Wok Long Painim Kingdom Bilong God na Stretpela Pasin Bilong Em
“Namba wan samting yupela i mas mekim i olsem: Yupela i mas larim God i stap king bilong yupela, na kisim stretpela pasin bilong em, na bai em i givim dispela olgeta arapela samting tu long yupela.”—MATYU 6:33.
1, 2. Taim ol Farisi na saveman bilong lo i mekim gutpela pasin i olsem ol i mekim wanem? Jisas i givim wanem strongpela tok long ol disaipel bilong em?
OL FARISI na saveman bilong lo i wok long kamap stretpela man long rot ol yet i ting em i stret—ol i no bihainim rot God i makim. Na taim ol i mekim sampela gutpela pasin i olsem ol i mekim pasin giaman, long wanem ol i mekim long ai bilong ol man bai ol i lukim na tingim ol i stretpela man. Ol i no mekim wok bilong God; ol i mekim wok bilong litimapim nem bilong ol yet tasol. Jisas i givim strongpela tok long ol disaipel long ol i no ken bihainim dispela kain pasin bilong giaman. Em i tok: “Yupela lukaut. Yupela i no ken mekim ol gutpela gutpela pasin bilong yupela long ai bilong ol manmeri, bai ol i lukim. Sapos yupela i mekim olsem, yupela bai i no inap kisim pe long Papa bilong yupela i stap long heven.”—Matyu 6:1.
2 Jehova i save pilim tru gutpela pasin bilong ol man i helpim ol rabisman—tasol em i no amamas long ol man i bihainim pasin bilong ol Farisi long mekim kain wok sori olsem. Jisas i givim strongpela tok long ol disaipel long ol i no ken bihainim pasin bilong ol Farisi. Jisas i tok: “Sapos yu laik givim samting long ol rabisman, yu no ken salim man i winim biugel i go paslain long yu olsem ol sampela man i save mekim insait long ol haus lotu na long ol rot. Ol dispela man i laik giamanim ol manmeri, bai ol manmeri i ting ol i gutpela man na givim biknem long ol. Mi tok tru long yupela, ol dispela man i kisim pinis pe bilong ol.”—Matyu 6:2.
3. (a) Olsem wanem ol Farisi na saveman bilong lo i kisim pinis pe bilong pasin bilong ol long givim samting? (b) Olsem wanem tingting bilong Jisas long givim samting i narapela kain?
3 Dispela tok ‘ol i kisim pinis’ (tok Grik, a·peʹkho) em wanpela tok man bilong bisnis i save raitim long pepa bilong makim olsem em i kisim pinis pe bilong samting em i baim i go long man. Bipo ol man i save wokabaut long rot na mekim tok promis long ai bilong ol man long givim samting bilong helpim ol rabisman. Na long ol haus lotu ol i save kolim nem bilong ol man i bin helpim ol rabisman. Sapos man i bin givim bikpela mani bilong helpim ol rabisman, taim ol i go long lotu ol i save givim sia long em klostu long hetman bilong lotu na dispela man i kisim biknem moa yet. Ol i givim samting long ai bilong ol man, bai ol man i ken lukim; na ol man i lukim na litimapim nem bilong ol. Olsem na long pepa i makim pe bilong wok sori ol i bin mekim, ol i ken raitim tok olsem: “Kisim Pinis.” Pasin bilong Jisas i narapela kain tru long pasin bilong ol! Em i tok, sapos yu laik givim samting, wok sori bilong yu i mas “i stap hait. Na Papa bilong yu i save lukim ol samting i stap hait, em bai i bekim pe long yu.”—Matyu 6:3, 4; Sindaun 19:17.
Ol Beten God i Laikim
4. Bilong wanem ol beten bilong ol Farisi i kirapim Jisas long tok ol dispela man i man bilong giaman?
4 Jehova i save amamas long ol beten ol man i mekim long em—tasol em i no amamas long pasin bilong ol Farisi long mekim beten. Jisas i tokim ol disaipel: “Taim yupela i mekim [beten], yupela i no ken mekim olsem ol man bilong giaman i save mekim. Ol i laikim tumas long sanap na mekim [beten] insait long ol haus lotu, na long ol kona bilong bikrot, bai ol man i ken lukim ol. Mi tok tru long yupela, ol i kisim pinis pe bilong ol.” (Matyu 6:5) Ol Farisi i save makim planti taim bilong mekim beten long olgeta de na ol i mas mekim ol dispela beten long taim stret bilong en, maski ol i stap we. Ol i no ken mekim long ai bilong ol man, tasol ol i painim rot bilong sanap “long ol kona bilong bikrot” long taim bilong mekim beten bambai ol man long olgeta hap bilong bikrot i ken lukim ol.
