Yu Save Larim Jehova i Givim Askim Long Yu?

BAIBEL i gat planti handet askim na ol dispela askim i save kirapim tru bel bilong yumi. God Jehova yet i save yusim ol askim bilong skulim ol man long ol bikpela tok i tru. Olsem: Jehova i yusim sampela askim taim em i givim tok lukaut long Kein bilong helpim em long lusim pasin nogut we i laik bagarapim em. (Stt. 4:​6, 7) Sampela taim, Jehova i mekim wanpela askim tasol na dispela inap kirapim man long bihainim gutpela rot. Taim profet Aisaia i harim Jehova i askim olsem: “Bai yumi salim husat? Husat bai i bringim tok bilong mi i go?” Aisaia i tok: “Yu salim mi.”​—Ais. 6:8.

Jisas, em Bikpela Tisa, em tu i mekim gutpela wok long ol askim. Winim olsem 280 askim bilong Jisas i stap long ol Gutnius. Sampela taim em i mekim ol askim bilong pasim maus bilong ol man bilong sutim tok, tasol planti taim em i laik bai ol askim i kirapim ol man long pilim tok long bel, na tingim gut i stap bilong ol long ai bilong God. (Mt. 22:​41-​46; Jo. 14:​9, 10) Long wankain pasin, aposel Pol em man i raitim 14 buk bilong Ol Skripsa Grik, em i yusim ol askim bilong pulim tingting bilong ol man. (Ro. 10:​13-​15) Ol pas em i raitim i go long ol Rom, ol dispela pas i gat planti askim long en. Ol askim bilong Pol i kirapim ol man long pilim tru na lain gut long “ol gutpela pasin bilong God na tingting na save bilong en i pulap tru.”​—Ro. 11:33.

Sampela askim i save kirapim man long bekim long maus, na sampela askim i save kirapim man long wokim gut tingting. Planti askim bilong Jisas i stap long ol Gutnius, ol i bilong kirapim man long wokim gut tingting. Wanpela taim em i givim tok lukaut long ol disaipel bilong em: “Yupela lukaut long yis bilong ol Farisi na long yis bilong Herot,” olsem lukaut long pasin giaman na tok giaman bilong ol. (Mk. 8:15; Mt. 16:12) Ol disaipel bilong Jisas i no kisimgut insait bilong tok na ol i kirap tok pait long ol yet long ol i bin lusim tingting long kisim bret i kam. Tingim pasin bilong Jisas long yusim ol askim long dispela sotpela toktok i kamap namel long ol. “Em i tokim ol olsem, ‘Bilong wanem yupela i toktok nabaut olsem, “Yumi no gat bret”? Ating yupela i no klia yet? Ating yupela i no gat save yet? Ating tingting bilong yupela i pas, a? Yupela i gat ai, tasol yupela i no lukim ol samting, a? Yupela i gat yau, tasol yupela i no harim tok, a? . . . Yupela i no save yet, a?’ ” Ol askim bilong Jisas i bilong kirapim ol disaipel long bekim long tingting, na tingim gut insait bilong tok bilong em.​—Mk. 8:​16-21.

“Bai Mi Askim Yu”

God Jehova i yusim ol askim long stretim tingting bilong wokman bilong em Jop. Long rot bilong sampela askim, Jehova i skulim Jop olsem Jop i samting nating tasol taim em i skelim em yet wantaim Man Bilong Wokim em. (Jop, sap. 38-​41) Yu ting Jehova i laik bai Jop i bekim long maus olgeta wan wan askim? Ating i no olsem. Ol kain askim olsem, “Taim mi wokim na strongim as bilong dispela graun, yu stap we?,” em i bilong kirapim tingting na bel bilong Jop. Bihain long Jehova i givim ol dispela askim long em, Jop i no gat toktok. Em i tok tasol olsem: “Olsem wanem na mi inap bekim tok bilong yu? Mi bai pasim maus tasol.” (Jop 38:4; 40:4) Jop i kisimgut insait bilong tok na em i daunim em yet. Tasol i no olsem Jehova i skulim tasol Jop long kisim pasin daun, nogat. Em i stretim tu tingting bilong Jop. Long wanem ol rot em i stretim tingting?

