Kingdom Bilong God i Winim Olgeta Narapela Gavman

JISAS KRAIS i skulim ol disaipel olsem: “Yupela i mas mekim kain prea olsem, ‘Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.’ ” (Matyu 6:​9, 10) Planti ol i save kolim dispela beten olsem Papa Bilong Mipela, na em i kamapim klia wok bilong Kingdom Bilong God.

Long rot bilong Kingdom, God bai mekim nem bilong em i stap holi. Taim Satan wantaim Adam na Iv i bikhet long God, dispela i bagarapim tru nem bilong God, tasol Kingdom bai i stretim dispela samting. Dispela em i bikpela samting tru. Bilong i stap amamas, olgeta manmeri bilong graun i mas tingim nem bilong God i holi, na ol i mas bilip olsem i stret God i stap King na bosim olgeta samting.​—⁠KTH 4:⁠11.

Na tu, God i kamapim Kingdom bilong kamapim ‘laik bilong em long graun olsem ol i save bihainim long heven.’ Wanem dispela laik bilong God? Em i bilong kamapim bek pasin wanbel i bin stap namel long God na ol man, em Adam i bin lusim. Na Kingdom bai mekim samting em King bilong heven na graun, Jehova, i tingting pinis long mekim, olsem kamapim Paradais long graun na ol gutpela man i ken i stap oltaim oltaim long en. Em nau, Kingdom Bilong God bai stretim bek ol samting nogut em sin bilong namba wan man na meri i bin kamapim, na Kingdom bai kamapim tru olgeta samting God i tingting pinis long mekim long dispela graun. (1 Jon 3:⁠8) Dispela Kingdom na ol samting em bai mekim, em i nambawan bikpela tok bilong Baibel.

I Winim Ol Narapela Olsem Wanem?

Kingdom Bilong God em i wanpela gavman tru tru na em i gat bikpela strong. Profet Daniel i helpim yumi long save liklik long bikpela strong bilong dispela gavman. Long bipo yet em i tok profet olsem: “God bai i kirapim wanpela kingdom na . . . em bai i daunim . . . na bagarapim ol arapela king [bilong graun].” Ol gavman bilong ol man i save kamap na bihain ol i pinis na narapela i kamap, i go i go olsem; tasol “ol arapela king i no inap daunim” Kingdom Bilong God. (Daniel 2:44) Na i no dispela tasol. Long olgeta samting dispela Kingdom i winim moa yet olgeta gavman bilong ol man.

Kingdom Bilong God i gat wanpela King i winim tru ol narapela king. Dispela King em i husat? Long samting olsem driman, Daniel i lukim King bilong Kingdom Bilong God “i wankain olsem yumi man bilong graun,” na ol i bringim em i kam long God i Gat Olgeta Strong, na God “i mekim em i kamap king na i givim em strong na biknem,” na wok king bilong em bai i stap oltaim oltaim. (Daniel 7:​1, 13, 14) Dispela man i wankain olsem yumi man bilong graun, em Jisas Krais tasol​—⁠em Mesaia. (Matyu 16:​13-17) God Jehova i bin makim Pikinini bilong em yet, Jisas, long kamap King bilong Kingdom bilong Em. Taim Jisas i stap long graun, em i tokim ol Farisi nogut: “Kingdom bilong God em i stap pinis namel long yupela.” Mining bilong en i olsem: Jisas, em man bai kamap King bilong dispela Kingdom, em i stap namel long ol.​—⁠Luk 17:⁠21.

Husat namel long ol man bilong graun i winim wankain mak stret olsem Jisas long i stap King? Jisas i kamapim klia pinis olsem em i wanpela stretpela Lida tru, em ol man inap bilip long em na em i man bilong marimari. Stori bilong ol Gutnius long Baibel i soim yumi olsem em i man bilong kirap mekim ol strongpela wok, na tu, em i man bilong bel sori. (Matyu 4:23; Mak 1:​40, 41; 6:​31-34; Luk 7:​11-17) Na tu, Jisas i kirap bek pinis na em i no save dai o kisim sik o narapela kain hevi ol man i save kisim.​—⁠Aisaia 9:​6, 7.