5. (a) I gat wanem sampela pasin moa bilong ol Farisi na God i no save harim beten bilong ol? (b) Taim Jisas i kolim kain beten ol disaipel i mas mekim, em i kolim wanem ol samting pastaim? Planti man long nau i wanbel long dispela o olsem wanem?
5 Ol i save giaman long mekim pasin holi—“ol i save giaman long mekim ol longpela prea.” (Luk 20:47) Wanpela lo ol i bin kisim long maus bilong ol tumbuna i tok: “Ol holiman bilong bipo ol i save wet inap wanpela aua pastaim na bihain ol i mekim [beten].” (Buk Mishnah) Long dispela rot bai olgeta man inap lukim pasin holi bilong ol na kirap nogut long en! Ol dispela kain beten i no save go antap long God; ol i save go antap inap long het bilong ol yet tasol. Jisas i tok, taim yumi laik beten, yumi no ken mekim long ai bilong ol man, na yumi no ken kolim nating wankain tok planti taim, na em i lainim ol disaipel long kain beten yumi ken mekim. (Matyu 6:6-8; Jon 14:6, 14; 1 Pita 3:12) Long dispela beten Jisas i kolim ol bikpela samting pastaim, olsem: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu.” (Matyu 6:9-13) Planti man long nau ol i no save long nem bilong God, na ol i no laik mekim nem bilong em i stap holi. Ol i mekim olsem God em i wanpela god nating i no gat nem. Na olsem wanem long dispela tok ‘Kingdom bilong God i mas i kam’? Planti man i ting olsem Kingdom bilong God i kam pinis na i stap long bel bilong ol. Ating ol i save beten na tok ol i mas bihainim laik bilong God, tasol ol i bihainim laik bilong ol yet.—Sindaun 14:12.
6. Bilong wanem Jisas i tok, taim ol Juda i tambu long kaikai ol i mekim nating tasol?
6 Jehova i orait long pasin bilong tambu long kaikai, tasol em i no orait long pasin bilong ol Farisi long tambu long kaikai. Pasin bilong ol saveman bilong lo na ol Farisi long helpim ol rabisman na long beten na long tambuim kaikai tu, em Jisas i tok ol i save mekim nating tasol na i no helpim ol long kamap stretpela man long ai bilong God. Em i tok: “Sapos yupela i tambu long kaikai, orait yupela i no ken mekim pes nogut olsem ol man bilong giaman i save mekim. Ol i save mekim pes nogut, bai ol manmeri i ken save ol i tambu long kaikai. Mi tok tru long yupela, ol i kisim pinis pe bilong ol.” (Matyu 6:16) Lo bilong ol tumbuna i makim olsem taim ol Farisi i stap tambu long kaikai ol i no ken waswas o welim skin; ol i mas rapim sit bilong paia long het bilong ol. Taim ol Juda i no stap tambu long kaikai, ol i save waswas na welim skin.
7. (a) Ol disaipel bilong Jisas i mas mekim wanem taim ol i tambu long kaikai? (b) Long taim bilong Aisaia ol Juda i save tambu long kaikai, tasol Jehova i laik bai ol i mekim wanem?
7 Jisas i stori long pasin bilong i stap tambu long kaikai na em i tokim ol disaipel bilong em: “Yu mas putim wel long het bilong yu na wasim pes bilong yu. Olsem bai ol man i no ken save yu tambu long kaikai. Papa bilong yu i stap hait, em wanpela tasol i ken save.” (Matyu 6:17, 18) Long taim bilong Aisaia ol Juda i lusim Jehova na ol i amamas long pasin bilong ol long tambuim kaikai, na daunim ol yet, na putim het i go daun long graun, na pasim klos bilong sori na sindaun long sit bilong paia. Tasol Jehova i no laikim kain pasin olsem. Em i laik bai ol i lusim ol man i stap olsem kalabus, na givim kaikai long ol man i hangre, na givim haus long ol man i no gat haus bilong slip long en, na givim laplap long man i no gat laplap.—Aisaia 58:3-7.
Bungim Ol Gutpela Samting long Heven
8. Wanem samting i mekim na ol saveman bilong lo na ol Farisi i no tingim rot God i makim bilong kamap stretpela man long ai bilong em? Ol i no bihainim wanem lo em Pol i kolim bihain?
