na “han” i makim ol samting yumi save mekim long han bilong yumi. Sapos yumi no was gut, ol dispela hap bilong bodi inap “pulim” yumi na yumi lusim pasin bilong i stap “pren tru bilong God.” (Stt. 5:22; 6:9) Olsem na taim wanpela samting i laik pulim yumi long sakim tok bilong Jehova, orait yumi mas strong long mekim sampela samting, i kain olsem yumi kamautim ai o katim na rausim han.

10, 11. Wanem samting inap helpim yumi long abrusim pasin pamuk?

¹⁰ Olsem wanem yumi inap bosim gut ai bambai yumi no ken lukluk long ol samting bilong pasin pamuk? Jop, em man i gat pasin bilong pret long God, em i tok: “Mi bin mekim strongpela promis pinis olsem, mi no ken aigris long ol meri.” (Jop 31:1) Jop em i maritman na em i gat strongpela tingting olsem em i no ken kalapim ol lo bilong God long stretpela pasin. Maski yumi marit o yumi singel, yumi tu i mas i gat dispela tingting. Bilong abrusim pasin pamuk, yumi mas larim holi spirit bilong God i stiaim yumi, em dispela spirit i save helpim ol man i laikim God long kisim pasin bilong bosim bel.​—Ga. 5:​22-25.

¹¹ Bilong abrusim pasin pamuk, i gutpela yumi askim yumi yet olsem, ‘Mi save larim ai bilong mi i kirapim mi na mi gat strongpela laik long ritim ol buk, lukim TV, o Intenet i stori long pasin doti?’ Yumi mas tingim tu tok bilong disaipel Jems: “Bel bilong yumi olgeta wan wan i save kirap na pulim yumi. Dispela laik nogut bilong yumi yet i save grisim yumi na giamanim yumi, bilong kirapim yumi long mekim sin. Orait na dispela pasin bilong bel i kirap, em i olsem meri i kisim bel, na bihain em i save kamapim sin, olsem meri i karim pikinini. Na taim sin i kamap bikpela, em i save kamapim dai.” (Jem. 1:​14, 15) Sapos wanpela man i dediket pinis long God, tasol em i gat laik nogut long bel taim em i ‘lukluk’ long wanpela meri, orait em i mas mekim sampela bikpela senis, i kain olsem em i kamautim ai na tromoi i go.​​—Ritim Matyu 5:​27, 28.

12. Wanem tok bilong Pol inap helpim yumi long rausim ol laik nogut bilong skin?

¹² Sapos yumi mekim wok nogut long han bilong yumi, dispela inap pulim yumi long kalapim ol lo bilong Jehova long stretpela pasin, olsem na yumi mas tingting strong long bihainim klinpela pasin. Yumi mas bihainim tok bilong Pol: “Yupela i mas kilim i dai olgeta pasin bilong dispela graun i stap long bel bilong yupela. Mi tok long olkain pasin olsem, pasin pamuk na pasin doti, na pasin bilong bel i kirap long mekim ol pasin nogut, na pasin bilong mangal long ol samting bilong narapela man. Dispela pasin bilong mangal em i wankain olsem pasin bilong lotu long giaman god.” (Kl. 3:5) Dispela tok “kilim i dai” i makim olsem yumi mas strong tru long rausim ol laik nogut bilong skin.

13, 14. Bilong wanem em i bikpela samting long abrusim ol tingting na pasin i no klin?

¹³ Man inap orait long dokta i katim na rausim han o lek samting bambai em i ken i stap laip. Dispela tok “katim na tromoi” ai o han i makim olsem em i bikpela samting long yumi mas abrusim ol tingting na pasin nogut we inap mekim na Jehova i no orait moa long yumi. Yumi mas i stap klin long tingting, long pasin, na long ol samting bilong lotu. Long dispela rot tasol yumi inap abrusim bagarap na yumi no ken i go long Gehena, em tok piksa bilong makim olsem man bai bagarap na pinis olgeta.

¹⁴ Yumi gat sin, olsem na yumi mas wok strong tru long bihainim yet klinpela pasin. Pol i tok: “Mi save paitim tru bodi bilong mi na mekim em i bihainim laik bilong mi. Nogut mi autim gutnius long ol arapela man na bihain mi yet mi no kisim prais.” (1 Ko. 9:27) Olsem na yumi mas tingting strong long bihainim tok bilong Jisas long mekim stretpela pasin oltaim, na yumi no ken mekim ol pasin i soim olsem yumi no pilim tru ofa Jisas i bin givim bilong baim bek ol man.​—Mt. 20:28; Hi. 6:​4-6.

“Givim Ol Samting Long Ol Arapela”

15, 16. (a) Olsem wanem Jisas i stap gutpela piksa long pasin bilong givim? (b) Tok bilong Jisas long Luk 6:38 i makim wanem samting?