Jisas wantaim ol wanwok bilong em i mekim wok king long ples i antap tru. Long dispela samting olsem driman, Daniel i lukim tu olsem God i “givim biknem na strong bilong olgeta king bilong graun i go long ol manmeri bilong en.” (Daniel 7:27) Jisas i no stap wanpis na mekim wok king. Em i gat ol narapela tu i stap wantaim em, em ol bai mekim wok king na wok pris. (KTH 5:​9, 10; 20:⁠6) Aposel Jon i tok long ol olsem: “Mi lukluk gen, na mi lukim Pikinini Sipsip i sanap long maunten Saion, na 144,000 manmeri i sanap wantaim em. . . . God i bin baim bek ol namel long olgeta manmeri bilong graun.”​—⁠KTH 14:​1-3.

Dispela Pikinini Sipsip, em Jisas Krais taim em i kamap King bilong Kingdom. (Jon 1:29; KTH 22:⁠3) Dispela maunten Saion i makim heven.a (Hibru 12:22) Jisas wantaim ol wanwok bilong em ol i stap long heven na mekim wok king. Man! Ol i mekim wok king long ples antap tru! Long heven ol inap lukim na skelim gut olgeta samting. Heven em i ples dispela Kingdom i stap long en, olsem na sampela taim ol i kolim “kingdom bilong God” olsem “kingdom bilong heven.” (Luk 8:10; Matyu 13:11) I no gat wanpela kain gan o bom nuklia o roket samting ol inap sutim i go kamap long heven na bagarapim dispela gavman bilong heven. Em i wanpela gavman ol man i no inap tru long daunim, na em bai mekim olgeta wok Jehova i laik bai em i mekim.​—⁠Hibru 12:⁠28.

Kingdom Bilong God i gat ol mausman bilong en long graun em yumi inap bilip tru long ol. Olsem wanem yumi save long dispela? Song 45:16 i tok: “Bai yu gat planti pikinini man, na bai . . . yu givim bikpela namba long ol, na bai ol i bosim ol manmeri long olgeta hap bilong graun.” Long dispela tok profet, dispela tok “yu” i makim Pikinini Bilong God. (Song 45:​6, 7; Hibru 1:​7, 8) Olsem na Jisas Krais yet bai makim na givim namba long ol dispela mausman. Yumi ken bilip tru olsem ol bai mekim gut ol wok em i tokim ol long mekim. Long nau tu, ol man i winim mak na i mekim wok elda insait long kongrigesen Kristen ol i kisim skul long lukautim, na givim nupela strong, na mekim gut bel bilong ol wanbilip bilong ol, na ol i no ken “strong tumas long bosim ol.”​—⁠Matyu 20:​25-28; Aisaia 32:⁠2.

Kingdom i gat ol stretpela lain i stap aninit long en. Long ai bilong God ol i no gat asua na ol i stretpela man. (Sindaun 2:​21, 22) Baibel i tok: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:11) Ol lain i stap aninit long Kingdom ol i gat pasin daun inap long God i ken skulim ol, na ol i gat pasin isi. Bikpela samting long ol, em ol samting bilong God. (Matyu 5:⁠3) Ol i laik mekim ol pasin i stret na ol i redi long bihainim rot God i soim long ol.

Ol lo i bosim Kingdom Bilong God i winim tru ol lo bilong ol man. God Jehova yet i as bilong ol lo na stiatok bilong Kingdom. Ol dispela lo i no kalabusim yumi​—⁠ol i save helpim yumi. (Song 19:​7-11) Long nau planti manmeri ol i save bihainim ol stretpela lo bilong Jehova long i stap bilong ol, na ol i kisim ol gutpela samting long en. Olsem: Pasin bilong bihainim ol tok kaunsel Baibel i givim long ol man marit, ol meri marit, na ol pikinini, em i save helpim sindaun bilong famili i kamap gutpela. (Efesus 5:33–6:⁠3) Taim yumi bihainim tok long ‘givim bel long ol arapela manmeri,’ yumi save stap gut wantaim ol. (Kolosi 3:​13, 14) Na taim yumi bihainim ol stiatok bilong Baibel, yumi save mekim gut wok bilong yumi na yumi kisim stretpela tingting long mani. (Sindaun 13:4; 1 Timoti 6:​9, 10) Na yumi save abrusim pasin bilong dring spak, pamuk, smok, na kisim ol drak, na ol i no bagarapim skin bilong yumi.​—⁠Sindaun 7:​21-23; 23:​29, 30; 2 Korin 7:⁠1.