8 Ol saveman bilong lo na ol Farisi i wok strong long kamap stretpela man long ai bilong God, tasol ol i no tingim rot God i makim. Ol i tingting tasol long mekim ol samting bai ol man i ken litimapim nem bilong ol. Ol i holim strong ol lo na pasin bilong ol man na ol i lusim tok na lo bilong God ol i raitim pinis. Ol i givim bel long kisim biknem long graun na ol i no tingting long bungim ol gutpela samting bilong ol long heven. Ol i givim baksait long wanpela tok i tru, em wanpela Farisi i bin kamap Kristen i raitim bihain, olsem: “Olgeta samting yupela i mekim, yupela i mas wok strong na mekim. I no olsem yupela i mekim wok bilong ol man. Nogat. Yupela i mekim wok bilong Bikpela. Yupela i save, bihain Bikpela bai i givim pe long yupela, em ol dispela gutpela samting em i makim pinis bilong ol manmeri bilong en.”—Kolosi 3:23, 24.
9. Wanem ol samting inap bagarapim ol gutpela samting yumi bungim long graun? Yu mas mekim wanem na bai ol gutpela samting tru bilong yu i no ken bagarap?
9 Jehova i save tingim bel bilong yu, yu givim bel long em o nogat. Em i no tingim pasbuk bilong yu. Em i save, long ples ol gutpela samting bilong yu i stap long en, long dispela ples bel bilong yu tu bai i stap. Olsem wanem long ol gutpela samting bilong yu? Ros na ol binatang inap bagarapim? Ol stilman inap brukim haus na stilim? Long nau planti bisnis i bagarap na mani i no gat strong moa na ating dispela inap bagarapim ol gutpela samting bilong yu? Pasin raskol i go bikpela na ating ol raskol bai stilim ol gutpela samting bilong yu? Tasol ol gutpela samting bilong yu i no inap bagarap sapos yu bungim long heven. Na i no inap bagarap sapos ai bilong yu i gutpela—olsem wanpela lam i mekim bodi olgeta i lait—na yu lukluk tasol long Kingdom bilong God na stretpela pasin bilong em. Ol mani kago samting inap lus. Baibel i tok: “Yu no ken hatwok tumas long kamap maniman. Sapos yu gat gutpela tingting, bai yu no ken mekim olsem. Maski yu kisim planti mani, wantu em bai i pinis. I olsem mani i gat wing na i flai i go antap olsem tarangau.” (Sindaun 23:4, 5) Nogut yu gat planti samting bilong skin na oltaim yu tingting planti long en na yu no inap slip. Baibel i tok: “[Maniman] i save wari long ol planti samting bilong en, olsem na em i no inap slip gut.” (Saveman 5:12) Yu mas tingim strongpela tok bilong Jisas em i tok: “Yupela i no inap i stap aninit long God na long mani wantaim.”—Matyu 6:19-24.
Bilip i Mekim na Yu No Ken Tingting Planti
10. Bilong wanem i bikpela samting yu mas bilip long God na yu no ken bilip long ol samting bilong skin yu holim? Jisas i givim wanem tok long ol manmeri long dispela samting?
10 Jehova i laik bai yu bilip long em na yu no ken bilip long ol samting bilong skin yu holim. Baibel i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:6) Jisas i tok: “Maski yu yet yu gat planti samting moa, tasol yu no inap kisim laip long ol dispela samting bilong yu.” (Luk 12:15) Maski yu gat planti milion kina long beng, dispela i no inap helpim yu sapos wetlewa bilong yu i gat sik o klok long bel i bagarap na i no inap wok strong moa. Olsem na Jisas i tok: “Yupela i no ken tingting planti long laip bilong yupela na tok, ‘Bai yumi kaikai wanem samting? Bai yumi dring wanem samting?’ Na yupela i no ken tingting planti long bodi bilong yupela na tok, ‘Bai yumi pasim wanem laplap?’ Ating laip em i winim kaikai, na bodi em i winim ol laplap samting.”—Matyu 6:25.
11. Jisas i lukim ol samting i stap we na em i mekim ol tok piksa? Olsem wanem em i bin mekim olsem long taim em i mekim tok long maunten?