Jop em i “gutpela man tru na i no gat asua,” tasol sampela taim tok bilong em i save kamapim tingting kranki. Elihu i bin luksave long dispela na em i stretim tingting kranki bilong Jop taim Jop i tok “em yet i mekim stretpela pasin na pasin bilong God i no stret.” (Jop 1:8; 32:2; 33:​8-12) Ol askim bilong Jehova i stretim tu tingting kranki bilong Jop. God i stap insait long bikpela win na ren na i toktok long Jop, em i tok: “Jop, yu no gat gutpela tingting na save. Yu wanem kain man tru na yu mekim planti toktok nabaut, na yu laik paulim ol samting mi laik mekim? Nau yu mas sanap olsem man tru. Na bai mi askim yu long olkain samting na yu mas bekim ol askim bilong mi.” (Jop 38:​1-3) Long rot bilong ol askim, Jehova i kirapim Jop long tingim bikpela savetingting na bikpela strong bilong Em we i stap ples klia long ol samting em i bin wokim. Samting Jehova i mekim i helpim Jop moa yet long bilip tru long pasin bilong Jehova long skelim ol man na long mekim ol samting. Man! Em narapela kain samting tru i bin painim Jop​—olsem God i Gat Olgeta Strong i bin givim askim long em!

Yumi Larim Jehova i Givim Askim Long Yumi

Olsem wanem long yumi? Ol askim i stap long Baibel ol inap long helpim yumi tu? Yes, ol inap helpim yumi! Taim yumi larim ol dispela askim i kirapim yumi long wokim gut tingting, dispela inap helpim yumi long kisim planti gutpela samting bilong spirit. Ol askim i stap long Baibel ol i gat strong na dispela inap kamapim gutpela samting. Tru tumas, “tok bilong God . . . i wok strong i stap. . . . Olsem na em i save gut tru long olgeta tingting na laik bilong bel bilong yumi.” (Hi. 4:12) Bilong helpim yumi, yumi mas tingim olsem ol dispela askim i kam long yumi stret, i olsem Jehova i givim ol dispela askim long yumi olgeta wan wan. (Ro. 15:4) Yumi ken skelim sampela eksampel.

“Jas bilong olgeta graun, em i mas bihainim stretpela pasin o nogat?” (Stt. 18:25, NW) Abraham i mekim dispela askim long Jehova long taim kot bilong God i bin painim Sodom na Gomora, em kain askim we i no gat wok long bekim. Abraham i ting Jehova i no inap mekim pasin i no stret​—long kilim i dai ol stretpela man wantaim ol man nogut. Askim bilong Abraham i kamapim klia strongpela bilip bilong em long ol stretpela pasin bilong Jehova.

Long nau, ating sampela i kamapim tingting bilong ol long ol samting bai kamap long de bilong kot bilong Jehova long bihain, olsem husat bai abrusim bagarap long Armagedon na husat bai kirap bek. Nogut yumi larim ol kain tingting olsem i mekim yumi tingting planti, i gutpela yumi tingim askim bilong Abraham. Olsem Abraham, yumi save long Jehova olsem gutpela Papa bilong yumi long heven na yumi bilip tru long stretpela pasin na pasin marimari bilong em. Dispela i pasim yumi long westim taim na strong bilong yumi long wari nating long ol samting, na kisim tupela tingting na mekim tok pait i no gat as bilong en.

“Sapos wanpela bilong yupela i wok long tingting planti long rot bilong i stap gut, ating dispela pasin bilong tingting planti bai i skruim liklik hap taim moa long laip bilong en?” (Mt. 6:27) Taim Jisas i toktok long bikpela lain na ol disaipel wantaim, em i yusim ol dispela askim bilong strongim tok olsem ol i mas putim ol yet long han bilong Jehova. Las de bilong ol pasin nogut bilong nau i mekim yumi tingting planti long ol samting, tasol sapos yumi tingting tasol long ol dispela samting, dispela i no inap skruim hap taim moa long laip bilong yumi o mekim laip bilong yumi i kamap gutpela, nogat.

Sapos yumi tingting planti long ol samting bilong yumi yet o long famili na ol pren bilong yumi, orait tingim dispela askim bilong Jisas na dispela inap helpim yumi long kisim stretpela tingting. Dispela askim inap helpim yumi na yumi no ken wari na kisim ol tingting kranki we inap bagarapim tingting, bel, na helt bilong yumi. Olsem Jisas i bin tokim yumi, Papa bilong yumi long heven, husat i save givim kaikai long ol pisin bilong antap na bilasim ol purpur samting, em i save gut long ol samting em yumi mas kisim.​—Mt. 6:​26-34.