¹⁵ Ol tok na ol samting Jisas i mekim i soim klia olsem em i gat pasin bilong givim ol samting long ol arapela. Em i bin kamapim tru dispela pasin taim em i kam long graun bilong helpim ol sinman. (Ritim 2 Korin 8:9.) Jisas i redi long lusim ol gutpela samting bilong heven na kamap man long graun bilong helpim ol man i gat sin, em sampela bilong ol bai kisim ol gutpela samting long heven na mekim wok king wantaim em long Kingdom. (Ro. 8:​16, 17) Jisas i skulim ol disaipel long pasin bilong givim, na em i tok:

¹⁶ “Yupela i mas givim ol samting long ol arapela, na bai God i givim ol samting long yupela. Em bai i skelim gutpela moa long yupela, na em bai i pulapim tru, na sakim i go daun, na pulapim moa yet, inap long ol samting i kapsait, na givim long yupela. Skel yupela i save givim long ol arapela man, long dispela skel tasol God bai i bekim long yupela.” (Lu. 6:38) Dispela tok “pulapim tru” i makim pasin ol man i save bihainim long ol maket long hap Is; ol man bilong maketim ol samting i save pulapim laplap bilong ol man i baim samting​—em laplap ol i save hangamapim long sol na pasim long let long bel na laplap i kamap olsem paus bilong karim ol samting. Taim bel i kirapim yumi long givim ol samting, dispela inap mekim na yumi kisim planti samting, ating long taim yumi sot long samting.​​—Sav. 11:2.

17. Jehova i mekim wanem na em i stap nambawan gutpela piksa long pasin bilong givim? Yumi bai kisim amamas sapos yumi givim wanem ol samting?

¹⁷ Jehova i save laikim ol man i amamas long givim ol samting na em i save praisim ol. Em yet i stap nambawan gutpela piksa, na em i bin givim dispela wanpela Pikinini bilong em bambai ‘olgeta manmeri i bilip long em ol i no ken lus, bai ol i kisim laip i stap gut oltaim oltaim.’ (Jo. 3:16) Pol i tok: “Man i planim planti, em bai i kisim planti. Olsem na yupela olgeta wan wan i mas tingting gut pastaim na save gut long wanem samting yupela i laik givim. Nogut wanpela man i bel hevi long givim samting, na nogut em i ting ol man i strong tumas long em i mas givim. . . . God i save laikim man i amamas na i givim samting long laik bilong em yet.” (2 Ko. 9:​6, 7) Sapos yumi givim taim, strong, na mani samting bilong helpim lotu i tru, dispela bai givim amamas long yumi na yumi bai kisim planti gutpela samting.​—Ritim Sindaun 19:17; Luk 16:9.

“No Ken Salim Man i Winim Biugel i Go Paslain Long Yu”

18. Wanem kain tingting inap mekim na yumi “no inap kisim pe” long Papa bilong yumi long heven?

¹⁸ “Yupela lukaut. Yupela i no ken mekim ol gutpela gutpela pasin bilong yupela long ai bilong ol manmeri, bai ol i lukim. Sapos yupela i mekim olsem, yupela bai i no inap kisim pe long Papa bilong yupela i stap long heven.” (Mt. 6:1) Taim Jisas i kolim dispela hap tok, “ol gutpela gutpela pasin,” em i tok long ol pasin i stret long laik bilong God. Jisas i no tok olsem yumi no ken tru mekim ol gutpela pasin long ai bilong ol manmeri, nogat. Long wanem, em i bin tokim ol disaipel olsem “lait bilong [ol] i mas lait long ai bilong ol manmeri.” (Mt. 5:​14-16) Tasol sapos yumi mekim ol gutpela pasin, long wanem, yumi laik “bai ol [man] i lukim” yumi na litimapim nem bilong yumi, orait yumi “no inap kisim pe” long Papa bilong yumi long heven. Sapos yumi gat kain tingting olsem, yumi no inap pas gut wantaim God na yumi no inap kisim ol blesing aninit long wok bos bilong Kingdom.

19, 20. (a) Olsem wanem yumi inap bihainim tok bilong Jisas olsem yumi no ken salim man i go bilong “winim biugel” taim yumi laik “givim samting long ol rabisman”? (b) Yumi no ken tokim han kais long samting em han sut i mekim. Dispela tok i makim wanem samting?