11 Jisas i save tru long mekim ol tok piksa. Olgeta samting em i lukim long hap em i stap long en i givim tingting long em bilong mekim tok piksa. Em i lukim wanpela meri i laitim lam na putim antap long tebol, na em i mekim tok piksa long dispela. Em i lukim wanpela wasman bilong sipsip i wok long tilim ol sipsip na meme i go tupela lain, na em i mekim wanpela tok piksa. Em i lukim ol pikinini i pilai long ples bung na em i mekim tok piksa long dispela. Na taim em i sindaun long maunten na tokim ol manmeri ol i no ken tingting planti long kaikai na klos samting, em i lukim ol samting i stap klostu long em, olsem ol pisin i flai nabaut na ol plaua, na em i mekim tok piksa. Ol pisin i no save planim kaikai, na ol i no save bungim na putim long haus kaikai, a? Na ol plaua i no save wokim laplap, a? God i bin wokim ol dispela samting na em i lukautim. Tasol yu winim tru ol pisin na ol plaua. (Matyu 6:26, 28-30) Em i givim Pikinini bilong em bilong helpim yu; em i no mekim olsem bilong helpim ol pisin na ol plaua.—Jon 3:16.
12. (a) Tok piksa Jisas i mekim long ol pisin na plaua, ating dispela i makim olsem ol disaipel bilong Jisas i no ken mekim wok o olsem wanem? (b) Jisas i laik kamapim wanem bikpela tok long pasin bilong mekim wok na long bilip?
12 I no olsem Jisas i tok ol disaipel bilong em i no ken mekim wok bilong kisim kaikai na klos samting bilong ol. Nogat. (Lukim Saveman 2:24; Efesus 4:28; 2 Tesalonaika 3:10-12.) Taim Jisas i stap long maunten hia, long dispela moningtaim, ol pisin i wok long painim kaikai, na painim poroman, na wokim haus, na ol i sindaun antap long kiau bilong ol na wok long givim kaikai long ol pikinini bilong ol. Ol i mekim wok, tasol ol i no tingting planti. Ol plaua tu i mekim wok, olsem putim rop i go daun insait long graun bilong kisim wara na gris bilong graun, na ol i putim lip bambai lait bilong san i ken holim. Ol i mas kamap bikpela na putim plaua na kamapim pikinini bilong en. Ol i mekim wok, tasol ol i no tingting planti. God i save lukautim ol pisin na ol plaua, ‘olsem na yupela ol manmeri i gat liklik bilip tasol, yupela i ken save tru olsem, God bai i lukautim yupela tu.’—Matyu 6:30.
13. (a) Jisas i tok wanem bilong makim olsem pasin bilong tingting planti i no inap helpim yu liklik? (b) Yu mas mekim wanem na bai i olsem yu inap skruim bikpela hap taim moa long laip bilong yu?
13 Olsem na yu mas bilip. Yu no ken tingting planti long ol samting. Pasin bilong tingting planti i no inap helpim yu liklik o senisim wanpela samting. Jisas i tok: “Sapos wanpela bilong yupela i wok long tingting planti long rot bilong i stap gut, ating dispela pasin bilong tingting planti bai i skruim liklik hap taim moa long laip bilong en? I no inap tru.” (Matyu 6:27) Sapos yu tingting planti long kaikai na klos samting, dispela i no inap helpim yu long skruim liklik hap taim moa long laip bilong yu. Nogat. Tasol i gat rot bilong skruim bikpela hap taim moa long laip bilong yu, na bai yu inap i stap oltaim oltaim. Yu no inap mekim olsem long rot bilong tingting planti olsem, “Bai yumi kaikai wanem samting?” “Bai yumi dring wanem samting?” “Bai yumi pasim wanem laplap?” Nogat. Yu mas bilip na yu mas mekim olgeta samting Jisas i tokim yumi long mekim. “Namba wan samting yupela i mas mekim i olsem: Yupela i mas larim God i stap king bilong yupela, na kisim stretpela pasin bilong em, na bai em i givim dispela olgeta arapela samting tu long yupela.”—Matyu 6:31-33.
Bilong Kisim Kingdom Bilong God na Stretpela Pasin Bilong Em
14. (a) Wanem tok i olsem as tok bilong ol tok Jisas i mekim long maunten? (b) Ol saveman bilong lo na ol Farisi i ting ol inap painim Kingdom na kamap stretpela man long ai bilong God long wanem rot na ol i kranki?