Kingdom Bilong God em i wanpela gavman God i bin givim namba long en. King bilong en​—⁠Mesaia, Jisas Krais​—⁠wantaim olgeta wanwok king bilong em, ol i gat wok long bihainim ol stretpela lo na stiatok bilong God. Ol manmeri i stap aninit long Kingdom, wantaim ol mausman bilong Kingdom ol i stap long graun, ol i amamas long bihainim ol lo bilong God long i stap bilong ol. Em nau, ol lain bilong bosim Kingdom na ol lain i stap aninit long en ol i tingim God long olgeta samting ol i mekim. Olsem na Kingdom em i wanpela gavman tiokratik​—⁠wanpela gavman God yet i bosim. Kingdom bai inapim tru olgeta wok God i laik mekim long rot bilong en. Tasol wanem taim Kingdom Bilong God​—⁠olsem Kingdom Bilong Mesaia​—⁠em i mas kirap mekim wok?

Kingdom i Kirap Mekim Wok

Wanpela tok bilong Jisas i helpim yumi long save, wanem taim Kingdom i mas kirap mekim wok. Em i tok: “Lek bilong ol man bilong ol arapela lain bai i krungutim Jerusalem, inap long taim God i bin makim bilong ol arapela lain man i bosim Jerusalem, em i pinis.” (Luk 21:24) Wanpela taun tasol long graun, em Jerusalem, i gat nem bilong God i stap long en. (1 King 11:​36, NW; Matyu 5:35) Em i bin i stap nambawan biktaun bilong wanpela kingdom long graun em God i orait long en. Lek bilong ol man bilong ol narapela lain bai i krungutim Jerusalem​—⁠dispela i makim olsem inap wanpela haptaim God bai larim ol gavman bilong graun i bosim ol manmeri bilong em. Orait dispela bai kirap long wanem taim?

Laspela king i sindaun long sia king bilong Jehova long Jerusalem i kisim tok olsem: “Rausim laplap long het, na lusim hat bilong king. . . . No gat wanpela man i ken kisim dispela samting inap long taim dispela man husat i gat rait long kisim em i kam, na bai mi givim long em.” (Esekiel 21:​25-27, NW ) Ol i mas rausim hat king long het bilong dispela king, na God i no ken bosim moa lain bilong Em inap wanpela haptaim. Dispela samting i bin kamap long 607 B.C.E., taim ol Babilon i bagarapim Jerusalem. Orait nau taim bilong “ol arapela lain man” i kirap, na insait long dispela taim, bai i no gat wanpela gavman long graun bilong makim wok king bilong God. Tasol long pinis bilong dispela taim, Jehova bai givim namba bilong mekim wok king long dispela man “husat i gat rait long kisim”​—⁠em Jisas Krais. Dispela haptaim bai i gat hamas yia bilong en?

Wanpela tok profet bilong Buk Daniel long Baibel i tok: “Katim dispela diwai na bagarapim, tasol larim as bilong en i stap long graun namel long ol gras. Na kisim wanpela bikpela ring ain na bras na putim long as bilong en . . . inap long 7-pela yia [“7-pela haptaim,” NW ].” (Daniel 4:23) Bai yumi lukim olsem, dispela “7-pela haptaim” i wankain stret olsem “taim God i bin makim bilong ol arapela lain man.”