“Sapos yu holim paia klostu long bros bilong yu, orait ating siot bilong yu i no inap paia, a?” (Snd. 6:27) Long Buk Sindaun sapta 1 i go sapta 9, i gat sampela sotpela tok bilong wanpela papa husat i givim gutpela tingting long pikinini man bilong em. Dispela askim i stap antap em i tok long ol samting nogut i save kamap taim man i mekim pasin adaltri. (Snd. 6:​29) Sapos yumi luksave olsem yumi wok long mekim ol tok gris wantaim wanpela i no poroman marit bilong yumi, o yumi tingim tingim ol laik nogut bilong maritpasin, orait dispela askim i mas kamap olsem tok lukaut long hevi inap kamap. Dispela askim inap helpim yumi tu long taim kain kain traim i laik pulim yumi long bihainim rot nogut. Em i kamapim klia ol stiatok bilong Baibel: “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu”!​—Ga. 6:7.

“Yu husat na yu skelim pasin bilong wokboi bilong narapela man?” (Ro. 14:4) Long pas Pol i salim long ol Rom, em i toktok long ol hevi i kamap insait long kongrigesen long taim bilong ol aposel. Sampela Kristen ol i gat narapela narapela sindaun na pasin bilong ples, na ol i laik skelim disisen na pasin bilong ol wanbilip bilong ol. Askim bilong Pol i kirapim ol long amamas long ol brata bilong ol na larim wok bilong skelim man i stap long han bilong Jehova.

Wankain tu long nau, lain bilong Jehova ol i bilong narapela narapela kantri na ol i gat kain kain sindaun. Tasol Jehova i bringim yumi i kam bung wantaim na yumi stap wanbel. Olsem wanem? Yumi mekim ol samting bilong i stap wanbel wantaim ol narapela? Sapos yumi laik kirap kwik long tokaut olsem yumi no orait long pasin bilong wanpela brata, orait i gutpela moa long yumi askim yumi yet long dispela askim bilong Pol i stap antap!

Ol Askim i Helpim Yumi i Go Klostu Tru Long Jehova

Ol dispela eksampel i kamapim klia strong bilong ol askim i stap long Baibel. Taim yumi tingim stori bilong ol wan wan askim, dispela inap helpim yumi long bihainim stiatok bilong ol dispela askim. Na taim yumi ritim Baibel, bai yumi lukim sampela askim moa i stap em ol inap helpim yumi.​—Lukim blok long pes 14.

Taim yumi tingim gut na pilim tru ol askim i stap long Baibel, dispela bai helpim tingting na bel bilong yumi long bihainim ol stretpela lo bilong Jehova. Taim Jehova i givim pinis askim long Jop, Jop i tok: “Bikpela, bipo mi bin harim tok bilong ol man tasol na mi kisim save long yu. Tasol nau mi lukim yu stret long ai bilong mi yet.” (Jop 42:5) Tru tumas, Jop i tingim Jehova olsem wanpela man tru, i olsem Jehova i stap long ai bilong em. Bihain disaipel Jems i tok olsem: “Yupela i mas i go klostu tru long God, na em bai i kam klostu tru long yupela.” (Jem. 4:8) Yumi laik larim olgeta tok i stap long Baibel, na ol askim tu, long helpim yumi long kamap strong moa long ol samting bilong spirit na yumi inap “lukim” Jehova, olsem save gut moa long em!

[Blok long pes 14]

Taim yu givim ol dispela askim long yu yet, olsem wanem dispela i helpim yu long kisim tingting bilong Jehova?

▪ “Bikpela i laikim wanem pasin? Ating em i laikim olkain ofa tasol, a? O ating em i laikim yumi bihainim tok bilong en?”​—1 Sml. 15:22.

▪ “God i bin wokim ai bilong yumi. Orait ating em yet i no inap lukluk, a?”​—Sng. 94:9.

▪ “Tasol yupela lesman, ating yupela i laik slip longpela taim, a? Wanem taim bai yupela i kirap long bet bilong yupela?”​—Snd. 6:9.

▪ “Jona, ating dispela kros bilong yu em i stret, a?”​—Jna. 4:4.

▪ “Sapos wanpela man i kisim olgeta samting bilong graun, tasol laip bilong em yet i lus, orait dispela olgeta samting bai i helpim em olsem wanem?”​—Mt. 16:26.

▪ “Krais i save laikim yumi moa yet, . . . ating dispela olkain samting bai i inap pasim laik bilong Krais?”​—Ro. 8:35.

▪ “Yu gat wanpela gutpela samting yu no bin kisim long God, a?”​—1 Ko 4:7.

▪ “Olsem wanem, lait i ken bung wantaim tudak?”​—2 Ko. 6:14.

[Piksa long pes 15]

Ol askim bilong Jehova i givim wanem skul long Jop?