14 Long namba wan tok Jisas i mekim long ol man long maunten, em i toktok long Kingdom bilong heven na em i tok, Kingdom em i bilong ol man i save ol i sot long ol samting bilong spirit na ol i laik kisim. Long namba 4 tok em i mekim, em i tok ol man i laik tumas long bihainim stretpela pasin, long wankain pasin olsem man i hangre tru na i laikim tumas long kisim kaikai na i dai long wara, em ol i ken amamas; bai God inapim ol tru. Jisas i putim Kingdom na stretpela pasin bilong Jehova i namba wan samting. Tok bilong dispela tupela samting i olsem as tok bilong ol tok Jisas i mekim long maunten. Em dispela tupela samting inap helpim olgeta man long ol samting ol i sot long en. Tasol yumi ken kisim Kingdom bilong God na stretpela pasin bilong em olsem wanem? Olsem wanem yumi ken wok oltaim long painim Kingdom na long kamap stretpela man long ai bilong God? Yumi no ken bihainim rot ol saveman bilong lo na ol Farisi i bin bihainim. Ol i ting sapos ol i bihainim Lo bilong Moses, na ol lo bilong ol tumbuna ol i tok i insait long dispela Lo, bai ol inap painim Kingdom na kamap stretpela man long ai bilong God. Ol i ting taim God i givim Lo bilong em long Moses long maunten Sainai em i givim tu ol lo ol i bin kisim long maus bilong ol tumbuna.
15. (a) Ol Juda i ting ol lo ol i kisim long maus bilong ol tumbuna i bin kamap long wanem taim? Olsem wanem ol i litimapim ol dispela lo, winim Lo bilong God ol i bin kisim long rot bilong Moses? (b) Tasol ol dispela lo i bin kamap long wanem taim tru? Na ol dispela lo i mekim wanem long Lo bilong God ol i bin kisim long rot bilong Moses?
15 Buk bilong lo bilong ol tumbuna (Mishnah) i stori long dispela samting olsem: “Moses i kisim Lo [liklik tok daunbilo long buk i tok, em ‘Lo Bilong Maus’] long Sainai na em i givim long Josua, na Josua i givim long ol hetman, na ol hetman i givim long ol Profet, na ol Profet i givim long ol man bilong Bikpela Kaunsil.” Bihain ol i litimapim tru lo ol i bin kisim long maus bilong ol tumbuna, winim Lo bilong God ol man i raitim pinis. Buk bilong lo bilong ol tumbuna bilong ol i tok: “[Sapos] wanpela man i kalapim tok bilong Lo [em Lo bilong God ol man i raitim pinis], em i no gat asua,” tasol sapos “em i skruim hap tok long tok bilong ol Saveman Bilong Lo [em Lo ol i bin kisim long maus bilong ol tumbuna], em i gat asua.” (Mishnah) Ol i no bin kisim ol lo bilong ol tumbuna long maunten Sainai. Nogat. Ol dispela lo i wok long kamap planti inap olsem 200 yia paslain long Krais. Em ol nupela lo ol Juda i skruim long Lo bilong God ol i bin kisim long rot bilong Moses na ol i raitim pinis, na ol dispela lo i rausim sampela lo bilong God, na pinisim strong bilong dispela Lo.—Lukim Lo 4:2; 12:32.
16. Long wanem rot ol man inap kamap stretpela man long ai bilong God?
16 Man i no inap kamap stretpela man long ai bilong God long pasin bilong bihainim Lo. Dispela samting i kamap long narapela rot. Baibel i tok: “Long pasin bilong bihainim lo ‘i no gat wanpela man bai i no gat asua na i stap stret long ai bilong God.’ Nogat. Lo i save soim yumi long ol sin bilong yumi, em tasol. Tasol nau pasin God i mekim bilong kolim yumi stretpela manmeri, em i kamap ples klia pinis. Em i no kamap long rot bilong bihainim lo. Nogat. Em i kamap long narapela rot. Na tok i stap long lo bilong Moses na long ol buk bilong ol profet em i autim tok bilong dispela pasin God i mekim. Dispela pasin em i olsem: Olgeta manmeri i bilip long Jisas Krais, God i save kolim ol stretpela manmeri.” (Rom 3:20-22) Olsem na man i mas bilip long Krais Jisas bambai em i ken kamap stretpela man long ai bilong God—‘tok bilong Lo na bilong ol Profet’ i kamapim klia dispela samting. Jisas inapim tru olgeta tok bilong ol profet long man God i makim bilong kisim bek ol manmeri. Na em inapim tru Lo tu. Dispela Lo em God i bin givim long ol long rot bilong Moses i pinis—God i nilim long diwai bilong Jisas.—Luk 24:25-27, 44-46; Kolosi 2:13, 14; Hibru 10:1.