Long Baibel, sampela taim ol diwai inap makim ol man, ol king, na ol gavman. (Song 1:3; Jeremaia 17:​7, 8; Esekiel, sapta 31) Dispela diwai em Daniel i tok piksa long en, em i bikpela tru “inap long olgeta man bilong olgeta hap graun i ken lukim.” (Daniel 4:11) Olsem na dispela wok king em diwai i makim na ol i mas katim na pasim, em i “bosim ol manmeri bilong olgeta hap bilong graun.” (Daniel 4:​17, 20, 22) Olsem na dispela diwai i makim wok king bilong God, na i makim moa yet wok king em i mekim bilong bosim graun. Inap liklik haptaim God i bin mekim wok king long graun long rot bilong kingdom em i bin kamapim long Israel. Ol i bin katim dispela “diwai” na pasim ring ain na bras long as bilong en na bai em i no ken kru na kamap bikpela. Dispela i makim olsem wok king God i bin mekim long rot bilong dispela kingdom em bai pinis pastaim, olsem em i bin mekim long 607 B.C.E.​—⁠tasol em i no pinis olgeta, nogat. Ring ain na bras bai stap long diwai inap long dispela “7-pela haptaim” i pinis. Orait long pinis bilong dispela haptaim, Jehova bai givim wok king long man i gat rait long kisim dispela wok, em Jisas Krais. Em nau, i klia tru olsem dispela “7-pela haptaim” na “taim God i bin makim bilong ol arapela lain man” ol i wankain taim tasol.

Baibel i helpim yumi long save olsem dispela “7-pela haptaim” i gat hamas yia bilong en. Em i soim yumi olsem 1,260 de i wankain stret olsem 3 na hap “taim.” (KTH 12:​6, 14, NW ) Olsem na taim yumi dabolim dispela 3 na hap taim, em i kamap olsem 7-pela haptaim, em inap 2,520 de.

Taim yumi kaunim 2,520 de tru tru, kirap long 607 B.C.E., yumi kamap long yia 600 B.C.E. Tasol dispela 7-pela haptaim em i longpela moa. Ol i stap yet taim Jisas i bin toktok long “taim God i bin makim bilong ol arapela lain man.” Olsem na dispela 7-pela haptaim em i samting bilong tok profet. Long dispela as yumi mas bihainim wanpela lo bilong Baibel long dispela, olsem “wanpela wanpela yia bilong inapim olgeta wan wan de.” (Namba 14:34; Esekiel 4:⁠6) Em nau, dispela 7-pela haptaim ol gavman bilong ol man tasol i bosim graun na God i no pasim wok bilong ol, em inap olsem 2,520 yia. Sapos yumi kaunim 2,520 yia kirap long 607 B.C.E., yumi kamap long yia 1914 C.E. Long dispela yia, “taim God i bin makim bilong ol arapela lain man,” olsem 7-pela haptaim, em i pinis. Olsem na Jisas Krais i kirap mekim wok king long Kingdom Bilong God long 1914.

“Kingdom Bilong Yu i Mas i Kam”

Kingdom Bilong Mesaia i kamap pinis long heven, olsem na yu ting yumi mas beten yet long Kingdom i mas i kam, olsem Jisas i bin skulim ol disaipel long beten? (Matyu 6:​9, 10) Yes, yumi mas mekim olsem. Dispela beten i stret, na yumi mas beten yet long dispela samting. Bihain Kingdom Bilong God bai kirap na bosim tru dispela graun.

Taim dispela samting i kamap, God bai mekim gut tru long ol manmeri i stap gut long em! Baibel i tok: “God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:​3, 4) Long dispela taim, “i no gat man . . . bai i tok olsem, ‘Mi gat sik.’ ” (Aisaia 33:24) Ol manmeri i mekim pasin God i laikim, ol bai kisim laip i stap oltaim oltaim. (Jon 17:⁠3) Nau yumi wetim ol dispela gutpela tok profet na ol narapela tok profet bilong Baibel i kamap tru, olsem na yumi mas “wok pastaim long painim kingdom bilong God wantaim stretpela pasin bilong em.”​—⁠Matyu 6:​33, Nupela Testamen na Ol Sam.

[Futnot]

[Rait long pes 4]

Jehova i bin makim Jisas Krais long i stap King Bilong Kingdom bilong Em

[Sat/Ol Piksa long pes 6]

2,520 yia

Oktoba 607 ◀ B.C.E. C.E. ▸ Oktoba 1914

606 yia na 3-pela mun 1,913 yia na 9-pela mun

“Taim God i bin makim bilong ol arapela lain man” i kirap long 607 B.C.E. na i pinis long 1914 C.E.

[Piksa long pes 7]

Ol manmeri i stap long graun aninit long Kingdom Bilong God ol bai kisim planti gutpela samting