¹⁹ Sapos yumi gat stretpela tingting, yumi bai bihainim tok bilong Jisas, olsem: “Sapos yu laik givim samting long ol rabisman, yu no ken salim man i winim biugel i go paslain long yu olsem ol sampela man i save mekim insait long ol haus lotu na long ol rot. Ol dispela man i laik giamanim ol manmeri, bai ol manmeri i ting ol i gutpela man na givim biknem long ol. Mi tok tru long yupela, ol dispela man i kisim pinis pe bilong ol.” (Mt. 6:2) Jisas na ol aposel bilong em i gat wanpela bokis kontribiusen bilong helpim ol rabisman. (Jo. 12:​5-8; 13:29) Ol man i no save winim biugel taim ol i givim ol samting long ol rabisman, olsem na yumi ken save Jisas i tok piksa tasol taim em i tok yumi “no ken salim man i winim biugel i go paslain” long yumi taim yumi laik “givim samting long ol rabisman.” I no stret long yumi tokim olgeta manmeri long ol samting yumi givim, olsem ol Farisi bilong lain Juda i bin mekim, nogat. Jisas i kolim ol olsem ol man bilong tupela maus, long wanem, ol i save go “insait long ol haus lotu na long ol rot” na tokaut long mani samting ol i bin givim long ol rabisman. Ol dispela man bilong tupela maus ol i “kisim pinis pe bilong ol.” Ol man i litimapim nem bilong ol na ating ol i sindaun wantaim ol tisa bilong lotu long ol namba wan sia long haus lotu, na dispela tasol i olsem pe ol i kisim, long wanem, Jehova i no inap givim pe long ol. (Mt. 23:6) Tasol ol disaipel bilong Krais i mas mekim wanem pasin? Jisas i tokim ol​—na yumi tu:

²⁰ “Sapos yu laik helpim ol rabisman, orait han kais bilong yu i no ken save long samting han sut i mekim. Olsem na dispela wok marimari yu mekim bai i stap hait. Na Papa bilong yu i save lukim ol samting i stap hait, em bai i bekim pe long yu.” (Mt. 6:​3, 4) Tupela han bilong yumi i save poroman wantaim long mekim wok. Olsem na dispela hap tok olsem han kais i no ken save long samting han sut i mekim, dispela i makim olsem yumi no ken tokim ol narapela long ol wok yumi mekim bilong helpim ol rabisman, na yumi no ken tokim tu ol lain em yumi poroman gut wantaim ol wankain olsem han kais i poroman gut wantaim han sut.

21. Dispela Man i save “lukim ol samting i stap hait,” em bai mekim wanem taim em i givim pe long yumi?

²¹ Sapos yumi no hambak na tokim ol man long ol samting yumi bin givim bilong helpim ol rabisman, orait “wok marimari” bilong yumi bai stap hait. Na Papa bilong yumi husat i “stap hait” na lukim yumi, em bai givim pe long yumi. Papa bilong yumi i stap long heven na ol man i no inap lukim em long ai tru bilong ol, olsem na em i “stap hait” long ai bilong ol man. (Jo. 1:18) Insait long dispela pe em Jehova i givim yumi, em ol samting olsem: Em bai helpim yumi long pas gut wantaim em, na lusim ol rong bilong yumi, na givim yumi laip oltaim. (Snd. 3:32; Jo. 17:3; Ef. 1:7) Dispela i winim tru pasin bilong kisim ol tok ol man i mekim bilong litimapim nem bilong yumi!

Tingim Tru Ol Tok Bilong Jisas

22, 23. Bilong wanem yumi mas tingim tru ol tok bilong Jisas?

²² Dispela Bikpela Tok Long Maunten i pulap tru long ol gutpela tok bilong skulim yumi. Ol dispela gutpela tok inap givim bikpela amamas long yumi maski yumi stap long taim bilong planti hevi. Yes, yumi bai stap amamas sapos yumi tingim tru ol tok bilong Jisas na larim ol dispela tok i stiaim tingting na i stap bilong yumi.

²³ Olgeta man husat i “harim” na “bihainim” ol tok Jisas i skulim yumi long en, ol bai kisim blesing. (Ritim Matyu 7:​24, 25.) Olsem na yumi mas tingting strong long bihainim skultok bilong Jisas. Long stadi i kamap bihain long dispela, yumi bai skelim sampela tok moa em i bin mekim long Bikpela Tok Long Maunten.

Bai Yu Bekim Olsem Wanem?

• Bilong wanem em i bikpela samting long yumi mas stretim tok na kamap wanbel gen wantaim brata i gat tok long yumi?

• Yumi ken mekim wanem bambai “ai long han sut” i no ken pulim yumi long mekim sin?

• Yumi mas i gat wanem tingting long pasin bilong givim samting?

[Piksa long pes 11]

Em i gutpela samting long “stretim tok” na kamap wanbel gen wantaim wanbilip i gat tok long yu!

[Ol Piksa long pes 12, 13]

Jehova i save mekim gut long ol man i amamas long givim ol samting