17. Pol i tok ol Juda i mekim wanem na ol i no save long pasin bilong God long kolim yumi stretpela man?
17 Olsem na aposel Pol i tok, ol Juda i no save long pasin bilong God long kolim yumi stretpela man. Pol i tok: “Mi save gut long ol na mi tokaut olsem, ol i strong tumas long bihainim pasin God i laikim. Tasol ol i no klia gut long laik tru bilong God, na ol i mekim. Ol i no save long pasin God i bihainim bilong kolim yumi stretpela man, na ol i laik kamap stretpela man long strong bilong ol yet. Olsem na ol i no bin aninit long God na larim em i mekim ol i kamap stretpela man. Yumi save, Krais em inapim pinis lo bilong Moses, bai olgeta manmeri i bilip long Krais, ol i ken kamap stretpela manmeri long ai bilong God.” (Rom 10:2-4) Na Pol i stori long Krais Jisas na em i tok: “Krais i no save mekim sin, tasol God i laik helpim yumi, olsem na em i bin bungim olgeta sin bilong yumi antap long em, na Krais i kamap olsem man bilong mekim sin tru. God i mekim olsem bai yumi ken i stap long Krais, na long strong bilong em yumi ken kamap stretpela manmeri bilong God.”—2 Korin 5:21.
18. Ol Juda i ting olsem wanem long “Krais i dai pinis”? Ol Grik i ting olsem wanem long em? ‘Ol manmeri God i bin singautim’ ol i ting olsem wanem long em?
18 Krais i dai na long tingting bilong ol Juda kain man olsem bilong kisim bek ol em i no gat strong. Na ol saveman bilong ol Grik i ting tok bilong kain man olsem em i kranki toktok. Tasol Pol i tokaut olsem: “Ol Juda i save strong tumas long lukim ol mirakel, na ol Grik i wok strong long kisim gutpela tingting na save. Tasol mipela i save autim tok bilong Krais i dai pinis long diwai [pos], na dispela tok i olsem tok nogut long tingting bilong ol Juda. Na ol Grik i ting dispela em i kranki toktok tasol. Tasol yumi ol manmeri i bin harim singaut bilong God, yumi Juda na Grik wantaim, yumi save, Krais em i strong bilong God, na em i save bilong God. Ol man bilong graun i save ting olsem, sampela tingting bilong God i kranki tru. Tasol dispela tingting i winim tru save bilong ol man. Na ol i save ting, sampela pasin bilong God i soim olsem God i no gat strong. Tasol ol dispela pasin bilong en i gat bikpela strong na i winim tru strong bilong ol man.” (1 Korin 1:22-25) Tru tumas, long rot bilong Krais Jisas, God i kamapim strong na gutpela save bilong em. Na long rot bilong Krais Jisas em i kolim ol manmeri i bihainim tok olsem stretpela man na em i givim laip oltaim long ol. Baibel i tok: “I no gat narapela man i inap kisim bek yumi. Nogat. Long nem bilong Jisas wanpela tasol yumi olgeta manmeri bilong graun inap i stap gut. Em wanpela tasol God i bin makim bilong kisim bek yumi.”—Aposel 4:12.
19 Stori i kamap bihain long dispela bai kamapim klia olsem sapos yumi laik abrusim bagarap na kisim laip i stap oltaim, orait, yumi mas wok yet long painim Kingdom bilong God na stretpela pasin bilong em. Bilong painim Kingdom na kamap stretpela man long ai bilong God, yumi mas harim ol tok bilong Jisas na yumi mas bihainim tu ol dispela tok.
Sampela Askim Bilong Kamapim Gen Ol Bikpela Tok
◻ Taim ol man bilong lotu Juda i mekim gutpela pasin, olsem helpim ol rabisman o beten o tambu long kaikai, i olsem ol i mekim wanem kain pasin?
◻ Yu mas bungim ol gutpela samting bilong yu we na bai i no ken bagarap?
◻ Bilong wanem yumi no ken tingting planti long kaikai na klos samting?
◻ Ol Juda i giaman na tok ol lo ol i kisim long maus bilong ol tumbuna ol i bin kisim long wanem taim?
◻ Kingdom bilong God na stretpela pasin bilong em i kamap long wanem rot?
19. Stori i kamap bihain long dispela bai kamapim klia wanem samting?
[Piksa long pes 18]
Ol Farisi i laik long sanap long kona bilong ol bikrot na mekim beten bambai ol man i lukim ol